Swivutiso Swa Vahlayi . . .

Ha Yini Sathana A Tirhise Nyoka Ku Vulavula Na Evha?

▪ Hilaha swi hlamuseriweke hakona eka tluka 8, u nga pfumela leswaku Sathana u tirhise nyoka ku vulavula na Evha. Leswi hi swona leswi Bibele yi swi dyondzisaka. Hambiswiritano, u nga ha tivutisa, ‘Ha yini xivumbiwa xa moya lexi nga ni matimba xi vulavule na Evha hi ku tirhisa nyoka?’

Bibele yi vula leswaku Sathana u tirhisa “marhengu” leswaku a kanganyisa vanhu naswona leswi swi tikomba swi n’wi tirhela. (Vaefesa 6:11) Leswi hi swi voneke entangeni wa Edeni i xikombiso lexi hlamarisaka xa ndlela leyi Sathana a nga tlhariha ha yona. Hi ndlela yihi?

Sathana a a xi tiva kahle xikongomelo xakwe. Evha a a tlharihile, kambe a ku ri ni swivumbiwa leswi a swi tlharihe ku n’wi tlula. Leswi a nga ri na ntokoto, Sathana u n’wi kanganyisile. Hi ku tirhisa nyoka leyi a yi ri ni vuxiyaxiya swinene, u endle leswaku Evha a nga swi voni swikongomelo swakwe. (Genesa 3:1) Xiya swin’wana leswi a swi hetisiseke.

Xo sungula, Sathana u endle leswaku Evha a n’wi yingisa handle ko kavanyeteka. Evha a a swi tiva leswaku tinyoka a ti vulavuli; nuna wakwe hi yena la nyikeke swiharhi hinkwaswo mavito, ku katsa ni nyoka leyi a nga rhanga hi ku yi xiyisisa. (Genesa 2:19) Swi nga ha endleka leswaku Evha na yena a a swi tiva leswaku xivumbiwa lexi xi ni vuxiyaxiya. Rhengu ra Sathana ri endle leswaku Evha a lava ku tiva swo tala; ri endle leswaku miehleketo yakwe yi dzika eka murhi lowu yirisiweke eka swilo hinkwaswo leswi a swi ri entangeni. Xa vumbirhi, loko nyoka yi ti tumbete eka murhi lowu yirisiweke, i yini leswi Evha a a fanele a tivutise swona? Kumbexana a a fanele a tivutise leswi, leswi nyoka yi nga vulavuliki, xana a yi sunguli ku vulavula hikwalaho ka leswi yi dyeke eka murhi lowu yirisiweke? Loko mbhandzu lowu wu kote ku endla leswaku nyoka yi vulavula, xana yena a wu ta n’wi endla yini? A hi tiyiseki leswaku i yini leswi teke emiehleketweni ya Evha naswona a hi swi tivi leswaku nyoka yi wu dyile kumbe a yi wu dyanga mbhandzu lowu, kambe leswi hi swi tivaka hileswaku loko nyoka yi n’wi byela leswaku mbhandzu lowu wu ta n’wi endla a “fana ni Xikwembu,” u ma tshembile mavunwa wolawo.

Marito lawa Sathana a ma tirhiseke ma vula swo tala. U endle leswaku Evha a kanakana hikuva u vule leswaku Xikwembu a xi n’wi naveleli leswinene naswona xi n’wi tsona ntshunxeko. Ku humelela ka rhengu ra Sathana a swi titshege hi ku va Evha a nga ha xi rhandzi ngopfu Xikwembu lexi n’wi nyikeke swilo hinkwaswo. (Genesa 3:4, 5) Rhengu ra Sathana ri tirhile; Adamu na Evha a va ri kombisanga rirhandzu ni ku tlangela loku a va fanele va ku komba Yehovha. Xana Sathana a nga tirhisi marhengu lama fanaka ninamuntlha?

Xana a ku ri xihi xikongomelo xa Sathana? Entangeni wa Edeni u titumbetile naswona a nga xi vekanga erivaleni xikongomelo xakwe. Kambe hi ku famba ka nkarhi u humelele erivaleni. Loko a ringa Yesu u swi xiyile leswaku a swi nge n’wi pfuni nchumu ku titumbeta. Kutani u byele Yesu hi ku kongoma a ku: “Nkhinsama u ndzi gandzela.” (Matewu 4:9) Swi le rivaleni leswaku Sathana i khale a ri ni mavondzo loko vanhu va gandzela Yehovha Xikwembu. A nga endla hinkwaswo leswi a nga swi kotaka leswaku a va sivela ku gandzela Xikwembu. U lava leswaku hi nga tshembeki eka Xikwembu.

Bibele yi swi veka erivaleni leswaku Sathana u tiyimisele ku hambukisa vanhu va Xikwembu. A hi fanelanga hi va swiphukuphuku ku fana na Evha “hikuva ha ma tiva makungu yakwe.”—2 Vakorinto 2:11.