Tepet na Saray Manbabasa . . .

Akin et Angusar si Satanas na Uleg Diad Impitongtong to’d si Eva?

▪ Nayarin mipakna ka ed samay nibaga ed pahina 8, a si Satanas so talagan akitongtong ed si Eva tan inusar to labat so uleg. Ibabangat itan na Biblia. Balet nayarin isipen mo, ‘Akin a mangusar na uleg so sakey a makapanyarin espiritu a singa ventriloquist a manguusar na puppet?’

Tinukoy na Biblia iray pakana nen Satanas bilang ‘masilib iran paraan,’ tan pruebaan iya na samay agawa ed Eden. (Efeso 6:11) Aliwa iman ya is-istorya labat nipaakar ed sakey ya ayep a makasalita; sakey itan a makapakebbiew ya alimbawa na masilib iran estratehiya nen Satanas pian niyarawi iray totoo ed Dios. Akin a nibaga tayon ontan?

Maalwar ya pipilien nen Satanas iray biktimaen to. Si Eva so sankaugawan ya intelihentin pinalsa ed saman diad interon uniberso. Lapud amta nen Satanas ya daiset ni amta to, sikatoy pinatitan tan tinukso to. Masilib ton inyamot iray matangas tan maambisyon iran getma to diad impangusar to na uleg, sakey ya masilib ya ayep. (Genesis 3:1) Nengnengen pa met so agawaan to lapud pinapaway ton samay uleg so mansasalita.

Unona, talagan asagyat nen Satanas so imano nen Eva. Amta nen Eva ya agmakasalita iray uleg; nayarin inaral nin maong nen asawa to so amin ya ayayep insan to nginaranan iratan, pati say uleg. (Genesis 2:19) Tan seguradon naobserbaan met nen Eva iyan masilib ya ayep. Kanian asagyat ed saman ya pakana nen Satanas; nipaarap so imano to ed samay saksakey ya isesebel ed sikato diad hardin. Komadua, no say uleg et wadman ed sanga-sanga na isesebel ya kiew, anto kasi nayarin naisip nen Eva? Agto kasi inrason ya sayan abeban klase tan agmakasalitan ayep et angan na bunga kanian akapansalita? No baleg so agawaan na samay bunga ed sakey ya uleg, anto met kasi nagawaan na satan ed sikato? Agtayo naseguro no antoy inisip nen Eva odino kasin angan imay uleg na bunga, balet amta tayo ya nen imbaga na uleg ed si Eva ya sikatoy magmaliw ya ‘singa Dios’ no mangan na bunga, anisian tampol ed saman a tila.

Dakel ni naamtaan tayo ed saray salitan inusar nen Satanas. Impanduaruwa to si Eva, ya impasagilig ton walay isisiblet na Dios ed sikato kanian nasesebelan. Magmaliw labat ya epektibo so pakana nen Satanas no mas importante ed si Eva so sarili to nen say panangaro to ed Dios ya angiter ed sikato na amin a walad sikato. (Genesis 3:4, 5) Makapaermen, epektibo so taktika nen Satanas; anggapo’d puso di Adan tan Eva imay klase na panangaro tan apresasyon ed si Jehova a nepeg komon a walad sikara. Agta ontan met a panagkatunongan tan inkamakasarili so isusugsog nen Satanas natan?

Anto balet so motibo nen Satanas? Anton talagay labay to? Diad Eden et sinali ton iyamot so tuan inkasikato tan say motibo to. Balet, sinmabi panaon, impaamta toy inkasikato. Sanen tinukso toy Jesus, amta ton agto la itan niyamot. Kanian diretsaan ya imbaga to’d si Jesus: “Ondakmomo ka tan mandayew ka ed siak a maminsan.” (Mateo 4:9) Mapatnag sirin, abayag lan panibegan nen Satanas so panagdayew ya iiter ed si Jehova a Dios. Gawaen toy anggaan na nayarian to pian kontraen itan a panagdayew. Labalabay ton deralen so katooran ed Dios.

Malinew ya ipapaamta na Biblia a talagan manggaway paraan si Satanas pian sumpalen iray getma to. Maong labat “ta aliwa itayon andian na pikakabat ed saray paraan to,” kanian agto tayo natilaan a singa ed si Eva.​—2 Corinto 2:11.