Ki Kabakalañi Manyalo A Mañata ha Sinyehanga?

“Bafalisi ni bona ba taha ku [Jesu], ba mu lika, inze ba li: Kikuli muuna u lumelezi ku leleka musalaa hae, ka mulatu kaufela?”—Mateu 19:3.

BATU ba bañwi ba ne ba pilile mwa miteñi ya Jesu ne ba kakanya ka za haiba manyalo a swanela ku inelela. Jesu naa bulelezi batu ba kuli: “Ha mu si ka bala kuli Ya naa ba ezize kwa simuluho, naa ezize muuna ni musali? Mi a li: Kabakaleo, muuna u ka tuhela ndataahe ni mahe, a kumalele musalaa hae, mi ba babeli ikaba nama i liñwi feela. Kuli mane ha ba sa li ba babeli, kono ki nama i liñwi feela. Cwalehe, Mulimu saa kopanyize hamoho, mutu a si ke a si kauhanya.” * (Mateu 19:4-6) Ku si na ku kakanya, mulelo wa Mulimu ne li wa kuli manyalo a inelele.

Mwa linaha ze ñata kacenu, 40 pesenti kamba ku fitelela ya manyalo kaufela, a ‘kauhanyizwe,’ mane ni ku kena mwa telekano. Kana kelezo ya mwa Bibele ka za linyalo ha i sa kona ku tusa se siñwi? Kana se si tahisanga ku sinyeha kwa manyalo ki taba ya kuli tukiso ya linyalo ne i si ka tomiwa hande?

Mu nyakisise mutala wo: Baana ba babeli ni basali ba bona ba leka mota ya mufuta wo swana. Bo muuna ni musali ba pili ba babalela hande mota ya bona ni ku i zamaisanga ka tokomelo. Mota ya bona ha i sinyehi. Bo muuna ni musali ba bubeli bona ha ba babaleli mota ya bona, mi mane ha ba i zamaisangi ka tokomelo. Mota ya bona ya sinyeha mi ba tuhela ku itusisa yona. Ki nto mañi ye tahisize kuli mota ya bo muuna ni musali ba bubeli i sinyehe—kana mulatu ki wa mota kamba ki wa bañi ba yona? Kaniti, mulatu ki wa bañi ba mota.

Ka ku swana, ku sinyeha kwa manyalo a mañata ha ku talusi kuli tukiso ya linyalo ne i si ka tomiwa hande. Manyalo a mañata a tiile a bonisa hande kuli tukiso ya linyalo ne i tomilwe hande. Manyalo a tiile a tahisanga tabo ni buiketo ku ba ba mwa linyalo leo, mabasi, ni batu ba ba pila mwa silalanda kaufela. Kono sina mota, linyalo li tokwa ku babalelwa ni ku lukisiwa nako ni nako ilikuli li kone ku inelela.

Ku si na taba kuli mu ba banca kamba mu ba kale mwa linyalo, kelezo ya mwa Bibele ya mo mu kona ku babalela ni ku tiiseza linyalo ya tusa luli. Ha lu boneñi mitala ye miñwi ye bonisa cwalo ye fa makepe a tatama.

[Litaluso za kwatasi]