Bo Ta Prepará pa e Dia Mas Importante di Aña?
DJIS algun ora promé ku Hesus a muri, el a introdusí un manera spesial pa konmemorá su morto. Beibel a yama e okashon akí “e Sena di Señor.” (1 Korintionan 11:20) Hesus a mustra e importansia di e okashon akí, ora el a instruí su siguidónan: “Hasi esaki na mi rekuerdo.” (Lukas 22:19) Bo ke obedesé Hesus? Si esei ta e kaso, lo bo konsiderá e aniversario di Hesus su morto komo e dia mas importante di aña.
Pero ki dia presis bo tin ku konmemorá e evento akí? I kiko ta e kosnan ku bo por hasi pa por tin un mihó komprondementu di e nifikashon di e okashon importante akí? Esakinan ta preguntanan ku kada kristian tin ku konsiderá kuidadosamente.
Kuantu Biaha?
Mayoria di biaha nos ta rekordá susesonan importante ún bes pa aña. Por ehèmpel, e hendenan na New York ku a pèrdè nan sernan kerí debí na e atake riba World Trade Center, dia 11 di sèptèmber 2001, nunka por lubidá loke a sosodé, pero ta ún bes pa aña so, riba e fecha akí, nan ta konmemorá e insidente lamentabel ei.
Di mes manera, den tempu bíbliko nan tabata rekordá susesonan importante ún bes pa aña. (Ester 9:21, 27) Yehova a ordená e israelitanan pa selebrá nan liberashon milagroso for di sklabitut na Egipto ún bes pa aña. Beibel ta referí na e evento ei komo e Pasku Hudiu, i e israelitanan a selebrá esaki ún bes pa aña riba e mesun fecha ku nan a haña liberashon.—Eksodo 12:24-27; 13:10.
Ora Hesus a kaba di selebrá e Pasku Hudiu ku su apòstelnan, el a introdusí e sena spesial ku lo a bira un modelo pa konmemorá su morto. (Lukas 22:7-20) E israelitanan tabata selebrá e Pasku Hudiu ún bes pa aña. P’esei, nos por konkluí ku lo tene e selebrashon nobo akí ku a remplasá e Pasku Hudiu ún bes pa aña tambe. Pero ki fecha lo selebr’é?
Ki Fecha?
Pa haña kontesta riba e pregunta ei, nos tin ku komprondé dos kos. Di promé, den tempu bíbliko un dia a kuminsá atardi ora solo baha i e dia a terminá su siguiente dia ora solo baha. P’esei, un dia tabata kore di atardi pa atardi.—Levítiko 23:32.
Di dos, den tempu bíbliko nan no a usa e kalènder ku nos ta usa awe. Por ehèmpel, en bes di mart i aprel Beibel ta papia di adar i nisan. (Ester 3:7) E hudiunan tabata konta un luna for di luna nobo te na e siguiente luna nobo. Nan tabata selebrá e Pasku Hudiu riba e di 14 dia di e promé luna riba nan kalènder, esta, nisan. (Levítiko 23:5; Numbernan 28:16) Ta riba e mesun fecha ei, esta, 14 di nisan e romanonan a klaba nos Señor Hesukristu na staka. Hesus a muri 1.545 aña despues ku e israelitanan a tene e promé sena di Pasku Hudiu. Pues, 14 di nisan ta un fecha masha importante.
Pero ki fecha riba nos kalènder awe ta koinsidí ku 14 di nisan? Un kalkulashon por yuda nos yega na e fecha eksakto. Nisan ta kuminsá na momento ku e luna nobo mas serka di e promé dia di lènte, rònt di 21 di mart, den e Hemisferio Nort bira visibel na Yerusalèm despues ku solo baha. Si nos konta 14 dia for di e momento ei padilanti, nos ta yega na e fecha 14 di nisan. Mayoria di biaha, riba e fecha ei luna ta yen. Usando e método di konta akí ku ta basá riba Beibel, e aña akí 14 di nisan ta kuminsá ora solo baha riba djadumingu 17 di aprel 2011. *
E aña akí, Testigunan di Yehova ta prepará pa reuní huntu ku tur otro persona ku ke rekordá e morto di Hesus. Bo ta keda kordialmente invitá pa reuní huntu ku nan. Sea asina bon di tuma kontakto ku Testigunan di Yehova den bo área pa haña sa e lugá i e ora ku nan lo reuní pa selebrá e Memorial. Nan lo no tene esaki mainta ni mèrdia, sino atardi despues ku solo baha. Dikon? Pasobra segun Beibel, e konmemorashon akí mester ta un “sena.” (1 Korintionan 11:25) Djadumingu atardi, 17 di aprel 2011, ta kumpli 1.978 aña ku Hesus a introdusí e konmemorashon spesial akí. Esaki ta tuma lugá na komienso di 14 di nisan, riba e mesun dia ku Hesus a muri. No tin ningun otro dia mas apropiá pa konmemorá Hesus su morto, no ta bèrdat?
Kon Bo Por Prepará?
Kiko ta e kosnan ku nos por hasi awor pa prepará pa e okashon akí ku ta tuma lugá ún bes pa aña? Nos por meditá riba loke Hesus a hasi pa nos. E buki Kiko Beibel Ta Siña Realmente? * a yuda miónes di hende haña un mihó komprondementu di loke Hesus su morto ta nifiká pa nos.—Mateo 20:28.
Ademas, nos por lesa di e susesonan ku a hiba te na e último dia di Hesus su bida riba tera. Riba e siguiente páginanan nos ta haña un kuadro ku lo yuda nos. Den e promé kolumna di e kuadro nos por mira e fechanan di nos kalènder i e fechanan di e kalènder di tempu bíbliko. E di dos kolumna ta duna un deskripshon breve di e susesonan i e di tres kolumna ta mustra unda nos por lesa di e susesonan ei den e Evangelionan i den e buki E homber mas importante cu hamás a biba. * Lo ta bon pa tuma tempu pa lesa por lo ménos algun di e relatonan bíbliko akí riba kada un di e dianan ei. Esei lo yuda bo prepará pa e dia mas importante di aña.
[Nota]
^ par. 11 E fecha akí kisas no ta koinsidí ku esun di e Pasku Hudiu ku e hudiunan djawe ta selebrá. Dikon no? Pasobra awe mayoria di hudiu ta selebr’é riba 15 di nisan pa motibu ku nan ta kere ku e mandato duná na Eksodo 12:6 ta señalá na e fecha ei. (Wak La Atalaya di 15 di febrüari 1990, página 14.) Pero Hesus a selebrá e Pasku Hudiu riba 14 di nisan na armonia ku loke e Lei di Moisés a stipulá. Pa mas informashon enkuanto kon pa kalkulá e fecha akí, wak La Atalaya di 1 di novèmber 1977, página 671-672.
^ par. 14 Publiká pa Testigunan di Yehova. Wak página 47-56, 206-208 den e buki. Ta posibel tambe pa wak e publikashon akí riba nos website www.watchtower.org.
^ par. 15 Publiká pa Testigunan di Yehova.
[Komentario na página 16]
Konmemorá e morto di hesus riba djadumingu 17 di aprel 2011
[Tabèl/Plachinan na página 17, 18]
(Pa e teksto den su formato kompleto, wak e publikashon)
E ÚLTIMO SIMAN
2011 Djamars 12 di Aprel
▪ Sabat
□ gt kap. 101, §2-4 *
9 DI NISAN (ora solo baha)
Den tempu bíbliko un dia tabata kuminsá atardi, despues ku solo baha, i a terminá su su siguiente dia ora solo baha
▪ Bankete serka Simon e leproso
▪ Maria a basha zeta perfumá riba kabes di Hesus
▪ Hudiunan a bini pa bishitá Hesus i Lázaro
□ gt kap. 101, §5-9
2011 Djarason 13 di Aprel
▪ Entrada triunfal den Yerusalèm
▪ Hesus a siña hende den tèmpel
□ gt kap. 102
10 DI NISAN (ora solo baha)
▪ Hesus a pasa anochi na Betania
2011 Djaweps 14 di Aprel
▪ Hesus a bai Yerusalèm mainta trempan
▪ El a saka e negoshantenan for di tèmpel
▪ Yehova a papia for di shelu
□ gt kap. 103 i 104
11 DI NISAN (ora solo baha)
2011 Djabièrnè 15 di Aprel
▪ Hesus a siña den tèmpel, usando komparashon
▪ El a kondená e fariseonan
▪ El a mira e biuda duna su kontribushon
▪ El a profetisá tokante e destrukshon di Yerusalèm
▪ El a duna e señal di su futuro presensia
□ gt kap. 105 te ku kap. 112, §1
12 DI NISAN (ora solo baha)
2011 Djasabra 16 di Aprel
▪ Hesus a pasa un dia trankil ku su disipelnan na Betania
▪ Hudas a plania pa traishoná Hesus
□ gt kap. 112, §2-4
13 DI NISAN (ora solo baha)
2011 Djadumingu 17 di Aprel
▪ Pedro i Juan tabata prepará p’e Pasku Hudiu
▪ Hesus i e otro dies apòstelnan tambe a bai mas lat
□ gt kap. 112, §5 te ku kap. 113, §1
14 DI NISAN (ora solo baha)
▪ Hesus a selebrá Pasku Hudiu
▪ Hesus ta laba e pianan di su apòstelnan
▪ El a manda Hudas bai
▪ El a introdusí e Memorial di su morto
□ gt kap. 113, §2 te final di kap. 116
meianochi
2011 Djaluna 18 di Aprel
▪ Traishoná i arestá den hòfi di Getsemané
▪ Apòstelnan a hui
▪ Husgá dilanti Sanedrin
▪ Pedro a nenga Hesus
□ gt kap. 117 te final di kap. 120
▪ Hesus a bai dilanti Sanedrin atrobe
▪ Hibá dilanti Pilato, despues Herodes, i atrobe dilanti Pilato
▪ Sentensiá na morto i klabá na staka
▪ Hesus a muri mas o ménos tres or di atardi
▪ Nan a kita su kurpa for di staka i a der’é
□ gt kap. 121 to kap. 127, §7
15 DI NISAN (ora solo baha)
▪ Sabat
2011 Djamars 19 di Aprel
▪ Pilato a aprobá pa pone guardianan na e graf di Hesus
□ gt 127, §8-9
16 DI NISAN (ora solo baha)
2011 Wed. April 20
▪ Hesus a ser resusitá
▪ El a aparesé na su disipelnan
□ gt kap. 127, §10 te ku kap. 129, §10
[Nota]
^ par. 28 E símbolo gt ta referí na e buki E homber mas importante cu hamás a biba. Pa un kuadro ku ta kontené mas tekstonan bíbliko relashoná ku Hesus su ministerio final, wak e buki “Tur Skritura Ta Inspirá di Dios i Probechoso” na spañó, página 290, publiká pa Testigunan di Yehova.
