Magin Duok ha Dios

“Hiya Nangita kan Jehova”

“INABAT ko nga diri gud ako takos,” siring han usa nga lalaki nga bumaya ha suruklan han Dios nga iya hinbaroan tikang ha kabata. Han gintatadong na niya an iya pagkinabuhi, nahadlok hiya nga bangin diri hiya mapasaylo han Dios. Kondi naliaw hiya han asoy han Biblia mahitungod kan Manases nga mababasa ha 2 Kronikas 33:1-17. Kon naabat ka nga diri ka takos ha pagpasaylo tungod han imo mga sala ha naglabay, maliliaw ka liwat han nahitabo kan Manases.

Hi Manases nagdaku ha pamilya nga mahadlukon ha Dios. An iya tatay nga hi Hesekia usa han pinakamaopay nga hadi han Juda. Natawo hi Manases mga tulo ka tuig katapos milagroso nga gindugtongan ni Jehova nga Dios an kinabuhi han iya tatay. (2 Hadi 20:1-11) Sigurado nga gintagad hiya han iya tatay sugad nga regalo tungod han kalooy han Dios ngan iginpasilsil ha iya an gugma ha putli nga pagsingba. Kondi diri ngatanan nga anak nasunod ha susbaranan han ira mga kag-anak. Sugad hito an nahitabo kan Manases.

Mga 12 anyos hi Manases han mamatay an iya tatay. Makasurubo, “nagbuhat [hiya] hadton maraot ha paniplatan ni Jehova.” (Bersikulo 1, 2) Naimpluwensyahan ba inin batan-on nga hadi han magsaragdon nga waray pagtagad ha tinuod nga pagsingba? Waray magsiring an Biblia. Nagsiring la ito nga hi Manases nagbuhat hin duro nga idolatriya ngan karaotan. Nagtukod hiya hin mga altar para ha palso nga mga dios, naghalad han iya kalugaringon nga mga anak, nagbuhat hin espiritismo, ngan nagbutang hin dios-dios ha templo ni Jehova ha Jerusalem. Matig-a an ulo ni Manases. Waray hiya pamati ha pauroutro nga pahamangno ni Jehova, an Dios nga nagpahinabo han iya milagroso nga katawo.—Bersikulo 3-10.

Ha urhi, gintugotan ni Jehova nga mabihag hi Manases han Babilonya. Samtang nakadto, nakapamalandong hiya han iya mga ginbuhat. Nasantop na ba niya nga waray hiya mapanalipdi han iya waray gahum ngan waray kinabuhi nga mga dios-dios? Nahinumdoman ba niya an mga igintutdo han iya mahadlukon ha Dios nga amay? Anoman an nahitabo, nagbag-o hi Manases. An asoy nasiring: ‘Hiya nangita kan Jehova an iya Dios, ngan nagpaubos gud. Ngan hiya nag-inampo ha Iya.’ * (Bersikulo 12, 13) Kondi, mapapasaylo gud ba han Dios an usa nga nakabuhat hin seryoso nga mga sala?

Nabantad an kasingkasing ni Jehova han sinsero nga pagbasol ni Manases. Ginpamatian ni Jehova an iya mga pakimalooy “ngan gindara liwat hiya ngadto ha Jerusalem dida ha iya ginhadian.” (Bersikulo 13) Sugad nga pamatuod han iya pagbasol, ginbuhat niya an tanan basi tadungon an iya mga sayop pinaagi ha pagkuha han mga dios-dios ha iya ginhadian ngan pagsagda ha katawohan nga ‘mag-alagad kan Jehova.’—Bersikulo 15-17.

Kon inaabat mo nga diri ka takos pasayloon han Dios tungod han imo mga sala ha naglabay, hinaot maliaw ka han nahitabo kan Manases. Ini nga asoy bahin han giniyahan nga Pulong han Dios. (Roma 15:4) Matin-aw, karuyag ni Jehova nga hibaroan naton nga “andam [hiya] ha pagpasaylo.” (Salmo 86:5) An importante ha iya diri an kadaku han sala han usa kondi kon ano an aada ha kasingkasing. An makasasala nga nag-aampo, nagbabasol, nabaya ha iya sayop nga binuhatan, ngan nangangalimbasog ha pagbuhat han husto mahimo pasayloon ni Jehova, sugad han nahitabo kan Manases.—Isaias 1:18; 55:6, 7.

[Footnote]