Ditharollo tša Dipelaelo tše di Tlwaelegilego

BEIBELE ga e bolele gore lenyalo ke selo se bonolo. Moapostola Paulo o ile a budulelwa ke Modimo go ngwala mabapi le banyalani gore ba be ba tla lebeletšana le “mathata a letšatši le letšatši.” (1 Bakorinthe 7:28, Today’s English Version) Eupša banyalani ba ka dira mo gontši go fokotša mathata ao ba lebeletšanago le ona le go oketša lethabo la bona. Ela hloko dipelaelo tše di latelago tše tshela tšeo banna le basadi ba nago le tšona gomme o bone kamoo go diriša melao ya motheo ya Beibele go ka thušago ka gona.

1

PELAELO:

“Nna le molekane wa ka ga re sa na tswalano ya kgauswi.”

MOLAO WA MOTHEO WA BEIBELE:

“Le kgonthišetše dilo tše bohlokwa kudu.”—BAFILIPI 1:10.

Lenyalo la gago ke se sengwe sa dilo tše bohlokwa kudu bophelong bja gago. Le swanetše go etišwa pele. Ka gona hlahloba go bona ge e ba lenaneo la gago e le sebaki sa pelaelo ye. O se ke wa dumelela dilo tše di nyakegago bophelong di dira gore wena le molekane wa gago le phele maphelo ao a aroganego. Ke therešo gore mošomo wa boiphedišo le maemo a mangwe ao a sa phemegego, ka nakwana a ka dira gore le lahlegelwe ke nako ya go ba gotee. Eupša le ka kgona e bile le swanetše go bea mollwane  dilong tšeo le nago le matla a go di laola—bjalo ka nako yeo le e fetšago dilong tša go itloša bodutu goba le bagwera.

Lega go le bjalo, balekane ba bangwe ba ka šoma mošomo o oketšegilego goba ba itloša bodutu ka selo se itšego e le feela go phema go fetša nako le balekane ba bona. Batho ba bjalo ga se gore ga ba “sa na tswalano ya kgauswi” le balekane ba bona. Ba tšhabela kgole le mathata. Ge e ba wena goba molekane wa gago le ena le bothata bjo, le swanetše go tseba modu wa bjona gomme le bo rarolle. Ke feela ka go fetša nako le molekane wa gago moo bobedi bja lena le ka batamelanago kgauswi le go ba “nama e tee” ka kgopolo e feletšego.—Genesi 2:24.

Kamoo ba bangwe ba dirišitšego keletšo ye ka gona: Andrew * le Tanji, banyalani ba kua Australia, ba na le nywaga e lesome ba nyalane. Andrew o re: “Ke ithutile gore go šoma kudu le go ba le boikarabelo bjo bontši go ka ba kotsi lenyalong. Ka gona, nna le mosadi wa ka re beela ka thoko nako ya go boledišana le go ntšhetšana sa mafahleng.”

Dave le Jane, bao ba dulago United States e bile ba nago le nywaga e 22 ba nyalane, ba diriša seripa sa iri mantšiboa a mangwe le a mangwe bakeng sa go bolela ka diphihlelo le dikgopolo tša bona. Jane o re: “Ye ke nako e bohlokwa yeo re sa dumelelego selo le ge e le sefe gore se šitišane le yona.”

2

PELAELO:

“Ga ke sa hwetša seo ke se nyakago lenyalong le.”

MOLAO WA MOTHEO WA BEIBELE:

“Anke yo mongwe le yo mongwe a tšwele pele a tsoma seo se holago motho yo mongwe, e sego seo se holago yena a nnoši.”—1 BAKORINTHE 10:24.

Motho yo a tshwenyegilego kudu ka seo a se hwetšago lenyalong a ka se tsoge a thabile e le ka kgonthe, gaešita le ge motho yo bjalo a ka nyala gantši. Lenyalo le atlega ge molekane yo mongwe le yo mongwe a lebiša tlhokomelo go neeng go e na le go amogeleng. Jesu o nea lebaka ka gore: “Go na le lethabo le legolo go neeng go feta go amogeleng.”—Ditiro 20:35.

Kamoo ba bangwe ba dirišitšego keletšo ye ka gona: Maria le Martin, bao ba dulago Mexico,  ba na le nywaga e 39 ba nyalane. Eupša ga se ka mehla moo dilo di ba sepelelago gabotse. Ba gopola ka mo go kgethegilego kgohlano yeo ba kilego ba ba le yona. Maria o gopola ka gore: “Nakong ya ge ngangišano e le gare e fiša, ke ile ka botša Martin mantšu ao a bego a sa bontšhe tlhompho. O ile a befelwa o šoro. Ke lekile go mo hlalosetša gore ke be ke sa ikemišetša go bolela seo ke se boletšego le gore ke be ke fo ba ke befetšwe. Eupša o be a sa ntheetše.” Martin o re: “Nakong ya ngangišano yeo, ke ile ka thoma go nagana gore re ka se sa hlwa re kgona go dula gotee le gore ke swanetše go fo kgaotša go leka go lokiša lenyalo le.”

Martin o be a nyaka go hlompšha. Maria o be a kganyoga go kwešišwa. Bobedi bja bona ba be ba sa hwetše seo ba se nyakago.

Ba be ba tla rarolla bothata bjo bjang? Martin o re: “Ke ile ka ipha nako ya gore ke theoše maswafo gomme bobedi bja rena re ile ra phetha ka gore re diriše keletšo e bohlale ya Beibele mabapi le go bontšha tlhompho le botho. Go theoša le nywaga, re ithutile gore go sa šetšwe gore mathata a tla gantši gakae, re ka lebeletšana le ona ka katlego ge e ba re rapelela thušo ya Modimo le go diriša keletšo e lego ka Beibeleng.”—Jesaya 48:17, 18; Baefeso 4:31, 32.

3

PELAELO:

“Molekane wa ka ga a phethe boikarabelo bja gagwe.”

MOLAO WA MOTHEO WA BEIBELE:

“Yo mongwe le yo mongwe wa rena o tla ikarabela go Modimo.”—BAROMA 14:12.

Ntle le pelaelo, lenyalo le ka se tšwele pele gabotse ge e ba e le molekane o tee feela yoo a katanelago gore le atlege. Eupša boemo bo tla mpefala ge e ba balekane ka bobedi ba hlokomologa taba, ka gore ba beane molato.

Ge e ba o lebiša tlhokomelo kudu go seo molekane wa gago a swanetšego go se dira, o ka se tsoge o thabile. Go tla ba bjalo kudu ge e ba o diriša mafokodi a molekane wa gago go hlokomologa boikarabelo bja gago. Ka lehlakoreng le lengwe, ge e ba o katanela go ba monna goba mosadi yo botse, go ka direga gore lenyalo la gago le atlege. (1 Petro 3:1-3) Se bohlokwa le go feta, o itlhatsela go Modimo gore o hlompha tokišetšo ya gagwe ya lenyalo gomme ditiro tša gago di tla mo thabiša kudu.—1 Petro 2:19.

Kamoo ba bangwe ba dirišitšego keletšo ye ka gona: Kim le monna wa gagwe, bao ba dulago Korea, ba na le nywaga e 38 ba nyalane. Kim o re: “Ka dinako tše dingwe monna wa ka o a mpefelela, a kgaotša go mpolediša gomme ke sa tsebe lebaka. Seo se ntira gore ke kwe eka lerato la gagwe le fokotšegile. Ka dinako tše dingwe ke ikhwetša ke nagana gore, ‘Ke ka baka la’ng a nyaka gore ke mo kwešiše mola yena a sa leke go nkwešiša?’”

Kim o be a ka lebiša tlhokomelo go hlokeng toka ga boemo gaešita le go seo molekane wa gagwe a sa se dirego. Go e na le moo, o lebelela dilo ka tsela e fapanego. Kim o re: “Go e na le go dula ke befetšwe, ke ithutile gore ke mo gobotse go tšea kgato ya pele go direng khutšo. Mafelelong, bobedi bja rena re kgona go iša maswafo fase gaešita le go boledišana ka khutšo.”—Jakobo 3:18.

 4

PELAELO:

“Mosadi wa ka ga a ikokobetše.”

MOLAO WA MOTHEO WA BEIBELE:

“Hlogo ya monna yo mongwe le yo mongwe ke Kriste.”—1 BAKORINTHE 11:3.

Monna yo a naganago gore mosadi wa gagwe ga a ikokobetše o swanetše gore pele a itlhahlobe go bona ge e ba a ikemišeditše go ikokobeletša Hlogo ya gagwe, Jesu Kriste. Monna a ka bontšha boikokobetšo ka gore a latele mohlala wa Jesu.

Moapostola Paulo o ngwadile gore: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafa ka baka la yona.” (Baefeso 5:25) Jesu ga se a ka a “buša” barutiwa ba gagwe. (Mareka 10:42-44) O neile balatedi ba gagwe tlhahlo e kwagalago gomme a ba phošolla ge go be go nyakega. Eupša le ka mohla o be a se bogale. O be a le botho gomme a kwešiša mafokodi a bona. (Mateo 11:29, 30; Mareka 6:30, 31; 14:37, 38) Ka mehla o be a etiša dikgahlego tša bona pele go tša gagwe.—Mateo 20:25-28.

Monna o swanetše go ipotšiša potšišo ye, ‘Na pono ya ka ka bohlogo le basadi ka kakaretšo e hueditšwe kudu ke setšo sa gešo goba ke keletšo le mehlala e tšwago ka Beibeleng?’ Ka mohlala, o be o ka nagana’ng ka mosadi yoo a sa dumelelanego ka go tia le pono ya monna wa gagwe eupša a hlalosa pono ya gagwe ka tlhompho? Ka Beibeleng, mosadi wa Aborahama, Sara, o lebelelwa e le mohlala wa mosadi yo a ikokobetšago. (1 Petro 3:1, 6) Lega go le bjalo, o be a hlalosa pono ya gagwe ge go be go nyakega, bjalo ka nakong ya ge Aborahama a be a palelwa ke go lemoga dikotsi tšeo di bego di tlela lapa la bona.—Genesi 16:5; 21:9-12.

Go molaleng gore, Aborahama o be a sa sware Sara ka tsela yeo e bego e dira gore a tšhabe go bolela. O be a se sehlogo. Ka mo go swanago, monna yo a latelago keletšo ya Beibele a ka se ke a tšhošetša mosadi wa gagwe, ka go nyaka gore a ikokobeletše yena selong se sengwe le se sengwe seo a se nyakago. O tla ikhweletša tlhompho ya mosadi wa gagwe ka go diriša bohlogo bja gagwe ka tsela e nago le kwelobohloko.

Kamoo ba bangwe ba dirišitšego keletšo ye ka gona: James, yo a dulago Engelane e bile a nago le nywaga e seswai a nyetše o re: “Ke ithuta go se dire diphetho tše bohlokwa ntle le gore ke botše mosadi wa ka. Ke leka gore ke se ke ka inaganela ke nnoši. Go e na le moo, ke leka go etiša dikgahlego tša gagwe pele go tša ka.”

George o dula United States e bile o na le nywaga e 59 a nyetše. O re: “Ke lekile go se sware mosadi wa ka bjalo ka ge eka ke motho wa tlasana, eupša ke mo swara bjalo ka molekane yo bohlale le yoo a nago le bokgoni.”—Diema 31:10.

 5

PELAELO:

“Monna wa ka ga a etelele pele.”

MOLAO WA MOTHEO WA BEIBELE:

“Mosadi yo bohlalehlale o agile ntlo ya gagwe, eupša wa lešilo o e phušola ka diatla tša gagwe.”—DIEMA 14:1.

Ge e ba monna wa gago a dikadika go dira diphetho goba go etelela pele go hlokomeleng lapa, gona o na le dikgetho tše tharo. (1) O ka mmontšha mafokodi a gagwe leboelela goba (2) o ka mo amoga boikarabelo bja gagwe bjalo ka hlogo ya lapa goba (3) o ka mo reta go tšwa pelong bakeng sa maiteko le ge e le afe ao a a dirago. Ge e ba o kgetha e nngwe ya dikgetho tše pedi tša pele, o tla phušola ntlo ya gago ka diatla tša gago. Go tšea kgetho ya boraro go tla go thuša go aga goba go tiiša lenyalo la gago.

Banna ba bantši ba tšeela godimo go bontšhwa tlhompho go ena le go bontšhwa lerato. Ka gona ge o dira gore monna wa gago a ikwe a hlompšha, ka go dira gore a kwe gore maiteko a gagwe a go etelela pele ka lapeng ke a atlegago e bile a a thabelwa, go ka direga gore a kaonefatše karolo yeo a e phethago ka lapeng. Ke therešo gore ka dinako tše dingwe o ka se dumelelane le monna wa gago ka taba e itšego. Bobedi bja lena le swanetše go boledišana ka taba yeo. (Diema 18:13) Eupša mantšu ao le kgethago go a diriša le segalo sa wona a ka phušola goba a aga lenyalo la lena. (Diema 21:9; 27:15) Hlalosang maikwelo a lena ka tlhompho, gomme go ka direga gore le fihlelele seo le se nyakago—monna yo a sa dikadikego go etelela pele.

Kamoo ba bangwe ba dirišitšego keletšo ye ka gona: Michele, yo a dulago United States e bile a nago le nywaga e 30 a nyetšwe, o re: “Mma e be e le mosadi yo matla le yo a ikemetšego, ka gobane o nkgodišitše gotee le baratho ba ka ka ntle le thekgo ya monna. Ke ile ka thoma go ekiša dika tšeo. Ka gona ke ile ka swanelwa ke gore ka mehla ke šomele tabeng ya go bontšha boikokobetšo bja kgonthe. Ka mohlala, ke ithutile go boledišana le monna wa ka go e na le go itirela diphetho.”

Rachel, yo a dulago Australia e bile a nago le nywaga e 21 a nyalane le Mark, le yena o be a hueditšwe ke setlogo sa gagwe. O gopola ka gore: “Mma le ka mohla o be a sa ikokobeletše tate. Go ngangišana le go se hlomphane e be e le setlwaedi. Nywageng ya mathomo ya lenyalo la ka, ke ile ka ekiša mma. Lega go le bjalo, go theoša le nywaga, ke ithutile mohola wa go diriša keletšo ya Beibele mabapi le go bontšha tlhompho. Ga bjale nna le Mark re na le lenyalo leo le thabišago.”

6

PELAELO:

“Ga ke sa kgona go kgotlelela mekgwa e tenago ya molekane wa ka.”

MOLAO WA MOTHEO WA BEIBELE:

“Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe.”—BAKOLOSE 3:13.

Ge o be o beana mabaka la mathomo, go ka direga gore o be o lebišitše tlhokomelo dikeng tše dibotse tša molekane wa gago moo e lego gore  gantši o be o sa hlokomele mafokodi a gagwe. Na o ka dira se se swanago le gona bjale? Ga go pelaelo gore molekane wa gago o go nea lebaka le le kwagalago la go belaela. Lega go le bjalo, ipotšiše gore, ‘Ke tla kgetha go lebiša tlhokomelo dikeng dife tša molekane wa ka—tše dibotse goba tše mpe?’

Jesu o dirišitše papišo e matla yeo e bontšhago go nyakega ga go hlokomologa mafokodi ao re a bonago go ba bangwe. O botšišitše gore: “Ke ka baka la’ng o lebelela lehlokwa le le lego ka leihlong la ngwaneno eupša o sa šetše kota ye e lego ka leihlong la gago?” (Mateo 7:3) Lehlokwa e ka ba karolo e nyenyane ya bjang. Ka lehlakoreng le lengwe, kota, ke legong le letelele leo le dirišetšwago go thekga marulelo a ntlo. Ntlha ya gagwe ke efe? “Ntšha pele kota ka leihlong la gago, ke moka o tla bona gabotse kamoo o ka ntšhago lehlokwa ka leihlong la ngwaneno.”—Mateo 7:5.

Jesu o dirišitše papišo ye e le temošo e kwagalago. O itše: “Tlogelang go ahlola gore le se ahlolwe, gobane kahlolo ye le ahlolago ka yona, le tla ahlolwa ka yona.” (Mateo 7:1, 2) Ge e ba o ka rata gore Modimo a hlokomologe mafokodi a gago—kota ka leihlong la gago—e tla ba mo go holago gore o hlokomologe mafokodi a molekane wa gago.—Mateo 6:14, 15.

Kamoo ba bangwe ba dirišitšego keletšo ye ka gona: Jenny, yo a dulago Engelane e bile ga bjale a nago le nywaga senyane a nyalane le Simon o re: “Ke hlokomela gore selo seo se dira gore ke tenege ke mokgwa wa molekane wa ka wa go se rulaganye e sa le pele, wa go dira dilo ka motsotso wa mafelelo. Se se a makatša, ka gobane ge re be re sa beana mabaka, ke be ke rata tsela yeo a bego a dira dilo ka go akgofa ka gona. Lega go le bjalo, ga bjale ke lemogile gore le nna ke na le mafokodi, a bjalo ka go ba yo a laolago kudu. Nna le Simon re ithuta go hlokomologa mafokodi a manyenyane a go se phethagale a yo mongwe le yo mongwe wa rena.”

Curt, yo a nyalanego le Michele, yoo a tsopotšwego pejana, o re: “Ge e ba o lebiša tlhokomelo dikeng tše di tenago tša molekane wa gago, mafokodi ao a tla bonagala a gola ganyenyane-ganyenyane. Ke kgetha go lebiša tlhokomelo dikeng tšeo di dirilego gore ke rate Michele.”

Sephiri sa go Atlega

Mehlala ye e mmalwa e bontšha gore ditlhohlo tšeo di tlišwago ke lenyalo di ka se phengwe eupša ga se tšeo e lego tše thata kudu go ka lebeletšana le tšona. Sephiri sa katlego ke sefe? Godiša lerato la go rata Modimo le maikemišetšo a go diriša keletšo e lego ka Lentšung la gagwe, Beibele.

Alex le Itohan bao ba dulago Nigeria e bile ba nago le nywaga ya ka godimo ga e 20 ba nyalane, ba ithutile sephiri seo. Alex o re: “Ke ithutile gore bonyenyane bothata bjo bongwe le bjo bongwe bo ka rarollwa ge fela banyalani ba diriša melao ya motheo ya Beibele.” Mosadi wa gagwe o re: “Re ithutile bohlokwa bja go rapela gotee ka mehla le go diriša keletšo ya Beibele ya go ratana go tšwa pelong le go se felelane pelo. Ga bjale re na le mathata a sego kae ge re a bapiša le a ge re be re sa tšwa go nyalana.”

Na o tla rata go ithuta ka mo go oketšegilego mabapi le kamoo keletšo e šomago e tšwago Lentšung la Modimo e ka holago lapa la gago ka gona? Ge e ba go le bjalo, kgopela Dihlatse tša Jehofa go ahlaahla le wena kgaolo 14 ya puku ya Ke Eng Seo ge e le Gabotse Beibele e se Rutago? *

[Mengwalo ya tlase]

[Seswantšho go letlakala 4]

Na re beela ka thoko nako ya go ba gotee?

[Seswantšho go letlakala 5]

Na ke leka go nea go feta kamoo ke amogelago ka gona?

[Seswantšho go letlakala 6]

Na ke gata mogato wa pele go rarolla diphapano?

[Seswantšho go letlakala 7]

Na ke kgopela pono ya mosadi wa ka pele ke dira phetho?

[Seswantšho go letlakala 9]

Na ke lebiša tlhokomelo dikeng tše dibotse tša molekane wa ka?