¿Jardín de Edén nishcapichu gentecunapa causaica callarirca?

SHUJ juyailla jardingupi, juyailla sisagucunata ricushpa, llaquicunapash illa, preocupaciongunapash illa, tucui tranquilo ali causajushcapi pensaripai. Shinallata cushillapacha tucui ali causajushcanguiman.

Chaipica juyailla bosquecuna, airepash frescolla, juyailla pajarogucuna, huaicu yacucunapash limpio limpio cashcanman. ¿Nachu chaipica causangapaj munapanguiman?

Mundo enteropi gentecunami primer jari, primer huarmica shina laya juyailla jardingupi causarianga yuyan. Ashtaca huatacuna huashamandallatami judío gentecuna, Jesusta catij gentecuna, musulmán nishca gentecunapash Adán y Eva jardín de Edenbi causashcata crin. Bibliapica Adán y Eva paicunapura cushilla causashcata, animalgucunatapash cuidashpa cushilla causashcatami ricuchin. Shinallata Taita Dioshuan ali amigocuna cashcatapashmi ricuchin. Paicunaca chai juyailla paraisopica para siempre causana oportunidadtami charirca (Génesis 2:15-24).

Indú gentecunapashmi ashtaca huatacuna huashaman shuj paraíso tiashcata yachachin. Shinallata budista nishca gentecunapash cai alpapi tranquilo ali causaigu tiajpi, shuj paraíso alpagu cajpi paicunapa buda nishca dioscuna causashcatami crin. África llactapipash religiongunata catijcunaca callaripi cai alpapi shuj paraíso tiashcatami crin.

Casi tucui religiongunapillatami callaripi shuj paraíso tiashcata crin. Gentecunapa causaimanda estudiaj Jean Delumeau shuti jarica “casi tucui gentecunallatami callaripi paraisopi cushilla, ali, juyailla causaiguta charin cashcata crin cashca. Shinallata llaquicuna, guerracuna, nali cosascuna illa causaita charishcatami crishca. Chaimandami gentecunaca shina paraisopi causana munaita charin” ninmi.

¿Imamandata gentecunaca jardín de Edén paraíso tiashcataca crin? ¿Ciertopachacha Adán y Eva, jardín de Edenbash tiarca? ¿Ciertopacha tiashcamandachu gentecunaca jardín de Edenbi crishpa catin?

Cunanbica gentecunaca ashtacata estudiashpa, shuj shuj cosascunata rurashpa, shuj shuj cosascunata yachaj chayashcamandami shuj paraíso tiashcataca ñana crin. Paicunaca chaicunaca yanga parlocunallami can ninmi. Religiongunata ñaupaman pushajcunapashmi jardín de Edén na tiashcata yachachin. Paicunaca jardín de Edenga imatapash yachachingapaj shuj comparacionllami can ninmi.

Bibliapica Jesús paipa catijcunaman yachachingapaca comparaciongunahuan yachachishcatami ricuchin. Shinapash Bibliapica jardín de Edenmanda parlashpaca ciertopacha tiashcatami ricuchin. Jardín de Edenmanda yachachishcacuna na cierto cajpica Bibliapa chaishuj yachachishcacunataca na cri ushanchimanllu. Shinapash ¿imamandata huaquin gentecunaca jardín de Edén ciertopacha tiashcataca na crin? Caita crina imamanda importante cashcata ricupashun.