Atamalana le Modimo

“Nkgakologelwe, Tlhe Modimo Wa me, Ka Molemo”

“K E NE ke akanya gore Jehofa, yo o nkitseng sentle, a ka se nthate e bile a ka se nkamogele.” Mafoko ano a ne a kwalwa ke mosadi mongwe wa Mokeresete yo o ikanyegang yo o neng a na le maikutlo a go inyatsa. A o kile wa ikutlwa ka tsela e e tshwanang, o akanya gore Modimo ga a amege ka wena e bile ga a go amogele? Fa e le gore go ntse jalo, mafoko a a kwadilweng mo go Nehemia 13:31 (NW) a ka go kgothatsa.

Nehemia, yo e neng e le mmusi wa Bajuda mo lekgolong la botlhano la dingwaga B.C.E, o ne a dira ka natla gore a itumedise Modimo. O ne a etelela pele tiro ya go aga dipota tsa Jerusalema sesha le fa baba ba ne ba ba ganetsa. O ne a tlhomamisa gore Molao wa Modimo o a latelwa, a tlhokomela batho ba ba gateletsweng a bo a leka go nonotsha tumelo ya Baiseraele ka ene. A Modimo o ne a bona dilo tse di molemo tse monna yono yo o ikanyegang a neng a di dirile? A Nehemia o ne a amogelwa ke Jehofa? Re ka bona dikarabo mo mafokong a a konelang a buka e e bidiwang ka leina la gagwe.

Nehemia o ne a rapela a re: “Nkgakologelwe tlhe, Modimo wa me, ka molemo.” * A Nehemia o ne a boifa gore Modimo o ne a sa lemoga ditiro tsa gagwe tse di molemo kgotsa gore o ne a tla mo lebala? Nnyaa. Ga go pelaelo gore Nehemia o ne a itse mafoko a bakwadi ba Baebele ba pele ga gagwe a a bontshang gore Jehofa o kgatlhegela baobamedi ba gagwe ba ba ikanyegang le ditiro tsa bone tse di molemo. (Ekesodo 32:32, 33; Pesalema 56:8) Mme jaanong, o kopa gore Modimo a dire eng? Buka nngwe ya ditshupiso e bontsha gore lefoko la Sehebera le le ranotsweng go twe ‘gakologelwa’ le kaya “go rata sengwe le go dira dilo dingwe ka go bo o di gakologelwa.” E re ka Nehemia a ne a dumela a sa belaele gore thapelo e na le maatla, o ne a kopa Modimo gore a mo gakologelwe ka lorato a bo a mo segofatse.—Nehemia 2:4.

A Jehofa o tla araba thapelo ya ga Nehemia ya gore a mo gakologelwe? Ka tsela nngwe o setse a dirile jalo. Ntlha fela ya gore Jehofa o ne a bona go tshwanela gore thapelo ya ga Nehemia e kwalwe, le gore e nne karolo ya Dikwalo tse di tlhotlheleditsweng, e re bontsha gore o gakologelwa Nehemia ka lorato. Mme “Moutlwi wa thapelo” o tla dira se se oketsegileng go araba thapelo ya ga Nehemia e e tswang pelong.—Pesalema 65:2.

Modimo o sa ntse a tla duela Nehemia ka ntlha ya dilo tsotlhe tse di molemo tse a di diretseng kobamelo e e itshekileng. (Bahebera 11:6) Mo lefatsheng le lesha le le tlang la tshiamo le Jehofa a le solofeditseng, o tla segofatsa Nehemia ka go mo tsosa mo baswing. * (2 Petere 3:13; Tshenolo 21:3, 4) Ka nako eo, ka ntlha ya tsholofelo ya go tshelela ruri mo lefatsheng la paradaise, Nehemia o tla bona gore eleruri Jehofa o mo gakologetswe ka ntlha ya molemo o a neng a o dira.

Thapelo ya ga Nehemia e tlhomamisa boammaaruri jwa mafoko a ga Kgosi Dafide a a reng: “Wena ka bowena Jehofa, o tla segofatsa ope fela yo o siameng; o tla ba dikanyetsa ka kamogelo, jaaka e kete ke ka thebe e kgolo.” (Pesalema 5:12) Ee, Modimo o bona maiteko a rona a go mo itumedisa e bile o a tsaya a le botlhokwa. Fa fela o ka mo direla ka bojotlhe jwa gago, o ka tlhomamisega gore o tla go gakologelwa ka lorato le go go segofatsa fela thata.

Dikgaolo tsa Baebele tse di ka balwang ka February:

▪ Nehemia 1-13

[Dintlha tse di kwa tlase]