Naa Tsimu Ya Edeni Yo Vhuya Ya Vha Hone?

ḒIVHONENI ni ngadeni. A hu zwithithisi a hu na phosho ya dzigoloi. Yeneyo ngade ndi khulu nahone ho fhola. A hu na tshine na khou ḽa mbilu ngatsho, no ḓitakalela nahone ni na nungo. Ni nga ḓiphina nga u sokou ṱanzwa maṱo.

Ni vhona maluvha o nakaho, maḓi a tshi khou elela na maṱari madala na hatsi. Ni pfa lumuya lu rotholelaho zwavhuḓi na maluvha a nukhelelaho. Ni pfa maṱari a tshi khou vhudzulwa nga muya, maḓi a tshi elela nṱha ha matombo, zwiṋoni zwi tshi khou imbelela na zwikhokhonono zwi tshi khou vhidzelela. No vha ni tshi nga takalela u vha fhethu ho raloho, a si zwone?

Vhathu u mona na shango ḽoṱhe vha tenda uri vhathu vha u thoma vho vha vha tshi dzula fhethu ho raloho. Vhathu vha vhurereli ha Tshiyuda, ha Tshiislam na vhane vha dzhena kereke vho funzwa lwa miṅwaha minzhi nga ha tsimu ya Edeni ye Mudzimu a vhea Adamu na Eva uri vha dzule khayo. Bivhili i sumbedza uri vho vha vha tshi khou tshila zwavhuḓi. Vho vha vhe na mulalo nga tshavho, na zwipuka na Mudzimu we a vha ṋea fhulufhelo ḽa u tshila tshoṱhe henefho fhethu havhuḓi.​—Genesi 2:15-24.

Na vha vhurereli ha Tshihindu vha tenda uri ho vhuya ha vha na pharadiso. Vha vhurereli ha Tshibuddha vha tenda uri vharangaphanḓa vhavho vhane vha vhidzwa Buddha vho tshila nga tshifhinga tshee ḽifhasi ḽa vha ḽi pharadiso. Nahone vhunzhi ha kereke dzi re fhano Afurika dzi funza nga ha mafhungo a fanaho na ane a ambiwa Bivhilini nga ha Edeni.

Vhunzhi ha dzikereke na masialala vha tenda uri ho vhuya ha vha na pharadiso. Muṅwe muṅwali wa bugu o ri: “Tshifhingani tsho fhiraho, vhathu vha tshaka dzo fhambanaho vho vha vha tshi tenda uri vhathu vha u thoma vho vha vha tshi dzula pharadisoni, he vha vha vha tshi tshila zwavhuḓi, vha si na tshine vha tshi ofha nahone vhe na zwoṱhe zwine vha zwi ṱoḓa. . . Zwenezwo zwo ita uri vhathu vhanzhi vha tame yeneyo pharadiso na u lingedza u ita uri dzembe ḽi vhuyelele mufhinini.”

Naa zwenezwi zwiṱori na masialala zwi bva fhethu huthihi? Naa tshaka dzo fhambanaho dzi amba zwi fanaho nga ha pharadiso na uri tsimu ya Edeni, Adamu na Eva vho vha vhe hone zwa vhukuma?

Vhathu vhanzhi ṋamusi vha vhona u nga mafhungo a pharadiso a si a vhukuma. Vhaṅwe vharangaphanḓa vha vhurereli a vha tendi uri tsimu ya Edeni yo vhuya ya vha hone. Nahone vha amba uri enea mafhungo ndi zwifanyiso zwo itelwaho uri gudisa zwiṅwe zwithu.

Ndi ngoho uri Bivhilini hu na zwifanyiso. Nahone Yesu o amba nga ha zwifanyiso zwinzhi. Fhedzi zwine Bivhili ya zwi amba nga ha tsimu ya Edeni ndi zwa vhukuma. Arali tsimu ya Edeni i songo vhuya ya vha hone, zwi amba uri ri nga si fhulufhele zwine Bivhili ya zwi amba. A ri vhone uri ndi ngani vhaṅwe vhathu vha sa tendi mafhungo a ambaho nga ha tsimu ya Edeni, nga murahu ri ḓo guda uri ndi nga enea mafhungo e a ndeme kha riṋe.