Kati Kebun Eden Endang Amat Kala Bisi?

KALA nuan ninga cherita pasal Adam enggau Awa ke diau ba Kebun Eden? Mayuh orang nemu pasal cherita tu. Bacha meh cherita nya dalam Bup Kudus ba Pemungkal 1:26–3:24. Tu meh lansa cherita nya:

Keterubah iya, Petara Jehovah * nempa seiku lelaki ari tanah. Petara ngangauka iya, Adam, lalu ngengkahka iya ba siti kebun ke ba endur ti dikumbai Eden. Kebun nya amat manah sereta bisi mayuh pun kayu ke bebuah. Ba tengah-tengah kebun nya bisi “sepun kayu ti meri penemu kena ngelala bida entara utai ti manah ari utai ti jai.” Petara nagang mensia makai buah ari pun kayu nya. Enti sida makai buah ke ditagang nya, sida deka mati. Udah nya, Jehovah ngena siti tulang kerigai Adam kena nempa seiku bini ke iya. Indu tu diberi nama Awa. Petara meri sida pengawa ngambika sida ulih nyaga kebun nya, beranak betelesak, sereta ngemenuhka dunya enggau peturun sida.

Bisi sekali, lebuh Awa kediri, seiku ular bejaku ngagai iya lalu ngasuh iya makai buah ti ditagang nya. Ular nya madah, Petara udah nipu Awa lalu ngenanka utai ti manah ari iya. Enti Awa makai buah nya, iya deka nyadi baka Petara. Nya alai, Awa lalu makai buah nya, lalu meri buah nya ngagai Adam. Ketegal sida enda ngasika jaku Jehovah, Iya ngukum Adam, Awa enggau ular nya. Pengudah Adam enggau Awa diburu ari Kebun Eden, bala melikat diengkah kena nyaga jalai tama ngagai kebun nya.

Bisi siti maya nya suba, orang ke bepenemu sereta bala pemansik sejarah enggau naka ulih ngiga bukti ke ulih nyukung pengamat cherita ba bup Pemungkal. Tang, kemayaharitu, orang agi kakang ati enggau cherita tu. Nama kebuah? Aram kitai meda empat kebuah ti suah dikena sida.

1. Kati Kebun Eden nya endur ti amat bisi?

Nama kebuah orang nanya tu? Pengelama beratus taun, pakar pengarap pechaya Kebun Eden agi bisi. Tang, runding gerija dikachau enggau runding bala pakar Gerika baka Plato enggau Aristotle ke madahka nadai utai ti sempurna ba dunya. Utai ti sempurna semina bisi ba serega. Nyadi, bala pakar nya pan berengkah pechaya Kebun Eden nya endur ti bisi ba serega. * Bisi mega ke madah Kebun Eden ba tuchung gunung ti amat tinggi sereta jauh ari dunya tu. Kebukai mega pechaya, Kebun Eden ba Kutub Utara, Kutub Selatan, bulan, tauka endur ke semak enggau bulan. Penemu ke baka tu ngasuh orang berunding, Kebun Eden nya semina angan-angan aja. Sekeda pakar kemayaharitu mega madahka endur Kebun Eden ti dipadah dalam Bup Kudus nya salah sereta enda ulih diterima.

Kebendar iya, utai ti dipadah Bup Kudus pasal Kebun Eden amat bebida enggau runding orang ke disebut tadi. Ba Pemungkal 2:8-14, dia madahka penerang ti nyemetak pasal Kebun Eden. Chunto iya, kebun tu ba begian timur endur ti dikumbai Eden, lalu bisi siti sungai ke bepati ngagai 4 iti sungai. Tiap iti sungai nya bisi nama sereta penerang ti pandak pasal endur ke ditengah sungai nya. Mayuh pakar nguji ngena penerang nya ngiga endur Kebun Eden tang sida tetemuka utai ti bebida. Kati tu reti iya penerang pasal kebun sereta semua sungai nya pelesu?

Enda. Perundingka utai tu: Moses engka bulih penerang pasal Kebun Eden nengah utai ti dipadah orang tauka utai ti ditulis ba jeman nya. Kira-kira 2,500 taun pengudah utai nya nyadi ba Kebun Eden, Moses udah nulis bup Pemungkal. Ukai semina nya aja, diatu, kira-kira 6,000 taun udah limpas kenyau ari maya utai nya nyadi ba Kebun Eden. Kati gaya dunya, nyengkaum sungai, udah berubah nitihka jeman? Au. Tu ketegal lapis bumi seruran bekinsit. Kelimpah ari nya, endur ke engka nyengkaum Kebun Eden ti asal terengkah ba endur tanah berenyang. Kira-kira 17 peratus ari tanah berenyang ti besai nyadi ba endur nya. Nya alai, kitai enda tekenyit enti gaya dunya ba dia bisi mayuh ubah. Pia mega, Bah Besai ke nyadi ba jeman Noah engka udah ngasuh gaya endur nya balat berubah. *

Peratika sekeda fakta tu: Bup Kudus ngambarka Kebun Eden baka siti endur ti amat bisi. Dua ari empat iti sungai ke disebut, iya nya Sungai Eupratis enggau Tigris, agi bisi kemayaharitu. Sekeda penatai ai sungai nya amat semak enggau pangan diri. Ayat Bup Kudus mega madah ngagai kitai pasal endur ti ditengah sungai nya sereta utai semula jadi ke bisi ba endur nya. Nya alai, penerang ti disebut nya tentu udah nulung orang Israel kelia ke macha nya.

Pikirka mega utai tu: Kesuah iya, cherita ensera nadai penerang ti silik lalu seruran iya berengkah enggau jaku baka, “Ba jeman kelia, ba siti endur ti amat jauh . . . .” Enti cherita Kebun Eden semina cherita ensera, tentu cherita nya nadai mayuh penerang ti nyemetak sereta silik.

2. Kati kitai ulih pechaya Petara nempa Adam ari tanah lalu Awa ditempa ari siti tulang kerigai Adam?

Nitihka pansik sains, tubuh mensia ngundan bemacham utai nyengkaum hidrogen, oksigen enggau karbon. Semua tu ulih ditemu dalam kerak dunya. Baka ni semua utai tu tau bisi ba tubuh mensia?

Mayuh pakar sains madah, utai ti idup nyadi kediri empu. Pekara tu begunaka awak pengelama bejuta-juta taun ngambika ulih nyadi. Sida pechaya utai ti idup berengkah ari sel ti mit lalu belubah-lubah nyadi utai ti kompleks agi. Tang, sel ke dikumbai “mit” nyengkaum sel ti pemadu mit pan kebendar iya amat kompleks. Nadai bukti ke nunjukka utai ti idup ulih nyadi kediri empu. Tang, gamal utai ti idup nunjukka bisi penempa ke ngembuan penemu ti jauh tinggi agi ari mensia. *—Rome 1:20.

Kati pekara tu ulih dipechaya? Enti sema nuan ninga munyi orkestra ke nyamai didinga, meda bengunan ti ngalitka ati tauka meda lukisan ti manah, kati nuan ngumbai semua utai tu nyadi kediri empu? Tentu enda! Enti dibandingka enggau semua utai ke ditempa, tubuh mensia jauh kompleks agi. Kelimpah ari nya, Bup Kudus madah, semina mensia aja ke ditempa neladan gamal Petara. (Pemungkal 1:26) Nya alai, semina mensia aja ke ulih ngaga karya seni, musik sereta teknologi ti manah. Enti mensia ulih ngaga semua utai tu, tentu Penempa kitai, iya nya Petara, ulih ngereja nya enggau chara ti jauh manah agi.

Ketegal Petara ulih nempa mensia ari tanah, iya tentu ulih nempa indu ari tulang kerigai lelaki. * Kebendar iya, Petara ulih ngena chara bukai nempa indu. Tang, Iya deka nunjukka lelaki enggau indu bisi kaul ti rapat. Sida deka kawin lalu “nyadi siku.” (Pemungkal 2:24) Endang amat, kualiti ba lelaki enggau ba indu nyukung pangan diri lalu sida ulih bisi kaul ti rapat. Endaka tu nunjukka seiku Penempa ti landik sereta pengasih, endang amat bisi?

Kelimpah ari nya, pakar genetik ngaku, semua mensia engka datai ari peturun seiku lelaki enggau seiku indu. Nya alai, cherita ba bup Pemungkal nya ukai cherita sengapa.

3. Kayu penemu enggau kayu pengidup nya baka utai ti bisi ba cherita ensera.

Bup Kudus enda ngajar pasal kayu ti bisi kuasa ajih. Tang, kayu nya semina kayu biasa aja ke nyadi lambang.

Kena meretika utai tu, perundingka chunto ti nyadi ba siti kot. Enti seseiku orang ngereja tauka nyebut utai ti enda patut, hakim deka meri iya jaku tangkan laban pengawa nya ngenyaika kot. Kati tu reti iya orang nya benung ngenyaika mija, bangku, dinding, tauka perengka bukai dalam bilik kot nya? Tentu enda! Utai ku hakim nya reti iya, orang nya benung ngenyaika sistem pengelurus ti digambarka nengah kot. Kelimpah ari chunto tu, makota enggau tungkat diraja suah dikena ngambarka kuasa seseiku pemerintah.

Nya alai, nama utai ke digambarka 2 iti kayu tu? Terang amat, kayu penemu ngambarka hak Petara nentuka utai ti manah enggau utai ti jai. (Jeremiah 10:23) Semina Petara aja ke ngembuan hak tu. Nyadi, pengawa sida ke ngambi buah ari kayu nya penyalah ti besai. Baka ni enggau kayu pengidup? Kayu nya ngambarka pemeri pengidup belama iya ke semina ulih diberi Petara.—Rome 6:23.

4. Nadai ular ke ulih bejaku ba dunya tu.

Amat, cherita pasal ular ke ulih bejaku nya baka ke nyelai sereta baka ke utai ti bisi ba dunya ensera. Tang, lebuh kitia mansik Bup Kudus, misteri pasal ular tu ulih ditemu.

Kitai nemu, jelu baka ular enda ulih bejaku. Tang, melikat ulih ngaga jelu baka ke ulih bejaku. Ambika chunto, Moses nulis pasal melikat Petara ke ngasuh keledai Balaam bejaku.—Penyampau 22:26-31; 2 Peter 2:15, 16.

Kati ulih melikat bukai ngereja utai tu? Ba Bup Kudus, Moses udah meda orang ke tau keramat enggau orang ti bepenemu-dalam ba Ejip mali tungkat nyadi ular. Nya alai, melikat ke bemunsuh enggau Petara mega bisi kuasa ngereja pengawa ajih.—Pemansut 7:8-12.

Sapa munsuh Petara ke lumur satu? Ba bup Jop ke ditulis Moses, kitai nemu, munsuh Petara ti lumur satu nya Sitan. Iya mega nyakap penetap ati semua penyembah Jehovah. (Jop 1:6-11; 2:4, 5) Nya alai, orang Israel kelia tentu pechaya Sitan nya meh ke ngasuh ular nya bejaku kena nipu Awa lalu ngasuh iya ngelaban pesan Petara.

Peratika mega utai ti dipadah Jesus. Jesus ngangau Sitan nya “pemula, lalu iya endang apai pemula.” (John 8:44) Rambai jaku “apai pemula” nunjukka Sitan nya nyebut pemula ti keterubah. Iya nyaru diri nyadi ular lalu nipu Awa. Iya madah, Awa tentu ‘enda mati’ pengudah makai buah ke ditagang nya. (Pemungkal 3:4) Tu nunjukka Jesus nemu Sitan nya meh ke ngasuh ular nya bejaku. Ketegal nya, iya ngangau Antu Sitan nya “ular ti tuai.”—Pemandang 1:1; 12:9.

Kebendar iya, mensia mega ngembuan penau ngaga patung baka ke ulih bejaku. Enti pia, melikat jai ke bekuasa agi, tentu ulih ngereja nya enggau landik agi.

Bukti ti Amat Nyata

Pengudah mansik semua penerang ba atas, kitai ulih andal cherita ba bup Pemungkal amat nyadi. Tang nama bukti ti amat nyata ke nyukung cherita tu?

Kitai ulih mansik jaku “[saksi] ke tetap ati, saksi ti bendar” iya nya Jesus Kristus. (Pemandang 3:14) Ketegal Jesus mensia ti sempurna, iya enda kala nipu tauka nyarutka utai ti bendar. Bup Kudus madahka, Jesus endang udah bisi “sebedau dunya digaga.” (John 17:5) Nya alai, iya udah meda semua utai ti nyadi ba dunya kenyau ari pun suba. Nama utai ti dipadahka iya?

Jesus udah ngena chunto Adam enggau Awa kena ngajar bala peninga iya pasal standard Jehovah bekaul enggau tikah. (Matthew 19:3-6) Ketegal Jesus udah bisi ba serega maya Adam enggau Awa ditempa, utai ti disebut iya pasal dua iku mensia nya tentu amat!

Kebendar iya, orang ke kakang ati pasal pengamat cherita dalam bup Pemungkal, mega enda entu pechaya pasal semua ajar ari Jesus. Enti pia, sida tentu enda ulih meretika tema dalam Bup Kudus sereta semua semaya dalam Bup Kudus. Nama kebuah kitai ulih ngumbai nya? Aram kitai meda artikel ke nangkanka tu.

[Nota Kaki]