¿Meru niáraspi jarhani jardini de Edéni?

UÁNIKUA kʼuiripuechaksï kurhastia jardini de Edénirhi ka Adáni ka Eberi ambe, joperuksï nótki méni arhintaxati Bibliarhu. ¿Andijtsï no ísï újki iásï? Ini uandantskuani, jimintsï exentaaka Génesis 1:⁠26–3:​24. I ambesï uandajti jimini.

Jeoba * kueraasti primeru achamasïni tʼupurirhu uératini, Adáni arhinhataraspti ka kʼéri jardini ma jimbo péeraspti o parke enga imani lugari jimbo japka enga Edéni arhinheenga. Indeni jardinini Tata Diosï mismu ústi ka kánikua itsï jarhaspti ka anhatapuecha engaksï áspiti fruta íntspienga. Tata Diosï, terujkanikuarhu péeraspti anhatapuni enga jindeeka para míteni “ambe sési jarhaski ka ambe no sési jarhaski”, ka arhiaspti eskaksï no jámapiringa arhani jima uératini jimbokaksï uarhipiringa. Ma jurhiani, tsirini ma pʼitanhaspti Adánini ka jima uératini kueraaspti Ebani orheta uarhiitini. Tátsekua arhiaspti eskaksï kuidaripiringa jardinini, eskaksï kaapiringa uájpeechani ka eskaksï iámu parhakpinirhu irekapiringa.

Ísï tátsekua, enga Eba jandiajku japka akuitsi uandontskuarhekuspti ka arhispti, eska apiringa imani frutani engaksï no sésikua jatsispka para arhani. Uandaspti eska kuerajpirini chkuanderakuaxapka ka eska jískakuaxapka ambe ma engaksï ima jatsipka para míteni: eska ima úpirini ísïini eska Tata Diosï. Eba jakajkukuspti ka arhaspti frutani. Adánijtu no kurhajchaspti Tata Diosïni. Ísï tátsekua Tata Diosï arhiaspti ambe engaksï úkuarhinchapiringa, Adáni, Eba ka ístu akuitsi. Temungurhiri petanhantanhaspti paraisurhu ka máru ánjelichaksï jima jarhaspti parakaksï nóteru inchantapiringia.

Ióntki, sáno iámindu imeecha engaksï istorieri ambe exejka ka ístu engaksï Biblieri ambe mítekuka, uandasïndiksï eska inde uandantskua meru ísïispka. Joperu ini jurhiatikuecha jimbo, sáno iámindu kʼuiripuechaksï no jakajkusïndi indeni uandantskuani. Joperu, ¿andiksïsï ísï újki? Ju je exeni tʼámu kurhamarhikuechani engaksï kʼuiripuecha úkuarhijka.

1. Enga ísïika eska jardini de Edéni meru jarhaspka, ¿nani jarhaspi?

Ióni tiempu, imeecha engaksï Biblieri ambe exejka, uandasïrendiksï eska jamberi Paraisu, útasteru jarhaspka nani ísï. Joperu tátsekua, iglesia uénaspti jakajkuni ambe engaksï gresia anapu filósofuecha jorhentpienga, komu Platón ka Aristóteles engaksï uandeenga eska ixú parhakpinirhu no ma ambe uaa perfektueni. * Ísï jimbo, imeecha engaksï Biblieri ambe exejka, uandasptiksï eska Paraisu jatsispka para jimeesïsï jarhani enga sánderu no iauanika auandarhu. Máruksï ísï uandasïreendi eska kʼéri juáta ma jimbo enga iámu ambe pímbinhasïpka ka máteruechaksï eska tsimani poluecharhu ísï o lunarhu. Iámindu indeni jimbo, Paraisuri uandantskua niárasti ísï exenhani komu sési jásï uandantskua ma enga no méni úkuarhika. Iásï imeecha engaksï kánikua ambe míteka, uandasïndiksï eska ísku ambe máeska jakajkuni jardini de Edéniri ambe eska no méni niáraska jarhani.

Joperu ambe enga Biblia uandajka Paraisueri ambe kánikua ménderuenisti. Pori ejemplu, Génesis 2:​8-​14 sési uandantasïndi nani enga japka: uandasïndi eska esterhu ísï jarhaspka lugari ma jimbo enga Edéni arhinheenga ka eska iurhekua jimeesïsï nitamasïrenga ka tʼápuru úkuarhintasïrenga. Ístu uandantasïndi néna engaksï arhinhajka riuecha ka néna engaksï nirajka. Imeecha engaksï tsitijka jorhenguarhini ambe ma, iónisïksï jánguarhintasti exeni ambe ma ini karakatarhu nani enga jaka ima Paraisu enga Tata Diosï kueraaka. Joperu ambe engaksï exentajka no terukuntasïndi. ¿Arhikuekasïni inde ambe eska ambe enga uandajka Biblia Edéniri ambe ka ístu riuecheri, eska no ísïiska ka eska iámindu ambe kuentusï ambejkueska?

Ju je jingontku exeni. Para uénani, exeakachi eska ma seisi mili uéxurhini ísï nitamaskia enga inde ambe úkuarhika engachi uandontskuarheni jaka. Ka enga Moisési karapka jamberi kurhanguarhiparini o jiáni anapu sïrandechani exepariani, nitamasptia ma dosi mili kinientu uéxurhini ísï. Ísï jimbo, para asta ima jamberi ióntki anapu uandantskua ambeespti. ¿Mójtakukuarhia echeri iásï jamberi? Jo. Na enga jándeka ixú parhakpinirhu seguirixati mójtakukuarhipani. Pori ejemplu, ima lugarirhu enga jamberi japka jardini de Edéni, kánikua jenchesïndi: 17% iámindu kʼérati jenchekuecherhi jimaksï úkuarhisïndi. Ístu ju je no mirikurhini, dilubiuni enga Tata Diosï juapka ima kánikua mójtakupti na enga jándeka iásï echeri. * Ísï jimbo, riuecha ka na enga jándeka jimesïsï, kánikua mójtakukuarhistia.

Génesisi uandantasïndi eska jardini de Edéni meru jarhaspka. Tʼámu iurhekuecheri, útasteruksï tsimani jarhasti Éufrates ka Tigris o Hidequel⁠— ka máru iurhekua sapirhaticha engaksï imeecha jingoni kúnguarhintajka jimaksï no iauani jarhasti. Ístu, uandantasïndi néna engaksï arhinhenga ima lugaricha engaksï ísï nireenga i iurhekuecha ka ambe enga jukapka jimeesïsï. Iámindu i ambe kánikua sési mítekatespti para ióntki anapu israelitecha, jimbokaksï imeechanisï karakuapka uénakuarhu.

Kuentuecha ka uandantskuechaksï, nóksï jurhimbitku ambe uandantasïndi. Nóksï uandantasïndi imani ambe engaksï kʼuiripuecha uáka exeni eska ísïiska. Uánikuechaksï arisï uénasïndi: “ Ma xanhari jini iauani iauanisï...” Joperu, jardini de Edéniri uandantskua, uánikua ambe uandantasïndi enga jukaparhakua ambeka, meru ísï eska uandantskua ma enga istorierika.

2. ¿Néna úpirini Tata Diosï kueraani Adánini tʼupuriri ka Ebani, Adániri tsirinirhu uératini?

Juchaari kuerpu, echerirhu anapu ambe jukasti komu, idrojenu, oksijenu ka karbonu, ini ambeksï exesti sientifikuecha eska ísïiska. Joperu, ¿ambe úski eskaksï inde elementuecha márku úkuarhintapiringa paraka niárapiringa kʼuiripu ma tsípiti jarhani?

Uánikua sientifikuechaksï uandasïndi eska tsípikua ísku jatini úkuarhispka. Uandasïndiksï eskaksï máru organismuecha engaksï arisku járhapka, mójtakukuarhiskaksï ka ióni tiempu jimboksï niáraspti mámaru jarhani. Joperu, ¿jaki ambe ma enga tsípiti jaka engachi úpiringa uandani eska “arisku jásï” úkata jarhaska? Jimboka asta ima organismuecha engaksï ma seluleriika, uánikua joperu uánikua ambeksï jukasti. Ísï jimbo, no ma ambe jarhasti enga uáka xarhatani eska tsípikua ístu jatini jarhaska —o eska uáka⁠— ístu jatini úkuarhiaka. Sánderu sési, iáminduksï xarhatasïndi eska jarhaska nema enga iauani sánderu jánhastiika eska kʼuiripu enga uáka (Roma 1:​20). *

Pori ejemplu: eranhaska je eska chá kánikua sési pʼikuarheraxaka kústakua ma kurhaaparini o dibujuni ma exeparini o aparatuni ma enga apenasi uéraka. ¿Chá uandapirini eskaksï iicha jandiajku úkuarhiska ka eska no nema uaaska? Nómbe. Ísï jimbo, no ma ambe jarhasti enga kʼuiripu úka na uéjki xáni kʼéri ambeni, enga uáka terukuntani juchaari kuerpu jingoni enga xáni sési úkata jaka, mámaru ambe jukani ka enga xáni sési jáxeka. Jiájkani, ¿nénachi uaa uandani eskachi no kueraanhaska? Génesis uandasïndi eska juchajkusï ísï úkata jaka eska Tata Diosï na jásïika (Génesis 1:​26). Ka jucha kʼuiripuechajkusï uéjka úni ambe ma komu teknologia ambe ísï eska Tata Diosï na újka. Jiájkani, ¿andijtsïnisï ísku pakatapirini engajtsïni Tata Diosï echeriri uératini úka?

Ka ¿ambechi úpirini uandani indeeri ambe enga Tata Diosï Adániri tsïrinirhu uératini úka Ebani? Para Tata Diosï, inde ambe no úkua jukapti. * Ka nájkiruka úpiringa máteru ambe úrani, ima tsïrinini erakuspti jimboka inde kánikua ambe arhikuekasïreenga. Ima uékasïreendi eska Andani ka Ebaksï, tembuperapiringa ka niáranksï kánikua xénchperani ka no jurajperani, enajkiksï ‘májku kuerpuepirini’ (Génesis 2:​24). Ísï jimbo, tataka ka nanaka ménderueniksï úkata jarhasti parakaksï tsimarhani uáka jarhuajperani imani ambe jingoni enga máteru uétarhinchajka ka niáranksï kánikua uékperani ka kuidarperani. Xarharasïndi eska Kuerajpiri kánikua jánhastiiska ka uékpitini.

Ístuchi uáka uandani eskaksï imeecha engaksï sési mítekuka genetikeri ambe, uandasïnga eska uánikua ambe xarhatasïnga eskachi iámindu kʼuiripuecha ma tatakaru ka ma nanakaru uératini jurhaska. Ísï jimbo, nóchi uaa uandani eska inde uandantskua enga Génesis uandajka eska ísku ambe máeska, ¿a no?

3. ¿Néna úpirini jarhani anhatapu ma enga jánhaskakua íntspijka ka máteru enga tsípikua íntspijka?

Uékasïngachi uandani eska Biblia no jorhentpisïnga eskaksï inde tsimani anhatapuecha uinhapikua ambe jatsipiringa. Sánderu sési, májkuenisptiksï eskaksï máteru anhatapuecha, joperu Jeoba erakuaspti paraksï ambe ma arhikuekani.

Pori ejemplu, ju je eranhaskani eska juesi ma ónhatarkuarhisïnga kʼuiripuni ma jimboka no sési jámani jarhasïnga jefaturarhu. ¿Arhikuekasïni eska jimbosï ónhaaka jimboka no respetariuaxapka siiechani, mesechani ka paredichani? Nómbe. Sánderu sési, inde arhikuekasïndi juramukueri lugari ma, enga ma jatsika para respetarini. Máteru ejempluechaksï jindeesti reicheri koronecha ka imeecheri setru engaksï jájkirhu pájka, jimboka inde ambe juramukua arhikuekasïnga.

Jiájkani, ¿ambeksï arhikuekasïni inde tsimani anhatapuecha engaksï jardini de Edéniru japka? Kʼuiripu mámaru ambe uandasïndi enga úkua jukaka kurhanguni, joperu no úkua jukasti ka kánikua jukaparhakuesti para jucha. Anhatapu enga jindeeka para míteni ambe sési jarhaski ka ambe no sési jarhaski, arhikuekasïreendi eska Tata Diosïjkusï jukanchaka para uandani ambe sési jarhaski ka ambe nómbe (Jeremías 10:23). Ísï jimbosï, Jeoba uandapti eska enga nema apiringa inde anhatapurhu uératini, kánikua no sési úni japirindi. Anhatapu tsípikueri arhikuekasïreendi, tsípikua para méntkisï enga solu Tata Diosï újka íntspini (Roma 6:​23).

4. Néna úpirini akuitsi ma uandontskuarhekuni Ebani?

Engachi no kuenta úska ambe ka ambe engatiru uandajka Biblia, úkua jukanchaakachi uandani ambe enga arhikuekajka i uandantskua enga Génesis uandantajka. Joperu, karakatechajtsïni sánhani arhisïndi jánhastani parachi úni kurhanguni.

Para uénani, ¿né úspi para ísï xarharani enajki akuitsi uandani japi? Pori ejemplu, ióntki anapu israeli anapuechaksï, uánikua ambeksï jatsispti para úni kurhanguni nésï úpi paraka akuitsi uandapiringa. Mítesptiksï eskaksï jarhaska espirituecha engaksï újka eska ísï xarharaaka enajkiksï animalicha uandani jaki. Asta Moisési karasti eska Jeoba ánjelini ma úraaspka paraka Baalamiri burra uandapiringa (Números 22:​26-31; 2 Pedru 2:​15, 16).

Ístu, mítesptiksï eskaksï demoniuecha o ánjelicha engaksï nóteru uékapkia kurhajchani Tata Diosïni kánikuaksï uinhapikua jatsiska. Pori ejemplu, exeaspti Ejiptu anapu saserdotichani engaksï kopiariuapka Jeobaeri milagruechani, engaksï úpka eska imeecheri pirimu ma akuitsi úkuarhintapiringa. ¿Nani uératini jurhaspi inde uinhapikua? Demoniuecheri uératini (Éxodo 7:​8-​12).

Ka últimu, israeli anapuechaksï jatsisptia Jobueri libruni, enga jamberi Moisési karapka. Inde libru uánikua ambe jorhendaspti Satanasiri ambe, enga sánderu kʼéri ikiatspitiika Tata Diosïri ka enga uandajka eskaksï iámindu Tata Diosï Jeobaeri marhuaricha interesi jimbojkusï marhuakujka (Job 1:​6-​11; 2:​4, 5). Ini ambe míteparini, israelitechaksï seguru jarhaspti eska Satanasisï úpka eska akuitsi enganiaripiringa Ebani ka eska no kurhajchapiringa Tata Diosïni.

Joperu jarhasti sánderu ambe enga xarhatajka eska no ambakitisï úpka eska akuitsi chkuanderakupiringa Ebani. Ju je miáni eska Jesúsi uandaska eska Satanasi “chkuandereska ka ima jindeesti chkuanderecheri taati jémba” (Juanu 8:​44). ¿Andisï uandapi eska ima jindeeska “chkuanderecheri taati jémba”? Jimboka mítetixapka eska imasï uandapka primeru chkuanderakuani akuitsini úraparini. Tata Diosï arhispti Adánini ka Ebani eska engaksï apiringa imani frutani engaksï no sésikua jatsipka, uarhipiringaksï, peru akuitsi chkuanderaspti enga uandapka: “Nójtsï uarhiaka” (Génesis 3:4). Ka engajtsï útasï no jakajkujka, Jesúsi xarhatakuspti ísï tátsekua apostoli Pabluni, eska Satanasi jindeeska “ióntki anapu akuitsi” (Jaŋaskuecha [Apocalipsis] 1:​1; 12:9).

Joperu, nójtu xáni kʼéri ambeesti enga espiritu ma uáka úni eska akuitsi ma ísï xarharaka enajki uandani jarhajki. Jimbokaksï jarhaska kʼuiripuecha engaksï újka eska ísï xarharaaka enajkiksï uandani jarhajki ima monecha engaksï uaxanharhiati jarhajka o engaksï támisï xarharani jarhajka.

Sánderu kʼéri ambe enga xarhatajka eska ísïiska

Ixú jamberi, ¿nójtsï ísï exesïni eska ambe enga uandajka Génesis meru ísïiska? Jimbokachi uánikua pruebechani exeaska engaksï ísï xarhatajka. Joperu, ju je exeni máteru.

Biblia uandasïndi eska Tata Jesukristu jindeeska “ma testigu enga sési jimbo mintsinharhikueka” (Jaŋaskuecha [Apocalipsis] 3:​14). Ima perfektuespti ka ima no méni chkuanderaspti ni méni enganiaripi nemani. Ante de jurhani echerirhu—asta “ante de parhakpini jarhani”⁠— imeeri taati jémba Jeoba jingoni irekaspti jini auandarhu (Juanu 17:5). Jesúsi tʼuini jarhasptia ante de kʼuiripu kueraanhani, ísï jimbo, ambe enga ima uandajka kánikua jukaparhakuesti. ¿Ka ambe uandaspi ima jardini de Edéniri ambe?

Jesúsi uandaspti eskaksï Adáni ka Eba, meruksï irekaspka. Ka asta imeechanisï arhikuekani japti enga juramukua íntsaapka temungurhirikueri ambe (Mateu 19:​3-6). Enga uandantskua enga Génesisi jimbo jaka kuentusi ambeepiringa, Jesúsi chkuanderari máepirindi ójtsïni enganiarini japirindi. Joperu ima méntku no ísï úpirindi. Eskachi na uandakia, ima exespti auandarhu uératini iámu ambe enga úkuarhika. Ísï jimbo, ¿náki prueba úpirini jarhani engajtsïni úpiringa sánderu jakajkutarani?

Engachi no jakajkupiringa ambe enga uandajka Génesisi, nóchi úpiringa jakajkuni Jesúsini ka ístuchi no úpiringa kurhanguni ambe engajtsïni Biblia aiangujka nijtu Tata Diosïri aiatsperakuechani. Ju je exeni andi.

[Notecha]