Memang Toho do Hea Adong Taman Eden Najolo?

HEA do dibege hamu cerita taringot si Adam, si Hawa, dohot Taman Eden? Hampir sude do halak di portibi on mamboto cerita i. Coba ma jo jaha hamu ceritana di 1 Musa 1:26–3:24. Songon on ma ringkasanna:

Dibahen Debata Jahowa * ma sahalak bawa sian orbuk jala dibahen ma goarna si Adam. Dung i dibahen Debata ma ibana di sada taman na digoari Taman Eden. Godang do aek di taman i jala godang hau na marparbue. Di tonga-tonga ni taman i, adong “hau parbinotoan taringot na denggan dohot na roa”. Diorai Debata do si Adam mangallang parbue ni hau i. Didok Debata molo diallang nasida i, pasti mate do nasida. Dung i dibahen Jahowa ma sahalak borua lao mandongani si Adam. Dibahen ma goarna si Hawa. Sian rusuk ni si Adam do ibana dibahen. Disuru Debata do muse nasida mangurus taman i jala disuru do muse nasida marpinoppari lao manggohi tano on.

Tikki sahalakna si Hawa, makkatai ma sada ulok tu ibana. Digoda ulok i ma si Hawa asa mangallang parbue ni hau na diorai Debata. Didok ulok i margabus do Debata jala diorai pe nasida mangallang i, alana mabiar do Debata so tung sarupa jolma i songon Ibana. Gabe tergoda ma si Hawa jala diallang ma parbue ni hau i. Dung i dohot ma si Adam mangallang parbue ni hau i. Dihukum Jahowa ma si Adam, si Hawa, dohot ulok i. Diusir ma nasida sian taman i jala disuru ma akka suru-suruan manjaga dalan tu taman i.

Najolo didok akka pakar, halak na malo, dohot sejarawan toho do cerita na dipaboa di 1 Musa taringot si Adam, si Hawa, dohot Taman Eden. Alai saonari, unggodang halak na mandok dang toho cerita na dipaboa Bibel i. Boasa ma gabe dang porsea nasida? Saonari taida ma opat sukkun-sukkun na sering didok nasida.

1. Toho do memang adong Taman Eden i najolo?

Boasa ma gabe adong sukkun-sukkun songon i? Saleleng marratus taon, didok akka pakar agama adong dope Taman Eden i. Alai dipengaruhi akka filsuf ni Junani ma nasida, songon si Plato dohot si Aristoteles. Didok nasida dang adong na sempurna di tano on. Holan di surgo do na sempurna. Jadi gabe didok akka pakar agama i ma, di jonok na langit do Taman Eden i. * Adong muse halak na mandok, di pussu ni sada dolok na massai timbo do taman i asa dang boi halak na jahat masuk tusi. Adong muse na mandok, di Kutub Utara manang di Kutub Selatan do i. Na asing muse mandok, jonok ni bulan do taman i. Alani i gabe didok halak ma Taman Eden i holan di angan-angan. Adong muse piga-piga pakar mandok, dang toho lokasi ni Taman Eden na disurat di Bibel i. Jala didok nasida, sebenarna dang adong Taman Eden i.

Alai dang songon i na didok Bibel. Godang do hatorangan na dipaboa taringot taman i di 1 Musa 2:8-14. Didok, taman i di sabola timur ni sada inganan na digoari Eden. Adong sunge na mengalir sian taman i jala terbagi ma i gabe opat sunge. Jala dipaboa do goar ni opat sunge i. Godang do akka pakar na mamakke ayat ni Bibel lao mangalului lokasi ni Taman Eden najolo. Alai didok nasida, dang sadalan hatorangan na dipaboa Bibel tu pandapot ni nasida. Attong, na so toho do hatorangan na dipaboa Bibel taringot Taman Eden? Jala toho do i holan angan-angan?

Pikkirhon ma on: Hira-hira 6.000 taon naung salpu do masa na disurat di Bibel taringot Taman Eden. Jala 2.500 taon dukkon i pe baru disurat si Musa taringot i. Olo do ra dibege ibana cerita i sian halak na asing manang dijaha ibana sian akka gulungan na adong tikki i. Jadi nungnga gabe sejarah na leleng be taringot Taman Eden i. Jala marratus taon dukkon i, olo do muse muba tanda ni sada inganan songon akka sunge. Asing ni i marhusor do torus kerak bumi. Di lokasi Taman Eden najolo pe sering do terjadi gempa. Hira-hira 17 persen ma godangna sian akka gempa na balga na hea masa di tano on. Jadi di tempat i, pasti sering do terjadi perubahan. Asing ni i, olo do ra muba bentuk permukaan ni bumi alani Aek na Sumar di jaman ni si Noak najolo. *

On ma piga-piga hatorangan na sittong na porlu taboto. Memang toho do adong Taman Eden na dipaboa di bukku 1 Musa. Sian opat sunge na adong disi, adong dope dua sunge sahat tu saonari, i ma sunge Eprat dohot sunge Tigris manang Hidekel. Jala jonok-jonok do mata mual ni sunge na dua i. Dipaboa do tong di Bibel akka luat na dibolus sunge i, dohot akka aha na terkenal sian ganup luat. Molo di halak Israel najolo, marguna hian do hatorangan i.

Jadi toho do holan dongeng manang cerita na dibahen-bahen jolma taringot Taman Eden i? Biasana dang pola takkas hatorangan na dipaboa di sada dongeng, jala dang boi dibuktihon atik na toho i manang na dang. Alai molo sejarah dang songon i. Biasana takkas do hatorangan na dipaboa di sada sejarah. Jala marguna do hatorangan i. Songon i ma tong hatorangan taringot Taman Eden.

2. Toho do sian orbuk dibahen Debata si Adam, jala sian rusuk ni si Adam dibahen si Hawa?

Dung diteliti tubuh ni jolma, memang toho do disi adong unsur-unsur songon hidrogen, oksigen, dohot karbon. Sude unsur-unsur i adong di kerak bumi. Alai boha do carana sappe boi akka unsur i gabe sada makhluk hidup?

Godang do ilmuwan na mandok, na adong sandiri do hangoluan i. Dimulai ma i sian sada sel na sederhana. Dung marjuta taon, muba ma i gabe sada makhluk hidup. Alai sebenarna dang adong makhluk hidup na “sederhana”, termasuk ma i mikroorganisme bersel tunggal. Jala dang adong bukti na patuduhon na memang adong sandiri hangoluan i. Justru godang do bukti na patuduhon, adong do na mambahen sude makhluk hidup di alam semesta on. *​—Rom 1:20.

Coba ma jo bayakkon hamu sada konser musik na balga manang sada lukisan na bagak manang sada teknologi na canggih. Barani do hamu mandokkon na adong sandiri do i? Pasti daong! Alai dang sadia i martimbakkon rancangan ni tubuh ni jolma na rumit, na bagak, jala na cerdas. Dang mungkin adong sandiri i. Asing ni i, didok di bukku 1 Musa holan jolma do na dibahen mirip songon Debata. (1 Musa 1:26) Alani i, holan jolma do na tolap patuduhon sifat ni Debata di sude na dibahen nasida, contohna di sada karya musik, seni, dohot teknologi na canggih. Jadi unjago do Debata mambahen manang aha pe sian jolma.

Jadi dang ulaon na maol di Debata mambahen sahalak borua sian rusuk ni sahalak bawa. * Sebenarna boi do dipakke Debata bahan na asing lao mambahen sahalak borua. Alai adong do tujuanna makana dibahen Debata songon i. Lomo do rohana asa boi bawa dohot borua menikah jala gabe “sada daging”. (1 Musa 2:24) Lomo do roha ni Debata asa boi sahalak bawa dohot borua bekerja sama jala bermanfaat do i tu nasida na dua. On patuduhon Debata na parholong jala na marbisuk do na manoppa nasida.

Asing ni i, diakkui pakar genetika modern do, sian sahalak bawa dohot sahalak borua do sude jolma na adong di tano on. Jadi boi do tahaporseai hatorangan na disurat di bukku 1 Musa i.

3. Hira na so toho do hau hangoluan dohot hau parbinotoan taringot na denggan dohot na roa i.

Dang hea disurat di bukku 1 Musa istimewa do akka hau i jala adong kekuatanna. Sebenarna sarupa do akka hau i songon akka hau na asing. Alai dibahen Jahowa do akka hau i gabe lambang.

Dang songon i sipata na dibahen jolma? Contohna, dihukum hakim do molo adong halak na so mangihutton peraturan di pengadilan. Na dimaksud hakim disi, dang na lao menjaga asa unang sega dibahen akka perabot, barang, manang dinding ni ruang pengadilan i. Alai asa diargai halak do hukum na adong di negara i. Songon i do tong akka raja. Sipata dipakke nasida do tukkot dohot mahkota gabe lambang na patuduhon jabatan ni nasida do na uttimbo.

Jadi lambang lao patuduhon aha do dua hau i? Godang do pandangan ni jolma taringot i. Sebenarna lambang hak ni Debata na istimewa do hau parbinotoan na denggan dohot na roa i, i ma hak ni Debata lao manottuhon dia na denggan dohot na so denggan. (Jeremia 10:23) Jadi halak na jahat do manang ise na manakko parbue ni hau i! Asing ni i, hau hangoluan i ma lambang na patuduhon holan Debata do na boi mangalehon hangoluan na saleleng ni lelengna.​—Rom 6:23.

4. Holan dongeng do biasana cerita taringot ulok na boi makkatai.

Memang olo do ra hita bingung tikki manjaha bukku 1 Musa taringot i, apalagi molo dang tajaha bagian na asing na adong di Bibel. Alai sebenarna secara bertahap dipaboa do di Bibel lapatan ni i.

Boasa hira na boi ulok i makkatai? Ise do na mambahen i? Diboto halak Israel najolo do boasa boi terjadi na songon i. Contohna diboto nasida do memang dang boi binatang makkatai. Alai boi do suru-suruan ni Debata mambahen gabe songon na makkatai binatang i. Disurat si Musa do di Bibel taringot si Bileam. Hea do disuru Debata suru-suruanna mambahen halode ni si Bileam boi makkatai.​—4 Musa 22:26-31; 2 Petrus 2:15, 16.

Toho do suru-suruan ni Debata manang suru-suruan na jahat boi mambahen mukjizat? Hea do diida si Musa akka datu ni halak Mesir maniru mukjizat na songon dibahen Debata. Contohna boi do dibahen nasida tukkot muba gabe ulok. Pasti suru-suruan na jahat do na mangalehon huaso tu nasida makana boi nasida mangulahon i.​—2 Musa 7:8-12.

Si Musa do tong na manuratton taringot si Job. Godang do dipaboa di bukku Job taringot musu ni Debata i ma Sibolis. Didok ibana, olo pe jolma manomba Debata asa dilehon Debata pasu-pasu tu nasida. (Job 1:6-11; 2:4, 5) Ala nungnga dibege halak Israel cerita i, olo do ra didok roha ni nasida Sibolis do tong na mambahen ulok i gabe hira na boi makkatai. Tujuanna lao mangoto-otoi si Hawa asa dang setia be ibana tu Debata.

Toho do Sibolis na mambahen ulok i gabe hira na boi makkatai? Tikki di tano on Jesus, didok ibana do Sibolis i ‘pargabus jala ama ni gabus’. (Johannes 8:44) Ibana ma na parjolo sahali margabus di tano on. Tarida do gabusna i sian hata ni ulok i tu si Hawa. Didok ulok i, molo diallang si Hawa parbue ni hau i, dang na lao mate nasida. Hape didok Debata do tu si  Adam, molo diallang nasida parbue ni hau i pasti mate do nasida. (1 Musa 3:4) Jadi diboto Jesus do, Sibolis na mambahen ulok i gabe hira na boi makkatai. Lam takkas ma muse dipaboa Jesus taringot i tu Apostel Johannes. Didok Jesus do Sibolis i “ulok na parjolo”.​—Pangungkapon 1:1; 12:9.

Memang boi do suru-suruan mambahen ulok i gabe hira na boi makkatai? Haru jolma pe boi do pasuman-sumanhon suarana gabe hira suara ni na asing. Apalagi ma suru-suruan na jahat.

Bukti na Paling Kuat

Jadi sebenarna, dang masuk akkal alasan ni halak mandok dang toho cerita na dipaboa di bukku 1 Musa i. Hape godang do bukti na patuduhon, memang sejarah na hea masa do cerita na di bukku 1 Musa i.

Contohna di Bibel, didok do Jesus Kristus i “saksi na boi dihaporseai jala na sittong”. (Pangungkapon 3:14) Sempurna do ibana jala dang hea margabus. Jala dang hea dipakke ibana Hata ni Debata tu na so sittong. Asing ni i, didok Jesus nungnga adong ibana di surgo di labbung ni Bapakna “andorang so adong dope portibi on”. (Johannes 17:5) Jadi sebelum adong akka na mangolu di tano on, nungnga adong Jesus. Ala saksi na boi dihaporseai ibana, bukti aha ma na dipaboa ibana taringot on?

Dipaboa Jesus do hatorangan na patuduhon memang hea do si Adam dohot si Hawa mangolu di tano on. Disinggung ibana do taringot perkawinan ni nasida tikki paboahon aturan ni Debata taringot perkawinan. (Mateus 19:3-6) Molo toho do dang adong si Adam dohot si Hawa di tano on jala dang hea adong Taman Eden, berarti na dioto-otoi do Jesus manang na pargabus do ibana. Dang mungkin Jesus dioto-otoi jala dang mungkin Jesus margabus! Justru ala di surgo Jesus tikki i, boi ma diida ibana aha na masa di Taman Eden i. On ma bukti na paling kuat.

Jadi molo dang porsea hita tu akka hatorangan na dipaboa di bukku 1 Musa, sarupa ma i songon na so porsea hita tu hata ni Jesus. Jala molo dang porsea hita tu akka hatorangan na dipaboa di bukku 1 Musa i, gabe maol ma hita mamboto aha tema utama ni Bibel. Jala gabe dang pos be rohatta tu akka janji na dipaboa di Bibel. Taida ma boasa boi didok songon i.

[Surat na di Toru]