Diosta allinta reqsiy

Huchanmanta kutirikuqtinmi Diosqa chaskirqan

“HUK runan nirqan: “Diosqa manapunin pampachawanmanchu”, nispa. Payqa huch’uy kaspan Diospa kamachikuyninmanta yachasqa, ichaqa tiempoq pasasqanman hinan manaña chayman hinachu kawsasqa. Saqepurqanña huchanta chaypas, manapas Dios pampachanmanchu hinan sientekurqan. Ichaqa Bibliapin 2 Crónicas 33:1-17 textota leerqan, chaypin rimashan Manasés reymanta chayraqmi thak sientekurqan. Yaqapaschá qanpas chhaynata sientekunki ñawpaqpi pantasqaykimanta, ichaqa chay textota leeymi yanapasunkiman.

Jehová Dios Ezequiaspa kawsayninta milagropi yapasqanmanta kinsa wata pasaqtinmi Manasesqa nacerqan. Ezequiasqa Judá llaqtapi allin kamachikuqmi karqan. (2 Reyes 20:1-11). Manasés naceqtinmi Ezequiasqa yuyaykurqan Diospa regalon kasqanta. Chaymi huch’uychanmantapacha Diospa kamachikuyninta yachachirqan. Ichaqa tayta-mamakunan yachananku mayninpiqa wawakuna mana paykuna hinachu kanankuta. Chhaynatan Manasés ruwarqan.

Manasés 12 watayoq kashantinmi Ezequiasqa wañukapurqan. Chaymantapachan waynachaqa ‘manapuni Señor Diospa munayninman hinachu ruwarqan’ (versículos 1, 2). ¿Diospa kamachikuyninkunata mana kasukuq runakunaq nisqanman hinachu ruwarqan? Bibliaqa manan chayta willanchu. Ichaqa yachanchismi ídolo yupaychaq, runa wañuchiq kasqanta. Falso dioskunaq altarnintan ruwachirqan chaypin wawankunata sacrificiopi haywarqan, layqakuykunatan yacharqan, Jerusalén llaqtapi Dios yupaychana wasimanpas millay idolotan apaykurqan. Jehová Diosña kawsayta qorqan, askha kutitaña mana allin ruwasqanmanta willachirqan chaypas, manan kasukurqanchu (versículos 3-10).

Chayraykun Jehová Diosqa Babilonia llaqtaman apachirqan. Chay llaqtapiñan Manasesqa imayna kawsasqanpi yuyaymanarqan. Yaqapaschá idolonkuna mana yanapasqanta rikuspa repararqan yanqapaq kasqanta. Hinan yuyarirqan ñawpa tiempopi taytan yachachisqanta. Chaymi cambiayta qallarirqan. Biblian Manasés reymanta nin: “Diosnin Señorpa ñawpaqenpi huch’uyyaykukuspa rogaykukurqan”, nispa (versículos 12,13). ¿Pampachanmanchu Dios chhayna millay ruwasqanmanta?

Manasés khuyayta llakikusqanqa Diospa sonqonmanmi chayarqan. Chaymi Diosqa “mañakusqanta uyarirqan, hinaspan Jerusalenman kutichipurqan” (versículo 13). Huchanmanta pesapakusqanta rikuchinanpaqmi llapa ruwachisqan idolokunata altarkunatawan thunichirqan, hinaspa kamachisqan llaqtata kallpacharqan Jehová Diosta servinankupaq (versículos 15-17).

Sichus qanpas sinchita llakikushanki Dios mana pampachanasuykipaq hina qhawarikuspa chayqa, yuyariy Manasespa ejemplonta. Jehová Diosmi qelqachirqan chay ejemplota kallpachawananchispaq yachachillawanchistaqmi ‘hucha pampachaq’ kasqanta (Salmo 86:5; Romanos 15:4). Payqa manan imayna huchallikusqanchistachu qhawan, aswanpas imayna sonqowan pesapakusqanchistan. Sonqomanta pesapakuspa Diosmanta pampachayninta mañakunki, kallpachakunkitaq kawsayniykita cambianaykipaq chayqa, Manasés hinan Diospa sonqonman chayanki (Isaías 1:18; 55:6, 7).