Batamela Kgauswi le Modimo

“Modimo wa ka, o Nkgopole ka tše Botse”

“KE BE ke nagana gore Jehofa yo a ntsebago gabotse, a ka se ke a nthata goba a nkamogela.” Go ngwadile mosadi yo a botegago wa Mokriste yo a bego a katana le maikwelo a go inyatša. Na o kile wa tshwenywa ke maikwelo a bjalo, o nagana gore ga o bohlokwa moo Modimo a ka go šetšago, re sa bolele ka go go amogela? Ge e ba go le bjalo, mantšu a begilwego go Nehemia 13:31 a ka go kgothatša.

Nehemia, mmuši wa Bajuda wa lekgolong la bohlano la nywaga B.C.E., o ile a dira sohle seo a se kgonago go kgahla Modimo. O ile a etelela pele modiro wa go aga merako ya Jerusalema go sa šetšwe kganetšo ya manaba. O ile a diriša Molao wa Modimo, a hlokomela bao ba gateletšegilego gomme a katanela go aga tumelo ya Baisiraelegotee le yena. Na Modimo o ile a lemoga botse bjoo monna yo wa go botega a bo dirilego? Na Nehemia o ile a amogelwa ke Jehofa? Re ka lemoga dikarabo mantšung a go phetha a puku ye e bitšwago ka leina la gagwe.

Nehemia o rapela ka gore: “Modimo wa ka, o nkgopole ka tše botse.” * Na Nehemia o boifa gore mediro ya gagwe e mebotse e ile ya se lemogwe ke Modimo goba gore Modimo o tla mo lebala? Aowa. Nehemia ka ntle le pelaelo o tseba seo bangwadi ba pejana ba Beibele ba se boletšego mabapi le go kgahlegela ga Jehofa barapedi ba gagwe ba botegago le mediro ya bona. (Ekisodo 32:32, 33; Psalme 56:8) Bjale, o kgopela Modimo gore a dire’ng? Puku e nngwe ya ditšhupetšo e hlalosa gore polelwana ya Seheberu yeo e fetoletšwego e le “gopola” e ra gore “go kgahlega ga monagano le mogato woo o sepedišanago le go gopola.” A dumela ka mo go tletšego matleng a thapelo, Nehemia o kgopela Modimo gore a mo gopole ka lerato le gore a mo šegofatše.—Nehemia 2:4.

Na Jehofa o tla araba thapelo ya Nehemia ya gore a mo gopole? Ka tsela e nngwe o šetše a dirile bjalo. Taba ya gore Jehofa o bone go swanetše go ba le pego ya sa ruri ya thapelo ya Nehemia, a e dira karolo ya Mangwalo a buduletšwego, e re kgonthišetša gore o gopola Nehemia ka lerato. Eupša “Mokwi wa thapelo,” o tla dira seo se fetišago go araba kgopelo ya Nehemia.—Psalme 65:2.

Modimo o sa tlo putsa Nehemia bakeng sa botse ka moka bjoo a ilego a bo dira bakeng sa borapedi bjo bo sekilego. (Baheberu 11:6) Lefaseng le lefsa leo le tlago leo Jehofa a le holofeditšego, o tla putsa Nehemia ka go mo tsoša bahung. * (2 Petro 3:13; Kutollo 21:3, 4) Gona moo, a ena le tebelelo ya go phela ka mo go sa felego paradeiseng mo lefaseng, Nehemia o tla bona gore Jehofa o mo gopotše e le ka kgonthe.

Thapelo ya Nehemia e hlatsela go rereša ga mantšu a Kgoši Dafida a rego: “Wena Jehofa o tla šegofatša le ge e le mang yo a lokilego; ka ge o ba amogela, o tla ba šireletša bjalo ka ge eka ke ka kotse e kgolo.” (Psalme 5:12) Ee, Modimo o lemoga maiteko a rena a botegago a go mo kgahliša e bile o a tšeela godimo. Ge feela o dira sohle seo o ka se kgonago go mo hlankela, o ka kgodišega gore o tla go gopola ka lerato gomme a go šegofatša.

Mmalo wa Beibele o šišintšwego bakeng sa February:

▪ Nehemia 1-13

[Mengwalo ya tlase]