Bijbel e kenki sma libi

FA WAN uma di ben e wroko na ini wan bar, di ben e dringi sopi pasa marki èn di ben e gebroiki drugs, ben man kenki en libi? Wan man di ben de wan politiekman fosi èn di no ben lobi kerki kon tron wan preikiman. Fa dati du kon? Sortu problema wan man fu Rosiakondre, di ben e leri skowtu fa fu feti, ben musu pasa fu man tron wan Kotoigi fu Yehovah? Luku san den sma disi e fruteri.

„Mi nanga mi mama kon de bun baka nanga makandra.”​—NATALIE HAM

A GEBORE NA INI 1965

KONDRE: AUSTRALIA

A BEN DE WAN SMA DI BEN E GEBROIKI DRUGS

A LIBI FU MI FOSI: Mi gro kon bigi na ini wan pikin foto pe sma ben e du fisiwroko. A foto disi nen Robe, èn a de na a zuidsei fu Australia. Na ini den sortu pikin foto disi, sma lobi fu go na a hotel fu abi prisiri nanga makandra. Papa nanga mama ben go tu, èn dati meki den pikin ben gwenti si fa sma e dringi sopi pasa marki, den ben gwenti fu yere fa sma e taki dotitaki èn den ben si fa sma e smoko sikaret. Na so den pikin ben gro kon bigi.

Di mi ben abi 12 yari, mi ben e smoko, mi ben lobi taki dotitaki èn doronomo mi ben e kisi trobi nanga mi mama. Di mi ben abi 15 yari, mi mama nanga mi papa prati èn 18 mun baka dati, mi gowe libi oso. Mi ben e dringi tumusi furu sopi, mi ben e gebroiki drugs, èn mi ben e libi wan yayolibi. Mi ben de nanga atibron doronomo èn mi no ben sabi san fu du. Ma feifi yari langa mi ben leri fu feti karate èn mi ben leri fa fu kibri misrefi leki umasma. Dati meki mi ben feni taki mi ben o man luku misrefi. Toku, te mi ben e sidon prakseri èn te dyugudyugu no ben de, dan mi ben e firi sari srefisrefi, èn mi ben e begi Gado fu yepi mi. Ma mi ben taigi Gado: „No aksi mi fu go na kerki.”

Baka wan pisi ten, wan mati fu mi gi mi wan Bijbel. A mati disi ben e bribi na ini Gado, ma a no ben de wan memre fu wan kerki. Neleki den tra mati fu mi, a ben e gebroiki drugs. Ma toku a ben taki fa a ben e bribi trutru na ini Gado èn a overtoigi mi taki mi musu teki dopu. A tyari mi go na wan liba na ini a kontren èn a dopu mi. Sensi a dei dati, mi ben feni taki mi abi wan spesrutu matifasi nanga Gado. Ma noiti mi ben feni ten fu leisi Bijbel.

A FASI FA BIJBEL KENKI MI LIBI: Na ini 1988, tu Kotoigi fu Yehovah kon na mi oso, èn wan fu den aksi mi: „Yu sabi Gado en nen?” A Kotoigi leisi Psalm 83:18 na ini en Bijbel, pe skrifi: „Na so sma o sabi taki yu di nen Yehovah, yu wawan na a Moro Heiwan fu heri grontapu.” Mi no ben man bribi san mi leisi! Baka di den tu Kotoigi gowe, mi rèi 56 kilometer go na wan bukuwenkri pe den ben e seri Kresten buku. Mi go fu luku  san skrifi na ini tra Bijbelvertaling èn mi suku a nen fu Gado na ini wan wortubuku. Di mi kon si taki a nen fu Gado na Yehovah, dan mi aksi misrefi sortu tra sani mi no ben sabi ete.

Mi mama ben taigi mi taki Yehovah Kotoigi no bun. Mi no ben sabi furu sani fu den Kotoigi, ma mi ben feni taki den ben hori densrefi tumusi na owru gwenti èn taki den no sabi meki prisiri. Te den ben kon na mi oso, dan mi ben e du neleki mi no de. Ma mi kenki prakseri bakaten, èn mi kari den kon na inisei. Na so wi bigin studeri Bijbel wantewante.

Ibri leisi te mi ben studeri, mi ben e fruteri Craig, a man di mi ben hori nanga en, san mi ben leri. Baka wan pisi ten, a sani dati ben fruferi en so te, taki a teki a buku di mi ben e studeri na mi anu èn a bigin leisi en. Dri wiki baka dati, a ben abi na overtoigi taki a kon sabi den tru tori di abi fu du nanga Bijbel. Te fu kaba, mi nanga Craig tapu fu smoko drugs èn wi no ben dringi sopi pasa marki moro. Boiti dati, mi no ben wroko moro na ini wan bar. Fu di mi nanga Craig ben wani libi na wan fasi di e kruderi nanga Bijbel gronprakseri, meki wi bosroiti fu trow.

DEN WINI DI MI KISI: Na a pisi ten di mi nanga Craig bigin studeri Bijbel nanga Yehovah Kotoigi, wi ben de fu prati nanga makandra. Ma now, Craig na wan bun masra èn wi abi tu moi pikin. Wi abi mati tu di wi lobi trutru èn di abi a srefi bribi leki wi.

Na a bigin, mi mama ben atibron di a kon sabi taki mi ben e studeri Bijbel nanga Yehovah Kotoigi, fu di a no ben frustan fa sani ben de trutru. Now mi nanga mi mama kon de bun baka nanga makandra. Mi no e firi moro leki mi no warti noti èn taki wan sani e misi na ini mi libi. Na presi fu dati, mi abi wan marki na ini a libi, èn wan trutru matifasi nanga Gado.—Mateyus 5:3.

„Mi leri furu moi sani fu Bijbel.”​—ISAKALA PAENIU

A GEBORE NA INI 1939

KONDRE: TUFALU

A BEN DE WAN POLITIEKMAN

A LIBI FU MI FOSI: Mi gebore na Nukulaelae, wan moi èilanti na ini a Stille Oceaan. Na èilanti disi de na ondro a tiri fu Tufalu now. Den sma na tapu den èilanti ben de na ondro a tiri fu domri, di ben kisi leri fu kerkitori na wan heiskoro na ini Samoa. Den sma fu na èilanti ben de fruplekti fu sorgu taki den domri nanga den osofamiri fu den kisi nyanyan ibri dei, èn taki den ben abi wan oso. Fu taki en leti, den ben gi den domri disi den moro bun sani di den ben abi. Awansi den sma fu na èilanti no ben abi nofo nyanyan gi den eigi osofamiri, toku den ben de fruplekti fu sorgu gi den domri.

Na tapu na èilanti pe mi ben e tan, wan domri ben drai a skoro fu a dorpu. A ben e gi leri fu kerkitori, wiskunde, èn wan tu sani fu aardrijkskunde. Mi man memre ete taki son leisi a domri ben fon den skoropikin so te, taki den skin ben e lon brudu. Ma nowan sma ben prefuru fu taki wan sani, srefi den papa nanga mama fu den pikin no ben taki noti. Den sma  ben e lespeki a domri neleki a ben de Gado srefi.

Di mi ben abi tin yari, mi gowe libi oso fu go na a wan-enkri lanti-skoro na ini a birti, di ben de na wan tra èilanti. Di mi klari a skoro, dan mi go wroko gi lanti. Na a pisi ten dati, den èilanti ben de na ondro a tiri fu Ingrisikondre, èn sma ben sabi den leki Gilbert nanga Ellice èilanti. Mi ben wroko na difrenti afdeling, fosi mi bigin wroko leki a sma di abi a frantwortu fu luku san e kon na ini wan koranti di lanti ben tyari kon na doro wán leisi wan wiki. Ala sani ben e waka bun, teleki a dei di mi druk wan brifi fu wan sma na ini a koranti. A sma dati ben krutu taki lanti no ben e gebroiki a moni bun, di den ben e sreka sani gi a fisiti fu a kownu manpikin fu Wales. A sma di ben skrifi a brifi no gebroiki en trutru nen, èn a basi fu mi ben de nomonomo fu mi taigi en a trutru nen fu a sma disi. Mi weigri fu taigi en dati, èn furu sma ben kon sabi fu a tori disi.

Baka a sani disi, mi gowe libi a lantiwroko èn mi go na ini a politiek. Mi ben wini wan verkiezing na ini Nukulaelae èn mi tron Minister fu bisnis afersi èn afersi di abi fu du nanga den gudu fu a kondre. Bakaten, di den sma fu a Kiribati èilanti (fosi a ben nen Gilbert èilanti) nanga Tufalu (fosi a ben nen, Ellice èilanti) ben e kisi moro nanga moro srefidensi fu Ingrisikondre, dan a tiriman ben wani gi mi wan hei posisi na ini a tirimakti fu Tufalu. Ma mi no ben wani taki sma musu denki taki mi ben wroko gi a tirimakti fu Ingrisikondre. Dati meki mi no teki a wroko èn baka dati mi teki prati na a verkiezing fu wini a moro hei posisi na ini a politiek. Mi lasi a strei dati. Baka dati, mi nanga mi wefi drai go baka na a èilanti pe mi gebore, èn mi bosroiti fu libi leki fa mi ben gwenti fosi na ini a dorpu.

A FASI FA BIJBEL KENKI MI LIBI: Na tapu den èilanti, sonde ben de a sabat-dei, èn ala sma ben e si en leki wan santa dei. Ala sma boiti mi, bika tapu sonde mi ben e go seiri nanga boto èn mi ben go fanga fisi. Mi no ben wani taki sma si mi leki wan man di de na ini wan kerki. Mi papa fruteri mi taki en nanga tra sma ben e firi sari fu a fasi fa mi ben e tyari misrefi. Ma mi ben abi a fasti bosroiti fu no gi pasi taki kerki basi mi.

Wan fu den leisi di mi ben go na Funafuti, na èilanti pe a mamafoto fu Tufalu de, dan mi pikin brada aksi mi fu kon nanga en na wan konmakandra fu Yehovah Kotoigi. Bakaten, wan zendeling gi mi wan lo Waktitoren nanga Ontwaakt! fu leisi. A gi mi wan buku sosrefi di ben tyari kon na krin taki furu kerki di e taki dati den na Kresten, e leri sma sani di komoto fu a heiden bribi. Mi leisi a buku difrenti leisi. Mi leri furu moi sani fu Bijbel, èn mi leri tu taki Kresten no musu hori na alawiki Sabat. * Mi taki fu den sani disi nanga mi wefi èn wantewante a tapu fu go na kerki.

Ma toku mi no ben wani abi noti fu du nanga kerki. Pikinmoro tu yari ben pasa, ma mi no ben man frigiti den sani di mi ben leri. Te fu kaba, mi skrifi a zendeling di ben tan na Funafuti èn mi taigi en taki mi ben de klariklari fu tyari wan kenki kon. A teki a fosi boto di ben kon na a èilanti èn a yepi mi fu leri moro fu Bijbel. Mi papa ben mandi srefisrefi di a kon sabi taki mi ben wani tron wan Kotoigi fu Yehovah. Ma mi taigi en taki den Kotoigi leri mi furu sani fu Bijbel èn taki mi ben teki mi bosroiti kaba.

DEN WINI DI MI KISI: Na ini 1986, mi teki dopu èn tron wan Kotoigi fu Yehovah. Mi wefi dopu wán yari baka dati. Den tu umapikin fu wi kon sabi tu san Bijbel e leri trutru, èn den bosroiti fu kon tron Kotoigi fu Yehovah.

Mi e prisiri now fu de wan memre fu wan kerki grupu pe difrenti no de na mindri den fesiman nanga den tra memre, soleki fa a ben de nanga den Kresten fu a fosi yari hondro (Mateyus 23:8-12). Boiti dati, den abi sakafasi èn den e teki na eksempre fu Yesus fu di den e fruteri trawan fu a tiri fu Gado Kownukondre (Mateyus 4:17). Mi de nanga tangi trutru taki Yehovah Gado meki mi kon sabi den tru tori di abi fu du nanga En èn nanga en pipel!

 „Den Kotoigi no taigi mi san mi musu bribi.”​—ALEXANDER SOSKOV

A GEBORE NA INI 1971

KONDRE: ROSIAKONDRE

A BEN DE WAN MAN DI BEN E LERI SMA FA FU FETI

LIBI FU MI FOSI: Mi gebore na ini Moskow èn na a ten dati, Moskow ben de a mamafoto fu Sovyet-Unie. Mi famiri ben e libi na ini wan bigi gebow, èn furu fu den sma di ben libi drape, ben e wroko na a srefi fabriki. Mi e memre taki den sma ben kragi taki mi ben dyugudyugu tumusi èn den ben e taki dati a sani disi ben o meki mi dede fruku, noso taki mi ben o go na strafu-oso wan dei. Fu taki en leti, di mi ben abi tin yari, dan mi ben kisi problema kaba nanga skowtu.

Di mi ben abi 18 yari, dan mi ben musu go na ini a legre èn mi ben e hori wakti na a lanki fu a kondre. Baka tu yari, mi go baka na oso èn mi go wroko na ini wan fabriki. Ma mi ben feni taki a wroko soi. Dati meki mi go wroko gi den skowtu fu Moskow di ben musu tapu bigi grupu sma di ben opo densrefi teige lanti. Mi ben e leri den fa fu feti. Mi ben e yepi den fu kisi ogriman na ini Moskow èn mi ben e go na difrenti presi fu a kondre pe dyugudyugu nanga feti ben de. Mi ben de fayafaya fu feti. Son leisi te mi ben kon baka na oso, dan mi nanga mi wefi no ben e sribi tapu a srefi bedi. Mi ben e frede taki mi ben o gi mi wefi mankeri na ini mi sribi.

A FASI FA BIJBEL KENKI MI LIBI: Di mi bigin studeri Bijbel nanga Yehovah Kotoigi, dan mi kon si taki a libi fu mi no ben e kruderi nanga Bijbel gronprakseri. Mi kon si tu taki mi ben musu tapu nanga a smoko di mi ben e smoko, èn taki mi no ben musu dringi so furu sopi moro. Ma mi ben denki taki mi no ben o man suku wan tra wroko di ben o gi mi okasi fu sorgu mi osofamiri, fu di mi no ben sabi nowan tra sani di mi ben kan du leki wroko. Boiti dati, mi ben feni taki noiti mi ben o go preiki soleki fa den Kotoigi e du.

Te fu kaba, mi kisi na overtoigi taki den tori di skrifi na ini Bijbel na tru tori. Mi kisi trowstu fu den sani di skrifi na ini Esekièl 18:21, 22. Drape skrifi: „Efu wan ogrisma tapu nanga den ogri di a ben e du . . . , mi no o memre nowan fu den ogri di a ben du.”

Mi ben lobi taki den Kotoigi no ben e taigi mi san mi musu bribi, ma den ben e taki-go-taki-kon nanga mi fu den sani di mi ben e leri. Mi ben teki sowan 40 noso moro tijdschrift èn mi leisi den na ini dri wiki. Den sani di mi leri, gi mi na overtoigi taki mi feni a tru bribi.

DEN WINI DI MI KISI: Fosi mi ben e studeri Bijbel, mi nanga mi wefi ben de fu broko trow. Now a trowlibi fu wi kon moro bun. Di mi ben e studeri Bijbel, dan mi wefi bigin studeri tu, èn wi bosroiti fu dini Yehovah makandra. Now wi abi wan moro koloku osofamiri libi. Mi ben man feni wan wroko tu di no de teige Bijbel gronprakseri.

Te mi ben e teki prati na a oso-fu-oso preikiwroko na a bigin, dan mi ben e kisi den srefi firi leki te mi ben go feti. Now mi de seiker taki mi kan hori misrefi awinsi wan sma e suku fu meki mi atibron. Now mi leri fu abi pasensi nanga sma. A e hati mi taki mi lasi someni ten na ini mi libi, ma now mi e firi taki a libi fu mi abi wan marki trutru. Mi breiti taki mi man gebroiki mi krakti fu dini Yehovah Gado èn fu yepi tra sma.

[Futuwortu]