Duzu Ati A Agyalɛ Dɔɔnwo Ɛlɛsɛkye A?

“Falasiima bie rale Gyisɛse anwo ɛkɛ radole ye agyiba bizale ye kɛ, ‘Asoo yɛ mɛla ne maa adenle kɛ nrenya kola bɔ ɔ ye ewole wɔ edwɛkɛ biala anwo?’”—Mateyu 19:3.

ƐNEE menli mɔɔ wɔ Gyisɛse mekɛ zo la bie mɔ te nganeɛ kɛ saa menli nwiɔ gya a bɛnrɛhola bɛnrɛbɔ nu bɛnrɛdɛnla dahuu. Bie mɔ noko dwenlenle kɛ ɔnle kɛ bɛtɛnla bɛbɔ nu dahuu. Ɛhye ati, Gyisɛse hanle hilele bɛ kɛ: “Bɛtɛkengale Nyamenle Edwɛkɛ ne mɔɔ se: Mɔlebɛbo ne Nyamenle bɔle bɛ nrenya nee raalɛ na ɔhanle kɛ, ‘Ɛhye ati nrenya bagyakyi ɔ ze nee ɔ nli na ɔ nee ɔ ye bɛabɔ nu, na bɛ mu nwiɔ bɛayɛ sonla ko la ɔ’? Yemɔti ɛnee bɛnle nwiɔ bieko na bɛle ko. Zɔhane ati mɔɔ Nyamenle ɛha ɛbɔ nu la, ɔnle kɛ awie biala kpakye nu.” * (Mateyu 19:4-6) Ɔda ali kɛ ɛnee Nyamenle adwenle mɔɔ ɔlɛ a le kɛ saa menli nwiɔ gya a ɔnle kɛ bɛtete nu ɛlɛ.

Ɛnɛ, wɔ maanle bie mɔ anu, bɛdua ewole ɛbɔlɛ zo ‘bɛkpakye’ agyalɛ ɛya ngyɛnu 40 anu. Asoo folɛ mɔɔ Baebolo ne tu ye wɔ agyalɛ nwo la mekɛ ɛkpa nwo? Asoo nvonleɛ mɔɔ wɔ agyalɛ ngyehyɛleɛ mumua ne anwo la ati a, nuhua dɔɔnwo ɛnyɛ kpalɛ a?

Suzu ndonwo ɛhye anwo: Agyalɛma nwiɔ tɔ kale ko ne ala bie. Mɔɔ lumua la nea bɛ kale ne azo boɛ na bɛka ye kɛnlɛma. Bɛ kale ne ɛnzɛkye. Mɔɔ tɔ zo nwiɔ la ɛnnyia mekɛ ɛnnea bɛ kale ne boɛ, yɛɛ eza bɛnga ye boɛ. Kale ɛhye sɛkye na bɛngola ye boɛ yɛ. Duzu a manle kale ne mɔɔ tɔ zo nwiɔ la zɛkyele a—ɔvi kale ne anzɛɛ kale ne amenle mɔ ɔ? Ɔda ali kɛ nvonleɛ ne dɔɔnwo vi kale ne amenle mɔ.

Zɔhane ala a agyalɛ dɔɔnwo mɔɔ sɛkye la noko ɛngile kɛ nvonleɛ wɔ agyalɛ ngyehyɛleɛ ne anwo a. Agyalɛ mgbe dɔɔnwo ɛyɛ boɛ na ɔdi edwɛkɛ ɛhye anwo daselɛ. Agyalɛ ɛhye mɔ maa menli, mbusua, nee kpalɛzoamra anye die. Noko kɛmɔ ɔde ye wɔ kale nwo la, ɔhyia kɛ bɛnea agyalɛ zo boɛ na bɛmiemia nu dahuu amaa yeagyinla.

Saa ɛgyale la yehyɛ anzɛɛ ɔtɛkyɛle bɔbɔ a, Baebolo ne folɛ mɔɔ ɔtu ye wɔ kɛzi ɔwɔ kɛ bɛsiezie agyalɛ na bɛmiemia nu la boa maa ɔgyinla. Ɛbanwu ɛhye anwo neazo bie mɔ wɔ edwɛkɛ mɔɔ doɔdoa zo la anu.

[Ɔ bo ɛkɛ ne edwɛkɛ]