Bible Okpụhọde Mme Owo

NSO ikanam eyenan̄wan emi ekesinyamde mmịn ọnọ owo, emi ekedide owo idiọk ikọ-inua, ofobo mmịn, ye ada n̄kpọsọn̄ ibọk, okpụhọde? Nso ikonyụn̄ inam akani ebre mbre ukara emi mîkesiyomke-yom ndikop n̄kpọ mban̄a ido ukpono akabade edi ọkwọrọikọ Abasi? Nso ukpụhọde ke owo bodisi Russia emi ekesikpepde mme owo en̄wan akanam man ekeme ndidi kiet ke otu Mme Ntiense Jehovah? Kop mi se mmọ ẹtịn̄de.

“Ami ye eka mi ididi itai ye aban̄.”—NATALIE HAM

N̄KAMANA KE 1965

NTO AUSTRALIA

UTỌ OWO EMI N̄KEDIDE: MMA NSIMA N̄KPỌSỌN̄ IBỌK

NTE N̄KESIDUDE UWEM: N̄kokpon ke ekpri ine emi odude ke Robe ke South Australia. Mme owo ẹkesiyọyọhọ mme bar oro ẹkedude do. Mme ete ye eka ẹkesidodụn̄ mi, ntre nditọwọn̄ ẹketọn̄ọ ke n̄kpri ẹn̄wọn̄ n̄kpọ, ẹsọn̄ọ enyịn, ẹdiọk inua, ẹnyụn̄ ẹn̄wọn̄ sika.

Mma ntọn̄ọ ndin̄wọn̄ sika mbemiso nsịmde isua 12, ndiọk inua ikọ, nnyụn̄ ntọhọ utọk ye eka mi kpukpru ini. Ete mi ye eka mi ẹma ẹdian̄ade ke ini ndide isua 15, ndien mma n̄kpọn̄ ufọk ke isua kiet ye ubak ama ekebe. Mma nsida n̄kpọsọn̄ mmịn ye n̄kpọsọn̄ ibọk, nnyụn̄ ndu oburobụt uwem. Mma nsiyat esịt ntịme ntịme, n̄konyụn̄ ndiọn̄ọke se n̄kpanamde. Edi mma n̄kere ke mmekeme ndise mban̄a idem mi sia mma nda isua ition n̄kpep karet ye nte n̄wan ekemede ndinyan̄a idem. Ndien kpa ye emi, ke ini ndude ikpọn̄ n̄kere n̄kpọ, mma nsikpa mfụhọ nnyụn̄ mben̄e Abasi nte an̄wam mi, edi okûdọhọ n̄ka ufọkabasi.

Nte ini akade, ufan mi emi amade n̄kpọ Abasi edi emi mîkenyeneke akpan ufọkabasi emi enye esikade, ama ọnọ mi Bible, edi esitiene nnyịn ọn̄wọn̄ ikọn̄ekpo. Kpa ye emi, enye ama owụt ke imenen̄ede inịm ke Abasi do ndien ke akpana nna baptism. Enye ama ada mi aka n̄kpọdiọhọ mmọn̄ kiet ke edem nnyịn ekenịm mi baptism. Eketie mi nte ke mmenen̄ede n̄kpere Abasi ndien. Edi n̄kenyeneke ini ndikot Bible.

NTE BIBLE OKOKPỤHỌREDE UWEM MI: Mme Ntiense Jehovah iba ẹma ẹdi ufọk mi ke 1988. Kiet ke otu mmọ ama obụp m̀mê mmọfiọk enyịn̄ Abasi. Enye ama okot Psalm 83:18 ke Bible esie, emi ọdọhọde ete: “Man mme owo ẹkpefiọk ẹte ke afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.” Idem ama enen̄ede akpa mi! Ke mmọ ẹma ẹkenyọn̄ọ, mma n̄wat kilomita 56  n̄ka ufọkurua emi ẹsinyamde mme n̄wed Christian n̄kese m̀mê enyịn̄ emi esịne ke Bible en̄wen nnyụn̄ nse ke n̄wed ukabadeikọ. Ke mma n̄kokụt ke Abasi ekere Jehovah, mma n̄kere m̀mê enyene mme n̄kpọ en̄wen emi mmendiọn̄ọke.

Eka mi ọkọdọhọ mi ke uwem Mme Ntiense Jehovah in̄wan̄ake owo. Ndien n̄kukụre se n̄kọdiọn̄de mban̄a mmọ edi nte ke mmọ ẹsidu uwem nte mbon eset, idiọn̄ọke ndidia uwem. Mma mbiere ke ndinam nte ndụhe ke mmọ ẹma ẹdi. Edi mma n̄kpụhọ ekikere nnyụn̄ nda mmọ ndụk ufọk ke ini mmọ ẹkedide, ndien nnyịn ima itọn̄ọ ndikpep Bible.

Mma nsitịn̄ se n̄kpepde kpukpru ini nnọ Craig, akparawa emi n̄kodụn̄de kiet. Esịt ama ayat enye usen kiet tutu enye awabade n̄wed emi ẹsidade ẹkpep mi n̄kpọ ọbọ onyụn̄ ọtọn̄ọ ndikot. Ke urua ita kpọt ama ekebe, enye ama enyịme ke imokụt akpanikọ. Nte ini akade, mma ntre utom bar ndien ami ye Craig ima itre ndin̄wọn̄ ikọn̄ekpo ye n̄kpọsọn̄ mmịn. Nnyịn ima inam ndọ ndiwụt ke imada Ikọ Abasi idu uwem.

UFỌN ORO MBỌDE: Akayak nsịn̄ ami ye Craig ndidian̄ade mbemiso itọn̄ọde ndikpep Bible ye Mme Ntiense Jehovah. Edi mfịn-e? Craig edi ata eti ebe, nnyịn imonyụn̄ inyene ndiye nditọ iba. Imonyụn̄ inyene nti ufan emi ẹnyụn̄ ẹnịmde se nnyịn inịmde ke akpanikọ.

Eka mi ama enen̄ede ayat esịt ye ami ke ini n̄kọtọn̄ọde ndidian idem ye Mme Ntiense Jehovah. Edi enye akanam emi sia enye mîkenen̄ekede idiọn̄ọ Mme Ntiense Jehovah. Idahaemi, ami ye eka mi ididi itai ye aban̄. Utu ke ndidu uwem nte owo oro mînyeneke iwụk, uwem mi enyene uduak idahaemi, mmonyụn̄ nnen̄ede n̄kpere Abasi.—Matthew 5:3.

“Mma n̄kpep ediwak n̄kpọ . . . ke Bible.”—ISAKALA PAENIU

N̄KAMANA KE 1939

NTO TUVALU

UTỌ OWO EMI N̄KEDIDE: EBRE MBRE UKARA

NTE N̄KESIDUDE UWEM: N̄kamana ke Nukulaelae, ediye isuo Pacific emi esịnede idahaemi ke Tuvalu. Mme pastọ emi ẹma ẹkekụre ukpep ke ufọkn̄wed ido ukpono ke Samoa ẹkekara isuo emi. Mbon isuo emi ẹkesinọ mme pastọ emi ye ikọtufọk mmọ udia ye ufọk. Se ededi emi ẹkenọde mmọ ẹkedi mfọnn̄kan. Idem ọkpọkọm mbon isuo emi ikenyeneke se ẹdiade ke ufọk mmọ, akana mmọ ẹkụt ẹte mme pastọ emi ẹnyene se mmọ ẹdiade.

Kpa mme pastọ emi ẹkesikpep n̄kpọ ke ufọkn̄wed isuo oro. Mmọ ẹma ẹsikpep Ikọ Abasi, ibat, ye ukpepn̄kpọ obot. Mmeti isan̄ kiet emi pastọ akamiade nditọ ufọkn̄wed ọnọ unan. Edi, owo ndomokiet, idem mme ete ye eka nditọ emi, ikedehedei isioro uyo. Ẹkekpono mme pastọ emi nte Abasi.

Mma n̄kpọn̄ ufọk ke ini n̄kedide isua duop n̄kaka ufọkn̄wed ukara emi okodude  ke isuo en̄wen. Mma ndụk utom ukara ke mma n̄kokụre n̄wed. Ini oro mme isuo emi ẹkedu ke idak ukara Britain emi ẹkediọn̄ọde nte Isuo Gilbert ye Isuo Ellice. Mma nnam utom ke nsio nsio itie mbemiso ntọn̄ọde ndiwet se ẹmịn̄de ke n̄wedmbụk n̄kpọntịbe ukara emi ẹkesisiode ke urua ke urua. N̄kenyeneke mfịna ndomokiet tutu ke ini oro n̄kanamde ẹmịn̄ se owo kiet ekewetde aban̄a okụk emi ẹkebiatde ẹben̄e edidi Ọbọn̄ Wales. Owo emi ekewetde leta emi ikesịnke ata enyịn̄ esie edi eteufọk mi ama ọdọhọ nsiak enyịn̄ esie nnọ imọ. Mma nsịn ndisiak, ndien ata ediwak owo ẹma ẹdikop n̄kpọ emi.

Ke emi ama ekebe, mma n̄kpọn̄ utom ukara ndụk mbre ukara. Ndien ẹma ẹmek mi ndise enyịn mban̄a mme mbubehe idụt nnyịn ke Nukulaelae. Nte ini akade, ke ini mbon Britain ẹkesụk ẹyomde ndikpọn̄ ukara nnọ mbon Kiribati (emi ẹkediọn̄ọde nte Gilbert) ye mbon Tuvalu (emi ẹkediọn̄ọde nte Ellice), andikara Britain ama ọdọhọ nse mban̄a ndutịm ukara Tuvalu. Edi n̄koyomke ndinyene n̄kpọ ndomokiet ndinam ye ukara mbakara, ntre mma nsịn. Mma mfiak ndụk mbre ukara man ẹnọ mi ata akamba itie ke ukara. Edi ẹma ẹkan mi. Ekem ami ye n̄wan mi ima ifiak inyọn̄ isuo nnyịn ikodu uwem nte mbon edem nnyịn.

NTE BIBLE OKOKPỤHỌREDE UWEM MI: Kpukpru owo ke isuo emi ẹkeda Sunday nte Sabbath ye edisana usen, edi ami n̄kadaha. Usen uwat ubom ye usen ọkọ mi akakam edi emi. N̄koyomke ẹda mi nte owo Abasi. Ete mi ama ọdọhọ ke imọ imaha edinam mi emi, ke mbon en̄wen n̄ko imaha. Edi mma mbiere ke ndidụkke ufụn nnọ ufọkabasi.

Isan̄ kiet ke ini n̄kakade Funafuti—isuo emi ibuot obio Tuvalu odude—ekpri eyeneka mi eren ama ọdọhọ ntiene imọ n̄ka mbono esop Mme Ntiense Jehovah. Ekem, isụn̄utom Mme Ntiense Jehovah kiet ama ọnọ mi ediwak Enyọn̄-Ukpeme ye Awake! ete n̄kot. Enye ama onyụn̄ ọnọ mi n̄wed emi ayararede nte ẹketọn̄ọde mme nsunsu ukpepn̄kpọ emi ẹkpepde ke mme ufọkabasi. Mma n̄kot n̄wed emi mma ediwak ini nnyụn̄ n̄kpep ediwak n̄kpọ emi akpade owo idem ke Bible. Mma nnyụn̄ ndikụt ke ikpanaha mme Christian ẹnịm Sabbath. * Mma ntịn̄ se n̄kpepde emi nnọ n̄wan mi, ndien enye ama etre ndika ufọkabasi.

Edi mma mbebiere ke ndinyeneke n̄kpọ ndomokiet ndinam ye ido ukpono. Isua iba ama ebe, edi n̄kekemeke ndifre se n̄kekpepde. Ntre mma n̄wet leta nnọ isụn̄utom oro ke Funafuti nte ke mmeben̄e idem ndikpono Abasi. Enye ikabiatke-biat ini, ama ọsọsọp odụk ubom edi edikpep mi Bible. Esịt ama ayat ete mi ke ini enye ọkọfiọkde ke nyom ndidi kiet ke otu Mme Ntiense Jehovah. Edi mma ndọhọ enye nte ke Mme Ntiense Jehovah ẹkpep mi ediwak n̄kpọ ke Bible ndien ke mmenen̄ede mbiere ndidi kiet ke otu mmọ.

UFỌN ORO MBỌDE: Mma nna baptism ke 1986, n̄wan mi onyụn̄ ana ke 1987. Nditọ mi iba ẹma ẹtiene ẹkpep Bible ẹnyụn̄ ẹbiere ndidi kiet ke otu Mme Ntiense Jehovah.

Esịt enen̄ede enem mi nditiene n̄kpono Abasi nte mme Christian eyo mme apostle ẹkesikponode, owo inyeneke pastọ. (Matthew 23:8-12) Imonyụn̄ isụhọde idem itiene uwụtn̄kpọ Jesus inyụn̄ ikwọrọ etop Obio Ubọn̄ Abasi inọ mme owo. (Matthew 4:17) Mmenen̄ede n̄kọm Jehovah Abasi ke ndikanam mi mfiọk enye ye ikọt esie!

 “Mme Ntiense Jehovah ikọdọhọke nnịm se nnịmde.”—ALEXANDER SOSKOV

N̄KAMANA KE 1971

NTO RUSSIA

UTỌ OWO EMI N̄KEDIDE: N̄KESIKPEP MME OWO EN̄WAN

NTE N̄KESIDUDE UWEM: N̄kamana ke Moscow emi ekedide ibuot obio ukara Soviet Union ini oro. Nnyịn ikodụn̄ọ ke akamba ufọk, ndien ediwak owo ke n̄kann̄kụk nnyịn ẹkenam utom ke usiakifia kiet. Mmeti ke mmọ ẹkesidọhọ ke mmakprak idem n̄kaha ẹnyụn̄ ẹdọhọ ke mmen̄kpaha nsek, ke ẹyekọbi mi. Mma nnyenyene mfịna ye mme bodisi kpa nte mmọ ẹkedọhọde mbemiso nsịmde isua duop.

Mma ndụk utom ekọn̄ ke ini n̄kedide isua 18, ẹnyụn̄ ẹnọ mi ẹte n̄kekpeme adan̄a idụt nnyịn. Ke mma n̄kanam utom isua iba, mma nnyọn̄ ufọk nnyụn̄ n̄kọtọn̄ọ utom ke usiakifia kiet, edi n̄kamaha utọ utom oro. Ntre, mma ndụk utom bodisi emi ẹsikpande ntịme ke Moscow nnyụn̄ nsikpep mme bodisi eken en̄wan. Mma nsimụm mme abiatibet ke nsio nsio ebiet emi ubiatibet okokponde etieti ke idụt nnyịn. Okosụk etie nte n̄kpan̄wana en̄wan kpukpru ini. Ndusụk ini mma nsịm ufọk, mma nsidụk ubet efen nna mbak ndidue mfịk n̄wan mi itọn̄ n̄wot ke enyịn idap.

NTE BIBLE OKOKPỤHỌREDE UWEM MI: Ke mma n̄kọtọn̄ọ ndikpep Bible ye Mme Ntiense Jehovah, mma ndikụt ke Abasi imaha en̄wan ye afai, ye nte ke akpana ntre ndin̄wọn̄ sika ye ikọn̄, nnyụn̄ ntehede ube ke mmịn. Edi n̄kekere ke ndikemeke nditre utom bodisi sia mmen̄kenyeneke ubọkutom en̄wen emi ndidade nnọ ubon mi udia. N̄konyụn̄ n̄kere ke tutu amama, ke ndikemeke ndisan̄a n̄kwọrọ ikọ nte Mme Ntiense Jehovah ẹsinamde.

Edi mma nnyụn̄ ndikụt ke Bible edi n̄wed akpanikọ. Esịt ama enem mi ndifiọk se idude ke Ezekiel 18:21, 22, emi ọdọhọde ete: “Amaedi idiọkowo, edieke enye ọwọn̄ọrede ọkpọn̄ kpukpru idiọkn̄kpọ emi enye anamde . . . kpukpru ubiatibet emi enye akabiatde—owo iditịghi mmọ ibat inọ enye.”

Esịt enem mi nditịn̄ ke Mme Ntiense Jehovah ikọdọhọke nnịm se nnịmde ke akpanikọ, edi ẹkekpekpep mi ndikụt ke se Bible ekpepde edi akpanikọ. Mma n̄kot n̄kpọ nte magazine mmọ 40 mma ke ufan̄ urua ita kpọt. Se n̄kokotde ama anam mfiọk ke mmokụt ido ukpono akpanikọ.

UFỌN ORO MBỌDE: Akayak nsịn̄ ami ye n̄wan mi ndidian̄ade ndọ mbemiso itọn̄ọde ndikpep Bible ye Mme Ntiense Jehovah. Edi ndọ nnyịn ọfọn idahaemi. N̄wan mi n̄ko ama ọtọn̄ọ ndikpep Bible, ndien nnyịn ima ibiere ndidiana kiet nnam n̄kpọ Jehovah. Ufọk nnyịn enem etieti idahaemi. Mma ndinyene utom emi mîtuahake ye Ikọ Abasi.

Idem okosụk etie mi en̄wan en̄wan akpa ini emi n̄kakade ukwọrọikọ. Edi idahaemi mmekeme ndimụm idem n̄kama idem ekpededi owo oyom mi ikọ. Mmekpep ndime ime. Mmeseme nte n̄kabiatde utọ anyan ini oro ndu uwem atahade, edi idahaemi, uwem mi enen̄ede ọwọrọ n̄kpọ. Esịt enen̄ede enem mi ndida odudu mi idahaemi nnam utom Jehovah Abasi nnyụn̄ n̄n̄wam mme owo.

[Ikọ Idakisọn̄]