Kwõpojak Ke ñan Raan eo Eaorõktata ilo Iiõ In?

JEJJO wõt awa m̦okta jãn an kar Jijej mej, ear ejaake juon iien elukkuun aorõk ñan keememeje raan in mej eo an. Tokãlik, kar n̦aetan iien in “kejota an Irooj.” (1 Korint 11:20) Joñan an lukkuun aorõk iien in, Jijej ear kakien: “Kom̦win kõm̦m̦an men in ilo ememej Eõ.” (Luk 22:19) Kokõn̦aan ke pokake naan kein an Jijej? El̦aññe aet, innem kwonaaj watõk bwe iien kwõjkwõj in mej eo an Jijej ej raan eo eaorõktata ilo iiõ in.

Bõtab, ñããt eo kwõj aikuj keememe raan in eaorõk? Im ta ko kwõmaroñ kõm̦m̦ani bwe kwõn maroñ lukkuun mel̦el̦e kõn aorõkin iien in? Erkein ej kajjitõk ko me kajjojo armej rej aikuj l̦õmn̦ak kaki.

Jete Alen?

Ekkã ad keememe juon iien elukkuun aorõk kajjojo iiõ. Ñan waanjoñak, elõñ rej keememej M̦aaj 1, 1954 bwe ej iien eo rar jol̦o̦k boktañ eo ilo Bikini. El̦ap an kar men in ko̦kkure jikin in im armej ro. Elukkuun l̦ap an ri M̦ajel̦ ro keememej men in ear wal̦o̦k im kajjojo iiõ ñe ej jejjet raan eo jorrããn in ear wal̦o̦k, el̦ap aer kaorõke. Im rej keememe ak kõm̦m̦an elõñ m̦akũtkũt ko ilo iien in ñan keememeje.

Ear bar ãindein ilo iien ko etto. (Ester 9:21, 27) Jeova ear kakien ri Israel ro bwe kajjojo iiõ ren keememej iien eo kar kanemkwoj er jãn aer kamakoko ilo Ijipt. Baibõl̦ eo ej n̦aetan iien in Raan in Kijoone. Kajjojo iiõ ri Israel ro rar keememe Raan in Kijoone eo ñe ej jejjet allõñ eo im raan eo kar lo̦mo̦o̦ren er.—Exodus 12:24-27; 13:10.

Ãlikin an Jijej kwõjkwõje Raan in Kijoone eo ippãn rijjelõk ro, ear jino kõm̦m̦ane kõjota eo an. Kõjota in enaaj kar wãween eo ñan keememeje raan in mej eo an. (Luk 22:7-20) Aolep kajjojo iiõ rar kwõjkwõje Raan in Kijoone eo. Innem ekkar bwe kajjojo iiõ jen kwõjkwõje kõjota eo an Irooj me ej bõk jikin Raan in Kijoone eo. Bõtab, ñããt eo jej aikuj kwõjkwõje mej eo an Jijej?

Ñããt?

Ñan lo uwaak in kajjitõk in, ewõr ruo men ko jej aikuj mel̦el̦e kaki. Kein kajuon,  ilo iien ko etto, juon raan ej jino ilo jota ñe ej tulo̦k al im jem̦l̦o̦k ilo raan eo tok juon ñe ej tulo̦k al. Kõn men in, kajjojo raan ear jino ilo jota im jem̦l̦o̦k ilo jota.—Livitikõs 23:32.

Kein karuo, eoktak kõl̦õn̦ta ko an armej ro ilo iien ko etto jãn raan kein. Ñan waanjoñak, raan kein jej ba M̦aaj im Eprõl̦, ak ilo iien ko etto rej ba Adar im Nisan. (Ester 3:7) Kajjojo allõñ ko an ri Ju ro rej jino ñe allõñ ej jino wal̦o̦k ak ekããl. Rar kwõjkwõje Raan in Kijoone eo ilo raan eo kein kajoñoul emãn ilo Nisan, allõñ eo jinointata ilo kõl̦õn̦ta eo aer. (Livitikõs 23:5; Bõnbõn 28:16) Nisan 14 ear ejja wõt raan eo im ri Rom ro rar dilaik Irooj eo ad Jijej Kũraij. Ium̦win 1,545 iiõ ko in aer kar keememeje raan in Kijoone eo tok ñan iien eo Jijej ear mej. El̦ap an lukkuun aorõk raan in Nisan 14!

Ak ilo kõl̦õn̦ta eo ad rainin, raan ta eo ej jejjet ñan Nisan 14? Ñan lo uwaak eo, jej aikuj bwini allõñ ko im raan ko. Ñe ej jino an wal̦o̦k allõñ ilo Jerusalem im iien in ej epaake M̦aaj 21 raan, innem Nisan 1 raan ej jinoe. Im ñe jej bõnbõn 14 raan jãn iien in, jenaaj tõpare Nisan 14 raan. Ilo iien in ekkã an allõñ iio. Ñe jej kajerbal kõl̦õn̦ta eo an ri Ju ro etto im bõnbõn, Nisan 14 enaaj wal̦o̦k ilo Jabõt, Eprõl̦ 17 ilo iien en̦ ej tulo̦k al̦ ilo iiõ in.

Ilo iiõ in, Ri Kõnnaan ro an Jeova rej pojak ñan aer naaj koba ippãn doon im bareinwõt ippãn ro im rej kõn̦aan kobal̦o̦k ippãer ñan keememeje raan in mej eo an Jijej ilo iiõ in. Rej m̦õn̦õn̦õ in kũrtok eok ñan am̦ pãd ilo iien in. Ñan am̦ jel̦ã awa eo im ia eo renaaj kõm̦m̦ane kwõjkwõj in ie, kwõmaroñ kajjitõk ippãn Ri Kõnnaan ro an Jeova ilo jikin eo kwõj pãd ie. Renaaj kõm̦m̦ane kwõjkwõj in ilo jota ãlikin an al̦ tulo̦k im ejjab ilo jibboñ ak raelep. Etke? Kõnke Baibõl̦ eo ej ba bwe iien in ej iien “kejota.” (1 Korint 11:25) Jabõt Eprõl̦ 17, 2011 ej jejjet ñan Nisan 14 raan. Ej iien eo me Jijej ear jino kõm̦m̦ane kõjota eo eaorõk 1,978 iiõ ko remootl̦o̦k. Ej bareinwõt iien eo Jijej ear mej ie. Eñin ej raan eo ejejjet im em̦m̦antata ñan keememej mej eo an.

Wãween Ad Maroñ Pojak

Ta eo kwõmaroñ kõm̦m̦ane kiiõ bwe kwõn pojak ñan raan in eaorõk im ej wal̦o̦k kajjojo iiõ? Juon wãween ej ilo am̦ kõl̦mãnl̦o̦kjen̦ kõn men eo Jijej ear kõm̦m̦ane ñan lo̦mo̦o̦ren kõj. Bok eo etan Ta eo Baibel Ej Lukkun Katakin? * ear jipañ elõñ milien armej ro ñan kal̦apl̦o̦k aer kam̦m̦oolol kõn mej eo an Jijej.—Matu 20:28.

Bar juon wãween kwõmaroñ pojak ñan iien in elukkuun aorõk ej ilo am̦ riit kõn mour eo an Jijej ilo Baibõl̦ eo. Ilo peij ko tok im̦aan, kwonaaj lo ruo jaat. Juon jaat ej kõllaajrake bwebwenato ko ilo Baibõl̦ im rej kwal̦o̦k kõn men ko rar wal̦o̦k m̦okta jãn an Jijej mej.

Jaat eo juon ej kwal̦o̦k raan ta ko ilo iiõ in im rej jejjet ñan raan ko Jijej ear kõm̦m̦ani m̦akũtkũt ko an ilo iien ko etto. Kwõmaroñ riiti jet iaan eoon kein kajjojo raan m̦aanl̦o̦k ñan iien kwõjkwõj in mej eo an Jijej. Men in enaaj jipañ eok ñan pojak ñan iien in ekanooj in aorõk ilo iiõ in.

[Kõmel̦el̦e eo itulal̦]

[Naan eo ilo peij 16]

Keememeje raan in mej eo an jijej Jabõt, Eprõl̦ 17, 2011

 [Jaat eo ilo peij 17, 18]

(Ñan lale pija eo, jouj im lale ilo bok eo)

WIIK EO ÃLIKTATA

2011 Juje Eprõl̦ 12

▪ Jabõt

□ Jon 11:55–12:1

□

NISAN 9 (ej jinoe ilo tulo̦kun al̦)

Ilo iien ko etto, kajjojo raan ear jinoe ilo jota ãlikin tulo̦kun al̦, im ear jem̦l̦o̦k ilo raan eo tok juon, ñe al̦ etulõk

▪ Jijej ej m̦õñã ippãn Saimõn, ri lõba eo

▪ Meri ej kajerbal juon kein ekkabit el̦ap on̦ean im kabit Jijej kake

▪ Ri Ju ro rej lol̦o̦k Jijej im Lazerõs

□ Matu 26:6-13

□ Mark 14:3-9

□ Jon 12:2-11

□

2011 Wõnje Eprõl̦ 13

▪ Armej ro rej lam̦õj ilo lañlõñ ke Jijej ej del̦o̦ñ ilo Jerusalem

▪ Ej katakin armej ro ilo tampel̦ eo

□ Matu 21:1-11, 14-17

□ Mark 11:1-11

□ Luk 19:29-44

□ Jon 12:12-19

□

NISAN 10 (ej jinoe ilo tulo̦kun al̦)

▪ Ear pãd ilo Betani in boñ

2011 Taije Eprõl̦ 14

▪ Ear ilo̦k ñan Jerusalem

▪ Karreoik tampel̦ eo

▪ Jeova ej kõnono jãn lañ

□ Matu 21:12, 13, 18, 19

□ Mark 11:12-19

□ Luk 19:45-48

□ Jon 12:20-50

□

NISAN 11 (ej jinoe ilo tulo̦kun al̦)

2011 Bõlaide Eprõl̦ 15

▪ Katakin armej ro ilo tampel̦ eo ilo an kajerbal waanjoñak ko

▪ Kananaik ri Parisi ro

▪ Ej lo an kõrã eo ejako pãleen jaba kõn jããn ko an

▪ Kanaan kõn an Jerusalem naaj jeepepl̦o̦k

▪ Kwal̦o̦k kõn kakõl̦l̦e ko im rej kalikkar iien eo enaaj jino irooj

□ Matu 21:19–25:46

□ Mark 11:20–13:37

□ Luk 20:1–21:38

□

NISAN 12 (ej jinoe ilo tulo̦kun al̦)

2011 Jãdede Eprõl̦ 16

▪ Ej pãd ippãn rijjelõk ro an ilo Betani

▪ Judas ej kõm̦m̦an juon kon̦ ippãn ri kõjdat ro ñan ketake Jijej

□ Matu 26:1-5, 14-16

□ Mark 14:1, 2, 10, 11

□ Luk 22:1-6

□

 NISAN 13 (ej jinoe ilo tulo̦kun al̦)

2011 Jabõt Eprõl̦ 17

▪ Piter im Jon rej kõppojak ñan keememeje Raan in Kijoone eo

▪ Ãlikin l̦o̦k raelep Jijej im rijjelõk ro jet joñoul rej kobal̦o̦k ippãerro

□ Matu 26:17-19

□ Mark 14:12-16

□ Luk 22:7-13

□

NISAN 14 (ej jinoe ilo tulo̦kun al̦)

▪ Kwõjkwõj in Kijoone eo

▪ Kwal̦ neen rijjelõk ro an

▪ Ej jilkinl̦o̦k Judas jãn ippãer

▪ Ej jiroñ rijjelõk ro an ñan keememeje raan in mej eo an

□ Matu 26:20-35

□ Mark 14:17-31

□ Luk 22:14-38

□ Jon 13:1–17:26

□

lukwõn boñ

2011 M̦ande Eprõl̦ 18

▪ Kar ketake im kalbuuji jãn jikin kallIb eo etan Getsemane

▪ Rijjelõk ro rej ko

▪ Pris ro rel̦ap im ri ekajet ro an Sanhedrin rej ekajete

▪ Piter ej kaarmejjeteik Jijej

□ Matu 26:36-75

□ Mark 14:32-72

□ Luk 22:39-62

□ Jon 18:1-27

□

▪ Ej bar jutak im̦aan ri ekajet ro an Sanhedrin

▪ Rej bõkl̦o̦k e ñan Pailat, innem Herõd, im tokãlik rej bar kajebl̦aak e ñan Pailat

▪ Kar liaakel̦o̦k e ñan mej im dilaiki ioon al̦al̦ in eñtaan eo

▪ Ke ej jilu awa ãlikin raelep, ear mej

▪ Rej bõk ãnbwinnin im kalibwini

□ Matu 27:1-61

□ Mark 15:1-47

□ Luk 22:63–23:56

□ Jon 18:28-19:42

□

NISAN 15 (ej jinoe ilo tulo̦kun al̦)

▪ Raan in Jabõt

2011 Juje Eprõl̦ 19

▪ Pailat ej kamãlim aer likũt ri waj ro ilo lõb eo an Jijej

□ Matu 27:62-66

□

NISAN 16 (ej jinoe ilo tulo̦kun al̦)

□ Mark 16:1

2011 Wõnje Eprõl̦ 20

▪ Ear jerkakpeje

▪ Ej weaakl̦o̦k ñan ippãn rijjelõk ro an

□ Matu 28:1-15

□ Mark 16:2-8

□ Luk 24:1-49

□ Jon 20:1-25

□