Ñawiriqkuna yachayta munanku

¿Imaraykutaq Satanás katariniqta Evata parlarqa?

▪ Kay revistap 8 paginanpi rikunchikjina, Biblia imaynatachus Edén huertapi Satanás katarita munayninmanjina apaykachasqanta rikuchiwanchik. Satanás atiyniyuq kaspa, ¿imaptin katarita apaykacharqa chʼawkiyananpaq?

Diospa Palabranqa, Satanás saqra yuyaywan “urmachiyta” munawasqanchikta, sutʼita reparachiwanchik. Edén huertamanta yachakusqanchik chayta rikuchiwanchik (Efesios 6:11). Mana cuentollachu, manaqa Kuraq Supay chayjina tuqllasniqta Diosmanta karunchayta munawasqanchikta rikuchin. Imaptinchus chayjina tuqllata apaykachasqanta qhawarina.

Satanás pitachus chʼawkiyananta allinta akllarqa. Eva pisi yuyayniyuq, tukuy imamanta qhipa ruwasqa kasqanrayku, urmananpaq juk saqra tuqllata wakichirqa. Kataripis parlachkanmanjina yuyachiyta munarqa, monte animalesmanta yuyaysapa kasqanrayku. Jinamanta Satanasqa pichus kasqanta, imatachus ruwayta munasqanta ima, kataripi pakarqa (Génesis 3:1). Chantapis wak imaspiwan pantachirqa.

Qallarinapaq, katari mana parlananpaq ruwasqa kasqanrayku, Satanás Evap yuyayninta rikchʼarichirqa. Manataq qunqanachu Adán tukuy animalesta —kataritapis— sumaqta riqsisqanta, imaraykuchus tukuyninkuman sutista churarqa, chayrayku Evapis katarita riqsinmanchá karqa (Génesis 2:19). Eva, katarip nisqanta yachaytapuni munasqanrayku, mana mikhunanku sachʼap puquyninta muqʼirqa. Kayta nillasunmantaq, ichapis katari sachʼa patapi kachkarqa. Chayrayku Kuraq Supaypa tuqllanqa katari sachʼap puquyninta mikhusqanrayku parlachkasqanta Evata yuyachinman karqa. Ichapis nirqa: “Kay puquy kataripi jinata ruwan chayqa, ¿imataq kanman mikhuykuptiyrí?”. Eva chayjinata yuyasqanta, katari chay sachʼap puquyninta mikhusqanta ima, mana yachanchikchu. Chaywanpis katari “Dios jina” kankichik nispa, Evata creechisqanta yachanchik.

Satanás sumaqta yuyaychakurqa. Jehová, Evamanta allin kaqta pakachkasqanta, sapallan munayninta akllayta atisqanta ima yuyachirqa, chaywantaq Jehová Diosmanta iskaychachirqa. Satanasqa Eva Diosta astawan munakunantaqa pichus tukuy imata qurqa, saqra munayninwan atipachikunanta yacharqa (Génesis 3:4, 5). Llakiyninchikpaqqa, Satanaspa munayninmanjina juntʼakurqa. Eva, Jehovaman munakuyninta, agradecesqa kayninta ima, mana wiñachisqanta sutʼita rikuchirqa, chayllatataq Adanpis rikuchirqa. ¿Manachu kay tiempopipis Kuraq Supay runasta chayjina saqra yuyaykunawan Jehovamanta karunchachin?

¿Imatá chay tuqllawan Satanás munachkarqa? ¿Imatataq suyachkarqa? Edén huertapi pichus kasqanta, imatachus munasqanta ima pakarqa, qhipamantaq mana pʼinqakuspa rikuchikurqa. Jesusta chʼawkiyananpaq ni ima animaltapis apaykacharqañachu, Satanás imatachus munasqanta sutʼita nirqa: ‘qunqurikuspa yupaychaway’ nispa (Mateo 4:9). Jehová yupaychasqa kasqanmanta, Satanás mayta envidiakun, manaña yupaychanankupaqtaq tukuy imata ruwayta munasqanta sutʼi rikukun. Runas Diosta mana kasukuptinkutaq mayta kusikun.

Bibliaqa, Kuraq Supay may yuyayniyuq kasqanta, chʼawkiyayta munawasqanchikta ima, willawanchik. ‘Saqrata ruwayta munawasqanchikta’, tuqllasninta ima riqsinchik, chayrayku mana Evajina chʼawkiyachikunachu (2 Corintios 2:11).