ʻEke Heʻetau Kau Lautohí . . .

Naʻe Fakatupu ʻe he ʻOtuá ʻa e Tēvoló?

▪ Koeʻuhi ʻoku pehē ʻe he Tohi Tapú ko e ʻOtuá naʻá ne “ngaohi ʻa e meʻa kotoa pe,” kuo fakaʻosiʻaki ai ʻe he niʻihi ʻoku pau pē ko e ʻOtuá naʻá ne fakatupu ʻa e Tēvoló. (Efeso 3:9; Fakahā 4:11) ʻOku fakahaaʻi mahino ʻe he Tohi Tapú naʻe ʻikai.

Naʻe fakatupu ʻe Sihova ʻa e tokotaha ko ia naʻe hoko ko e Tēvoló. Ko ia ai, ko e ʻi ai ʻa e tokotahá ni ʻi he tuʻunga ko e tokotaha-fakafepaki tefito ki he ʻOtuá kuo pau ke fehoanaki ia mo e meʻa ʻoku fakahaaʻi ʻe he Tohi Tapú fekauʻaki mo Sihova ʻi hono tuʻunga ko e Tokotaha-Fakatupú. ʻOku pehē fekauʻaki mo ia: “ʻOku haohaoa ʻene ngaue; ko ʻene ngaahi founga kotoa ʻoku fakakonisitutone: Ko e ʻOtua ʻo e Moʻoni, pea taʻe haʻane hala, ko e faitotonu ia mo haohaoa.” (Teutalonome 32:3-5) Mei he fakamatala ko iá, ʻe lava ke tau fakaʻosiʻaki ai ko Sētané naʻe haohaoa mo māʻoniʻoni ʻi ha taimi ʻa ia ko e taha ia ʻo e ngaahi foha ʻāngelo ʻo e ʻOtuá. ʻI he Sione 8:44 (PM), naʻe pehē ai ʻe Sīsū ko e Tēvoló “nae ikai nofo mau i he mooni,” ʻo fakahuʻunga ai naʻe moʻoni mo taʻemele ʻa Sētane ʻi he taimi ʻe taha.

Kae kehe, ʻi he hangē ko e toenga ʻo e meʻamoʻui ʻatamaiʻia ʻa Sihová, ko e ʻāngelo naʻe hoko ko Sētané naʻá ne maʻu ʻa e tauʻatāina ke fili ʻi he tonú mo e halá. ʻI hono fili ha ʻalunga fakafepaki ki he ʻOtuá pea fakaʻaiʻai ʻa e ʻuluaki ongo meʻa fakaetangatá ke kau mo iá, naʻá ne ʻai ai ia tonu ko Sētane ʻa ia ʻoku ʻuhingá ko e “Tokotaha-Talitekeʻi.”—Senesi 3:1-5.

Ko e meʻamoʻui laumālie fulikivanu ko iá naʻá ne toe ʻai ia tonu ko e Tēvolo, ko hono ʻuhingá ko e “Tokotaha Lauʻikovi Loi.” Ko Sētané ko e tokotaha fakangalingali taʻehāmai ia naʻe tuʻu mei mui ʻi he ngatá ʻo ne ngāueʻaki kākā ʻa e ngaahi loi ke kākaaʻiʻaki ʻa ʻIvi ke ne talangataʻa ki he lao ʻa e Tokotaha-Fakatupú naʻe fakahaaʻi mahinó. Ko e ʻuhinga ia naʻe ui ai ʻe Sīsū ʻa Sētane ‘koe tamai oe loí.’—Sione 8:44, PM.

Ko ia naʻe anga-fēfē lava ha meʻamoʻui laumālie haohaoa—ʻa ia naʻe ʻikai haʻane vaivaiʻanga ʻi loto pe ngaahi tākiekina fulikivanu mei tuʻa—ke hoko ʻo hehema fehālaaki? ʻOku hā mahino naʻá ne mānumanu ki he lotu naʻe totonu ke fai pē ki he ʻOtuá peá ne sio ki he malava ke ʻomai ʻa e faʻahinga ʻo e tangatá ki he malumalu ʻo ʻene pulé kae ʻikai ko e pule ko ia ʻa Sihová. ʻI he hokohoko atu ʻa e nōfoʻi ʻi he ʻamanaki ko eni ki he tuʻunga-pulé kae ʻikai ke tukuangé, naʻá ne fakaʻatā ai ʻa e fakakaukaú ke fakalalahi ʻo iku ai ʻo ne fai ha ngāue ki ai. ʻOku fakamatalaʻi ʻa e founga ko ení ʻi he tohi ʻa Semisí: “ʻOku ʻahiʻahiʻi ʻa e tangata taki taha he tohoaki ia ʻe heʻene holi aʻana, mo taki ʻaki ha mounu. Faifai pea tuʻituʻia ʻa e holi ko ia, ʻo ne fanauʻi ha angahala.”—Semisi 1:14, 15; 1 Timote 3:6.

Ke fakatātaaʻi: Sioloto atu ki ha ʻakauniteni ʻokú ne sio ki ha faingamālie ke ngāueʻaki pōtoʻi ʻa e ngaahi lēkōtí ʻi ha founga ke kaihaʻa ai mei heʻene kautahá ki haʻane tupu fakafoʻituitui. Te ne tukuange fakavave nai ʻa e fakakaukau fehālākí. ʻI hono kehé, kapau ʻokú ne nōfoʻi fakakaukau ki he malava ke hoko ení, ʻe kamata leva ke ne saiʻia ʻi he fakakaukaú pea ʻoku ngalingali te ne fakahoko ia. Kapau ʻokú ne fai ia, ko hono moʻoní kuó ne ʻai ia tonu ko ha kaihaʻa. Kapau ʻokú ne loi fekauʻaki mo ʻene hiá, ʻokú ne hoko foki ai ko ha tokotaha loi. ʻI ha founga meimei tatau, ʻi hono fakatupulekina ʻa e ngaahi holi fehālākí pea ngāue ki aí, ko e ʻāngelo ʻa ia naʻe fakatupu ʻe he ʻOtuá naʻá ne ngāueʻaki ʻa ʻene tauʻatāina ke filí ke kau ai ʻi ha kākā mo e angatuʻu ki heʻene Tamaí, ʻo ne ʻai ia tonu ko Sētane ko e Tēvoló.

Ko e meʻa ke fakamālōʻiá, ko Sētane ko e Tēvoló ʻe fakaʻauha ia ʻi he taimi totonu ʻa e ʻOtuá. (Loma 16:20) Lolotonga iá, ko e kau lotu ʻa Sihova ko e ʻOtuá ʻoku nau ʻilo fekauʻaki mo e faʻufaʻu ʻa Sētané pea maʻu ʻa e maluʻi mei heʻene ngaahi fāliungá. (2 Kolinito 2:11; Efeso 6:11) Ko ia ai ʻi he meʻa kotoa “tali tekeʻi ʻa e Tevolo, pea te ne hola meiate kimoutolu.”—Semisi 4:7.

[Fakatātā ʻi he peesi 12]

ʻI hono fili ha ʻalunga fakafepaki ki he ʻOtuá, ko ha meʻamoʻui ʻāngelo haohaoa naʻá ne ʻai ia tonu ko Sētane