“Abeet Ta Xoossau, Loˈˈobaa Gishshau, Tana Qoppa”
Xoossaakko Shiiqa
“Abeet Ta Xoossau, Loˈˈobaa Gishshau, Tana Qoppa”
“TANA loyttidi eriya Yihooway, tana siiqana woykko tanan ufayttana danddayenna gaada qoppaas.” Bana pattennabadan qoppiyoogan metootida, issi ammanettida Kiristtaaniyaa hegaadan xaafaasu. Xoossay tanan ufayttiyoogee atto shin, tana qofakka qoppenna giyoogan inttekka hegaadan unˈˈetti ereetii? Yaatikko, Nahimiyaa 13:31n [NW] deˈiya qofay inttena minttettana danddayees.
Ichashantta xeetu layttan K.K. Ayhudata haariyaagaa gidida Nahimee, Xoossaa ufayssanau bau danddayettiyaabaa ubbaa oottiis. Morkkee eqettishinkka, Yerusalaame gimbbiyaa zaarettidi keexxiyoogan i sintta xeera gididi kaalettiis. Xoossaa Higgee polettanaadan oottiis; naaqettidaageetuyyo qarettiis; qassi ba mala Israaˈeeletu ammanuwaa minttanau baaxetiis. Ha ammanettida bitanee oottido loˈˈobaa Xoossay akeekidee? Yihooway Nahimiyan ufayttidee? A sunttan xeegettiya maxaafaa wurssetta qaalatuppe hegaa zaaruwaa akeekana danddayoos.
Nahimee, “Abeet ta Xoossau, loˈˈobaa gishshau, tana qoppa” yaagidi woossiis. * Nahimee ba oottido loˈˈobaa Xoossay akeekenna woy babaa dogees giidi hirggidee? Akkay. Nahimee, Yihooway ammanettidi baayyo goynniyaageetanne eta loˈˈo oosuwaa loyttidi akeekiyoogaa xeelliyaagan Geeshsha Maxaafaa xaafida, baappe kase deˈidaageeti xaafidobaa eriyoogee sirissenna. (Kes. 32:32, 33; Maz. 56:8) Yaatin, i Xoossay waatanaadan oychidee? Issi xuufee “qoppa” geetettida Ibraysxxe qaalay, “issibaa dosiyoogaanne hassayiyoobaara gayttidabaa oosuwan peeshshiyoogaa” malaatiyoogaa yootees. Nahimee woosau deˈiya wolqqan wozanappe ammanettiyoogan, Xoossay bau qarettidi qoppanaadaaninne bana anjjanaadan woossiis.—Nah. 2:4.
Nahimee bana qoppanaadan woossidoogaa Yihooway zaaranee? Issi ginan zaariis. Yihooway Nahimiyaa woosay Geeshsha Maxaafan xaafettanaadan oottidoogee Nahimiyau qarettidi a qoppiyoogaa bessees. Gidikkokka, ‘woosaa siyiyaagee’ Nahimee wozanappe woossidoogaa zaaranau hara darobaa oottana.—Maz. 65:2.
Geeshsha goynuwau oottido ubbabaa gishshau, Xoossay Nahimiyaa biron woytana. (Ibr. 11:6) Yihooway qaalaa gelido sinttappe yaana, geeshshatettay kumiyo ooratta alamiyan i Nahimiyaa hayquwaappe denttiyoogan anjjana. * (2 PHe. 3:13; Ajj. 21:3, 4) He wode, gannatiyan saˈan merinau deˈiyo hidootaa demmidoogan, loˈˈobaa gishshau Yihooway bana qoppidoogaa Nahimee tumuppe akeekana.
Kawuwaa Daawiti, “Abeet GODAU, tumukka neeni xilluwaa anjjaasa. Neeni gonddallee kammiyoogaadan ne kehatettan a kammaasa” yaagidoogee tuma gidiyoogaa Nahimiyaa woosay qonccissees. (Maz. 5:12) Ee, nuuni a ufayssanau wozanappe baaxetiyoogaa Xoossay akeekeesinne xoqqu oottidi xeellees. Intte ayyo oottanau danddayettida ubbabaa oottiyo wode, i inttessi qarettidi qoppanaagaanne inttena palahissidi anjjanaagaa ammanettana danddayeeta.
Usuppuniyan Nabbabiyo Geeshsha Maxaafaa Kifiliyaa:
[Tohossa qofata]
^ MENT. 5 Nahimee ammanettidi oottidobaa gishshau Xoossay kehabaa woytanaadan woossidoogaa yootiya oyddu sohotuppe hagee ha maxaafan wurssettaagaa.—Nah. 5:19; 13:14, 22, 31.
^ MENT. 7 Ammanettida asaassi saˈan Xoossay halchidobaa gujjada eranau, Yihoowa Markkati attamissido, Tumuppe Geeshsha Maxaafay Tamaarissiyoy Aybee? giya maxaafaa shemppo 3nne 7 xeella.