“Hinumdomi Ako, Oh Diyos Ko, Alang sa Kaayohan”
Pakigsuod sa Diyos
“Hinumdomi Ako, Oh Diyos Ko, Alang sa Kaayohan”
“NAGHUNAHUNA kong si Jehova, nga nakaila pag-ayo kanako, dili gayod mahigugma o mouyon kanako.” Mao kini ang gisulat sa usa ka matinumanong Kristohanong babaye nga mibating wala siyay pulos. Gibati ba usab nimo nga ang Diyos wala na magtagad o mouyon kanimo? Nan, ang mga pulong sa Nehemias 13:31 makadasig kanimo.
Si Nehemias, ang gobernador sa mga Hudiyo sa ikalimang siglo B.C.E., naningkamot gayod sa pagpahimuot sa Diyos. Siya nanguna sa pagtukod pag-usab sa mga paril sa Jerusalem bisan pa sa pagsupak sa mga kaaway. Siya nagpatuman sa Balaod sa Diyos, nag-atiman sa mga dinaogdaog, ug nagpalig-on sa pagtuo sa iyang mga isigka-Israelinhon. Nakita ba sa Diyos ang kaayohan nga iyang gihimo? Si Nehemias ba giuyonan ni Jehova? Makita nato ang tubag diha sa paniklop nga mga pulong sa iyang basahon.
Si Nehemias nag-ampo: “Hinumdomi ako, Oh Diyos ko, alang sa kaayohan.” * Nahadlok ba si Nehemias nga dili makita sa Diyos ang maayong butang nga iyang gihimo o nga siya kalimtan na lang sa Diyos? Wala. Nasayod gayod si Nehemias sa giingon sa unang mga magsusulat sa Bibliya bahin sa kahingawa ni Jehova sa iyang matinumanong mga magsisimba ug sa ilang maayong binuhatan. (Exodo 32:32, 33; Salmo 56:8) Nan unsa diay iyang gihangyo sa Diyos nga buhaton? Ang usa ka reperensiya nag-ingon nga ang Hebreohanong termino nga gihubad nga “hinumdomi” nagtumong sa “paghandom uban ang pagkamabination.” Uban ang hugot nga pagtuo, gihangyo ni Nehemias sa Diyos nga hinumdoman siya uban ang pagkamabination ug nga siya unta panalanginan.—Nehemias 2:4.
Tubagon ba ni Jehova ang pag-ampo ni Nehemias? Sa usa ka bahin, siya gihinumdoman na. Kay gilakip ni Jehova sa Bibliya ang pag-ampo ni Nehemias, makaingon gayod kitang gihinumdoman ni Jehova si Nehemias uban ang pagkamabination. Apan labaw pa ang himoon sa “Tigpatalinghog sa pag-ampo” sa pagtubag sa kinasingkasing nga hangyo ni Nehemias.—Salmo 65:2.
Gantihan sa Diyos si Nehemias sa tanang kaayohan nga iyang gihimo alang sa putling pagsimba. (Hebreohanon 11:6) Sa matarong nga bag-ong kalibotan nga gisaad ni Jehova, iyang banhawon si Nehemias. * (2 Pedro 3:13; Pinadayag 21:3, 4) Didto, uban ang paglaom nga mabuhing walay kataposan sa paraisong yuta, makita unya ni Nehemias nga si Jehova nahinumdom gayod kaniya sa kaayohan nga iyang gihimo.
Ang pag-ampo ni Nehemias nagpamatuod nga tinuod gayod ang mga pulong ni Haring David: “Panalanginan mo si bisan kinsa nga matarong, Oh Jehova; ingon sa usa ka dakong taming, likosan mo sila uban ang pag-uyon.” (Salmo 5:12) Oo, nakita ug gipabilhan sa Diyos ang atong tim-os nga mga paningkamot sa pagpahimuot kaniya. Kon bug-os kang maningkamot sa pag-alagad kaniya, ikaw makasalig nga siya mahinumdom nimo uban ang pagkamabination ug dagayang magpanalangin kanimo.
Sugyot nga pagbasa sa Bibliya sa Pebrero:
[Mga footnote]
^ par. 3 Kini mao ang kataposan sa upat ka higayon nga mabasa niining basahona nga si Nehemias nag-ampo sa Diyos nga panalanginan unta ang iyang pagkamatinumanon.—Nehemias 5:19; 13:14, 22, 31.
^ par. 5 Alang sa dugang impormasyon bahin sa katuyoan sa Diyos alang sa matinumanong mga tawo sa yuta, tan-awa ang kapitulo 3 ug 7 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.
