Jeef daut werkjlich eenen Goaden Eden?

HAST du mol de Jeschicht jehieet von Adam un Eva un von dän Goaden Eden? Dee es fa väl Menschen von oppe gaunze Welt bekaunt. Wuarom wurscht du die dee Jeschicht nich mol noläsen? Dee es en 1. Mose 1:26 bat 3:24 (PB) notoläsen. Hia sent de wichtichste Sachen von dee Jeschicht:

Jehova Gott * muak eenen Maun von Ieed un jeef dän Maun dän Nomen Adam. Hee sad dän en eenen Goaden nenn en de Jäajent, waut Eden jenant wort. Gott haud doa selfst eenen Goaden jemoakt. Doa wia jenuach Wota un doa wieren uk jenuach schmocke Fruchtbeem. En de Medd wia de Boom, “dee Vestentnis jäwen kunn waut goot un schlajcht es”. Gott veboot de Menschen, von dän Boom Frucht to äten un säd, wan see wudden ojjehuarsom sennen, dan wudden see motten stoawen. Lota muak Jehova de Fru Eva. Hee muak ar von eent von Adam siene Rebben. Gott säd, dee sullen no dän Goaden oppaussen un Kjinja haben un de Ieed voll moaken.

Aus Eva auleen wia, vesocht eene Schlang ar un velokt ar, daut see von de Frucht äten sull, waut veboden wia. De Schlang säd, daut Gott ar väajeloagen haud un goodet von ar trigjhilt un wan see von de Frucht eet, dan wudd see soo aus Gott woaren. See jleewd de Schlang un see eet von de Frucht. Lota deed Adam dautselwje, un soo worden see beid Gott ojjehuarsom. Jehova spruak daut Uadeel äwa Adam un Eva un äwa de Schlang. No daut schekjt hee dee beid Menschen utem Goaden rut un dan pausten doa een poa Enjel opp, daut doa kjeena mea nenkunn.

Ieeschtemma jleewden väl Jelieede daut, daut de Jeschicht en 1. Mose opp iernst passieet wia. Oba nu twiewlen aul sea väle, aus daut rajcht es, waut de Bibel doa sajcht. Wuarom haben dee dän Twiewel? Well wie ons mol vea Jrind unjastonen, waut eenje doajäajen sajen.

1. Wia de Goaden Eden opp iernst eene Städ?

Wuarom es bie eenje Menschen Twiewel oppjekomen, aus et dän Goaden Eden opp iernst mol jejäft haft? Daut kaun sennen, daut de Menschen-Iedeeen doa waut met to doonen haben. Un fa väl Joaren haben de Gloowesleidasch jewundat, aus daut dän Goaden Eden noch emma wua jeft. De Kjoakjen hauden äare Iedeeen woomäajlich von Menschen soo aus dän griechischen Jelieeden Plato un Aristotle. Dise Jelieede säden, daut et bloos em Himmel volkomne Sachen jeef. Doawäajen jleewden de Bibeljelieede, daut daut ieeschtemmasche Paradies noda nom Himmel wia. * Eenje von dee säden, daut de Goaden Eden oppe Spetz Boajch wia, sea huach un wiet auf von de onvolkomne Ieed. Aundre wada säden, daut dee bie dän Nuadpol ooda bie dän Siedpol wia. Un noch aundre säden, daut daut Paradies oppe Mon wia ooda dicht bie de Mon. Doawäajen es daut nich toom wundren, daut väle jleewen, daut daut bloos eene oppjemoakte Jeschicht es. Eenje Jelieede vondoag dän Dach sajen, daut wie nich kjennen oppe Bibel vetruen, wan dee sajcht, wua de Goaden Eden wia.

Oba waut sajcht de Schreft äwa dän Goaden? En 1. Mose 2:8-14 kjenn wie miere Sachen lieren, waut dee doavon sajcht. De Goaden wia oosten von de Jäajent Eden; dee wort jewessat von eenen Riefa, waut sikj en vea deeld. Aul de vea Riefasch haben eenen Nomen. Un doa woat uk noch waut äwa de Riefasch utjelajcht. De Jelieede haben sikj no de Schreft jerecht un haben prooft de Städ to finjen, wua de Goaden Eden mol wia. Oba dee haben aula veschiedne Iedeeen doaräwa. Meent dit dan, daut et dän Goaden kjeenmol jejäft haft?

Denkj wie mol äwa dit: Von dan, aus daut dän Goaden Eden jeef, sent doa aul soo bie 6 000 Joa vegonen un doa haft sikj sea välet jeendat. Un aus Moses daut oppschreef von dän Goaden Eden, wieren doa aul rom 2 500 Joa vegonen un dän Goaden Eden jeef daut aul nich mea. Daut kaun je biejlikj sennen, daut de Riefasch met de Tiet aundatwäajen hanschälden. Un daut haft en de Tweschentiet opp dee Städ uk foaken Ieedbäben jejäft. Un dan uk noch: De Sintflut kaun väl Sachen jeendat haben. Doawäajen kaun eena daut nich krakjt weeten, wua de Goaden Eden mol mott jewast sennen. *

Hia sent eenje Sachen, waut wie doaräwa weeten. En 1. Mose woat von dän Goaden Eden jesajcht, daut daut eene werkjelje Städ es. Twee von dee Riefasch, waut doa jenant woaren, jeft daut bat vondoag dän Dach noch: De Eufrat un Tigris, waut uk Hiddekel jenant woat. Un dee beid Riefasch komen von deeselwje Städ. En de Jeschicht von dän Goaden Eden woat uk de Lenda aunjejäft, wua de Riefasch derchschälen. Un de Menschen von de Bibeltiet kunnen daut vestonen, wan dee daut hieeden, wiels dee kjanden dee Städen.

Waut de Schreft äwa dän Goaden Eden sajcht, es gaunz aundasch aus von eene utjedochte Jeschicht. De Schreft rät von Eenselheiten un Menschen, waut eena noforschen kaun, daut et dee werkjlich jeef. Oba utjedochte Jeschichten doonen daut nich.

2. Es daut werkjlich to jleewen, daut Gott Adam von Ieed muak un Eva von Adam siene Rebb?

Wissenschoftla haben rutjefungen, daut ons Kjarpa von soone Sachen jemoakt es, waut et uk enne Ieed jeft. Oba woo kunn daut von dise Sachen Menschen jäwen?

Väl Forscha jleewen, daut daut Läwen, soo aus wie daut vondoag dän Dach kjanen, von veselfst oppjekomen es. Ieescht wia doa een eefachet Läwen un äwa millionende Joaren haft sikj daut vebätat. Oba jieda Sort Läwen es grulich sea butajeweenlich, wan ons daut uk sea eefach väa kjemt. Daut jeft kjeenen Bewies, daut doa irjentwanea mol es von veselfst een Läwen oppjekomen ooda daut et jeemols kunn. Oba aulet Läwen wiest, daut doa wäa es, waut daut jemoakt haft, waut väl kjlieekja es aus wie selfst (Reema 1:20). *

Wan eena scheenet Spell horcht ooda een schmocket Bilt ooda eene besondre Maschien sitt, dan wudd kjeenmol wäa sajen, daut dee kjeena jemoakt haud. Oba dit es noch dusent Mol eefacha jemoakt aus de Menschenkjarpa. Woo kunn eena dan noch denkjen, daut et kjeenen Schepfa jeft? Un dan uk noch: 1. Mose sajcht, daut oppe Ieed bloos de Menschen soo jemoakt sent, daut dee Gott likjnen (1. Mose 1:26). Krakjt doawäajen kjennen uk bloos Menschen Sachen moaken soo aus Spell, niemootschet Jereetschoft ooda aundre schmocke Sachen. Wan wie Menschen aul waut moaken kjennen, sull ons daut dan wundren, daut Gott noch väl bätret moaken kaun aus wie?

Fa Gott es daut nuscht, eene Rebb von eenen Maun to nämen un doavon eene Fru to moaken. * Gott wudd de Fru goot haben kunt von waut aundre moaken. Oba hee wull ons doa waut besondre met lieren. Hee wull, daut wie vestonen kunnen, daut wan een Maun un eene Fru sikj befrieen, dan woaren dee eent sennen (1. Mose 2:24). Es daut nich weis un wiest daut nich, woo sea Gott ons leeft, daut hee dän Maun un de Fru soo jemoakt haft, daut dee kjennen veeent sennen un fein toopschaufen?

Väl Jelieede jleewen daut, daut wie aula bloos von een Poa Lied komen. Soo, wie kjennen ons opp iernst opp daut veloten, waut de Schreft von de Schepfunk sajcht.

3. De Boom vom Vestentnis un de Boom vom Läwen es bloos waut oppjemoaktet.

En 1. Mose sajcht daut nich, daut dise Beem eene besondre Macht hauden. Jehova brukt dee toom waut besondret väastalen.

Toom daut bäta vestonen, bruck wie mol een Jlikjnis. Bie ons Menschen es je daut uk eenjemol soo, daut wie eene Sach brucken toom waut aundret väastalen. Biejlikj, wan ons jesajcht woat, daut wie sellen de Rejierunk achten, es doamet oba nich jemeent, daut wie daut Rejierungshus achten sellen, wua de Menschen enne Rejierunk schaufen. Daut Rejierungshus stalt bloos de Rejierunk väa.

Un waut stalden dan de beid Beem väa? De Menschen haben veschiedne Meenungen doaräwa, oba de rajchte Auntwuat es gaunz eefach, oba haft väl to bedieden. De Boom äwa goot un schlajcht stalt daut väa, daut Gott daut Rajcht haft to sajen, waut goot un schlajcht es, un daut daut Rajcht bloos am jehieet (Jeremia 10:23, NW). Doawäajen wia daut soo schlemm, aus Adam un Eva sikj von de Frucht von dän Boom stoolen. De Boom, waut Läwen jeft, stalt daut eewje Läwen väa, waut bloos Gott jäwen kaun (Reema 6:23).

4. Eene Schlang, waut doa rät, hieet sikj uk no eene utjedochte Jeschicht.

Daut es soo, daut eenem dit kunn ondietlich sennen, oba daut äwaje Poat von de Schreft halpt ons to vestonen, waut doa em Goaden Eden krakjt aunjinkj.

Wäa ooda waut brocht de Schlang doatoo, daut et soo sach, daut dee räd? De Menschen von daut oole Israel kjanden noch aundre Jeschichten, waut dee holp to vestonen, waut doa en dän Goaden Eden krakjt aunjinkj. Moses schreef biejlikj eene Jeschicht opp von Bieleam, wua Gott eenen Enjel schekjt toom derch Bieleam sienen Burra räden, soo aus wan daut een Mensch wia. Dee Menschen wisten daut, daut de Tieren nich räden kunnen, oba dee wisten, daut een Jeist daut kunn soo moaken, daut et soo leet, aus wudd een Tia räden (4. Mose 22:26-31; 2. Petrus 2:15-16).

Kjennen doa uk beese Jeista Wunda doonen? Moses sach, woo de Hakjsenpriestasch von Ägipten eenen Stock to eene Schlang muaken. Dee äare Krauft kjeem von de beese Jeista (2. Mose 7:8-12).

Daut diet aula doano han, daut Moses uk daut Buak Hiob jeschräwen haft. Daut Buak wiest ons väl von dän Soton un woo dee daut oppem Twiewel jebrocht haft, wuarom Jehova siene Deena Jehova tru sent (Hiob 1:6-11; 2:4-5). Daut schient soo, daut de Israeliten jleewden, daut Soton de Schlang brukt toom Eva bat doa brinjen, Gott ojjehuarsom to sennen.

Soo, wia de Soton hinja de Schlang? Jesus säd lota äwa dän Soton, daut daut “een Lieeja es un de Voda äwa aule Läajes es” (Johanes 8:44, PB). Wan de Soton “de Voda äwa aule Läajes” es, wudd daut dan nich meenen, daut hee de ieeschta wia, waut jeloagen haft? Un de ieeschte Läajes kjeemen opp, aus de Schlang to Eva räd. Gott haud jesajcht, daut see wudden stoawen, wan see wudden von de Frucht äten. Oba de Schlang säd: “Jie woaren goanich stoawen” (1. Mose 3:4, PB). Aulsoo, Jesus wist daut, daut de Soton derch de Schlang to Eva jerät haud. En de Openboarunk, waut Jesus Johanes jeef, moakt Jesus daut dan gaunz dietlich. Doa nant Jesus dän Soton “dee oole Schlang” (Openboarunk 1:1; 12:9, PB).

Soo, daut es mäajlich: Een Jeist kaun daut moaken soo loten, daut eene Schlang räden kaun. Un Menschen kjennen je daut uk soo moaken, daut et soo lat, daut een Tia ooda eene Popp räden kaun.

De jratsta Bewies, daut et dän Goaden Eden werkjlich jeef

Daut jeft kloaren Bewies, daut daut Buak 1. Mose de Woarheit rät.

Biejlikj woat von Jesus Christus jesajcht, daut hee “met sien Zeichnis tru un woarhauftich es” (Openboarunk 3:14, PB). Wäajen Jesus een volkomna Mensch wia, deed hee kjeenmol lieejen un deed uk nich de Woarheit vedreien. Un hee lieed selfst uk, daut hee aul lang ea jewast wia, ea hee aus Mensch oppe Ieed wia. Hee säd, daut hee bie sienen Voda wia, “ea de Welt jeschaufen wort” (Johanes 17:5, PB). Soo, Jesus läwd aul ea, ea daut Läwen oppe Ieed aunfunk. Waut wia sien Zeichnis, waut hee jeef?

Eemol, aus Jesus von de Ehe räd, räd hee von Adam un Eva un fa am wieren daut werkjlich Menschen jewast (Matäus 19:3-6). Wan Adam un Eva en dän Goaden Eden kjeenmol jewast wieren, dan wudd Jesus jeloagen haben. Oba soont jeft daut nich. De Woarheit es, daut Jesus em Himmel wia un krakjt sach, woo Adam un Eva en dän Goaden Gott ojjehuarsom wieren. Kaun daut noch eenen jratren Bewies jäwen, daut et dän Goaden Eden werkjlich mol jejäft haft?

Dee, waut doa nich aun jleewen, waut en 1. Mose steit, dee jleewen dan uk nich aun Jesus. Un wan eena nich jleeft, daut et dän Goaden Eden werkjlich jejäft haft, dan woat eena uk eenje von de wichtichste Lieren un Vespräakjungen ut de Schreft nich vestonen kjennen. Well wie mol seenen, woosoo wie daut sajen kjennen.

[Footnooten]