Kwestin Blong Olgeta We Oli Ridim Magasin Ya . . .

?From Wanem Setan i Yusum Wan Snek Blong i Toktok Long Iv?

▪ Ating yu agri finis long ol samting we oli stap long pej 8, we i talem se Setan nao i yusum snek blong toktok long Iv. Baebol i tijim samting ya. Be, maet yu stap tingting se, ‘?From wanem, wan spirit man we i gat bigfala paoa i yusum wan snek, sem mak olsem wan man i mekem voes blong hem i kamaot long wan doli?’

Baebol i tokbaot ol plan blong Setan se oli “ol giaman trik.” Yes, samting we i hapen long Iv i pruvum samting ya. (Efesas 6:11) Samting we i hapen long gudfala ples long Iden i no wan kastom stori nomo blong wan anamol we i save toktok. Hem i wan tru stori we i mekem yumi sek taem yumi luk olsem wanem Setan i waesgud blong wokem ol plan we i blong pulum ol man oli gowe long God. ?Hem i mekem samting ya olsem wanem?

Setan i makemgud man we bambae hem i trikim. Long taem ya, Iv i yang moa long olgeta samting we God i mekem long yunives. Iv i no gat naf save, ale Setan i plan blong trikim hem mo switim hem. Snek i wan anamol we i waes blong mekem trik. Taem Setan i haed biaen long snek, hem i haedem gud plan blong hem. (Jenesis 3:1) Mo tu, i gud blong tingbaot samting we hem i winim taem hem i mekem olsem se snek ya i stap toktok.

Faswan samting se, Setan i pulum intres blong Iv. Iv i save se ol snek oli no save toktok. Man blong hem nao i putum nem blong evri anamol, wetem snek tu, afta we hem i stadi gud long olgeta. (Jenesis 2:19) I sua se Iv tu i bin stadi gud long anamol ya we i waes blong mekem trik. Taswe, trik blong Setan i pulum tingting blong Iv, i mekem we Iv i putum fulwan tingting blong hem long wan long ol samting we God i putum tabu long hem we i stap long gudfala ples ya long Iden. Mo nambatu samting se, ?sipos snek ya i stap haed long ol branj blong tri we God i putum tabu long hem, bambae Iv i gat wanem tingting? Maet Iv i stap tingting se: ‘?Ating snek ya i toktok from we hem i kakae frut blong tri ya?’ mo sipos i olsem, ‘?wanem samting bambae i kamaot sipos mi tu mi kakae frut ya?’ Yumi no save tingting blong Iv mo yumi no save sipos snek ya i testem frut ya smol, be yumi save se taem snek i talem long Iv se frut ya bambae i mekem hem i kam “olsem God,” Iv i rere nomo blong bilivim giaman toktok ya.

Ol tok we Setan i talem oli soemaot plante samting. Hem i planem wan tingting we i mekem Iv i gat tu tingting. Setan i stap talem se God i stap holem bak wan gudfala samting long Iv mo i stap blokem fasin fri blong hem blong nating nomo. Sipos samting we Iv nomo i wantem i bigwan moa long lav we hem i gat long God ya we i givim evri samting long hem, ale long ples ya, plan blong Setan i save wok gud. (Jenesis 3:4, 5) Yes, yumi save se plan blong Setan i wok. Iv mo Adam tufala i no wokem lav ya we i stret long hat blong tufala, mo tufala i no gat fasin blong talem tangkiu long Jehova. ?Wanem tingting blong yu? ?Yu no ting se Setan i stap leftemap wan kaen fasin olsem tede, fasin we man i tingbaot ol samting we hem wan nomo i wantem mo i mekem eskius se fasin olsem i oraet nomo?

?Mo wanem i pulum Setan blong mekem olsem? ?Hem i wantem wanem? Long garen blong Iden, Setan i traem haedem hem wan mo samting we hem i wantem. Be sloslo, tingting blong hem i kamaot klia. Taem hem i traem Jisas, Setan i save se bambae hem i no save haedem tingting blong hem. Ale hem i go stret long Jisas mo i talem se: “Yu bodaon long mi, yu mekem wosip long mi.” (Matiu 4:9) Yes, longtaem finis, Setan i jalus from wosip we i go long Jehova God. Bambae hem i mekem eni samting blong blokem ol man blong oli no mekem wosip long Jehova mo blong mekem se God i no glad long wosip we oli mekem i go long hem. Hem i laekem tumas blong spolem fasin blong ol man blong holemstrong long God.

Baebol i soemaot klia se Setan i wan man blong mekem rabis plan blong kasem ol samting we hem wan nomo i wantem. Yumi mas glad se “yumi savegud ol plan blong Setan” from we long rod ya nao, yumi save lukaot gud blong Setan i no trikim yumi olsem we hem i mekem long Iv.—2 Korin 2:11.