Ang Bibliya Makabag-o sa Kinabuhi

SA UNSANG paagi ang usa ka silbidora sa bar nga himalikas, palainom, ug nagdroga nagbag-o sa iyang kinabuhi? Nganong ang kanhing politiko nga dili gustog relihiyon nahimo mang ministro sa relihiyon? Unsa nga mga hagit ang kinahanglang buntogon sa usa ka combat instructor sa kapolisan sa Rusya aron mahimong usa sa mga Saksi ni Jehova? Palihog basaha ang ilang kasinatian.

“Nagkauli na ang Among Maayong Kabubut-on ni Mama.”—NATALIE HAM

NATAWO: 1965

NASOD: AUSTRALIA

KANIADTO: NAGDROGA

KAAGI: Nagdako ko sa Robe, usa ka gamayng lungsod nga pangisdaan didto sa Habagatang Australia. Didto, ang hotel mao ang dapit diin makighugoyhugoy ang mga tawo. Ang mga ginikanan magkanunayan sa hotel, maong ang mga anak nakakat-on ug paghuboghubog, pamalikas, ug panigarilyo.

Pag-edad nakog 12, nanigarilyo na ko, kusog nga mamalikas, ug pirmeng makig-away sa akong inahan. Pagka-15 anyos nako, nagbulag ang akong mga ginikanan, ug 18 ka bulan sa ulahi, mibiya ko sa balay. Ako naghuboghubog, nagdroga, ug nagkinabuhing imoral. Ako aburido ug naglibog. Kay lima ka tuig man kong nagtuog karate ug pagdepensa sa kaugalingon, kompiyansa ra ko kon may magbinuang nako. Bisan pa niana, sa dihang ako mag-inusara ug mamalandong, bation nako ang tumang kaguol. Unya ako mag-ampo sa Diyos ug mangayo kaniyag tabang, apan moingon, “Ayaw lang gyod ko pasudlag simbahan.”

Sa ulahi, ang usa nako ka amigo nga relihiyoso apan walay gianiban nga relihiyon naghatag kanakog Bibliya. Sama sa uban namong mga higala, siya usab nagdroga. Apan siya miingon nga siya nagtuo gayod ug Diyos ug iya kong gikombinsir nga magpabawtismo. Gidala ko niya sa sapa ug gibawtismohan. Sukad niadto, akong gibati nga duna koy linaing relasyon sa Diyos. Apan, wala koy panahon sa pagbasa sa Bibliya.

GIBAG-O SA BIBLIYA ANG AKONG KINABUHI: Niadtong 1988, may duha ka Saksing nanuktok sa balay. Usa kanila nangutana nako, “Nakaila ka ba sa ngalan sa Diyos?” Gibasa niya ang Salmo 83:18 sa iyang Bibliya, nga nag-ingon: “Aron ang katawhan makaila nga ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” Ako nahiugnok! Paglakaw nila, mibiyahe kog  56 kilometros aron susihon sa bookstore ang ubang mga hubad sa Bibliya ug gitan-aw kini nga ngalan sa diksiyonaryo. Kay kombinsido nga Jehova ang ngalan sa Diyos, naghunahuna ko kon unsa pa kahay wala nako masayri.

Giingnan ko ni Mama nga ang mga Saksi ni Jehova lahi sa uban. Sa akong nasayran kanila, sila konserbatibo kaayo ug dili maglingawlingaw. Naghunahuna kong magpakaaron-ingnon nga wala diha kon sila magsangyaw. Apan sa dihang sila miduaw, ako silang gipadayon ug dihadiha nagtuon mi sa Bibliya.

Human sa matag pagtuon, gipaambit nako sa akong trato, si Craig, ang akong nakat-onan. Sa kadugayan, gisamokan na kaayo siya nga tungod niana iyang gikuha kanako ang libro nga among gitun-an ug gibasa kini. Sulod sa tulo ka semana, siya miingon nga iyang nakaplagan ang kamatuoran bahin sa Diyos. Sa ulahi, kami ni Craig mihunong sa pagdroga ug paghuboghubog, ug miundang ko sa akong trabaho ingong silbidora sa bar. Aron among ikapadapat ang mga sukdanan sa Bibliya, kami nagpakasal.

MGA KAAYOHAN NGA AKONG NABATONAN: Niadtong bag-o pa ming nagtuon sa Bibliya uban sa mga Saksi ni Jehova, hapit na unta ming magkabulag ni Craig. Karon, si Craig maoy usa ka maayong bana, ug duna miy duha ka ambongang mga anak. Duna usab miy bililhong mga higala nga pareho namog pagtuo.

Sa sinugdan, ang akong inahan nasuko sa pagkasayod nga ako nakig-uban sa mga Saksi ni Jehova. Apan tungod kini kay sayop ang iyang pagsabot. Karon, nagkauli na ang among maayong kabubut-on ni Mama. Dili na haw-ang ang akong gibati. Hinunoa, nakaplagan ko ang tinuod nga kahulogan sa akong kinabuhi, ug gibati ko ang espirituwal nga katagbawan.—Mateo 5:3.

“Akong Nakat-onan ang Daghang Katingalahang mga Butang sa Bibliya.”—ISAKALA PAENIU

NATAWO: 1939

NASOD: TUVALU

KANIADTO: POLITIKO

KAAGI: Natawo ko sa Nukulaelae, usa ka matahom nga isla sa Pasipiko, nga bahin karon sa Tuvalu. Ang maong isla gidominar sa mga pastor nga nakaeskuyla sa teolohikal nga kolehiyo sa Samoa. Katungdanan sa mga tawo ang pagpakaon sa mga pastor ug sa ilang pamilya matag adlaw, pagtaganag puy-anan, ug sa tanang butang nga ilang gikinahanglan. Bisan pag ang mga taga-isla walay igong pagkaon sa ilang pamilya, sila obligado sa pagtagana sa mga pastor.

Ang pastor sa among isla mao ang nagdumala sa eskuylahan sa baryo, nagtudlo ug relihiyon, matematika, ug geograpiya. Nahinumdom ko nga may mga estudyante nga gibunalan pag-ayo sa pastor, nga tungod niana sila nagkadugo. Apan walay usa nga mireklamo bisan ang mga ginikanan. Ang pastor gipakadiyos.

Pagka-10 anyos nako, mibiya ko sa amoa aron moeskuyla sa bugtong publikong eskuylahan sa laing isla. Paggraduwar nako,  nangempleyo ko sa gobyerno. Nianang panahona, ang mga isla maoy sakop sa kolonya sa Britanya nga nailhang Gilbert ug Ellice Islands. Nagtrabaho ko sa lainlaing departamento sa wala pa ko mahimong editor sa senemanang mantalaan sa gobyerno. Maayo ra ang dagan sa sinugdan apan nagkaproblema sa dihang gipublikar nako ang usa ka sulat gikan sa magbabasa nga nagkondenar sa salapi nga gigasto sa pagpangandam sa pagduaw sa Prince of Wales. Nag-alyas ang nagpadala sa maong sulat, apan buot masayran sa akong superyor kon kinsay iyang tinuod nga ngalan. Wala nako siya tug-ani, ug nabaniog ni nga isyu.

Human sa maong panghitabo, miundang ko sa akong pangempleyo ug misulod sa politika. Nakadaog ko sa eleksiyon sa Nukulaelae ug gitudlo ako ingong Minister of Commerce and Natural Resources. Sa ulahi, sa dihang ang mga tawo sa isla sa Kiribati (kanhi Gilbert) ug Tuvalu (kanhi Ellice) nakabatog independensiya sa Britanya, gitanyagan ko sa gobernador nga mahimong pangulo sa Tuvalu. Apan dili ko gustong malangkit sa kolonyal nga pagmando. Busa ako kining gibalibaran, ug bisag walay nagsuportar kanako, ako midagan gihapon alang sa taas nga posisyon sa gobyerno. Napildi ko. Human niana, mipauli ko sa among isla ug nakahukom nga magkinabuhi na lang nga yano.

GIBAG-O SA BIBLIYA ANG AKONG KINABUHI: Ang Dominggo maoy adlawng Igpapahulay ug gitamod nga balaan sa mga tawo sa isla, apan wala ko magtamod niana. Gigahin nako nang adlawa sa paglayag ug pagpangisda. Dili ko gustong mailhan nga relihiyoso. Si Papa ug ang uban wala gayod malipay sa akong gihimo. Apan dili ko gustong magawngan sa simbahan.

Sa usa sa akong mga panaw ngadto sa Funafuti, ang isla nga nahimutangan sa kapital sa Tuvalu, giimbitar ko sa akong manghod nga lalaki nga mouban sa tigom sa mga Saksi ni Jehova. Sa ulahi, gihatagan ko sa usa ka misyonaryong Saksi ug daghang magasin nga Bantayanang Torre ug Pagmata! Gihatagan sab ko niya ug libro nga nagyagyag sa mga doktrinang gikan sa mga pagano nga gitudlo sa Kristiyano kono nga mga simbahan. Kadaghan nako kini basaha. Akong nakat-onan ang daghang katingalahang mga butang sa Bibliya, lakip ang kamatuoran nga ang mga Kristohanon dili obligado sa pagtuman sa senemanang Igpapahulay. * Gipaambit ko kini sa akong asawa, ug dihadiha siya miundang sa pagsimba.

Nanaad kong dili makiglabot sa relihiyon. Apan paglabay sa halos duha ka tuig, dili nako malimtan ang akong nakat-onan. Sa kadugayan, gisulatan nako ang misyonaryo sa Funafuti ug giingnan siya nga magbag-o na ko. Misakay dayon siya sa sunod nga barko ug giadto ko aron tabangan nga makakat-og dugang bahin sa Bibliya. Nasuko kaayo si Papa sa dihang iyang nahibal-an nga mag-Saksi ni Jehova ko. Apan ako siyang gisultihan nga daghan kaayo kog nakat-onan sa Bibliya gikan sa mga Saksi ug ako nakadesidir na.

MGA KAAYOHAN NGA AKONG NABATONAN: Sa 1986, ako nabawtismohan ingong usa sa mga Saksi ni Jehova, ug pagkasunod tuig nabawtismohan pod ang akong asawa. Ang among duha ka anak nga babaye nakakat-on usab sa gitudlo sa Bibliya ug nakadesidir nga mag-Saksi ni Jehova.

Karon ako malipayon nga nahimong bahin sa usa ka relihiyon nga, sama sa mga Kristohanon sa unang siglo, walay giilang dakodako. (Mateo 23:8-12) Sila mapainubsanong nagsunod sa panig-ingnan ni Jesus ug nagsangyaw sa uban bahin sa Gingharian sa Diyos. (Mateo 4:17) Mapasalamaton gayod ako kang Jehova nga nahibaloan ko ang kamatuoran bahin kaniya ug sa iyang katawhan!

“Ang mga Saksi Wala Magdiktar Kanako kon Unsay Angayng Tuohan.”—ALEXANDER SOSKOV

NATAWO: 1971

NASOD: RUSYA

KANIADTO: COMBAT INSTRUCTOR

 KAAGI: Natawo ko sa Moscow, nga nianang panahona mao ang kapital sa Soviet Union. Ang among pamilya nagpuyo sa usa ka dakong apartment, ug daghan sa among silingan ang parehong nagtrabaho sa pabrika. Nahinumdom ko nga ingnan ko nila nga bugoy kaayo ko nga bata ug ako kono sayong mamatay o kaha mapriso. Tuod man, pagka-10 anyos nako diha na koy rekord sa kapolisan.

Pagka-18 nako, ako gitawag sa pagkasundalo ug nahimong guwardiya sa utlanan. Mipauli ko sa balay human sa duha ka tuig ug nagtrabaho sa pabrika, apan gilaay ko. Busa miapil ko sa grupo sa kapolisan sa Moscow nga moronda kon dunay kagubot ug ako nahimong instruktor sa manomano nga kombate. Motabang ko sa pagdakop sa mga kriminal sa Moscow ug moadto sa lainlaing dapit sa nasod nga may kagubot. Putong ko kaayo. Kon mouli ko sa amoa, usahay dili ko modulog sa akong asawa kay basin mapasakitan nako siya samtang matulog mi.

GIBAG-O SA BIBLIYA ANG AKONG KINABUHI: Sa nagtuon ko ug Bibliya uban sa mga Saksi ni Jehova, akong nakita nga ang bayolenteng pagkinabuhi sukwahi sa mga sukdanan sa Bibliya. Kinahanglan usab nakong hunongon ang panigarilyo ug kontrolahon ang akong pag-inom. Apan, sa akong hunahuna dili nako mabiyaan ang akong trabaho kay wala koy laing nahibaloan nga pangita sa pagbuhi sa akong pamilya. Gibati usab nako nga dili ko makahimo sa pagsangyaw, sama sa gihimo sa mga Saksi.

Sa ulahi, ako nakombinsir nga husto ang giingon sa Bibliya. Ako nahupay sa giingon sa Ezequiel 18:21, 22. Kini sa bahin nag-ingon: “Mahitungod sa daotan, kon siya motalikod sa tanan niyang mga sala nga iyang nahimo . . . , ang tanan niyang kalapasan nga iyang nahimo—kini dili na pagahinumdoman batok kaniya.”

Nakadayeg ko nga ang mga Saksi wala magdiktar kanako kon unsay angayng tuohan apan nagtabang kanako sa pagpangatarongan pinasukad sa akong natun-an. Nagkuha kog 40 ka magasin o kapin pa ug gibasa kini sulod sa tulo ka semana. Kombinsido ako sa akong nabasa nga nakaplagan ko ang tinuod nga relihiyon.

MGA KAAYOHAN NGA AKONG NABATONAN: Sa wala pa mi magtuon ug Bibliya, hapit ming magdiborsiyo sa akong asawa. Karon miuswag ang among kaminyoon. Ang akong asawa miduyog kanako sa pagtuon ug Bibliya, ug kami nakadesidir sa pag-alagad kang Jehova. Karon mas malipayon ang among pamilya. Nakakita usab kog trabaho nga dili supak sa mga prinsipyo sa Bibliya.

Sa bag-o pa kong mag-ubanan sa pagsangyaw, bation nako ang sama sa akong gibati kaniadto sa dihang magronda mi. Apan karon ako masaligon nga makapugong na sa akong kaugalingon, bisan pag may mohagit kanako. Nakakat-on ra ko sa pagpailob sa mga tawo. Nagbasol ko nga daghan ang nausik nga panahon sa akong kinabuhi, apan karon gibati nako nga makahuloganon gayod kini. Malipay kong gamiton ang akong kusog sa pag-alagad kang Jehova nga Diyos ug sa pagtabang sa uban.

[Footnote]