Ebaibol Na O Re Nwene Uzuazọ Ohwo

ẸVẸ ọmọtẹ nọ o je ruiruo evaọ uwou-idieda, ọnọ ọ jẹ hai duwu ahwo iyeri, da idi vrẹta jẹ rehọ imu-egaga ọ sai ro nwene uzuazọ riẹ? Fikieme ọgba esuo-ohrowo nọ o wo isiuru kpahe egagọ vẹre he o ro zihe ruọ ọgba egagọ? Nọ ọga elakpa nọ ọ jọ owuhrẹ utu elakpa-ohọre ọ jẹ gwọlọ kuomagbe Isẹri Jihova, didi inwene e jọ use-abọ kẹe? Se eme nọ ahwo nana a rọ unu rai ta.

“Enẹna mẹ avọ oni mẹ ma be riẹ yeri ziezi.”—NATALIE HAM

UKPE NỌ A YẸ OMẸ: 1965

ORẸWHO MẸ: AUSTRALIA

IKU MẸ: MẸ JẸ HAE REHỌ IMU-EGAGA

UZUAZỌ MẸ EVAỌ OKE NỌ U KPEMU: Ẹwho ọsese nọ a re se Robe evaọ South Australia, onọ a re jo kpe iyei mẹ jọ whẹro. Evaọ ewho itieye na, oria nọ a re jo there emu zẹ jẹ da idi oye ahwo a re kpohọ kẹ ẹkeriotọ. Te esẹ te ini a re kpohọ etẹe gaga, onana u ru nọ emọ rai e rẹ rọ whẹro evaọ usu ahwo nọ a rẹ da idi vrẹ oma, ta eme etọtọ, je vovo isigareti.

Nọ mẹ jọ ikpe ikpegbivẹ yọ me mu isigareti họ evovo no, duwu ahwo iyeri, jẹ hai lele oni mẹ whọ ẹsikpobi. Ọsẹgboni mẹ a hẹriẹ nọ mẹ jọ ikpe ikpegbisoi, emera ikpegberee nọ i lele i rie, mẹ tẹ kwa no uwou. Mẹ jẹ hae da idi vrẹta, rehọ imu-egaga, yọ me je yeri uzuazọ ọfariẹ-ogbe. Ofu ọ jẹ hai mu omẹ dhe. Fikinọ mẹ rehọ ikpe isoi wuhrẹ ekareti-efa gbe oghẹrẹ nọ eyae e rẹ rọ thọ omarai, me te je roro nọ mẹ rẹ sae rẹrote omamẹ. Dede na, nọ mẹ ọvo ọ tẹ rrọ oria bi roro kpahe uzuazọ mẹ, ọkora ọ rẹ jọ omẹ oma, mẹ vẹ be lẹ se Ọghẹnẹ inọ o fi obọ họ kẹ omẹ. Mẹ jẹ hae ta kẹ Ọghẹnẹ nọ: “Rekọ who du ta kẹ omẹ nọ me kpohọ ichọche he.”

Oke jọ o vrẹ no, ogbẹnyusu mẹ jọ nọ o wo ẹzi Ọghẹnẹ ọgọ rekinọ ọ rrọ ichọche evuọvo ho ọ tẹ kẹ omẹ Ebaibol. Ọyomariẹ ọ jẹ rehọ imu-egaga re wọhọ egbẹnyusu mai nọ i kiọkọ. Dede na ọ jọ udu riẹ rọwo nọ Ọghẹnẹ ọ rrọ, ọ tẹ ta udu họ omẹ awọ inọ u fo re mẹ họ-ame. Ọ tẹ rehọ omẹ kpohọ awae jọ nyae họ omẹ ame. No oke yena vrẹ, o jọ omẹ oma nọ me wo usu obọdẹ kugbe Ọghẹnẹ. Dede na, me ru oke fihọ ro se Ebaibol na vievie he.

EPANỌ EBAIBOL NA O RO NWENE UZUAZỌ MẸ: Evaọ ukpe 1988, Isẹri Jihova ivẹ i te kporo ẹthẹ mẹ. Ọjọ rai ọ nọ omẹ nọ, “Kọ whọ riẹ odẹ Ọghẹnẹ?” Osẹri na o te se Olezi 83:18 evaọ Ebaibol riẹ, onọ o ta nọ: “Re ahwo a riẹ nọ whẹ, ọnọ odẹ riẹ o rrọ Jihova, whẹ ọvo họ Ọnọ Ọ Mai Kpehru vi otọakpọ na kpobi.”  Akpọ o gb’omẹ unu! Nọ a kpo no, mẹ tẹ rọ omoto dhẹ emaele ọgbagbisoi kpohọ uwou-eki nọ a rẹ jọ zẹ ebe Egagọ-Ileleikristi re me rri oria ikere na evaọ Ebaibol efa, je rri odẹ na evaọ obe-ofeme. Nọ mẹ ruẹ vuhumu inọ Jihova họ odẹ Ọghẹnẹ, mẹ tẹ be ta kẹ omamẹ inọ u ti wo eware efa buobu nọ mẹ riẹ hẹ.

Oni mẹ ọ vuẹ omẹ vẹre inọ Isẹri Jihova yọ ahwo nọ a rẹ sai wo otoriẹ rai hi. Rono umutho eware nọ mẹ riẹ kpahe ae ze, me je rri rai fihọ ahwo nọ a rovie aro ho, gbe ahwo nọ a riẹ epanọ a rẹ re omawere he. Mẹ tẹ ta kẹ oma mẹ inọ me ti ru wọhọ ẹsenọ mẹ rrọ uwou hu nọ a te zihe ze. Rekinọ a nyaze, me te nwene iroro. Me zizie i rai ruọ uwou, a tẹ nwani mu uwuhrẹ Ebaibol họ kugbe omẹ.

Kẹse kẹse nọ ma te wuhrẹ no, mẹ jẹ hae vuẹ Craig, ogbẹnyusu ọmọzae mẹ, eware nọ me wuhrẹ. Ẹdẹjọ eva e dha riẹ te epanọ o ro fru obe nọ ma je ro ru uwuhrẹ na mi omẹ, o te mu ei họ ese. Oware wọhọ eka esa e vrẹ no, ọ tẹ ta nọ o duku uzẹme na kpahe Ọghẹnẹ no. Mẹ avọ Craig ma tẹ siọ imu-egaga erehọ ba, si obọ no idieda vroma, me te je no iruo nọ me je ru evaọ uwou-idieda. Re ma ruẹsi yeri uzuazọ nọ o rọwokugbe ehri-izi Ebaibol, ma tẹ ruọ orọo lele uzi.

IRERE NỌ ME WO NO: Taure Isẹri Jihova a te ti mu uwuhrẹ Ebaibol họ kugbe omẹ avọ Craig, ma jẹ te fa no fiki ebẹbẹ nọ ma wo. Enẹna, Craig ọ rrọ uvi ọzae, yọ ma wo emezae iwoma ivẹ. Ma wo egbẹnyusu ezi re nọ ma gbẹ rrọ orọwọ na.

Oke ọsosuọ, eva e dha oni mẹ nọ ọ riẹ nọ me bi kuomagbe ukoko Isẹri Jihova. Dede na, eme ethọthọ nọ a ta kẹe kpahe Isẹri Jihova eye e jẹ kẹe uduama na. Enẹna mẹ avọ oni mẹ ma be riẹ yeri ziezi. Enẹna, me gbe bi mu wo ọkora ha. Ukpoye, uzuazọ mẹ u wo ẹjiroro no, yọ mẹ ruẹ vuhumu no inọ me bi ru ẹgwọlọ abọ-ẹzi mẹ gba.—Matiu 5:3.

“Me wuhrẹ eware buobu no Ebaibol na ze nọ i gbe omẹ unu.”—ISAKALA PAENIU

UKPE NỌ A YẸ OMẸ: 1939

ORẸWHO MẸ: TUVALU

IKU MẸ: ỌGBA ESUO-OHROWO

UZUAZỌ MẸ EVAỌ OKE NỌ U KPEMU: A yẹ omẹ evaọ Nukulaelae, ukoliko uwoma jọ evaọ obọ Pacific, onọ o rrọ abọjọ Tuvalu enẹna. Epastọ ichọche nọ a wuhrẹ evaọ ekọleji uwuhrẹ-egagọ nọ o rrọ Samoa ae a jẹ hae ta họ ahwo obọ evaọ ikoliko na. O jọ owha-iruo emotọ ẹwho na re a ko epastọ na gbe iviuwou rai kẹdẹ kẹdẹ, kẹ ae iwou nọ a rẹ rria, ẹhẹ, a rẹ kẹ ae oware nọ o mai woma kpobi. Nọ emotọ na a gbẹ maki wo emu nọ o re te iviuwou rai re he, o gba rai họ inọ a rẹ gwọlọ emu kẹ epastọ na.

Epastọ nọ ọ jọ iwhre mai ọ jọ ọnọ o wuzou isukulu iwhre na, ọ jẹ hai wuhrẹ emọ-isukulu na esọmu, uwuhrẹ-egagọ, gbe okegbe. Mẹ kareghẹhọ inọ epastọ na ọ jẹ hai kpe emọ-isukulu na ga te epanọ azẹ ọ jẹ hai ro hwẹ no ai oma ze. Dede na, ohwo ọvo o je yiwi nọe unu hu, makọ esẹgbini emọ na dede. A jẹ hae dhẹ epastọ na wọhọ ẹsenọ ọ rrọ Ọghẹnẹ.

 Nọ mẹ jọ ikpikpe, me te no uwou kpohọ isukulu egọmeti ọvo nọ ọ jọ okogho yena evaọ ukoliko ofa. Nọ me nwrotọ no, me te mu iruo egọmeti họ. Evaọ oke yena ikoliko na e jọ otọ esuo Britain, yọ a je se ai “Gilbert and Ellice Islands.” Me ru iruo evaọ ẹko-iruo egọmeti sa-sa bẹsenọ me ro zihe ruọ okere ọrọ obe-usi egọmeti jọ nọ a re si obọ no koka koka. Eware e jẹ riẹ nya ziezi bọo ẹdẹjọ nọ me ro fi ileta nọ ohwo jọ o kere kpahe igho nọ a be raha rọ ruẹrẹ oma kpahe kẹ iweze ọmọ osu Britain fihọ obe-usi na. Odẹ jọ gheghe ohwo na o ro kere ileta na orọnikọ odẹ oma riẹ hẹ, yọ ọga iruo mẹ ọ jẹ nọ omẹ odẹ oma ohwo na. Mẹ rọwo vuẹe he, onana o tẹ so ẹwho fihọ udevie mai imava nọ ahwo buobu a riẹ kpahe.

Nọ oware yena o via no, u kri hi, me te no iruo egọmeti je dhomahọ esuo-ohrowo. Mẹ kparobọ evaọ ivotu nọ a ru evaọ Nukulaelae, kẹsena a te fi omẹ họ ọkwa ohwo nọ o wuzou abọ ekọ gbe efe-otọ orẹwho na. Uwhremu na, nọ ahwo ukoliko Kiribati (onọ a riẹ wọhọ Gilbert vẹre) gbe ukoliko Tuvalu (nọ a riẹ wọhọ Ellice vẹre) a je no otọ esuo Britain re a wo esuo obọrai, osu ubrotọ na ọ tẹ ta kẹ omẹ nọ mẹ jọ osu Tuvalu. Dede na, mẹ gwọlọ họ re ahwo a ta nọ me wobọ kugbe esuo ahwo Britain nọ ma rrọ otọ riẹ na. Fikiere mẹ tẹ siọ ọkwa na, mẹ ọvo mẹ tẹ jẹ họre kẹ ọkwa okpehru ọfa jọ ababọ obufihọ riẹ. Mẹ kparobọ họ. Kẹsena mẹ avọ aye mẹ ma te zihe kpohọ ukoliko nọ ma noze jẹ jiroro nọ ma re yeri uzuazọ obọ iwhre.

EPANỌ EBAIBOL NA O RO NWENE UZUAZỌ MẸ: U te no omẹ no, ahwo ikoliko na kpobi a rehọ Ẹdoka wọhọ ẹdẹ nọ a re ro koko Ẹdijala je rri rie họ ọrẹri. Ẹdẹ yena me re kpohọ okọ-ubio gbe iyei-ikpe. Mẹ gwọlọ nọ a riẹ omẹ wọhọ ohwo nọ o wo isiuru kpahe egagọ họ. Ọsẹ mẹ ọ vuẹ omẹ inọ uruemu mẹ o be kẹe gbe amọfa idhọvẹ. Rekọ mẹ gba riẹ mu inọ mẹ rẹ jọ otọ ekpakpọ ichọche na vievie he.

Ẹdẹjọ nọ me kpohọ Funafuti—ukoliko nọ o jọ oria nọ u wuzou esuo Tuvalu, oniọvo-ọmọzae mẹ ọrọ ọmaha ọ tẹ ta kẹ omẹ nọ me lele iei kpohọ ewuhrẹ Isẹri Jihova. Kẹsena, omọvo Isẹri Jihova jọ nọ ọ rrọ imishọnare ọ tẹ kẹ omẹ ekru emagazini Uwou-Eroro gbe Awake! inọ me se. Ọ kẹ omẹ obe jọ re nọ u dhesẹ inọ obọ ahwo egedhọ iwuhrẹ ichọche buobu nọ i se omarai Ileleikristi na i no ze. Me se obe yena unuẹse buobu. Me wuhrẹ eware buobu nọ i gbe omẹ unu no Ebaibol na ze, ojọ rai họ o rrọ ọgbahọ kẹ Ileleikristi hi re a koko Ẹdijala ikoka koka. * Mẹ vuẹ aye mẹ eware nana, ọ tẹ siọ ichọche ba ẹnya ababọ oke oraha.

Dede na mẹ gba riẹ mu no vẹre inọ me re kuomagbe egagọ evuevo ho. Enwenọ ikpe ivẹ soso e vrẹ, rekọ eware nọ me wuhrẹ na e sai no omẹ iroro ho. Ukuhọ riẹ, me te kere ileta se imishọnare nọ ọ jọ ukoliko Funafuti na, mẹ tẹ ta kẹe inọ u no omẹ eva ze no re me ru inwene nọ o gwọlọ. Ọ tẹ nwane ruọ okọ ze vẹrẹ vẹrẹ re o fi obọ họ kẹ omẹ wuhrẹ eware efa evaọ Ebaibol na. Eva e dha ọsẹ mẹ thesiwa nọ ọ riẹ nọ mẹ gwọlọ zihe ruọ omọvo Isẹri Jihova. Rekọ mẹ vuẹ riẹ inọ Isẹri na i wuhrẹ omẹ eware buobu no Ebaibol na ze no, yọ mẹ gba riẹ mu no nọ me re kuomagbe ae.

IRERE NỌ ME WO NO: Evaọ ukpe 1986, mẹ tẹ họ-ame wọhọ omọvo Isẹri Jihova, aye mẹ ọ tẹ họ-ame ukpe nọ u lele i rie. Emetẹ ivẹ mai a wuhrẹ uzẹme Ebaibol na re, a tẹ jiroro nọ a rẹ jọ Isẹri Jihova.

Eva e be were omẹ inọ mẹ rrọ egagọ nọ e be raro kele Ileleikristi ukpe-udhusoi ọsosuọ na, enọ i wo itu ilorida gbe orọ ahwo nọ a rrọ otọ rai hi. (Matiu 23:8-12) A be rọ omaurokpotọ raro kele oriruo Jesu jẹ be ta usiuwoma kẹ amọfa kpahe esuo Uvie Ọghẹnẹ. (Matiu 4:17) Me yere Jihova Ọghẹnẹ gaga nọ o ro ru ei lọhọ kẹ omẹ riẹ uzẹme na kpahe ọyomariẹ gbe idibo riẹ!

“Isẹri na a gba iwuhrẹ rai họ omẹ hẹ.”—ALEXANDER SOSKOV

UKPE NỌ A YẸ OMẸ: 1971

ORẸWHO MẸ: RUSSIA

IKU MẸ: ỌGA ELAKPA NỌ Ọ JỌ OWUHRẸ UTU ELAKPA-OHỌRE

 UZUAZỌ MẸ EVAỌ OKE NỌ U KPEMU: A yẹ omẹ evaọ Moscow, onọ o jọ okpẹwho-esuo Soviet Union oke yena. Uviuwou mai o jẹ rria ighẹ ilogbo jọ nọ ahwo buobu a jọ, yọ ibuobu erivẹ mai a je ru iruo evaọ uwou-eware-ikuo ovona. Mẹ kareghẹhọ inọ a jẹ hai se omẹ ọgbuthu, a tẹ jẹ ta nọ me ti si uwhu kpe omamẹ hayo kie ruọ ẹbẹbẹ nọ u ti fi omẹ họ uwou-odi. Ginọ uzẹme na, oke nọ mẹ jọ ikpikpe, yọ ẹme mẹ o te iporisi obọ no.

Nọ me te ikpe 18 no, a te fi omẹ họ ewuhrẹ isoja je fi omẹ họ usu ahwo nọ a re rroro uwhru orẹwho na. Ikpe ivẹ e vrẹ no, me te no iruo isoja na, me te je ru iruo evaọ uwou-eware-ikuo, rekọ iruo na i je fou omẹ ehoo. Fikiere me te kuomagbe utu elakpa Moscow je zihe ruọ ọga elakpa nọ o re wuhrẹ utu elakpa-ohọre. Me je fi obọ họ mu ejaguda evaọ Moscow je kpohọ eria efa sa-sa nọ ozighi ọ jọ evaọ orẹwho na. Udu mẹ o jẹ hae rroro ẹsikpobi. Nọ me te te uwou, ẹsejọ mẹ jẹ hae nya siọ aye mẹ ba nyai kiẹzẹ ehwa sa, keme ozọ o jẹ hai mu omẹ nọ mẹ sae rọ oma fae evaọ aso.

EPANỌ EBAIBOL NA O RO NWENE UZUAZỌ MẸ: Nọ Isẹri Jihova a mu Ebaibol họ ewuhrẹ kugbe omẹ, mẹ tẹ te ruẹ vuhumu inọ uzuazọ ozighi nọ me je yeri na o rọwo kugbe izi Ebaibol ho. Mẹ ruẹ nọ u fo re me si obọ no ivovavovo jẹ whaha idieda vroma. Dede na, me je roro nọ mẹ sai si obọ no iruo mẹ na ha, keme me wo onaa hayo iruo-abọ efa nọ mẹ rẹ sai ru rọ kuọ uviuwou mẹ hẹ. Me je roro re inọ mẹ te sae ta usiuwoma ha wọhọ epanọ Isẹri Jihova i re ru.

Nọ oke o be nyaharo na, u te ti mu omẹ ẹro inọ eware nọ e rrọ Ebaibol na uzẹme. Yọ eme nọ e rrọ Izikiẹl 18:21, 22 e kẹ omẹ omosasọ. Ikere yena e ta nọ: “Ohwo omuomu o te kurẹriẹ no imuomu riẹ no o ru . . . , a gbẹte kareghẹhọ eware iyoma riẹ nọ o ru hu.”

O were omẹ inọ Isẹri na a gba iwuhrẹ rai họ omẹ hẹ, ukpoye a fi obọ họ kẹ omẹ roma totọ roro kpahe eware nọ me je wuhrẹ. Mẹ rehọ emagazini rai nọ i te udhuvẹ hayo bu viere dede, me te se ai evaọ eka esa. Eware nọ me wuhrẹ e kẹ omẹ imuẹro inọ me duku egagọ uzẹme no.

IRERE NỌ ME WO NO: Taure me te ti mu Ebaibol họ ewuhrẹ, mẹ avọ aye mẹ ma jẹ te fa orọo no. Enẹna orọo mai o rrọ ziezi. Nọ me mu Ebaibol họ ewuhrẹ no, aye mẹ o te kuomagbe omẹ, ma tẹ jiroro inọ ma rẹ gọ Jihova. Enẹna uviuwou mai o be were eva ziezi. Mẹ tẹ jẹ ruẹ iruo nọ e wọso izi Ebaibol ho.

Oke ọsosuọ nọ me mu usiuwoma ota n’uwou ruọ uwou họ, udu o jẹ hai te omẹ otọ họ—nwane epanọ oma o jẹ hai ru omẹ nọ mẹ tẹ gwọlọ ruọ edhere nyai mu ahwo nọ a bi ru ozighi. Enẹna mẹ ruẹ no inọ udu mẹ o sai totọ ziezi, makọ nọ ohwo jọ o te ru omẹ eva dha dede. Oke o be nyaharo na, me wuhrẹ epanọ me re ro wo odiri kẹ ahwo no. O be da omẹ inọ mẹ raha ikpe buobu uzuazọ mẹ kufiẹ, rekọ enẹna mẹ ruẹ nọ uzuazọ mẹ u w’aro ziezi no. Ẹgba mẹ nọ me bi ro ru iruo Jihova Ọghẹnẹ je fi obọ họ kẹ amọfa o be kẹ omẹ evawere ziezi.

[Oruvẹ-obotọ]