“Aw Ka Pathian, A Ṭha Lamin Min Hre Reng Ang Che”
Pathian Hnaih Rawh
“Aw Ka Pathian, A Ṭha Lamin Min Hre Reng Ang Che”
“MIN hre chiang êm êmtu Pathian Jehova chuan min hmangaihin, min duhsak theih ngai ka ring lo,” tiin tlâktlai lo nia inhre tlat Kristian nu pakhat chuan a ziak a. Chutianga inhriatna chu i neiin, Pathian duhsakna chu sawi loh a ngaihsakna takngial pawh phu lo niin i inhre tawh ngai em? I inhre tawh ngai a nih chuan Nehemia 13:31-a chhinchhiah thute chu i thlamuanpui thei ang.
B.C.E. kum zabi pangana hun laia Juda ram awptu Nehemia chuan Pathian tihlâwm tumin theih tâwp a chhuah a. Hmêlmate dodâlna kârah pawh Jerusalem kulh sak ṭhat lehnaah hma a hruai a ni. Ani chuan Pathian Dân a kengkawhin, hnehchhiaha awmte chu a ngaihsak a; tin a chipui Israelte rinna tihnghehsak dân kawng a dap bawk a ni. Pathianin he mi rinawma thil ṭha tihte chu a lo hmu em? Nehemia’n Jehova duhsakna a dawng em? A hming pu lehkhabu a tlipna thute aṭangin a chhânna kan hre thei a ni.
Nehemia chu: “Aw ka Pathian, a ṭha lamin min hre reng ang che,” tiin a ṭawngṭai a. * Nehemia chuan a thil ṭha tihte Pathianin a hmuh loh emaw, Pathianin amah a theihnghilh emaw a hlau em? Hlau lo ve. Ani chuan Pathian Jehova’n amah betu rinawmte a ngaihsakna leh an thiltih ṭhate a hriat rengzia a hmaa Bible ziaktute sawi chu a hre ngei ang. (Exodus 32:32, 33; Sâm 56:8) Chuti chu, Pathian hnêna a dîl chu eng nge ni ta ang? Lehkhabu pakhat chuan “hre reng” tia lehlin Hebrai thu mal chuan “rilrua ngainatna leh thiltih tel hriat chhuahna” a kâwk tih a târ lang. Nehemia chuan ṭawngṭai thiltihtheihna ring tlatin, Pathianin ngainatna nêna amah hre chhuak tûr leh malsâwm tûrin a ngên a ni.—Nehemia 2:4.
Hre reng tûra Nehemia ngenna chu Pathian Jehova’n a chhâng ang em? Kawng khat chuan a chhâng dêr tawh a ni. Pathian Jehova’n Nehemia ṭawngṭaina chhinchhiah a, a thâwk khum Bible-a telh tlâka a ruatna hrim hrim aṭang pawh hian Nehemia chu ngainatna nên a hre reng tih kan hre thei a ni. Mahse “ṭawngṭaina ngaithlatu” chuan tih tak zeta Nehemia ngenna chhân mai aia tam a tihsak ang.—Sâm 65:2.
Pathian chuan Nehemia chu biakna dik atâna a thil lo tih tawh zawng zawngte tân lâwmman a la pe dâwn. (Hebrai 11:6) Jehova min tiam felna khawvêl thar lo thleng tûrah hian, thihna ata kai thovin Nehemia chu mal a sâwm ang. * (2 Petera 3:13; Thu Puan 21:3, 4) Chutah chuan, lei paradis-a chatuana nun beiseina neiin, ani chuan Pathian Jehova’n a ṭha lamin a hre reng a ni tih a la hre ngei ang.
Nehemia ṭawngṭaina chuan Lal Davida thusawi: “Mi fel chu mal i sâwm dâwn si a; Aw LALPA, ani chu phaw ang hian duhsaknain i hual vêl ang,” tih a dikzia a nemnghet a ni. (Sâm 5:12) Ni e, Pathian chuan amah tihlâwm tuma kan thawhrimna chu a hmuin, a hlut bawk a ni. A rawngbâwlna kawnga theih tâwp i chhuah phawt chuan, ngainatna nên a hre reng chein, nasa takin mal a sâwm ang che tih i ring tlat thei a ni. (w11-E 02/01)
February Thla Chhunga Chhiar Atana Rawt Bible Chang:
▪ Nehemia 1-13
[Footnote-te]
^ par. 5 Hei hi Nehemia lehkhabua Nehemia’n a rinawmna thiltih aṭanga rah ṭha leh duhawm chhuahtîr tûra Pathian a ngenna palite zînga a hnuhnûng ber a ni.—Nehemia 5:19; 13:14, 22, 31.
^ par. 7 Leia mi rinawmte tâna Pathian thiltum chungchâng hriat belh nân, Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu, bung 3 leh bung 7 en rawh.