BEIBEL no ta bisa ku bida kasá ta fásil. Dios a inspirá apòstel Pablo pa skirbi ku parehanan kasá lo haña nan ku “problemanan” den bida. (1 Korintionan 7:28, BPK) Pero si parehanan kasá hasi esfuerso, nan lo tin ménos problema i nan lo ta mas felis ku otro. Laga nos trata seis keho komun ku esposo i esposa sa tin, i mira kon prinsipio bíbliko a yuda algun pareha den nan matrimonio.

1

KEHO:

“Mi kasá no ta wòri ku mi mas.”

PRINSIPIO BÍBLIKO:

“Distinguí loke ta importante di bèrdè.”​—FILIPENSENAN 1:10, BPK.

Bo matrimonio ta un di e kosnan mas importante den bo bida. Ta na su lugá pa bo dun’é prioridat. P’esei wak si e keho ei no ta debí na boso rutina diario. Evitá di ta muchu okupá ku bo propio asuntunan so. Ta lógiko ku debí na trabou òf otro situashonnan inevitabel boso no por ta huntu tur ora bai. Pero bo mester limitá e kantidat di tempu ku bo ta dediká na entre otro hòbi òf amigunan.

Miéntras ku tin pareha ku no ta realisá ku nan rutina ta pone ku nan no tin tempu pa otro, tin otronan ku deliberadamente ta buska yen di kos di hasi pa nan no tin nodi dediká tempu na otro. Nan ta kore pa problema. Si abo òf bo kasá tin e problema ei, boso mester analisá boso situashon i buska un solushon. Ta solamente si boso dediká tempu na otro, boso relashon ta bira mas estrecho i asina boso “lo bira ún karni” den tur sentido di palabra.​—Génesis 2:24.

Kon algun pareha kasá a apliká e konseho akí: Andrew * i Tanji, un pareha australiano, tin dies aña kasá. Andrew a bisa: “Mi a siña ku si mi dediká muchu tempu na trabou, amigunan òf rekreo, esei por kousa problema den mi matrimonio. P’esei ami ku mi kasá ta tuma tempu pa papia i kompartí nos sintimentunan ku otro.”

Dave i Jane ta biba na Merka i ta kasá pa 22 aña. Tur atardi, nan ta dediká e promé mei ora na papia riba loke nan a pasa aden durante dia i nan ta kompartí nan pensamentunan. Jane a bisa: “E tempu akí ta asina importante pa nos ku nos no ta laga nada stroba nos.”

2

 KEHO:

“Mi no ta gana nada mas ku e relashon akí.”

PRINSIPIO BÍBLIKO:

“No laga ningun hende buska su mes interes, sino esun di su próhimo.”​—1 KORINTIONAN 10:24.

Un persona ku ta interesá prinsipalmente den loke e por saka for di e matrimonio nunka lo no ta realmente felis, ni maske kuantu biaha e bolbe kasa. Un matrimonio ta bai bon ora kada un ta enfoká riba loke e tin ku duna en bes di riba loke e por haña. Dikon esei ta asina? Hesus a splika: “Ta mas bindishoná pa duna ku pa risibí.”​—Echonan 20:35.

Kon algun pareha kasá a apliká e konseho akí: Maria i Martin ta biba na México i nan tin 39 aña kasá. No ta tur ora kos tabata koló di rosa. Nan ta kòrda un di e momentonan mas difísil den nan bida. Maria ta konta: “Durante un diskushon fuerte, mi a insultá Martin. El a rabia masha hopi. Mi a purba splik’é ku mi no tabata ke men loke mi a bis’é. Pero e no kier a skucha mi.” Martin a bisa: “Durante e diskushon ei, mi a kuminsá pensa ku nos no por sigui biba huntu i ku mi mester stòp di purba solushoná nos problemanan i desakuerdonan.”

Martin tabata ke pa Maria respet’é i Maria a deseá pa Martin mustra komprenshon. Pero ningun di dos tabata haña loke e tabata ke.

Kon nan a logra solushoná e problema? Martin a bisa: “Mi a tuma tempu pa kalma promé i nos tur dos a disidí di apliká e konseho sabi di Beibel pa mustra rèspèt i bondat na otro. Atraves di aña, nos a siña ku maske kuantu biaha problema surgi, nos por vense nan si nos pidi Dios su yudansa den orashon i apliká konseho bíbliko.”​—Isaias 48:​17, 18; Efesionan 4:​31, 32.

3

KEHO:

“Mi kasá no ta kooperá.”

PRINSIPIO BÍBLIKO:

“Kada un di nos lo duna kuenta di su mes na Dios.”​—ROMANONAN 14:12.

Sin duda, un matrimonio lo no bai bon si solamente un partner ta hasi su parti. Pero e situashon lo bira pió si tur dos ta negligente i ta tira falta riba otro.

 Si henter ora bo ta enfoká solamente riba loke bo kasá mester hasi, esei ta pone ku nunka lo bo ta felis. Esei lo ta e kaso tambe si bo ta usa fout di bo kasá komo un èksküs pa no kumpli ku bo parti. Di otro banda, si bo hasi esfuerso pa ta un bon kasá, bo matrimonio probablemente lo mehorá. (1 Pedro 3:​1-3) Loke ta mas importante ta ku bo ta mustra Dios ku bo ta onra su areglo di matrimonio, i bo akshonnan lo agrad’é.​—1 Pedro 2:19.

Kon algun pareha kasá a apliká e konseho akí: Kim i su esposo ta biba na Korea i nan ta kasá pa 38 aña. Kim a bisa: “Tin biaha mi esposo ta rabia ku mi i ta stòp di papia ku mi, i e kos ta ku mi no sa ki malu mi a hasi. Esei ta pone mi sinti ku e no ta stima mi manera ántes mas. Mi a yega di pensa, ‘Dikon e ke pa ami komprondé su sintimentu siendo ku e no ta purba komprondé esun di mi?’”

Kim por a enfoká riba e trato inhustu i riba loke su esposo no ta hasiendo. Pero el a disidí di hasi un otro kos. Kim a bisa: “En bes di keda rabiá, mi a siña ku ta mihó pa tuma inisiativa pa resolvé e problema. Komo resultado, nos tur dos a kalma i por a papia pa resolvé e asuntu di un manera pasífiko.”​—Santiago 3:18.

4

KEHO:

“Mi esposa no ta sumiso.”

PRINSIPIO BÍBLIKO:

“Kristu ta e kabes di tur hòmber.”​—1 KORINTIONAN 11:3.

Un esposo ku ta pensa ku su esposa no ta sumiso na dje mester wak promé si e mes ta sumishon na su Kabes, Hesukristu. Un esposo por demostrá ku e ta sumishon ora e sigui Hesus su ehèmpel.

Apòstel Pablo a skirbi: “Esposonan, stima boso esposa, meskos ku Kristu tambe a stima e iglesia i a entregá su mes p’e.” (Efesionan 5:25) Hesus no a ‘dominá’ su disipelnan. (Marko 10:​42-44) El a duna su siguidónan instrukshon komprendibel i si tabata nesesario el a korigí nan. Pero nunka el a trata nan brutu. El a trata nan na un manera bondadoso i a tene kuenta ku nan limitashonnan. (Mateo 11:​29, 30; Marko 6:​30, 31; 14:​37, 38) Semper el a pone nan interesnan promé ku esnan di su mes.​—Mateo 20:​25-28.

Ta bon pa un esposo hasi su mes e pregunta akí, ‘Kustumber lokal a influensiá mi punto di bista di hefatura i di hende muhé en general mas ku konseho i ehèmpelnan bíbliko?’ Por ehèmpel, kiko bo ta pensa di un hende muhé ku no ta di akuerdo ku e punto di bista di su esposo i ku na un manera firme i respetuoso ta ekspresá su opinion? Beibel ta menshoná Abraham su esposa, Sara, komo un ehèmpel di sumishon na su esposo. (1 Pedro 3:​1, 6) Sinembargo, Sara a bisa kiko el a pensa ora tabata nesesario, manera por ehèmpel ora Abraham no a mira sierto peliger ku a menasá e famia.​—Génesis 16:5; 21:​9-12.

Ta mas ku klaru ku Abraham no a trata Sara di tal manera ku el a haña miedu di papia. E no tabata un tirano. Asina tambe, un esposo ku ta sigui konseho bíbliko lo no intimidá su esposa i eksigí pa e kumpli ku delaster un di su kaprichonan. Lo e ehersé su hefatura na un manera kompasivo pa e por gana rèspèt di su esposa.

Kon algun pareha kasá a apliká e konseho akí: James ta biba na Inglatera i e tin ocho aña kasá. El a bisa: “Mi ta hasiendo esfuerso pa no tuma desishon importante sin konsultá ku mi esposa. Mi ta purba pa no pensa riba mi so. Mas bien, mi ta purba pone su nesesidatnan promé ku esnan di mi mes.”

George ta biba na Merka i tin 59 aña kasá. El a bisa: “Mi ta purba trata mi esposa, no komo un persona inferior, sino komo un partner inteligente, birtuoso òf kapas.”​—Proverbionan 31:10.

5

 KEHO:

“Mi esposo no ta tuma inisiativa.”

PRINSIPIO BÍBLIKO:

“E muhé sabí ta traha su kas, ma esun bobo ta bash’é abou ku su mes man.”​—PROVERBIONAN 14:1.

Si bo ta sinti ku bo esposo ta totobiá pa tuma desishon òf pa dirigí asuntunan di kas, bo tin por lo ménos tres opshon. (1) Bo por bis’é konstantemente kiko ta su fayonan òf (2) bo por tuma su responsabilidat over òf (3) bo por elogi’é pa kualke esfuerso ku e hasi. Si bo skohe un di e dos promé opshonnan, lo bo basha bo kas abou ku bo mes man. Si bo skohe e di tres opshon, esei lo yuda bo fortalesé bo matrimonio.

Hopi hende hòmber ke pa nan esposa respetá nan i nan ta konsiderá esei mas importante ku e echo ku nan esposa ta stima nan. Pues si bo laga bo esposo sinti ku bo ta respet’é, esta, lag’é sinti ku bo ta apresiá su esfuerso pa dirigí e famia na un manera efektivo, probablemente lo e bira un mihó kabes di famia. Ta di komprondé ku tin bes lo bo no ta di akuerdo ku bo esposo den sierto asuntu. Boso dos lo tin ku sinta papia riba e asuntunan ei. (Proverbionan 18:13) Pero bo palabranan i tono di bos lo pone ku, na moda di papia, sea bo ta basha bo matrimonio abou òf edifik’é. (Proverbionan 21:9; 27:15) Papia ku rèspèt, i lo bo tin mas chèns di logra loke bo ke, esta ku bo esposo ta tuma inisiativa pa dirigí su famia.

Kon algun pareha kasá a apliká e konseho akí: Michele ta biba na Merka i ta kasá pa 30 aña. El a bisa: “Debí ku mi mama no tabatin un kasá ora el a lanta ami ku mi ruman muhénan, e tabata un muhé ku karakter fuerte i independiente. P’esei, mi tin tendensia di imitá mi mama. Pues, konstantemente mi tin ku hasi esfuerso pa mustra sumishon. Por ehèmpel, en bes di tuma desishon riba mi mes, mi a siña konsultá ku mi esposo.”

Rachel ku Mark ta biba na Australia i ta kasá pa 21 aña. Rachel su pasado tambe a influensi’é. E ta kòrda: “Mi mama nunka no tabata sumiso na mi tata. Na kas pleitamentu i faltamentu di rèspèt tabata kos masha normal. E promé añanan di mi matrimonio, mi tabata imitá mi mama. Pero atraves di aña, mi a siña e balor di apliká e konseho bíbliko pa mustra rèspèt. Awor ami ku Mark ta mas felis ku nunka.”

6

KEHO:

“Mi kasá tin sierto kos ta hasi ku ta iritá mi.”

PRINSIPIO BÍBLIKO:

“Boso soportá otro i pordoná otro, si un di boso tin un keho kontra un otro.”​—KOLOSENSENAN 3:13.

Tempu ku boso tabata namorá, probablemente bo tabata asina enfoká riba e bon kualidatnan di bo futuro kasá ku apénas bo  tabata nota su fayonan. Bo por hasi meskos awor? No tin duda ku bo por tin un motibu bálido pa keha. Sinembargo, puntra bo mes, ‘Riba kua di mi kasá su kualidatnan mi ta skohe pa enfoká: esnan bon òf esnan malu?’

Hesus a usa un ilustrashon poderoso ku ta siña nos e importansia di pasa por alto di faltanan ku nos ta mira den otro hende. El a puntra: “Dikon bo ta mira e splenter den wowo di bo ruman i e balki den bo mes wowo sí bo no ta ripará?” (Mateo 7:3, BPK) E diferensia entre un splenter i un balki ta bisto. Un splenter ta hopi mas chikitu ku un balki. Ta p’esei Hesus a bisa: “Saka e balki for di bo mes wowo promé, anto e ora ei bo por mira bon pa saka e splenter for di wowo di bo ruman.”​—Mateo 7:5, BPK.

Hesus a kuminsá e ilustrashon akí ku un spièrtamentu serio. El a bisa: “No husga, pa boso no wòrdu husgá. Pasobra di e mesun manera ku boso husga, boso lo wòrdu husgá.” (Mateo 7:​1, 2) Si bo ke pa Dios pasa por altu di bo faltanan—e balki den bo wowo—ta mihó pa bo pasa por altu di e faltanan di bo kasá.​—Mateo 6:​14, 15.

Kon algun pareha kasá a apliká e konseho akí: Jenny ku Simon ta biba na Inglatera i nan tin nuebe aña kasá. Jenny a bisa: “Loke ta iritá mi mas tantu di mi kasá ta echo ku e no ta plania nada di antemano i ta laga tur kos pa último ora. Esei ta un ironia, pasobra ora nos tabata namorá, mi tabata gusta e echo ku e tabata asina spontáneo. Sinembargo, awor mi ta rekonosé ku mi tambe tin mi fayonan, por ehèmpel, mi ta gusta manda. Ami ku Simon a siña pasa por altu di nos fayonan chikitu.”

Curt ta kasá ku Michele, kende nos a menshoná kaba. Curt a bisa: “Si bo enfoká riba e kosnan ku bo kasá ta hasi ku ta iritá bo, por parse ku nan ta bira pió ku nan ta. Mi ta preferá di enfoká riba e kualidatnan ku a pone mi namorá di Michele.”

E Klave pa Logra Éksito

E ehèmpelnan ku nos a kaba di trata ta mustra ku problemanan den matrimonio ta inevitabel pero no insuperabel. Kiko ta e klave pa logra éksito? Kultivá amor pa Dios i un deseo pa apliká konsehonan ku tin den su Palabra, e Beibel.

Alex i Itohan ta biba na Nigeria i ta kasá pa mas ku 20 aña. Nan a haña kiko ta e klave pa logra éksito. Alex a bisa: “Mi a deskubrí ku un pareha por resolvé kasi tur problema matrimonial si nan apliká prinsipio bíbliko.” Su esposa a bisa: “Nos a siña ku ta importante pa hasi orashon huntu riba un base regular i pa apliká e konseho bíbliko pa trata otro ku amor i pasenshi. Awor nos tin ménos problema ku ora nos tabata resien kasá.”

Bo ta deseá di haña sa mas tokante kon e konseho práktiko ku tin den e Palabra di Dios por benefisiá bo famia? Si ta asina, pidi Testigunan di Yehova pa trata kapítulo 14 ku bo den e buki Kiko Beibel Ta Siña Realmente? *

[Nota]

[Plachi na página 5]

Mi ta tuma inisiativa pa solushoná desakuerdo?

[Plachi na página 8]

Mi ta enfoká riba e bon kualidatnan di mi kasá?