¿Imanasqataq manaña unaypaqñachu?

Pantachinankupaqmi fariseokuna Jesusman asuykuspa nirqaku: “¿Diospa leyninpi permitenchu casado runa imamantapas tumpaykuspa warminmanta rakikuyta [otaq divorciakuyta]?”, nispa (Mateo 19:3).

¿ATINMANKUCHU tukuy tiempo kuska kawsakuyta? Imamantapas tumpaspa rakikunanpaq tapuptinkum Jesusqa casado vidaqa tukuy tiempopaq kasqanta explicarqa: “¿Manachu Bibliapi leerqankichik kay pachapa qallariyninpi qaritawan warmita unanchaqpa nisqanta? Paymi nirqa: ‘Qarim tayta-mamanta saqespa hukllawakunqa warminmanña chaymi iskayninku huk runa hinallaña kanqaku’. Chaynaqa manam iskayñachu kanqaku aswanqa hukllañam. Chayraykum runaqa mana rakinmanchu Diospa kuskanchasqantaqa”, nispa (Mateo 19:4-6). * Sutillamá, Diosqa munanmi casado vidaqa unaypaq kananta.

Ichaqa achka nacionkunapim 10 casarakuqkunamanta 4 divorcianakunku. ¿Chaychu nichwan Bibliapa consejonkunaqa casado vidata manaña yanapasqanta? ¿Yanqapaqchu casado vidaqa qallarirqa?

Piensasun kaypi, sichum casarasqa iskay runakuna kaqlla carrota rantirunmanku. Hukninmi carronkuta sumaqllata manejaspa cuidanku hinaptinmi carroqa mana malograkunchu. Hukninñataqmi loco hina manejaspa mana cuidankuchu. Chaymi carronku malograkuruptin manaña servichikunkuñachu. Hinaptinqa ¿Pitaq huchayoq? ¿Carrochu? Manam, imayna servichikuqkunam.

Chaynam casado vidapas, ¿hukkuna divorciakuptinchu nichwan casarakuyqa mana allinpaq kasqanta? Manam. Millonnintin runakunam casado vidankupi kusisqa kawsasqankuta qawachinku. Imaynam carro mana malograkunanpaq cuidana, chaynam casado vidapas tukuy tiempo allinta kawsanapaqqa cuidanam.

Bibliapim tarikun casado vidapi kusisqa kawsakunapaq consejokuna, yanapanmi hayka wataña casarasqa kaqkunatapas. ¿Munawaqchu chay consejokunamanta yachayta? Hinaptinqa kallpanchaykikum qatiqnin yachachikuyta leenaykipaq.

[Willakuy]