Solisyon serten problenm

LABIB pa zanmen dir ki tou keksoz pou mars byen dan maryaz. Bondye ti enspir zapot Pol pour ekrir ki bann koup marye pou “ganny problenm dan [zot] lavi.” (1 Korentyen 7:28) Me en koup marye i kapab fer bokou pour diminyen lakantite problenm ki zot eksperyanse e ganny plis lazwa dan zot lavi maryaz. Egzamin sis problenm ki souvan leve ant bann msye ek madanm marye e vwar ki mannyer bann prensip Labib i kapab ede kan i ganny aplike.

1

PROBLENM:

“Mwan ek mon konzwen nou pe dekile avek kanmarad.”

PRENSIP LABIB:

“Verifye sa ki pli enportan.”​—FILIPYEN 1:10, NW.

Ou maryaz i enn parmi bann keksoz pli enportan dan ou lavi. I devret en priyorite. Alor verifye si ou progranm pe kontribye pour fer sa problenm leve. Pa les bann aktivite dan lavi toulezour fer ou ek ou konzwen viv sakenn pour li. Byensir, ou travay ek lezot sityasyon ki ou pa kapab evite i kapab fer ki zot pou tanporerman pa dan konpanni kanmarad. Me ou kapab e ou devret met en limit avek okenn keksoz ki ou annan kontrol lo la.  Par egzanp, sa letan ki ou pase dan ou pastan oubyen avek zanmi.

Par kont, serten konzwen i kapab rod travay an plis oubyen plizyer pastan pour fer, zis pour zot pa pas letan avek zot konzwen. An realite, sa bann dimoun pa pe “separe” avek zot konzwen, me zot pe sov problenm. Si ou ek ou konzwen i tonm dan sa kategori, ou bezwen rode kote problenm i ete e rezourd li. Zot lanmour pou ogmante e zot pou “vin en sel laser” dan en sans konplet, si zot partaz zot lavi ansanm.​—Zenez 2:24.

Konman serten in aplik sa konsey: En koup Ostralyen, Andrew * ek Tanji in marye pour di-z-an. Andrew i dir: “Mon’n aprann ki travay tro bokou e fer tro bokou lezot aktivite an deor travay i kapab met ou maryaz an danze. Alor, mwan ek mon madanm, nou fer letan pour koze e pour partaz nou santiman avek kanmarad.”

Dave ek Jane ki reste Leta-z-ini in marye pour 22-z-an. Zot dedye sak premye lanmwatye lasware pour zot partaz bann panse ek leksperyans avek kanmarad. Jane i dir: “Sa moman i sitan enportan ki nou pa les nanryen enterfer avek.”

2

PROBLENM:

“Sa relasyon nepli satisfer mwan.”

PRENSIP LABIB:

“Personn pa devret rod son prop lentere, me lentere son prosen.”​—1 KORENTYEN 10:24.

En dimoun ki konsernen zis avek sa ki i pe gannyen dan son maryaz, pa pou zanmen vreman ere, menm si i remarye plizyer fwa. Lavi maryaz i mars byen, selman ler sak konzwen i konsantre plis lo donnen olye resevwar. Zezi i dir akoz: “I annan plis lazwa pour donnen ki pour resevwar.”​—Akt 20:35.

Konman serten in aplik sa konsey: Maria ek Martin ki reste Meksiko in marye pour 39 an. Me zot lavi maryaz pa’n touzour fasil. Zot rapel enn sa bann moman difisil an partikilye. Maria i rapel: “Dan milye en gro diskisyon  nou de Martin, mon ti mank respe pour li e dir en keksoz ki ti ofans li. I ti vreman ankoler. Mon ti esey eksplik li ki mon ti’n dir sa dan lakoler, me pa sa ki mon ti oule dir. Me i pa ti konpran mwan.” Martin i dir: “Ler nou ti pe dispit, mon ti konmans mazinen ki nou nepli kapab kontinyen viv ansanm, e mon zis devret aret lalit pour fer sa maryaz marse.”

Martin ti anvi ganny respe son madanm. Maria, li, i ti a kontan son msye i konpran li. Ni enn, ni lot pa ti pe ganny sa ki zot ti anvi dan zot maryaz.

Ki mannyer zot in kapab rezourd sa problenm? Martin ti dir: “Mon ti pran letan pour les mon lakoler kalme e nou tou le de nou ti deside pour aplik bann konsey saz ki dan Labib lo ki mannyer pour demontre respe anver kanmarad e azir dan en fason zantiy avek kanmarad. Diran bann lannen ki’n pase, nou’n aprann ki menm si tanzantan problenm i kapab leve, nou kapab rezourd zot si nou priye pour ganny led Bondye e aplik konsey ki trouve dan Labib.”​—Izai 48:17, 18; Efezyen 4:31, 32.

3

PROBLENM:

“Mon konzwen pa pe pran son responsabilite.”

PRENSIP LABIB:

“Sakenn antre nou pou bezwen rann kont devan Bondye pour son prop lekor.”​—ROMEN 14:12.

Definitivman, en maryaz pa pou mars byen si zis en konzwen ki fer zefor pour fer li marse. Me sityasyon pou vin pli pir si tou le de konzwen i negliz zot responsabilite anver kanmarad, e an menm tan blanm kanmarad.

Si ou kontinyen mazin lo sa ki ou konzwen i devret pe fer, me i pa pe fer, ou pou fer ou lavi mizerab. Sa i pou leka, espesyalman si ou fer sa vin en leskiz pour ou pa pran ou prop responsabilite. Me par kont, si ou fer bokou zefor pour ou vin en bon msye oubyen en bon madanm, i tre probab ki ou lavi maryaz pou amelyore. (1 Pyer 3:1-3) Pli enportan ankor, kan ou fer sa, ou pe montre Bondye ki ou onor sa laranzman maryaz ki i’n met an plas, e fason ki ou azir pou fer li plezir en kantite.​—1 Pyer 2:19.

Konman serten in aplik sa konsey: I annan 38 an depi ki Kim ek son msye ki reste Kore in marye. Kim i dir: “Parfwa mon msye i ankoler avek mwan e i aret koz avek mwan. Mon pa ni menm konnen akoz. Sa i fer mwan santi konmsi son lanmour pour mwan in diminyen. Parfwa mon mazinen, ‘Akoz li i anvi mon konpran li, me li i pa esey konpran mwan?’”

Kim ti’n kapab konsantre lo sa ki son msye pa pe fer, e kontinyen mazinen ki sa sityasyon i enzis. Me o kontrer, i’n deside fer en lot keksoz. Kim i dir: “Olye gard rankin, mon’n aprann ki i pli bon pran linisyativ pour esey fer lape. Finalman, nou tou le de nou arive kontrol nou lakoler e koz lo sa problenm byen kalm.”​—Zak 3:18.

 4

PROBLENM:

“Mon madanm pa oule soumet.”

PRENSIP LABIB:

“Kris i sef tou zonm.”​—1 KORENTYEN 11:3.

En msye ki krwar ki son madanm pa oule soumet i devret premyerman analize e vwar si li i pare pour soumet avek Zezi Kri, son Sef. En msye i kapab fer sa par swiv legzanp ki Zezi in kite.

Zapot Pol ti ekrir: “Zot, bann mari, kontan zot madanm parey Kris in kontan [“kongregasyon,” NW] e in donn son lavi pour li.” (Efezyen 5:25) Zezi pa ti “konmann” son bann disip. (Mark 10:42-44) I ti donn son bann disip gidans ki ti kler e koriz zot kan i ti neseser. Me, i pa ti zanmen tret zot dan en fason dir. I ti zantiy avek zot e i ti pran an konsiderasyon zot limit. (Matye 11:29, 30; Mark 6:30, 31; 14:37, 38) I ti touzour met zot lentere avan sa ki pour li.​—Matye 20:25-28.

En msye i bezwen poz son lekor sa kestyon: ‘Eski pwennvi ki mon annan lo lotorite dan maryaz e lo bann madanm an zeneral i plizoumwen ganny enfliyanse par bann koutim lokal olye lo bann konsey ek legzanp ki trouve dan Labib?’ Par egzanp, ki ou panse lo en madanm ki pa tonm dakor avek pwennvi son msye e i eksprim son lekor dan en fason ferm me respektab? Dan Labib, Sara, madanm Abraam, i ganny felisite pour son bon legzanp konman en madanm ki ti soumet avek son msye. (1 Pyer 3:1, 6) Me par kont, kan i ti neseser, i ti dir sa ki i ti panse. Sa ti leka kan Abraam pa ti arive vwar serten danze ki ti en menas pour son fanmir.​—Zenez 16:5; 21:9-12.

I evidan ki Abraam pa ti tret Sara dan en fason ki ti fer li per pour dir son pwennvi. I pa ti dominer. Pareyman, en msye ki swiv konsey Labib pa pou fors son madanm pour fer tou sa ki li i anvi. Si i egzers son lotorite avek konpasyon, son madanm pou respe li.

Konman serten in aplik sa konsey: James ki reste Langleter in marye pour wit an. I dir: “Mon pe aprann pour pa fer okenn desizyon enportan san ki mon diskit avek mon madanm avan. Mon esey pa mazin zis mon lekor. O kontrer mon fer sir ki son lentere i pas avan sa ki pour mwan.”

George ki reste Leta-z-ini in marye pour 59 an. I dir: “Mon’n fer zefor pour tret mon madanm konman en konzwen entelizan e talante, me pa konmsi i pli enferyer ki mwan.”​—Proverb 31:10.

 5

PROBLENM:

“Mon msye pa pran okenn linisyativ.”

PRENSIP LABIB:

“En madanm ki vreman saz in batir son lakour, me sa enn ki bet i kas sa lakaz avek son prop lanmen.”​—PROVERB 14:1.

Si ou msye pa oule pran desizyon oubyen pa pran son responsabilite konman sef lakour, ou annan omwen trwa keksoz ou kapab fer. (1) Ou kapab fer remark lo son bann defo tou lazournen, (2) ou kapab pran son rol konman sef fanmir oubyen (3) ou kapab senserman felisit li pour nenport zefor ki ou vwar li fer. Si ou swazir enn ant sa de premye opsyon, ou pou detrir ou lakour avek ou prop lanmen. Sa trwazyenm opsyon pou ed ou batir oubyen ranforsi ou maryaz.

Bokou zonm i pli kontan ki zot madanm i demontre respe anver zot ki sa lanmour ki zot madanm i demontre pour zot. Alor, si ou fer ou msye santi ki ou annan respe pour li, andotmo, fer li santi ki ou apresye son zefor pour pran son responsabilite konman sef lafanmir e montre li ki kan i fer li i anmenn bon rezilta, i pou amelyore. Byensir, parfwa zot pa pou tonm dakor lo serten keksoz. Zot pou bezwen diskit lo la ansanm. (Proverb 18:13) Me parol ki ou swazir ek ton lavwa ki ou servi pou ed ou detrir oubyen batir ou maryaz. (Proverb 21:9; 27:15) Si ou eksprim ou lekor avek respe, i annan plis sans ki ou pou ganny sa rezilta ki ou anvi, setadir, en msye ki pare pour pran son responsabilite konman sef lafanmir.

Konman serten in aplik sa konsey: Michele ki reste Leta-z-ini in marye pour 30 an. I dir: “Lefet ki mon manman in elve mwan ek mon de ser li tousel, san sipor en msye, i ti en madanm vreman kouraze e endepandan. Mon tant pour imit sa bann tre ki i ti annan. Alor, mon konstaman bezwen fer zefor pour demontre en soumisyon konplet. Par egzanp, mon’n aprann pour koz avek mon msye olye zis pran mon prop desizyon.”

Rachel ki reste Lostrali in marye avek Mark pour 21 an. I’n ganny enfliyanse par sa lanvironnman ki i ti grandi ladan. I rapel: “Mon manman pa ti zanmen soumet avek mon papa. Dan lakour ti annan dispit tou lazournen e personn pa ti demontre okenn respe pour kanmarad. Dan mon bann premye lannen maryaz, mon ti fer parey mon manman. Me, avek letan ki’n pase, mon’n aprann ki byenfe i annan pour aplik bann konsey Labib lo konman pour demontre respe. Aprezan, nou de Mark nou pli ere dan nou lavi maryaz.”

6

PROBLENM:

“Mon nepli kapab siport sa bann vilen manni ki mon msye i annan.”

PRENSIP LABIB:

“Siport kanmarad, pardonn kanmarad sak fwa ki enn ant zot i ofans en lot.”​—KOLOSYEN 3:13.

Kan zot ti fek konmans pwente, i tre probab ki ou ti konsantre plis lo bann bon kalite  ki ou fitir konzwen ti annan, e apenn si ou ti remark son bann defo. Eski ou kapab kontinyen fer parey? San dout, ou konzwen i donn ou rezon pour konplent. Me, demann ou lekor: ‘Ki bann kalite mon konzwen ki mon deside konsantre lo la? Son bann bon kalite oubyen move kalite?’

Zezi ti servi en bon legzanp ki montre nou lenportans pour pa konsantre lo defo ki nou vwar dan lezot. I ti dir: “Ki mannyer ou war lapay ki dan lizye ou frer me ou pa remark poto ki dan sa ki pour ou?” (Matye 7:3) En lapay i kapab en pti bout zerb. De lot kote, en poto i en gran bout dibwa ki ganny servi pour tenir twa en lakaz. Ki pwen i ti pe fer resorti? “Tir poto dan ou lizye avan, apre ou a war ase kler pour tir lapay ki dan lizye ou frer.”​—Matye 7:5.

Zezi ti entrodwir sa legzanp avek en lavertisman byen fran. I ti dir: “Pa zize e ou pa ava ganny zize. Parski Bondye pou ziz ou parey ou ziz lezot.” (Matye 7:1, 2) Si ou ti a kontan ki Bondye pa konsantre lo ou bann defo, setadir sa poto dan ou lizye, ou osi ou bezwen pa konsantre lo defo ou konzwen.​—Matye 6:14, 15.

Konman serten in aplik sa konsey: I fer nef an depi ki Jenny ki reste Langleter in marye avek Simon. Jenny i dir: “Mon’n remarke ki sa ki fatig mwan plis avek mon msye, se sa tandans ki i annan pour fer keksoz lo dernyen minit. I drol, akoz ler nou ti pe frekante, mon ti kontan ki i ti plàn keksoz la pour la. Me, aprezan mon realize ki mwan osi mon annan defo. Mon en dimoun ki tro kontan donn lord. Nou de Simon, nou pe aprann pour pa konsantre lo bann pti defo kanmarad.”

Curt ki’n marye avek Michele, ki’n ganny mansyonnen pli boner i dir: “Si ou konsantre lo bann vilen manni ou konzwen, son defo pou deplizanpli paret pli gro. Mon prefere konsantre lo bann kalite ki ti fer mwan tonm anmoure avek Michele o konmansman.”

Sa sekre pour ou reisi

Sa bann legzanp i montre nou ki dan tou maryaz i annan difikilte, me nou kapab sirmont zot. Ki sa sekre pour reisi? Devlop lanmour pour Bondye ek sa lanvi pour met an pratik konsey ki dan son Parol, Labib.

Alex ek Itohan ki reste Nizerya in marye pour plis ki 20-t-an. Zot, zot in aprann sa sekre. Alex i dir: “Mon’n realize ki preski tou difikilte dan maryaz i kapab ganny rezourd si en koup i aplik bann prensip Labib.” Son madanm i dir: “Nou’n realize ki i enportan pour priy ansanm regilyerman e pour aplik konsey Labib lo ki mannyer pour demontre en lanmour senser pour kanmarad e pour pran pasyans avek kanmarad. Aprezan nou annan mwens problenm ki ler nou ti’n fek marye.”

Eski ou ti a kontan aprann plis konsernan ki mannyer bann konsey pratik ki trouve dan Parol Bondye i kapab anmenn byenfe pour ou fanmir? Si wi, demann en Temwen Zeova pour diskit sapit 14 avek ou dan liv Ki Labib i vreman dir? *

[Not anba lo paz]

[Portre lo paz 4]

Eski nou fer letan pour kanmarad?

[Portre lo paz 5]

Eski mon esey donn plis ki sa ki mon resevwar?

[Portre lo paz 6]

Eski mon pran linisyativ pour rezourd bann diskisyon ki leve ?

[Portre lo paz 7]

Eski mon rod lopinyon mon madanm avan mon pran en desizyon?

[Portre lo paz 9]

Eski mon konsantre lo bann bon kalite ki mon konzwen i annan?