Kon krosibei na Gado

„Ke mi Gado, memre mi. Memre den bun sani di mi du”

„MI BEN prakseri taki Yehovah, di sabi mi heri bun, noiti no ben o man lobi mi noso feni mi bun.” Na so wan Kresten uma ben skrifi di ben firi leki a no warti. Yu ben firi so tu wan leisi? Yu ben prakseri taki yu no warti nofo fu Gado poti prakseri na yu èn feni yu bun? Efu dati de so, dan den wortu di skrifi na ini Nehemia 13:31 kan gi yu deki-ati.

Nehemia ben e tiri den Dyu na ini a di fu feifi yarihondro bifo Krestes, èn a ben du ala san a man so taki Gado feni en bun. A ben teki fesi na ini a wroko di sma ben du fu bow den skotu fu Yerusalem baka, aladi feanti ben gens den. A ben sorgu taki sma gi yesi na a Wet fu Gado, a ben sorgu gi den sma di ben e pina, èn a ben suku fu gi den Israelsma deki-ati so taki a bribi fu den kon tranga. Gado ben si den bun sani di a man disi di ben e tan gi yesi na en, ben du? Yehovah ben feni Nehemia bun? Wi kan si a piki tapu den aksi disi na ini den lasti wortu fu a buku di abi a nen fu Nehemia.

Nehemia e begi: „Ke mi Gado, memre mi. Memre den bun sani di mi du.” * A de so taki Nehemia ben frede taki Gado no ben si den bun sani di a ben du, noso taki Gado ben o frigiti en? Nôno. A no de fu taki dati Nehemia ben sabi san fositen Bijbel skrifiman ben taki fu Yehovah. Den ben taki dati Yehovah e broko en ede trutru nanga den sma di e tan anbegi en èn a e si den bun sani di den e du (Exodus 32:32, 33; Psalm 56:8). We, dan san a e aksi Gado fu du? Wan buku e taki dati a Hebrew wortu di vertaal nanga „memre” abi fu du nanga „a lobi di wan sma lobi wan sani èn a e du wan sani fu sori dati”. Nehemia abi na overtoigi taki begi kan yepi en, èn fu dati ede a e aksi Gado fu memre en fu di a lobi en. Boiti dati, a e aksi Gado fu blesi en.​—Nehemia 2:4.

Yehovah o memre Nehemia soleki fa a ben begi? Na wan fasi, Yehovah memre en kaba. Fu taki en leti, Yehovah ben feni en bun fu meki sma skrifi a begi fu Nehemia, so taki a tron wan pisi fu den Buku fu Bijbel di skrifi nanga yepi fu santa yeye. Disi e gi wi a dyaranti taki a e memre Nehemia fu di a lobi en. Ma a sma di e „arki begi”, o du moro fu piki a begi di Nehemia ben begi nanga en heri ati.​—Psalm 65:2.

Gado o pai Nehemia ete gi ala den bun sani di a ben du gi a tru anbegi (Hebrewsma 11:6). Na ini a nyun grontapu pe retidu o de soleki fa Yehovah pramisi, Yehovah o blesi Nehemia fu di a o gi en wan opobaka (2 Petrus 3:13; Openbaring 21:3, 4). * Te Nehemia o de drape èn a o abi a howpu fu libi fu têgo na ini wan paradijs na grontapu, dan ensrefi o si taki Yehovah memre en trutru fu di a ben du san bun.

A begi fu Nehemia e sori taki den wortu disi fu Kownu David tru: „Yu, Yehovah, o blesi ibriwan sma di e du san reti. Fu di yu lobi den meki yu o kibri den, leki fa wan bigi skelt e kibri wan sma” (Psalm 5:12). Iya, Gado e si a muiti di wi e du nanga wi heri ati fu plisi en, èn a e warderi dati trutru. Solanga yu e du ala san yu man fu dini en, yu kan abi a dyaranti taki a o memre yu fu di a lobi yu èn a o blesi yu trutru.

A bun fu leisi a pisi disi fu Bijbel na ini februari:

▪ Nehemia 1-13

[Futuwortu]