¿Imanirtaq raslla rakikäriyan?

“Fariseucunaqa, Jesusman witïcur yachatsiquinincho pantatsita munar[mi], queno tapuyarqan: —¿Leynintsiccho permitincu warminpita juc nuna diborsiacurinanpaq ima achäquillapis?” (Mateo 19:3).

¿PUËDEYANMANTSURAQ casädokuna mana imëpis rakikarnin kawakïta? Ima achäkillapis casädokuna divorciakuyanqan alli o mana alli kanqanta Jesusta tapuyaptinmi, kënö nirqan: “¿Manacu Diospa palabranta leyiyashqa cayanqui ‘que patsata camarnin, warmita ollquta camanqanta’? Jina nerqanmi: ‘Tsemi, ollqu jaqirenqa mamanta yayanta warmiwan juntacäyänanpaq. Y ishcancunapis jucnollanam cayanqa’ [...]. Tsemi ishcaqnatsu cayan, sinoqa jucllellanam. Tseno captinmi, Dios juntashqantaqa mana pipis raquinmantsu” (Mateo 19:4-6). * Kë ninqanqa clärom rikätsikun, casädokuna imëpis junto kawakuyänanta Diosnintsik munanqanta.

Tsënö kaptimpis, më tsë markakunachömi casi pullannö kaq casädokuna divorciakuyan. Tsëqa, ¿mananatsuraq yanapakun casädokunapaq Bibliapa yachatsikïnin? ¿Mananatsuraq välin casakï?

Këman pensarishun: ishkë casakushqakuna cada uno cärronkuna rantiyanman. Huknin kaqqa shumaqlla manejarnin y imëpis altsaparnin mushoqtanölla katsikunman. Pero huknin kaq casakushqana lluta manejanman y malograptimpis ima qokunmantsu. Tsënöpa pakir ushakäriptin, haqiriyanman. ¿Pichötaq culpa? ¿Cärrochöku? Manam, antis duëñokunam culpayoqqa kayan.

Tsaq tsënöllam casädokunawampis pasan, wakinkuna divorciakuyanqanqa manam casakï mana välenqantatsu rikätsikun. Antis mëtsika millón casädokunam wayinkunachö y markankunachö kushishqa kawakuyan. Casakïqa imëka cärrota rantinömi, mana ushakänampaq y imëpis mushoqnölla kanampaqqa, allim cuidayänan.

Casakushqakuna shumaq y alli kawakuyänampaqqa, Bibliachömi atska y yanapakoq yachatsikïkuna kan. ¿Munankimantsuraq wakinllatapis yachakïta? Qateqninchömi tsë yachatsikïkuna këkan.

[Päginapa ura kuchunchö willakï]