Bibele Yi Hundzula Vutomi Bya Vanhu

XANA wansati loyi a a tirha ku xavisa byala ebarheni loyi a a ri ni nhlamba, a a nwa ku tlula mpimo naswona a a tirhisa swidzidziharisi u swi kotise ku yini ku cinca mahanyelo yakwe? I yini lexi susumeteleke wanuna un’wana loyi a a ri n’watipolitiki loyi a a nga lavi ku twa nchumu hi vukhongeri leswaku a sungula ku byi rhandza? I yini leswi phorisa ra le Russia leri a ri ri muleteri ri bohekeke ku lwisana na swona leswaku ri va Mbhoni ya Yehovha? Hlaya leswi vanhu lava va swi vulaka.

“Mina Na Manana Hi Ni Vuxaka Lebyikulu Lebyi A Hi Ri Na Byona Eku Sunguleni.”—NATALIE HAM

LEMBE RO VELEKIWA: 1965

TIKO: AUSTRALIA

MATIMU YAKWE: A A TIRHISA SWIDZIDZIHARISI

VUTOMI BYA MINA: Ndzi kulele exidorobanini lexi vanhu a va phasela eka xona tinhlampfi xa Robe, lexi nga eDzongeni wa Australia. Vanhu lava tshamaka endhawini yoleyo a va tihungasa eka hotela ya kwalaho. Vatswari a va heta nkarhi wo tala va ri ehotela yoleyo kutani vana va vona a va kulela endhawini leyi ku nwiwaka byala ku tlula mpimo, laha ku nga riki na mavulavulelo lamanene naswona ku dzahiwaka ni fole.

Loko ndzi ri ni malembe ya 12 se a ndzi dzaha, a ndzi tiva nhlambha naswona minkarhi hinkwayo a ndzi tshamela ku lwa na manana. Loko ndzi ri ni malembe ya 15, vatswari va mina va hambanile naswona endzhaku ka tin’hweti ta 18 ndzi rhurhe ekaya. A ndzi nwa ku tlula mpimo, ndzi tirhisa swidzidziharisi naswona a ndzi nga ri na mahanyelo. A ndzi tshama ndzi hlundzukile ndzi tlhela ndzi pfilunganyeka. Leswi a ndzi hete malembe ya ntlhanu ndzi leteriwa karati ni ndlela yo sirhelela vavasati, ndzi tibyele leswaku ndzi nga swi kota ku tihlayisa. Hambileswi a ndzi miyerile, loko ndzi ri ndzexe a ndzi tshamela ku va ni gome naswona a ndzi kombela Xikwembu leswaku xi ndzi pfuna. Kambe a ndzi xi kombela leswi, “U nga ndzi byeli leswaku ndzi ya ekerekeni.”

Hi ku famba ka nkarhi, munghana wa mina loyi a a ri mupfumeri kambe a a nga ngheni kereke u ndzi nyike Bibele. Ku fana ni vanghana va mina lavan’wana, na yena a a tirhisa swidzidziharisi. Kambe a a xi tshemba hi mbilu yakwe hinkwayo Xikwembu naswona u ndzi khutaze leswaku ndzi khuvuriwa. U ndzi yise etiveni ra kwalaho kutani a ndzi khuvula. Endzhaku ka sweswo, ndzi titwe ndzi ri ni vuxaka byo hlawuleka ni Xikwembu. Hambiswiritano, a ndzi nga ri na wona nkarhi wo hlaya Bibele.

NDLELA LEYI BIBELE YI HUNDZULEKE VUTOMI BYA MINA HA YONA: Hi 1988, ndzi endzeriwe hi Timbhoni timbirhi. Yin’wana ya tona yi ndzi vutise yi ku, “Xana wa ri tiva vito ra Xikwembu?” Yi ndzi hlayele Pisalema 83:18 eBibeleni ya yona leyi nge: “Leswaku vanhu va ta swi tiva leswaku wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.”  Leswi swi ndzi hlamarisile! Endzhaku ka loko ti fambile, ndzi chayele tikhilomitara ta 56 ndzi ya exitolo xa Vakreste leswaku ndzi ya languta vuhundzuluxeri bya Tibibele tin’wana loko ti ri na rona vito rero ndzi tlhela ndzi ri languta eka xihlamusela-marito. Loko se ndzi tiyisekile leswaku vito ra Xikwembu i Yehovha, ndzi tivutise leswaku i yini swin’wana leswi ndzi nga swi tiviki.

Manana u tshame a ndzi byela leswaku Timbhoni ta Yehovha a ti kahle. Hambileswi a ndzi nga tivi swo tala ha tona, a ndzi tibyela leswaku ti yi namarhela ngopfu Bibele naswona a ti titsakisi. Loko ti ndzi endzela a ndzi tumbela. Kambe hi ku famba ka nkarhi ndzi ti amukerile naswona hi nambe hi sungula ku dyondza Bibele.

Endzhaku ka dyondzo yin’wana ni yin’wana, a ndzi byela Craig jaha ra mina hileswi ndzi swi dyondzeke. Leswi swi endle leswaku a lava ku tivonela hi ya yena, hiloko a wutla buku leyi a ndzi yi khomile kutani a sungula ku yi hlaya. Ku nga si hela mavhiki manharhu, u gimete hileswaku se u kume ntiyiso malunghana ni Xikwembu. Eku heteleleni, mina na Craig hi tshike ku tirhisa swidzidziharisi, ku nwa ku tlula mpimo naswona ndzi tshike ntirho wa mina wo xavisa byala. Leswaku hi hanya hi ku pfumelelana ni milawu ya Bibele, hi endle xiboho xo tekana hi nawu.

NDLELA LEYI NDZI VUYERIWEKE HA YONA: Loko hi sungula ku dyondza Bibele ni Timbhoni ta Yehovha, mina na Craig a hi ri ekusuhi ni ku tshikana. Namuntlha Craig i nuna lonene naswona hi ni vana vambirhi vo saseka. Hi hala tlhelo, hi ni vanghana va xiviri lava na vona va nga Timbhoni.

Loko manana a sungula ku swi twa leswaku ndzi Mbhoni ya Yehovha u hlundzukile. Kambe leswi a swi vangiwa hileswi a byeriweke mavunwa hi Timbhoni. Sweswi mina na manana hi ni vuxaka lebyikulu lebyi a hi ri na byona eku sunguleni. A ndza ha titwi ndzi ri xikangalafula. Ku ri na sweswo, ndzi hanya vutomi lebyi nga ni xikongomelo naswona swilaveko swa mina swa moya swa enerisiwa.—Matewu 5:3.

“Ndzi Dyondze Swilo Swo Tala Leswi Hlamarisaka eBibeleni.”—ISAKALA PAENIU

LEMBE RO VELEKIWA: 1939

TIKO: TUVALU

MATIMU YAKWE: N’WATIPOLITIKI

VUTOMI BYA MINA: Ndzi velekeriwe eNukulaelae, laha ku nga xihlala xo saseka xa Pacific lexi sweswi xi nga xiphemu xa Tuvalu. Eswihlaleni sweswo a ku tele vafundhisi lava a va dyondzela vufundhisi ekholichi ya le Samoa. Vaaki va kwalaho hi vona lava a va khathalela swilaveko swa vona, va va nyika swakudya, vona swin’we ni mindyangu ya vona va tlhela va va kumela ndhawu yo tshama. Hambiloko vona va nga ri na swona swakudya leswi eneleke emindyangwini ya vona, a va sindzisiwa ku kumela vafundhisi swakudya.

Mufundhisi loyi a a tshama exihlaleni lexi ndzi nga kulela eka xona a a ri nhloko ya xikolo lexi a xi ri kwalaho naswona a a dyondzisa vukhongeri, tinhlayo ni ntivo-mbango. Ndzi tsundzuka siku leri ndzi nga n’wi vona a ba swichudeni hi ndlela ya tihanyi lerova swi huma ni ngati. Kambe a nga kona loyi a veke ni xivindzi xo kanetana ni mhaka leyi, hambi ku ri vatswari va lo timiyelela. Mufundhisi yoloye a xiximiwa ku fana ni Xikwembu.

Loko ndzi ri ni malembe ya khume, ndzi rhurhe  ekaya leswaku ndzi ya nghena xikolo xa mfumo lexi a xi ri exihlaleni xin’wana. Loko ndzi heta xikolo, ndzi sungule ku tirha eka mfumo. Hi nkarhi wolowo, xihlala xa Gilbert ni xa Ellice a swi ri ehansi ka tiko ra Britain. Loko ndzi nga si va muhleri wa phepha-hungu ra mfumo leri a ri huma vhiki ni vhiki, a ndzi tirha eka tindzawulo to hambana-hambana. Swilo hinkwaswo a swi famba kahle ku fikela loko ndzi kandziyisa papila leri humaka eka muhlayi loyi a a sola ndlela leyi mali yo lunghiselela ku ta ka Hosana ya le Wales yi tirhisiweke ha yona. Mutsari wa papila rero a a tirhise vito leri nga riki ra yena naswona mukongomisi wa mina a a lava ku tiva vito rakwe ra xiviri. A ndzi n’wi byelanga naswona mhaka leyi yi tiviwe hi vanhu vo tala.

Endzhakunyana ka sweswo, ndzi tshike ku tirha eka mfumo kutani ndzi nghenelela eka swa tipolitiki. Ndzi wine eka nhlawulo wa le Nukulaelae kutani ndzi va Holobye wa Mabindzu naswona a ndzi langutela ni Swilo swa Ntumbuluko. Loko vanhu va le xihlaleni xa Kiribati (lexi khale a xi vuriwa Gilbert) ni va le xihlaleni xa Tuvalu (lexi khale a xi vuriwa Ellice) va kuma ntshunxeko, ndhuna-nkulu ya le swihlaleni sweswo yi ndzi nyike ntirho wo rhangela xihlala xa Tuvalu. Hambiswiritano, a ndzi nga swi lavi ku va murhangeri wa xihlala lexi a xi ri ehansi ka tiko rin’wana. Leswi swi endle leswaku ndzi nga xi amukeli xikhundlha xexo. Hambileswi a ndzi nga seketeriwi hi munhu, ndzi nghenele nhlawulo wa mani na mani leswaku ndzi ta vhoteriwa eka xitulu xa le henhla xa tipolitiki, kambe a ndzi winanga. Endzhaku ka sweswo, mina ni nsati wa mina hi tlhelele exihlaleni lexi ndzi kuleleke eka xona naswona hi fike hi hanya ku fana ni vanhu va kwalaho.

NDLELA LEYI BIBELE YI HUNDZULEKE VUTOMI BYA MINA HA YONA: Eswihlaleni hinkwaswo hi Sonto a ku hlayisiwa Savata naswona vanhu hinkwavo a va ri teka ri kwetsima siku leri, kambe mina a ndzi nga ri teki tano. Hi siku leri a ndzi phasa tinhlampfi. A ndzi lava leswaku vanhu hinkwavo va swi tiva leswaku a ndzi tingheni ta vukhongeri. Tatana u vule leswaku swiendlo swa mina a swi n’wi khomisa tingana, yena swin’we ni vanhu van’wana. Kambe a ndzi nga swi lavi ku va xirho xa kereke yo karhi.

Siku rin’wana loko ndzi endzele exihlaleni xa Funafuti lexi eka xona ku nga ni ntsindza wa Tuvalu, ndzisana ya mina ya mufana yi ndzi rhambile leswaku ndzi famba na yona eminhlanganweni ya Timbhoni ta Yehovha. Endzhaku ka sweswo, murhumiwa la nga Mbhoni u ndzi nyike timagazini ta Xihondzo xo Rindza ni Xalamuka! leswaku ndzi ti hlaya. U tlhele a ndzi nyika buku leyi hlamuselaka masungulo ya tidyondzo ta vuhedeni leti tikereke to tala leti tivulaka ta Vukreste a ti ti dyondzisa. Ndzi yi hlaye ko tala buku yoleyo. Ndzi dyondze swilo swo tala leswi hlamarisaka eBibeleni ku katsa nileswaku Vakreste a va ha fanelanga va hlayisa Savata vhiki na vhiki. * Ndzi byele nsati wa mina leswi ndzi swi dyondzeke, hiloko a namba a tshika ku ya ekerekeni.

Hambiswiritano, a ndzi tibyele leswaku a ndzi lavi ku twa nchumu hi vukhongeri. Hambileswi se a swi lava ku endla malembe mambirhi, leswi ndzi swi dyondzeke eka timagazini teto a ndzi swi rivalanga. Eku heteleleni ndzi tsalele murhumiwa luya wa le Funafuti, ndzi n’wi byela leswaku se ndzi lava ku cinca vutomi bya mina. U lo namba a khandziya xikepe lexi landzeleke leswaku a ta ndzi pfuna ku dyondza swo tala hi Bibele. Tatana u hlundzukile loko a twa leswaku ndzi lava ku va Mbhoni ya Yehovha. Kambe ndzi n’wi byele leswaku Timbhoni ti ndzi dyondzise swo tala eBibeleni naswona a ndzi nge xi cinci xiboho xa mina.

NDLELA LEYI NDZI VUYERIWEKE HA YONA: Hi 1986, ndzi khuvuriwile ndzi va Mbhoni ya Yehovha naswona nsati wa mina u khuvuriwe haxawa xa kona. Vana va hina va vanhwanyana vambirhi va dyondze Bibele kutani va va Timbhoni ta Yehovha.

Sweswi ndza tiphina hi ku va xirho xa ntlawa wa vukhongeri lebyi nga riki na mufundhisi naswona vanhu va kona va ringanaka ku fana ni Vakreste va lembe-xidzana ro sungula. (Matewu 23:8-12) Hi ku titsongahata va landzela xikombiso xa Yesu naswona va chumayela hi Mfumo wa Xikwembu. (Matewu 4:17) Ndza n’wi nkhensa Yehovha Xikwembu hileswi a ndzi pfuneke ku dyondza ntiyiso hi yena ni hi vanhu vakwe!

 “Timbhoni A Ti Ndzi Sindzisanga Ku Pfumela Leswi A Ndzi Swi Dyondza.”—ALEXANDER SOSKOV

LEMBE RO VELEKIWA: 1971

TIKO: RUSSIA

MATIMU YAKWE: MULETERI WA MAPHORISA LAMA LAMULAKA TINYIMPI

VUTOMI BYA MINA: Ndzi velekeriwe etikweni ra Moscow, leri hi nkarhi wolowo a ri ri ntsindza wa Soviet Union. Ndyangu wa ka hina a wu tshama eka yindlu leyikulu naswona vaakelani va hina vo tala a va tirha eka feme yin’we. Ndzi tsundzuka loko va gungula hileswaku ndzi tlharihele etlhelo naswona ndzi ta fa ndza ha ri ntsongo kumbe ndzi hetelela ndzi ri ekhotsweni. Loko ndzi ri ni malembe ya khume, vito ra mina se a ri ri kona eka tifayili ta maphorisa.

Loko ndzi ri ni malembe ya 18, ndzi sindzisiwe ku joyina vusocha naswona a ndzi tirha tanihi murindzi wa le ndzilakaneni. Endzhaku ka malembe mambirhi ndzi tlhelele ekaya naswona ndzi tirhe efemeni, kambe ntirho wa kona a wu nga ndzi tsakisi. Kutani ndzi joyine ntlawa wa maphorisa ya le Moscow lawa a ma tirha ku khoma vanhu lava vangaka hasahasa etindhawini ta mani na mani naswona a ndzi tirha tanihi muleteri wa wona. A ndzi tirha ku khoma swigevenga eMoscow naswona a ndzi ya etindhawini to hambana-hambana leti a ku ri ni tinyimpi eka tona. A ndzi tshama ndzi ri karhi ndzi lava ku lwa. Loko ndzi vuya entirhweni, minkarhi yin’wana mina ni nsati wa mina a hi nga etleli eka mubedo wun’we hikwalaho ko chava leswaku ndzi nga n’wi vavisa.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi sungula ku dyondza Bibele ni Timbhoni ta Yehovha ndzi xiye leswaku madzolonga a ma fambisani nileswi Bibele yi swi dyondzisaka. Ndzi tlhele ndzi swi xiya leswaku ndzi fanele ndzi tshika ku dzaha naswona ndzi ringanisela loko ndzi nwa byala. Kambe a ndzi tibyele leswaku a ndzi nge wu tshiki ntirho wa mina tanihi leswi a ndzi vona onge a ku na ntirho wun’wana lowu ndzi nga wu endlaka leswaku ndzi wundla ndyangu wa mina. A ndzi vona onge a ndzi nge swi koti ku famba ndzi chumayela, hilaha Timbhoni ti endlaka hakona.

Ndzi hetelele ndzi swi xiya leswaku Bibele yi ni rungula leri kongomeke. Ndzi tlhele ndzi chaveleriwa hi rungula leri nga eka Ezekiyele 18:21, 22 leyi nge: “Loko ku ri lowo homboloka, loko o tshuka a tlhela eswidyohweni swakwe hinkwaswo leswi a swi endleke . . . , ku tlula nawu kakwe hinkwako loku a ku endleke—a ku nge tsundzukiwi eka yena.”

Lexi ndzi tsakiseke hileswaku Timbhoni a ti ndzi sindzisanga ku pfumela leswi a ndzi swi dyondza kambe ti ndzi pfune leswaku ndzi anakanyisisa hi goza leri a ndzi fanele ndzi ri teka. Ku nga si hela mavhiki manharhu, se a ndzi hlaye timagazini ta 40 kumbe ku tlula. Leswi ndzi swi hlayeke eka tano swi ndzi khorwisile leswaku ndzi kume vukhongeri bya ntiyiso.

NDLELA LEYI NDZI VUYERIWEKE HA YONA: Loko ndzi nga si dyondza Bibele, mina ni nsati wa mina a hi ri ekusuhi ni ku dlaya vukati. Kambe sweswi ha tiphina evukatini bya hina. Nsati wa mina u sungule ku dyondza Bibele endzhaku ka loko ndzi sungurile naswona hi endle xiboho xo tirhela Yehovha swin’we. Sweswi ku ni ntsako endyangwini wa mina. Ndzi tlhele ndzi kuma ntirho lowu nga lwisaniki ni milawu ya Bibele.

Loko ndzi sungula ku chumayela hi yindlu ni yindlu a ndzi chuha swinene, ku nga ndlela leyi a ndzi titwa ha yona loko ndza ha ri muleteri wa maphorisa lama lamulaka tinyimpi. Sweswi ndza swi kota ku tikhoma hambiloko munhu un’wana a ndzi pfuka. Ndzi dyondze ku lehisela vanhu mbilu. Ndza tisola hileswi ndzi tlangeke hi vutomi bya mina, kambe sweswi ndza swi xiya leswaku byi ni xikongomelo. Ndza tsaka leswi ndzi tirhisaka matimba ya mina leswaku ndzi tirhela Yehovha Xikwembu ni ku pfuna vanhu van’wana.

[Nhlamuselo ya le hansi]