Andam Ka na ba Alang sa Labing Hinungdanong Adlaw sa Tuig?
Andam Ka na ba Alang sa Labing Hinungdanong Adlaw sa Tuig?
PIPILA ka oras sa wala pa mamatay si Jesus, gihimo niya ang usa ka linaing paagi sa paghandom sa iyang kamatayon. Kini nga kasaulogan nailhang “panihapon sa Ginoo.” (1 Corinto 11:20) Aron ipakita ang kahinungdanon sa maong okasyon, si Jesus nagsugo: “Buhata ninyo kini agig paghandom kanako.” (Lucas 22:19, Maayong Balita Biblia) Buot ba nimong tumanon si Jesus? Kon mao, isipon nimo ang anibersaryo sa kamatayon ni Jesus ingong ang labing hinungdanong adlaw sa tuig.
Apan kanus-a man nimo kini angayng saulogon? Ug unsaon nimo pagtino nga ikaw bug-os andam aron masabtan ang kahulogan niining hinungdanong okasyon? Kini nga mga pangutana angay gayong hatagag pagtagad sa tanang Kristohanon.
Unsa ka Subsob?
Kasagaran atong handomon ang hinungdanong mga hitabo kausa sa usa ka tuig. Pananglitan, bisan tuod ang ngilngig nga trahedya niadtong Septiyembre 11, 2001 kanunayng mahinumdoman sa mga tawo sa New York City nga namatyan sa ilang mga minahal sa dihang giatake ang World Trade Center, hinungdanon kaayo alang kanila ang pag-abot sa maong petsa sa matag tuig.
Sa karaang panahon, gihandom usab ang hinungdanong mga hitabo sa matag tuig. (Ester 9:21, 27) Gisugo ni Jehova ang mga Israelinhon nga saulogon nila kada tuig ang ilang milagrosong kaluwasan gikan sa pagkaulipon sa Ehipto. Kini nga selebrasyon gitawag sa Bibliya ingong Paskuwa, ug ang mga Israelinhon magsaulog niini kausa sa usa ka tuig sumad sa petsa sa ilang pagkaluwas.—Exodo 12:24-27; 13:10.
Bag-o pang natapos ang pagsaulog ni Jesus sa Paskuwa uban sa iyang mga tinun-an sa dihang iyang giandam ang espesyal nga panihapon aron mahimong sumbanan sa pagsaulog sa iyang kamatayon. (Lucas 22:7-20) Ang Paskuwa gisaulog kada tuig. Busa, atong ikaingon nga kining bag-ong pagsaulog nga mipuli sa Paskuwa saulogon usab kausa sa usa ka tuig. Apan unsang petsaha?
Kanus-a?
Sa pagtubag sa maong pangutana, kinahanglang atong masabtan kining duha ka butang. Una, sa karaang panahon ang bag-ong adlaw magsugod sa gabii, sa pagsalop sa adlaw, ug matapos sa sunod gabii inigsalop sa adlaw. Busa ang usa ka adlaw maoy gikan sa gabii hangtod sa sunod gabii.—Levitico 23:32.
Ikaduha, wala gamita sa Bibliya ang kalendaryo nga atong gigamit karon. Wala gamita niini ang mga bulan sama sa Marso ug Abril, apan kini naghisgot sa mga bulan sama sa Adar ug Nisan. (Ester 3:7) Ang mga Hudiyo mag-ihap sa ilang bulan gikan sa pagsubang sa bag-ong bulan hangtod sa sunod nga pagsubang sa bag-ong bulan. Ilang gisaulog ang Paskuwa sa ika-14ng adlaw sa unang bulan sa ilang kalendaryo, ang Nisan. (Levitico 23:5; Numeros 28:16) Kanang adlawa, Nisan 14, mao usab ang adlaw nga gilansang sa mga Romano ang atong Ginoong Jesu-Kristo. Siya namatay 1,545 ka tuig human sauloga ang unang Paskuwa. Espesyal gayod nga petsa ang Nisan 14!
Apan unsa ang katumbas sa Nisan 14 sa atong kalendaryo karon? Ang simpleng kuwentada motabang kanato sa pagtino kon unsa kana nga petsa. Ang Nisan 1 magsugod sa dihang ang bag-ong bulan, nga kinadul-an sa spring equinox (ang pagsugod sa tingpamulak sa Northern Hemisphere), makita sa Jerusalem sa pagsalop sa adlaw. Kon kita mag-ihap ug 14 ka adlaw gikan niana, kita moabot sa Nisan 14. Kasagaran takdol ang bulan niining adlawa. Pinasukad niining Biblikanhong kuwentada, ang Nisan 14 karong tuiga magsugod sa pagsalop sa adlaw sa Dominggo, Abril 17, 2011. *
Busa niining tuiga, ang mga Saksi ni Jehova nangandam aron magkatigom uban sa tanang buot maghandom sa kamatayon ni Jesus. Sila kinasingkasing nga nagdapit kanimo. Palihog kontaka ang mga Saksi ni Jehova sa inyong lugar aron masayran ang oras ug dapit niini nga panagkatigom. Saulogon nila kini, dili sa buntag o sa hapon, apan sa pagkagabii inigsalop sa adlaw. Ngano? Kay sumala sa giingon sa Bibliya, kini maoy ‘panihapon.’ (1 Corinto 11:25) Ang gabii sa Dominggo, Abril 17, 2011, mao ang sumad sa gabii nga gisugdan ni Jesus kining espesyal nga pagsaulog mga 1,978 ka tuig ang milabay. Mao usab kining adlawa, Nisan 14, nga namatay si Jesus. Halandomon gayod kini nga adlaw sa iyang kamatayon!
Kon Unsaon sa Pagpangandam
Unsay imong himoon karon aron makapangandam niini nga okasyon nga saulogon kas-a sa usa ka tuig? Ang usa ka paagi mao ang pagpamalandong sa gihimo ni Jesus alang kanato. Ang librong Unsay Tinuod nga Gitudlo sa Bibliya? * nakatabang sa minilyon nga mas masabtan ang kahulogan sa kamatayon ni Jesus.—Mateo 20:28.
Ang laing paagi nga maandam ang atong mga kasingkasing alang niining espesyal nga okasyon mao ang pagbasa sa mga panghitabo sa nag-angat ang kataposang adlaw ni Jesus dinhi sa yuta. Sa mosunod nga mga panid, imong makita ang usa ka tsart. Sa unang kolumna makita ang mga petsa sa atong kalendaryo ug sa kalendaryo sa unang panahon. Sa ikaduhang kolumna mao ang mubong kahubitan bahin sa mga panghitabo. Makita usab sa ikatulong kolumna kon asa nato kini mabasa sa mga Ebanghelyo ug sa librong Ang Labing Bantogang Tawo nga Nabuhi Sukad. *
Nganong dili mogahin ug panahon aron basahon ang mga asoy sa Kasulatan nga naghubit sa mga panghitabo sa matag adlaw sa dayon nang pagsaulog sa Panihapon sa Ginoo? Kini motabang kanimo sa pagpangandam sa labing hinungdanong adlaw niining tuiga.
[Mga footnote]
^ par. 11 Kining petsaha tingali dili motakdo sa petsa sa Paskuwa nga gisaulog sa mga Hudiyo karong adlawa. Ngano man? Kadaghanang Hudiyo magsaulog sa Paskuwa sa Nisan 15, kay sila nagtuong mao kini ang petsa nga gisugo sa Exodo 12:6. (Tan-awa ang Bantayanang Torre sa Pebrero 15, 1990, panid 14.) Apan gisaulog kini ni Jesus sa Nisan 14 subay sa gilatid sa Moisesnong Balaod. Alang sa dugang impormasyon kon unsaon sa pagtino niini nga petsa, tan-awa ang The Watchtower sa Hunyo 15, 1977, panid 383-384.
^ par. 14 Gipatik sa mga Saksi ni Jehova. Tan-awa ang panid 47-56, 206-208. Makita nimo kini nga publikasyon sa Web site nga www.watchtower.org.
^ par. 15 Gipatik sa mga Saksi ni Jehova.
[Blurb sa panid 22]
Handoma ang kamatayon ni Jesus Dominggo, Abril 17, 2011
[Chart/Mga hulagway sa panid 23, 24]
(Alang sa aktuwal nga pagkahan-ay, tan-awa ang publikasyon)
ANG KATAPOSANG SEMANA
2011 Martes, Abril 12
▪ Igpapahulay Mateo
NISAN 9 (magsugod inigsalop sa adlaw)
Sa karaang panahon ang bag-ong adlaw magsugod sa gabii, sa pagsalop sa adlaw, ug matapos sa sunod gabii inigsalop sa adlaw
▪ Kombira uban kang Simon nga sanlahon
▪ Gihaplasan ni Maria ug pahumot nga nardo
▪ Mga Hudiyo miduaw kang Jesus ug Lazaro
2011 Miyerkoles, Abril 13
▪ Madaogong pagsulod sa Jerusalem
▪ Nagtudlo sa templo
□ gt 102
NISAN 10 (magsugod inigsalop sa adlaw)
▪ Nagpalabay sa gabii didtoo sa Betania
2011 Huwebes, Abril 14
▪ Sayong mipanaw ngadto sa Jerusalem
▪ Naghinlo sa templo
▪ Si Jehova misulti gikan sa langit
NISAN 11 (magsugod inigsalop sa adlaw)
2011 Biyernes, Abril 15
▪ Nagtudlo sa templo ginamit ang mga sambingay
▪ Nagkondenar sa mga Pariseo
▪ Nag-obserbar sa amot sa balo
▪ Nagtagna sa pagkapukan sa Jerusalem
▪ Naghatag ug ilhanan sa umaabot nga presensiya
□ gt 105 hangtod sa 112, par. 1
NISAN 12 (magsugod inigsalop sa adlaw)
2011 Sabado, Abril 16
▪ Nakig-uban sa mga tinun-an nga silasila ra didto sa Betania
▪ Judas nagplano sa pagbudhi
NISAN 13 (magsugod inigsalop sa adlaw)
2011 Dominggo, Abril 17
▪ Giandam ni Pedro ug Juan ang Paskuwa
▪ Si Jesus ug ang ubang napulo ka apostoles misunod sa hapit nang mogabii
□ gt 112, par. 5 hangtod sa 113, par. 1
NISAN 14 (magsugod inigsalop sa adlaw)
▪ Nagsaulod sa Paskuwa
▪ Naghugas sa mga tiil sa mga apostoles
▪ Nagpalakaw kang Judas
▪ Gihimo ang Memoryal sa iyang kamatayon
□ gt 113, par. 2 hangtod sa kataposan sa 116
tungang gabii
2011 Lunes, Abril 18
▪ Gibudhian ug gidakop sa tanaman sa Getsemane
▪ Mga apostoles mikalagiw
▪ Gihusay sa Sanhedrin
▪ Gilimod ni Pedro si Jesus
□ gt 117 hangtod sa kataposan sa 120
▪ Miatubang pag-usab sa Sanhedrin
▪ Gidala kang Pilato, kang Herodes, ug balik kang Pilato
▪ Gisentensiyahag kamatayon ug gilansang
▪ Namatay sa mga alas tres sa hapon
▪ Patayng lawas gikuha ug gilubong
□ gt 121 hangtod sa 127, par. 7
NISAN 15 (magsugod inigsalop sa adlaw)
▪ Igpapahulay
2011 Martes, Abril 19
▪ Si Pilato miuyon nga magbutang ug mga guwardiya sa lubnganan ni Jesus
NISAN 16 (magsugod inigsalop sa adlaw)
2011 Miyerkoles, Abril 20
▪ Gibanhaw
▪ Nagpakita sa mga tinun-an
□ gt 127, par. 10 hangtod sa 129, par. 10
[Footnote]
^ par. 29 Ang mga numero nga makita dinhi nagtumong sa mga kapitulo sa librong Ang Labing Bantogang Tawo nga Nabuhi Sukad (gt). Alang sa tsart nga may detalyadong Kasulatanhong paghisgot bahin sa kataposang ministeryo ni Jesus, tan-awa ang librong “Ang Tibuok Kasulatan Dinasig sa Diyos ug Mapuslanon,” panid 290, nga gipatik sa mga Saksi ni Jehova.
