Vaifofō i Faitioga Masani

E LĒ o fai mai le Tusi Paia e faigofie le faaipoipo. Na faagaeeina Paulo e faapea mai, o le a feagai ulugalii faaipoipo ma “puapuaga i aso uma.” (1 Korinito 7:28, Today’s English Version) Ae e tele mea e mafai ona fai e ulugalii faaipoipo e faaitiitia ai faafitauli o loo latou feagai, ma atili ai ona fiafia. Iloilo faitioga masani nei mai i tane ma avā, ma vaai i le auala na aogā ai le faatatauina o taʻiala a le Tusi Paia.

1

FAITIOGA:

“E lē o toe māfana la ma ulugalii.”

TAʻIALA A LE TUSI PAIA:

“Ia outou faamautinoa o mea e sili ona tāua.”—FILIPI 1:10.

O lau faaipoipoga, o se mea e sili ona tāua i lou olaga. E tatau ona faamuamua. Ia vaai po o au mea e fai i aso taʻitasi, ua māfua ai lenei faafitauli. Aua neʻi faatagaina meafai i le olaga e te lua valavala ai ma lau paaga. O le mea moni, o galuega masani ma isi tulaga e lē maʻalofia, e ono avea ma mea e te lua valavala ai. Ae e tatau ona e faatapulaa taimi e fai ai mea e te fiafia i ai, e pei o le faaalu o le taimi i mea faafiafia ma au uō.

 O nisi tagata faaipoipo, atonu e latou te faigaluega ovataimi pe e faia mea e fiafia i ai, e ʻalofia ai le faifaimea faatasi ma a latou paaga. O na tagata ua lē o toe māfana a latou ulugalii, a ua taumafai e sosola ese mai i faafitauli. Afai o le tulaga lenā ua lua oo i ai, e tatau ona vaai po o le ā le māfuaaga, ma taumafai e foʻia. O le faifaimea faatasi ma lau paaga, o le a lua māfana ai ma ‘avea ai oulua ma tino e tasi.’—Kenese 2:24.

Le auala ua faatino ai e nisi lenei fautuaga: O se ulugalii Ausetalia o Aneteleʻa * ma Tania, ua sefulu tausaga talu ona faaipoipo. Ua faapea mai Aneteleʻa: “Ua ou iloa, o le soona galue ma le faatasitasi soo ma isi, e mafai ona lamatia ai le faaipoipoga. O lea, na ma faatulaga ai ma laʻu avā se taimi, e ma te talanoa ma fefaasoaaʻi ai.”

O Tavita ma Sieni, e nonofo i Amerika, ma ua 22 tausaga talu ona faaipoipo, ma e la te faaalu se ʻafa itula i afiafi uma, e talanoa ai ma fefaasoaaʻi o la manatu. Ua fai mai Sieni: “O le taimi sili lenā ona tāua, e ma te lē faatagaina ai se mea e faalavelave mai.”

2

FAITIOGA:

“Ou te lē o toe maua se fiafia i la ma ulugalii.”

TAʻIALA A LE TUSI PAIA:

“Aua neʻi saʻilia e se tasi lona lava lelei, a ia faaauau ona saʻili le lelei o isi.”—1 KORINITO 10:24.

O se tagata e faamuamua ona manaʻoga i le faaipoipoga, e lē taitai ona fiafia e tusa lava pe faaipoipo faafia. Ae e taulau le faaipoipoga pe a taulaʻi le tane ma le avā i mea e lelei ai le isi, ae lē na o ia. Ua taʻua e Iesu le māfuaaga: “E sili le fiafia e maua i le foaʻi atu i lo o le talia mai.”—Galuega 20:35.

Le auala ua faatino ai e nisi lenei fautuaga: Ua 39 tausaga talu ona faaipoipo Maria ma Matini, e nonofo i Mekisikō. Ae e leʻi fiafia i  taimi uma la laʻua faaipoipoga. E la te manatua se taimi sa sili ona faigatā. Na fai mai Maria, “I sa ma taugāupu, na ou fai atu ai se tala lē faaaloalo lava iā Matini. Na matuā ita ai o ia. Sa ou tau faamalamalama i ai, o upu o le ita, ae e lē o le uiga lenā o laʻu tala. Ae e leʻi fia faalogo o ia.” Na fai mai Matini, “O le taimi lenā na ou mafaufau ai, e ma te lē toe nonofo, ua ou lē toe fia manaʻo foʻi e faalelei le faaipoipoga.”

Sa manaʻomia e Matini le faaaloalo atu o Maria, ae sa naunau Maria ia malamalama Matini iā te ia. Ae e leʻi maua le mea na la mananaʻo ai.

Na faapefea ona la foʻia le faafitauli? Na fai mai Matini, “Sa ou taumafai seʻi teʻa muamua loʻu ita, ona ma taumafai loa lea e faatino le fautuaga atamai a le Tusi Paia ina ia faaaloalo ma agalelei.” I le faagasologa o tausaga ua ma iloa ai, po o le ā lava le tele o faafitauli e tulaʻi mai, ae e mafai lava ona ma foʻia pe a tatalo i le Atua mo le fesoasoani, ma faatatau le fautuaga mai i le Tusi Paia.”—Isaia 48:17, 18; Efeso 4:31, 32.

3

FAITIOGA:

“E lē o faia e loʻu toʻalua ona tiute.”

TAʻIALA A LE TUSI PAIA:

‘E taʻitasi i tatou uma ma tala atu lana amio i le Atua.’—ROMA 14:12.

O le mea moni, pe a na o le toʻatasi le tagata o le ulugalii e taumafai ia taulau manuia le faaipoipoga, e lē mafai ona ausia le tulaga e tatau ona iai. Ae e sili ona leaga pe a tuuaʻi e le tasi le isi ae lē faia se taumafaiga.

Afai e te mafaufau pea i mea e tatau ona fai e lau paaga, e na o le lē fiafia lava e iʻu i ai. Aemaise lava pe a e manatu, e lē o faia e lau paaga ona tiute, e te lē popole foʻi la i ou tiute. I le isi itu, o le a faaleleia la lua faaipoipoga pe afai e lua te taumafai e avea o se tane po o se avā lelei. (1 Peteru 3:1-3) Ae e sili ona tāua lou faamaoni i le Atua, e te faamamaluina ai lana fuafuaga tau i le faaipoipoga, ma e sili ona faafiafiaina ai o ia.—1 Peteru 2:19.

Le auala ua faatino ai e nisi lenei fautuaga: O Kim ma lana tane e nonofo i Korea, ua 38 tausaga talu ona faaipoipo. Ua faapea mai Kim: “O nisi taimi e ita ai loʻu toʻalua iā te aʻu ma lē toe tautala mai, ou te lē iloa pe aiseā. Ua ou lagona ai ua lē toe alofa o ia iā te aʻu. Ma i nisi taimi ou te faapea ifo ai, ‘Aiseā e manaʻo ai ia ou malamalama iā te ia, ae e lē fia malamalama mai iā te aʻu?’”

Sa ono taulaʻi le mafaufau o Kim i leaga o lona toʻalua. Ae na ia filifili e fai se isi auala. Ua fai mai o ia, “Nai i lo o loʻu lē fiafia pea, ua ou iloa, e sili ona ou tausolomua e tausia le filemu. O le iʻuga, ua toʻafilemu lo ma aiga ma ua talanoa lelei.”—Iakopo 3:18.

 4

FAITIOGA:

“E lē faalogo mai laʻu avā.”

TAʻIALA A LE TUSI PAIA:

“O le ulu o tane taʻitoʻatasi uma o Keriso.”—1 KORINITO 11:3.

O se tane e lagona e lē o gauaʻi atu lana avā, e tatau ona vaai ifo iā te ia lava, po o gauaʻi i lona Ulu o Iesu Keriso. E faaalia e se tane lona gauaʻi e ala i le mulimuli i le faaaʻoaʻoga a Keriso.

Na tusi le aposetolo o Paulo e faapea: “O outou tane, ia faaauau ona alolofa atu i a outou avā, e pei o le Keriso foʻi ona alofa i le faapotopotoga, ma foaʻi mai lona ola mo le faapotopotoga.” (Efeso 5:25) E leʻi “pulepuletutū” Iesu i ona soo. (Mareko 10:42-44) Sa ia avatu faatonuga manino i ona soo ma faasaʻo i latou pe a manaʻomia. Ae e leʻi inainā o ia. Sa agalelei o ia iā i latou, ma e na te leʻi faatalitalia e latou te faia ni mea e sili atu i mea e latou te mafaia. (Mataio 11:29, 30; Mareko 6:30, 31; 14:37, 38) E na te faamuamua pea mea e latou te manaʻomia nai lo o ona manaʻoga.—Mataio 20:25-28.

E tatau i se tane ona fesili ifo i le fesili lenei, ‘Po o taaʻina oʻu manatu e faatatau i le tulaga ulu ma fafine, i tū masani a le atunuu i lo o fautuaga ma faaaʻoaʻoga mai i le Tusi Paia?’ O se faataʻitaʻiga, o le ā sou manatu i se fafine e taumafai e faailoa atu ma le faaaloalo ona manatu, pe afai e lē ioe i manatu o lana tane? I le Tusi Paia, ua avea Sara le avā a Aperaamo o se faaaʻoaʻoga o le avā gauaʻi. (1 Peteru 3:1, 6) Ae peitaʻi, sa talanoa atu o ia i le mea tatau, ina ua lē mataala Aperaamo i ni lamatiaga e ono afāina ai le aiga.—Kenese 16:5; 21:9-12.

E mautinoa, e leʻi fefe Sara e tautala atu ona o ni uiga sauā o Aperaamo. E tatau foʻi i se tane e usitaʻia fautuaga a le Tusi Paia, ona lē pulepuletutū ma faamalosia lana avā ia gauaʻi i mea uma e manaʻo i ai. E faaaloalogia o ia e lana avā pe a faatino lona tulaga ulu i se auala alofa.

Le auala ua faatino ai e nisi lenei fautuaga: Ua faapea mai Iakopo e nofo i Egelani, ua valu tausaga talu ona faaipoipo: “Ua ou iloa e lē tatau ona faia ni filifiliga tāua e aunoa ma le talanoa muamua i laʻu avā. Ou te taumafai e aua ou te manatu mo na o loʻu lava lelei. Ae ou te faamuamua pea ona manaʻoga.”

O Siaosi, e nofo i Amerika ma ua 59 tausaga talu ona faaipoipo. Ua faapea mai o ia: “Ou te taumafai pea e aua le manatu faatauvaa i laʻu avā, ae ia faia o ia o sē e atamai ma mafaufau lelei.”—Faataoto 31:10.

 5

FAITIOGA:

“E lē faia e laʻu tane ona tiute.”

TAʻIALA A LE TUSI PAIA:

“Ua atiaʻe e le fafine atamai lona fale, a o le fafine valea ua ia lepeti i lalo lona fale i ona lava lima.”—FAATAOTO 14:1.

Pe afai e faatalatū lau tane i le faia o filifiliga pe taʻimua i le tausia o le aiga, e tolu ni mea e te ono faia. (1) E te faamanatu pea i ai ona faalētonu (2) pe avea loa oe ma ulu o le aiga (3) po o le faamālō i ai mo ana taumafaiga. Afai e te filifili e fai vala muamua e lua, ua e lepeti i lalo lou fale i ou lava lima. A o le faia o le vala lona tolu, e fesoasoani e atiaʻe ai pe faamalosia ai lau faaipoipoga.

E sili ona tāua i le toʻatele o tane le faaaloalo atu o avā i lo o le alofa. O lea la, afai e te faaaloalo i lau tane, o le a ia lagona ai le aogā ma le talisapaia o ana taumafaiga e taʻimua i le aiga, ma atili ai ona taumafai e faaleleia. E moni e iai taimi e lua te lē ioe faatasi ai ma lau tane i se mataupu. E tatau la ona lua talanoa i lenā mataupu. (Faataoto 18:13) O upu e te tautala ai ma lou leo, e atiaʻe pe lepetia ai lau faaipoipoga. (Faataoto 21:9; 27:15) Ia faaali atu ma le faaaloalo ou manatu, ona e maua ai lea o se iʻuga lelei, o se tane e lē faatalatū e taʻimua i le aiga.

Le auala ua faatino ai e nisi lenei fautuaga: O Masele, ua 30 tausaga talu ona faaipoipo ma e nofo i Amerika. Ua faapea mai o ia: “Na tausia e lo matou tinā i matou ma oʻu uso ae e leai so matou tamā, e malosi o ia, e lē faalagolago i se isi. E tai faapena oʻu uiga. O lea, ou te taumafai pea e faaalia le gauaʻi. O se faaaʻoaʻoga, ou te talanoa atu pea i laʻu tane nai lo o le faia o aʻu lava faaiʻuga.

O Rasela e nofo i Ausetalia, ma ua 21 tausaga talu ona faaipoipo ma Mareko. Sa taaʻina foʻi o ia i le olaga na ola aʻe ai. Na fai mai o ia, “E lē taitai faalogo loʻu tinā i loʻu tamā. E masani lava ona tauaʻimisa ma e lē faaaloalo le tasi i le isi. I uluaʻi tausaga o la ma faaipoipoga, sa pei aʻu o loʻu tinā. Ae i le faagasologa o tausaga, ua ou iloa ai le tāua o le faatatauina o fautuaga a le Tusi Paia i le faaalia o le faaaloalo. I le taimi nei, ua sili atu ona fiafia la ma faaipoipoga ma Mareko.”

6

FAITIOGA:

“Ua ou fiu i ona uiga faatigā.”

TAʻIALA A LE TUSI PAIA:

“Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi.”—KOLOSE 3:13.

I le taimi na faatoʻā lua feoaʻi ai, sa e vaavaai na o uiga lelei o lau uō ae lē amanaʻia  ona masei. Pe mafai ona e faia faapea i le taimi nei? E lē taumatea, e iai uiga o lou toʻalua e te lē fiafia i ai. Ae fesili ifo, ‘O ā uiga o loʻu toʻalua ou te manaʻo e faatāua, o ona uiga lelei po o uiga leaga?’

Na faaaogā e Iesu se talafaatusa uigā e faailoa mai ai le manaʻomia ona tatou faagalo masei o isi. “Aiseā e te vaavaai ai i le fasilaau i le mata o lou uso, ae e te lē vaai i le utupoto o loo i lou lava mata?” (Mataio 7:3) O le fasilaau, o loo faatatau foʻi i sina vao. Ae o le utupoto, o se ogālaau telē e faaaogā e taofi ai le taualuga o se fale. O le manatu la o Iesu: “Ia muamua ona aveese le utupoto o loo i lou lava mata, ona e iloa lelei ai lea ʻeuese le fasilaau o loo i le mata o lou uso.”—Mataio 7:5.

Na iai foʻi ma se lapataʻiga i lenei talafaatusa a Iesu: “Aua tou te toe faamasino atu ina neʻi faamasinoina outou. Auā o le faamasinoga tou te faamasino atu ai, e toe faamasinoina ai foʻi outou.” (Mataio 7:1, 2) Afai e te manaʻo e faagalo e le Atua ou masei, po o le utupoto i lou mata, e sili la pe a aua le amanaʻia masei o lou toʻalua.—Mataio 6:14, 15.

Le auala ua faatino ai e nisi lenei fautuaga: Ua faapea mai Sieni e nofo i Egelani, ma ua iva nei tausaga talu ona faaipoipo ma Simona: “Ua ou iloa o le pogai autū lava e masani ona ou ita ai i laʻu tane, o lona lē fuafua mamao, ae tuu mea i le taimi mulimuli. Ae o le mea e malie ai, o lona uiga lea sa ou fiafia i ai a o ma feoaʻi. Peitaʻi ua ou iloa nei, e iai foʻi oʻu masei e pei o le fia pule naʻuā. Ua ma iloa ma Simona, e tatau ona lē amanaʻia o ma masei lāiti.”

Ua faapea mai Curt: “Afai ou te amanaʻia na o uiga lē lelei o loʻu toʻalua, o le a atili ai ona telē le faafitauli. E sili pe a ou amanaʻia na o uiga o Masele na ala ai ona ou alofa iā te ia i le amataga.”

Le Ki e Taulau Ai

O faaaʻoaʻoga nei ua faaalia ai, e iai faafitauli i faaipoipoga ae e mafai lava ona faaleleia. O le ā le ki e taulau ai? Ia atiaʻe le alofa i le Atua ma le lotomalie e faatatau fautuaga o loo i lana Afioga.

Ua iloa lenā ki e Aleki ma Iotana, e nonofo i Nigeria, ma ua sili atu i le 20 tausaga talu ona faaipoipo. Fai mai Aleki: “Ua ou iloa, e mafai lava ona foʻia faafitauli i se faaipoipoga, pe a faatatau e le ulugalii taʻiala o le Tusi Paia. A ua fai mai lona toʻalua: “Ua ma iloa le tāua o le tatalo faatasi e lē aunoa, ma faatatauina fautuaga a le Tusi Paia ia alofa faamaoni ma onosaʻi le tasi i le isi ma ua faaitiitia nei o ma faafitauli.”

Pe e te fia iloa atili e faatatau i aogā o fautuaga a le Tusi Paia i lou aiga? Afai o lea, talosaga i Molimau a Ieova e tou te talanoa i le mataupu e 14 o le tusi O ā Aʻoaʻoga Moni a le Tusi Paia? *

[Faamatalaga pito i lalo]

[Ata i le itulau 4]

Po o sema se taimi e ma te talatalanoa ai?

[Ata i le itulau 5]

Po ou te manatunatu mo lona lelei?

[Ata i le itulau 6]

Po ou te tausolomua i le faaleleia o ma feeseeseaʻiga?

[Ata i le itulau 7]

Po ou te amanaʻia manatu o laʻu avā ae leʻi faia se faaiʻuga?

[Ata i le itulau 9]

Po ou te amanaʻia uiga lelei o loʻu toʻalua?