Si Kẹle Ọghẹnẹ

‘O Bo Se ỌNOWO Na’

“ME JE roro nọ me gbe fioka evaọ aro Ọghẹnẹ hẹ,” ere ọzae jọ nọ a rọ izi Jihova wuhrẹ evaọ oke emaha rekinọ o kiuke ku egagọ Jihova ọ ta. Nọ ọ jẹ j’owọ re o nwene uzuazọ riẹ, udu u je bru rie inọ Ọghẹnẹ ọ te rọ vrẹe he. Rekọ ọzae nana nọ o kurẹriẹ no eva ze na o wo uduotahawọ no ikuigbe Manasẹ nọ e rrọ Ebaibol na ze, onọ a kere fihọ obe 2 Iruẹru-Ivie 33:1-17. Otẹrọnọ who roro nọ whọ te sai wo erọvrẹ Ọghẹnẹ hẹ fiki izi jọ nọ whọ thọ evaọ oke nọ u kpemu, ikuigbe Manasẹ e rẹ sae kẹ owhẹ omosasọ re.

A yẹ Manasẹ fihọ uviuwou eg’Ọghẹnẹ. Ọsẹ riẹ Hẹzikaya ọ jọ omọvo emamọ ivie nọ i su Juda. A yẹ Manasẹ oware wọhọ ikpe esa nọ e vrẹ nọ Ọghẹnẹ ọ rọ edhere igbunu siwi uzuazọ ọsẹ riẹ no ẹyao nọ o je ti kpei. (2 Ivie 20:1-11) U muẹro inọ Hẹzikaya o rri ọmọ nana wọhọ okẹ nọ u te rie obọ fiki ohrọ Ọghẹnẹ, yọ ọ daoma wuhrẹ iẹe re o wo uyoyou kẹ egagọ Ọghẹnẹ. Rekọ orọnọ ẹsikpobi emọ ahwo nọ a kru egagọ Ọghẹnẹ ga a rẹ raro kele emamọ oriruo esẹgbini rai hi. Ere o jọ kẹ Manasẹ.

Nọ ọsẹ riẹ o whu, yọ Manasẹ ọ re vrẹ ikpe 12 hẹ. U yoma kẹhẹ, Manasẹ “o ru eware imuomu eva aro ỌNOWO na.” (Owọ 1, 2) Kọ o sae jọnọ ọ jẹ gaviezọ kẹ ohrẹ ahwo nọ a wo orivo kẹ egagọ uzẹme? Ebaibol ọ ta ha. Oware nọ Ebaibol ọ vuẹ omai họ, Manasẹ o yoma te epanọ ọ jẹ rọ gọ emedhọ je gboja kẹ ahwo. Ọ rehọ aruẹri vi kẹ eghẹnẹ erue, ọ rehọ emọ riẹ dheidhe, wobọ evaọ iruẹru imizi, jẹ rọ ẹmema vi etẹmpol Jihova nọ o jọ obọ Jerusalẹm. Manasẹ nọ o wo udu ogaga na ọ rọwo gaviezọ kẹ unuovẹvẹ nọ u je no obọ Jihova ze kẹse kẹse he, Ọghẹnẹ nọ o ru rie lọhọ nọ a ro yẹi.—Owọ avọ 3-10.

Ukuhọ riẹ, Jihova ọ tẹ kuvẹ nọ a ro mu Manasẹ kpobọ Babilọn. Nọ ọ jọ igbo evaọ obei, Manasẹ o te roro kpahe ekpehru uzuazọ nọ o je yeri. Kọ o sae jọnọ ọ ruẹ vuhumu inọ eghẹnẹ erue nọ ọ rẹroso e sae thọe he? Kọ o sae jọnọ o je roro kpahe eware nọ ọsẹ riẹ nọ o kru egagọ Ọghẹnẹ gaga na o wuhrẹ i rie evaọ okenọ ọ jọ ọmaha? Oghẹrẹ kpobi nọ o jọ, Manasẹ o kurẹriẹ. Ikuigbe na e ta nọ: “O te bose ỌNOWO na Ọghẹnẹ riẹ, ọ tẹ rọ oma kpotọ gaga . . . Ọ tẹ lẹ e.” (Owọ avọ 12, 13) Kọ ohwo nọ ọ raha izi ilogbo itieye na ọ sai gine wo erọvrẹ Ọghẹnẹ?

Ekurẹriẹ nọ Manasẹ o kurẹriẹ no udu ze na o were Jihova. Ọghẹnẹ ọ kpahe fihọ olẹ nọ Manasẹ ọ rọ yare inọ ọ riẹe ohrọ, ‘o te zihe ie ze Jerusalẹm ziọ ẹta uvie riẹ.’ (Owọ avọ 13) Ro dhesẹ imuẹro inọ o gine kurẹriẹ no, Manasẹ ọ tẹ daoma kpobi ruẹ nọ ọ kpọ idhere riẹ vi, si egagọ emedhọ kpobi no ẹkwotọ esuo riẹ, jẹ ta udu họ ahwo na awọ inọ “a gọ ỌNOWO na.”—Owọ avọ 15-17.

Who te roro nọ whọ te sai wo erọvrẹ Ọghẹnẹ hẹ fiki izi nọ whọ thọ evaọ oke nọ u kpemu, oware nọ o via kẹ Manasẹ na o rẹ sae kẹ owhẹ omosasọ. Ikuigbe nana yọ abọjọ Ẹme Ọghẹnẹ nọ o gie ẹwolo ku. (Ahwo Rom 15:4) O rrọ vevẹ, Jihova ọ gwọlọ nọ ma riẹ inọ ọ “vọ avọ . . . erọvrẹ.” (Olezi 86:5) Oghẹrẹ nọ udu ohwo o rrọ oye Ọghẹnẹ o re riwi orọnikọ uzioraha na ha. Ọrahauzi nọ ọ lẹ se Jihova avọ eva efuafo, si obọ no izieraha riẹ, jẹ gbaemu inọ o re ru oware nọ u kiehọ, ọ rẹ sai wo ohrọ-oriọ Jihova, wọhọ epanọ o via kẹ Manasẹ na.—Aizaya 1:18; 55:6, 7.