АДАМ ӕмӕ Евӕйы, стӕй Едемы цӕхӕрадоны кой искуы фехъуыстай? Уыцы хабар зонынц ӕнӕхъӕн дунейы дӕр. Хорз уаид, куы йӕ бакӕсис. Фыст ис Библийы, Райдианы чиныджы 1:26–3:24 стихты. Хабар цыбыртӕй уыд афтӕ...

Хуыцау Йегъовӕ * сыджытӕй сфӕлдыста адӕймаджы ӕмӕ йӕ схуыдта Адам. Ӕрцӕрын ӕй кодта, Едемы цы цӕхӕрадон скодта, уым. Уыцы цӕхӕрадон уыди донӕй ӕфсӕст ӕмӕ дзы зад бирӕ рӕсугъд дыргъджын бӕлӕстӕ. Йӕ астӕу та уыд, «хорз ӕмӕ ӕвзӕр цы у, уый зоныны бӕлас». Хуыцау адӕмы бафӕдзӕхста, цӕмӕй уыцы бӕласӕй ма бахордтаиккой. Куы нӕ йӕм байхъуыстаиккой, уӕд амардаиккой. Фӕстӕдӕр Йегъовӕ Адамӕн йӕ фӕрсчытӕй иу систа ӕмӕ йын дзы скодта ӕххуысгӕнӕг – Евӕйы. Хуыцау Адам ӕмӕ Евӕйӕн бахӕс кодта, цӕмӕй Едемы цӕхӕрадонмӕ зылдаиккой, стӕй ма сын загъта, цӕмӕй сбирӕ уыдаиккой ӕмӕ сӕ байзӕддӕгтӕй зӕхх байдзаг уыдаид.

Иухатт Евӕ иунӕгӕй куы уыд, уӕд ӕм сдзырдта калм. Цыбӕл ӕй кодта, цӕмӕй, Хуыцау афтӕ кӕмӕй загъта, ма дзы бахӕрут, зӕгъгӕ, уыцы бӕласы дыргътӕй бахордтаид. Йӕ ныхӕстӕй афтӕ уад, цыма сӕ Хуыцау сайгӕ кӕны ӕмӕ сӕ цыдӕр хорздзинад ӕмбӕхсы.  Калм загъта, зӕгъгӕ дзы куы бахӕрат, уӕд Хуыцауы хуызӕн суыдзыстут, хорз ӕмӕ ӕвзӕр цы у, уый зондзыстут. Евӕ йӕм байхъуыста ӕмӕ бӕласы дыргътӕй бахордта. Фӕстӕдӕр дзы Адам дӕр бахордта, ӕмӕ афтӕмӕй Хуыцауы ныхасы сӕрты ахызт. Йегъовӕ Адамӕн, Евӕйӕн, стӕй калмӕн тӕрхон рахаста. Адӕмы дзӕнӕтӕй куы ратардта, уӕд ын йӕ бахизӕны сӕвӕрдта зӕдты, цӕмӕй йӕм бацӕуӕн мауал уыдаид.

Иуафон ахуыргӕндтӕ ӕмӕ историктӕ арӕх хастой бӕлвырдгӕнӕнтӕ, Райдианы чиныджы цы хабӕрттӕ фыст ис, уыдон ӕцӕгдӕр кӕй уыдысты, уымӕн. Абон та хъуыддаг цӕхгӕр фӕивта. Цымӕ бирӕты цӕуылнӕ уырны, Библийы Адам, Евӕ ӕмӕ Едемы цӕхӕрадоны тыххӕй цы фыст ис, уый? Ӕркӕсӕм, бирӕтӕ кӕуыл дызӕрдыг кӕнынц, цыппар ахӕм хъуыддагмӕ.

1. Едемы цӕхӕрадон ӕцӕгдӕр уыди?

Ууыл бирӕтӕ цӕмӕн дызӕрдыг кӕнынц? Чи зоны, ӕмӕ сыл фӕзынд иуӕй-иу ахуыргӕндты хъуыдытӕ. Ӕнусты дӕргъы, дины хъуыддӕгтӕ чи иртасы, уыдон дзырдтой, зӕгъгӕ, Едемы цӕхӕрадон абон дӕр кӕмдӕр ис. Фӕлӕ фӕстӕдӕр чырыстон динтыл фӕзынд грекъаг философтӕ Платон ӕмӕ Аристотелы хъуыды, зӕгъгӕ, зӕххыл ӕххӕстӕй ницы ис. Кӕд, дам, ӕххӕстӕй искуы исты ис, уӕд ӕрмӕстдӕр уӕлӕрвты. Уымӕ гӕсгӕ, диниртасджытӕ хъуыды кӕнын райдыдтой, дзӕнӕт кӕй ис кӕмдӕр уӕлӕрвтӕм хӕстӕг *. Иуӕй-иутӕ дзырдтой, зӕгъгӕ, Едемы цӕхӕрадон ис кӕмдӕр бӕрзонд хохы цъуппыл ӕмӕ йӕм нӕ «чъизи» зӕхх ницы бар дары. Иннӕтӕ та дзырдтой, уыцы бынат кӕй ис цӕгат кӕнӕ хуссар полюсы. Кӕмӕдӕр та афтӕ каст, дзӕнӕт кӕй ис мӕйыл кӕнӕ йӕ фарсмӕ. Уӕдӕ диссаг нӕу, Едемы цӕхӕрадоны хабар бирӕтӕн таурӕгъ йеддӕмӕ кӕй ницы у. Нӕ рӕстӕджы дӕр иуӕй-иу ахуыргӕндтӕ зӕгъынц, зӕгъгӕ, Едемы цӕхӕрадоны тыххӕй цы дзурынц, уыдон аргъӕуттӕ сты, уымӕн ӕмӕ зӕххыл ахӕм бынат никуы уыд.

Фӕлӕ Библимӕ гӕсгӕ Едемы хабар афтӕ нӕ уыд. Райдианы 2:8–14 стихты бӕстон фыст ис, уыцы бынат кӕм уыд ӕмӕ цыхуызӕн уыд, уый тыххӕй. Дзӕнӕт уыди скӕсӕны. Кӕм уыди, уыцы бынат хуынди Едем. Уыди дзы цӕугӕдон. Уыцы цӕугӕдон дих кодта цыппар цӕугӕдоныл ӕмӕ уыдон дзӕнӕт донӕй ӕфсӕстой. Цыппар цӕугӕдонӕн дӕр Библийы фыст сты сӕ нӕмттӕ, стӕй дзы чи кӕцырдӕм калд, уый. Уыцы бӕлвырд хабӕрттӕ бирӕ рӕстӕг ахуыргӕндтӕн ӕнцой нӕ лӕвӕрдтой. Бирӕтӕ лӕмбынӕг иртӕстой уыцы скъуыддзаг, цӕмӕй сбӕрӕг кодтаиккой, уыцы бынат абон кӕм ис, уый. Фӕлӕ уый фӕдыл алкӕмӕн дӕр уыди йӕхи хъуыды. Цымӕ уый ууыл дзурӕг у, ӕмӕ, Едемы тыххӕй Библийы цы фыст ис, ома уыцы цӕхӕрадон цыхуызӕн уыд ӕмӕ дзы цавӕр цӕугӕдӕттӕ калд, уыдӕттӕ иууылдӕр мӕнг ныхӕстӕ сты?

Ахъуыды-ма кӕнӕм: Едемы цӕхӕрадоны хабӕрттӕ ӕрцыдысты иу-6 000 азы размӕ. Фысгӕ та сӕ, ӕвӕццӕгӕн, ныккодта Моисей. Чи зоны, ӕмӕ йын сӕ чидӕр радзырдта, чи зоны та уӕдмӕ кӕмдӕр фыст уыдысты, ӕмӕ сӕ уырдыгӕй рафыста. Фӕлӕ сӕ Моисей ныффыста, куы ’рцыдысты, уымӕй иу-2 500 азы фӕстӕ. Уӕдмӕ дӕр Едемы хабар рагон хабар уыди. Цымӕ ӕнусты дӕргъы зӕххыл алцыдӕр, зӕгъӕм, цӕугӕдӕттӕ, куыд уыдысты, хъуамӕ афтӕ баззадаиккой? Зӕххы цъар ӕдзух ивгӕ кӕны. Библимӕ гӕсгӕ Едем кӕм уыд, уыцы бынаты арӕх вӕййы зӕххӕнкъуыстытӕ – дунейы стырдӕр зӕххӕнкъуыстытӕн сӕ 17 проценты уым ӕрцӕуынц. Ахӕм бынаты зӕххы цъар  куыннӕ ивдзӕн. Уымӕй уӕлдай, Нойы рӕстӕджы цы Доны хъаймӕт уыд, уый дӕр, ӕвӕццӕгӕн, зӕххы цъар афтӕ фӕивта, ӕмӕ, раздӕр цыхуызӕн уыд, уый ныр базонӕн нал ис *.

Фӕлӕ цалдӕр хъуыддаджы мах бӕлвырдӕй зонӕм: Райдианы чиныджы фыст ис, Едемы цӕхӕрадон ӕцӕгдӕр кӕй уыд. Цы цыппар цӕугӕдоны кой дзы ис, уыдонӕй дыууӕ – Евфрат ӕмӕ Тигр, кӕнӕ Хиддекел,– сты абон дӕр, ӕмӕ, цы дӕттӕй равзӕрдысты, уыдон кӕрӕдзимӕ тынг хӕстӕг сты. Райдианы чиныджы ма фыст ис, уыцы цӕугӕдӕттӕ кӕуылты калдысты, уыцы зӕххыты нӕмттӕ ӕмӕ уым зӕхх цӕмӕй хъӕздыг уыд, уый дӕр. Ацы чиныджы фыст хабӕрттӕ фыццаг бакастысты рагон Израилы адӕм. Ӕмӕ уыдонӕн ацы хабӕрттӕ бирӕ цӕуылдӕрты дзурӕг уыдысты.

Цымӕ аргъӕуттӕ ӕмӕ таурӕгъты дӕр афтӕ вӕййы? Ӕви дзы, ӕнцон сбӕлвырд кӕнӕн чи вӕййы, ахӕм хабӕртты кой уӕвгӕ дӕр нӕ ракӕнынц? Мӕнг хабӕрттӕ арӕх райдайынц ахӕм ныхӕстӕй: «Раджыма-раджы, иу дард бӕстӕйы...». Фӕлӕ ӕцӕг цауты та хабӕрттӕ вӕййынц бӕлвырд фыст, Библийы Едемы цӕхӕрадоны хабар куыд фыст у, афтӕ.

2. Хуыцау Адамы сыджытӕй кӕй скодта, Евӕйы та – Адамы фӕрскӕй, уый ӕцӕг куыд хъуамӕ уыдаид?

Абон ахуыргӕндтӕ сбӕрӕг кодтой, адӕймаджы буар конд кӕй у, зӕххы цы элементтӕ ис, уыдонӕй. Фӕлӕ уыцы элементтӕй удӕгас адӕймаг куыд рауад?

Ахуыргӕндтӕй бирӕтӕ зӕгъынц, цард йӕхихъӕдӕй кӕй фӕзынд. Фыццаг уал, дам, фӕзындысты хуымӕтӕг организмтӕ, стӕй уыдонӕй сабыргай, милуангай азты дӕргъы, равзӕрдысты ӕндӕртӕ, сӕ арӕзтмӕ гӕсгӕ уыдонӕй бирӕ уӕлдӕр чи лӕууы, ахӕмтӕ. Фӕлӕ иунӕг кълеткӕйӕ конд чи сты, суанг уыцы организмтӕ дӕр «хуымӕтӕг» куы схониккам, уӕд уый раст нӕ уаид, уымӕн ӕмӕ сӕ конд хуымӕтӕг нӕу. Ницы бӕлвырдгӕнӕнтӕ ис, цавӕрдӕр удӕгас организм ӕнӕнхъӕлӕджы кӕй фӕзынд кӕнӕ ахӕм хабарӕн, уӕвгӕ, гӕнӕн кӕй уыдаид, уымӕн. Удӕгасӕй цыдӕриддӕр ис, уыдӕттӕм кӕсгӕйӕ фидарӕй зӕгъӕн ис, чидӕр сӕ кӕй сфӕлдыста ӕмӕ уыцы чидӕр махӕй бирӕ зондджындӕр кӕй у (Ромӕгтӕм 1:20) *.

Зӕгъӕм, фехъуыстай оркестры аив цагъд, федтай ӕмбисонды рӕсугъд ныв кӕнӕ, цы ног диссаджы компьютер йе та телефон рауагътой, уый. Цымӕ цӕхгӕр ныллӕууис, ӕппӕт уыдӕттӕ  сӕхи ӕгъдауӕй фӕзындысты, зӕгъгӕ? Кӕй зӕгъын ӕй хъӕуы, нӕ! Фӕлӕ уыдӕттӕ абарӕн дӕр нӕй, адӕймаджы буар куыд диссаг ӕмӕ куыд рӕсугъд конд у, уыимӕ. Уӕдӕ афтӕ зӕгъӕн куыд ис, ӕмӕ адӕймагӕн Сфӕлдисӕг нӕ уыд? Уымӕй уӕлдай, Райдианы чиныг ӕмбарын кӕны, зӕххыл удӕгасӕй цыдӕриддӕр ис, уыдонӕй ӕрмӕстдӕр адӕймаг кӕй у Хуыцаумӕ гӕсгӕ конд (Райдиан 1:26). Ӕмӕ уӕд диссаг нӕу, ног цыдӕртӕ аразыны фӕнд ӕмӕ курдиат Хуыцаумӕ куыд ис, афтӕ ӕрмӕстдӕр адӕймагмӕ кӕй ис. Зӕгъӕм, адӕймаджы бон у рӕсугъд музыкӕ ныффыссын, рӕсугъд ныв скӕнын кӕнӕ ног исты ӕрхъуыды кӕнын. Уӕдӕ йын кӕд уыцы курдиат Хуыцауӕй лӕвӕрд у, уӕд нӕм диссаг цӕмӕн хъуамӕ кӕса, Хуыцау цы сфӕлдыста, уыдон бирӕ хуыздӕр кӕй сты, адӕймаг цы сарӕзта, уыдӕттӕй?

Хуыцау сылгоймаджы нӕлгоймагӕн йӕ фӕрскӕй кӕй скодта, уым та, цымӕ, диссагӕй цы ис? * Хуыцауӕн йӕ бон уыди, ӕмӕ сылгоймаджы ӕндӕр искуыд дӕр сарӕзтаид, фӕлӕ йӕ нӕлгоймаджы фӕрскӕй барӕй сарӕзта. Хуыцауы фӕндыд, цӕмӕй нӕлгоймаг ӕмӕ сылгоймаг «иу буар» уыдаиккой. Уый та уымӕ амоны, ӕмӕ хъуамӕ кӕрӕдзийыл ӕнувыд уыдаиккой (Райдиан 2:24). Нӕлгоймаг ӕмӕ сылгоймаг кӕрӕдзийы куыд баххӕст кӕнынц, бинонты царды кӕрӕдзийӕн ныфсы хос куыд вӕййынц ӕмӕ кӕрӕдзийӕн куыд феххуыс кӕнынц, уый цымӕ се Сфӕлдисӕджы стыр зонд ӕмӕ уарзондзинадыл дзурӕг нӕу?

Уымӕй уӕлдай, абон ахуыргӕндтӕ зӕгъынц, зӕгъгӕ, гӕнӕн ис, ӕмӕ адӕм иууылдӕр иу мад ӕмӕ иу фыдӕй равзӕрдысты. Уӕдӕ уӕд, Хуыцау адӕмы куыд сфӕлдыста, уый тыххӕй Библийы цы фыст ис, уый таурӕгъ схонӕн ис?

3. Хорз ӕмӕ ӕвзӕр цы у, уый зоныны бӕлас ӕмӕ царды бӕласы хабар таурӕгъӕй уӕлдай нӕу?

Райдианы чиныджы афтӕ фыст нӕй, ӕмӕ уыцы бӕлӕсты цыдӕр ӕнахуыр тых уыди. Уыдон уыдысты ӕнӕуи бӕлӕстӕ, фӕлӕ сын уыд ахсджиаг нысаниуӕг.

Адӕммӕ дӕр иуӕй-иу хатт афтӕ вӕййы. Зӕгъӕм, тырысайӕн кӕй кад кӕнынц, уымӕй кад кӕнынц сӕ паддзахадӕн, хъуымацы гӕбазӕн нӕ, фӕлӕ. Стӕй паддзахӕн дӕр йӕ лӕдзӕг ӕмӕ йӕ кадыхуд фӕамонынц йӕ бартӕм.

Цымӕ уӕд уыцы дыууӕ бӕласы та цӕмӕ амыдтой? Уый фӕдыл бирӕ алыхуызон хъуыдытӕ уыд, фӕлӕ иууылдӕр уыдысты тынг зынӕмбарӕн. Ӕцӕгӕй та ацы фарстайӕн йӕ дзуапп у хуымӕтӕг, фӕлӕ дзы ис арф хъуыды. Хорз ӕмӕ ӕвӕр цы у, уый зоныны бӕлас амыдта, ӕрмӕстдӕр Хуыцаумӕ чи уыд, уыцы  бармӕ – уый йӕддӕмӕ йӕ бон никӕмӕн уыд скъуыддзаг кӕнын, хорз цы у ӕмӕ ӕвзӕр цы у, уый (Йереми 10:23). Уӕдӕ уыцы бӕласӕй ӕртонын фыдракӕндыл нымад куыннӕ хъуамӕ уыдаид! Царды бӕлас та амыдта, ӕрмӕстдӕр Хуыцауӕн йӕ бон кӕй у раттын, уыцы лӕвармӕ – ӕнусон цардмӕ (Ромӕгтӕм 6:23).

4. Калм адӕймаджы ӕвзагӕй кӕй сдзырдта, уый фылдӕр аргъауы хуызӕн нӕу?

Кӕй зӕгъын ӕй хъӕуы, ацы хабар адӕймаджы зынтӕй бауырндзӕн, уӕлдайдӕр, Библийы иннӕ хабӕрттыл куы нӕ ахъуыды кӕна, уӕд. Фӕлӕ, ахӕм диссагӕн гӕнӕн куыд уыд, уый нын Библи йӕхӕдӕг ӕмбарын кӕны.

Чи сарӕзта афтӕ, цӕмӕй калм «сдзырдтаид»? Уыцы калмы хабар куыд уыд, уый рагон Израилы адӕмӕн ӕнцондӕр бамбарӕн уыди, хорз кӕй зыдтой, ӕндӕр ахӕм хабӕртты руаджы. Зӕгъӕм, кӕд ӕй уыдтой, цӕрӕгойтӕн сӕ бон дзурын кӕй нӕу, уӕддӕр зыдтой, зӕдӕн йӕ бон кӕй у афтӕ саразын, цӕмӕй афтӕ зына, цыма цӕрӕгой адӕймагау дзуры. Зыдтой, Моисей Валаамы тыххӕй цы хабар ныффыста, уый дӕр – Хуыцау зӕды куыд арвыста, цӕмӕй Валаамы хӕрӕджы адӕймаджы ’взагӕй сдзурын кодтаид (Нымӕцтӕ 22:26–31; 2 Петры 2:15, 16).

Цымӕ ӕппӕт зӕдтӕн дӕр, суанг Хуыцауы ныхмӕ чи рацыд, уыдонӕн дӕр, сӕ бон у ахӕм диссӕгтӕ аразын? Моисей йӕхи цӕстӕй федта, египетаг кӕлӕнгӕнӕг дзуарылӕгтӕ дӕр, йӕхӕдӕг Хуыцауы хъаруйӕ кӕй сарӕзта, ахӕм диссӕгтӕ кӕй сарӕзтой. Зӕгъӕм, цыма лӕдзӕг калм фестад, афтӕ бакодтой. Ахӕм диссӕгтӕ аразыны тых сын радтаиккой ӕрмӕстдӕр, Хуыцауы ныхмӕ чи рацыд, уыцы зӕдтӕ (Рацыд 7:8–12).

Иовы чиныгӕй фылдӕр базонӕн ис Хуыцауы ӕппӕты фыддӕр знаг Хӕйрӕджы тыххӕй. Ацы чиныг дӕр, ӕвӕццӕгӕн, ныффыста Моисей. Хӕйрӕг загъта, Йегъовӕйыл йӕ лӕггадгӕнджытӕ иууылдӕр сӕ зӕрдӕ кӕй сивдзысты, зын уавӕры куы бахауой, уӕд (Иов 1:6–11; 2:4, 5). Цымӕ израилӕгтӕ афтӕ хъуыды кодтой, Едемы цӕхӕрадоны калмы Хӕйрӕг кӕй «сдзурын кодта» ӕмӕ афтӕмӕй Евӕйы кӕй асайдта ӕмӕ йӕ Хуыцауы ныхмӕ кӕй скодта? Ӕвӕццӕгӕн, о.

Кӕцӕй йӕ зонӕм, калмы ӕцӕгдӕр Хӕйрӕг кӕй «сдзурын кодта»? Йесо Хӕйрӕджы схуыдта «мӕнгдзурӕг ӕмӕ мӕнгдзинады фыд» (Иоанны 8:44). Ӕмӕ кӕд афтӕ у, уӕд фыццаг мӕнг ныхас хъуамӕ «мӕнгдзинады фыдӕй» ма рацыдаид? Фыццаг мӕнг ныхас загъта калм Евӕйӕн. Хуыцау Адам ӕмӕ Евӕйӕн загъта, зӕгъгӕ, хӕрӕн кӕмӕй нӕй, уыцы бӕласы дыргътӕй куы бахӕрат, уӕд амӕлдзыстут. Калм та загъта: «Нӕ, нӕ амӕлдзыстут» (Райдиан 3:4). Кӕй зӕгъын ӕй хъӕуы, Чырысти зыдта, калмы уылты Хӕйрӕг кӕй дзырдта. Афтӕ зӕгъын нӕ бон уымӕн у, ӕмӕ Чырысти апостол Иоаннӕн цы цӕстылуайӕн раргом кодта, уым Хӕйрӕджы схуыдта «рагон калм» (Раргомад 1:1; 12:9).

Тыхджын зӕдӕн, цыма калм дзургӕ кӕны, афтӕ саразын йӕ бон кӕй у, уый цымӕ зын бауырнӕн хъуыддаг у? Кӕд адӕммӕ зӕдты хъару нӕй, уӕд дӕр сӕ бон у сценӕйӕ кӕнӕ киноты ахӕм ӕнахуыр диссӕгтӕ равдисын, ӕмӕ сӕм чи кӕса, уый сӕ ӕцӕг фенхъӕлдзӕн. Кӕнӕ та, зӕгъӕм, куклайы бӕсты фӕдзуры адӕймаг, махмӕ та афтӕ фӕкӕсы, цыма кукла йӕхӕдӕг дзуры.

 Ӕппӕты фидардӕр бӕлвырдгӕнӕн

Куыд зыны, афтӕмӕй, Райдианы чиныджы фыст хабарыл исчи дызӕрдыг кӕна, уымӕн бындур нӕй. Уый ӕцӕг хабар кӕй уыд, уымӕн та ис фидар бӕлвырдгӕнӕнтӕ.

Библийы фыст ис, Йесо Чырысти кӕй у «иузӕрдион ӕмӕ ӕцӕг ӕвдисӕн» (Раргомад 3:14). Чырысти уыд ӕххӕст адӕймаг, ӕмӕ сайгӕ дӕр никуы кодта, стӕй рӕстдзинад дӕр никуы зыгъуыммӕ кодта. Уымӕй уӕлдай, уый дзырдта, цалынмӕ зӕхмӕ не ’рцыд, уӕдмӕ дӕр уӕлӕрвты кӕй цард, уый тыххӕй. Йесо, «дуне куы нӕма уыд», уӕдмӕ дӕр уыди йӕ Фыдимӕ, Йегъовӕимӕ (Иоанны 17:5). Уӕдӕ зӕххыл цард куыд фӕзынд, уый Чырысти федта йӕхи цӕстӕй. Цымӕ цы загъта, ӕппӕты тынгдӕр ӕууӕндӕн кӕуыл ис, уыцы ӕвдисӕн?

Чырыстийы ныхӕстӕй бӕрӕг у, Адам ӕмӕ Евӕ ӕцӕгдӕр кӕй цардысты. Йегъовӕйы фӕндмӕ гӕсгӕ лӕгӕн иу ус йеддӕмӕ кӕй ма хъуамӕ уа, уый тыххӕй куы дзырдта, уӕд дӕнцӕгӕн ӕрхаста уыдоны (Матфейы 19:3–6). Адам ӕмӕ Евӕ ӕцӕгдӕр куы нӕ уыдаиккой кӕнӕ, цы дзӕнӕты цардысты, уый ӕрымысгӕ хабар куы уыдаид, уӕд афтӕ уайы, ӕмӕ кӕнӕ Йесойы асайдтой, кӕнӕ та йӕхӕдӕг асайдта. Фӕлӕ уымӕн гӕнӕн нӕй! Чырысти уыди уӕлӕрвты ӕмӕ, Едемы цӕхӕрадоны цы ’рцыд, уый йӕхи цӕстӕй федта. Уӕдӕ ма уымӕй фидардӕр бӕлвырдгӕнӕн цы хъуамӕ уа?

Ӕргом куы зӕгъӕм, уӕд Библийы, Райдианы чиныджы, цы хабар фыст ис, уый нӕ кӕд нӕ уырны, уӕд зӕгъӕн ис, ӕмӕ нӕ Чырысти дӕр нӕ уырны. Едемы цӕхӕрадоны хабӕрттӕ ӕцӕг кӕй уыдысты, уый нӕ куы нӕ уырна, уӕд, Библи цы ахсджиаг хъуыддӕгты кой кӕны ӕмӕ зӕрдӕ цӕмӕй ӕвӕры, уыдӕттӕ дӕр нӕй бамбарӕн. Ӕркӕсӕм, афтӕ цӕмӕн ис зӕгъӕн.

[Фиппаинӕгтӕ]