Waswe, Iu Redi for Datfala Barava Important Day Long Year?

TU-THRI hour bifor Jesus dae, hem startim wanfala spesol samting for rememberim dae bilong hem. Staka pipol savve long datwan olsem “Lord’s supper.” (1 Corinthians 11:20; English Standard Version) Datwan hem important bikos Jesus sei: “Gohed for duim diswan for showimaot iufala rememberim mi.” (Luke 22:19) Waswe, iu laek for obeyim wanem Jesus talem? Sapos olsem, bae iu ting long day wea Jesus dae hem barava important day long year.

Bat wanem day nao iu shud rememberim dae bilong Jesus? And hao nao iu savve redi mekem iu tinghae long datfala important day? Evri Christian shud ting raonem gud tufala kwestin hia.

Haomas Taem Long Year Nao Iumi Shud Duim Datwan?

Iumi savve rememberim olketa important day evri year. Olsem example, evri year pipol long Solomon Islands wea stap long Western Province savve rememberim day wea earthquake and tsunami happen, wea hem nao long April 2, 2007. Olketa savve tingim datwan bikos maet samwan wea olketa lovem hem dae long datfala day.

Pipol long bifor tu savve rememberim olketa important day evri year. (Esther 9:21, 27) Jehovah talem olketa Israelite for rememberim evri year datfala day wea olketa kamap free from wei for slave long Egypt. Bible storyim datwan hem Pasova, and olketa Israelite mas celebratem datwan wanfala taem evri year.—Exodus 12:24-27; 13:10.

Bihaen Jesus finis for kaikaim kaikai bilong Pasova witim olketa aposol, hem startim wanfala celebration wea olketa bae duim for rememberim dae bilong hem. (Luke 22:7-20) Olketa Israelite celebratem Pasova evri year. Disfala niu celebration bae kamap evri year and hem bae changem Pasova wea olketa Israelite celebratem bifor. Bat long wanem day nao datfala celebration bae kamap?

Wanem Taem?

For savve long ansa, iumi need for savve long tufala samting. First samting, long taem bilong Jesus, day hem start taem sun go daon and hem end long evening long next day.—Leviticus 23:32.

Mek-tu samting, olketa month wea Bible storyim hem difren from olketa month long  kalenda bilong iumi distaem. Bible no storyim olketa month olsem March and April, bat hem storyim olketa month olsem Adar and Nisan. (Esther 3:7) Olketa Jew kaontem month followim niu moon. Olketa celebratem Pasova long mek-14 day long first month long kalenda bilong olketa, wea hem nao Nisan. (Leviticus 23:5; Numbers 28:16) Datfala day, Nisan 14, hem sem day wea olketa long Rome killim dae Lord bilong iumi Jesus Christ. Hem dae 1,545 year bihaen olketa Israelite celebratem firstfala Pasova long 1513 B.C.E. Nisan 14 hem barava important day!

Bat Nisan 14 hem wanem date long kalenda bilong iumi? Nisan 1 hem start taem pipol lukim niu moon kamap bihaen long first week long March. Sapos iumi kaontem 14 day bihaen long niu moon, iumi kasem Nisan 14. Nisan 14 hem day wea iumi savve lukim full moon. Taem iumi followim kalenda bilong olketa Jew bifor, long disfala year, Nisan 14 hem start taem sun go daon long Sunday, April 17, 2011. *

Long disfala year, Olketa Jehovah’s Witness bae hipap for rememberim dae bilong Jesus witim olketa narawan wea laek for tingim datwan. Olketa invaetem iu tu for kam. Plis askem eni Jehovah’s Witness long ples bilong iu for savve long taem and ples wea olketa bae hipap for rememberim dae bilong Jesus. Olketa bae no hipap long morning or long aftanun, bat olketa bae hipap long evening bihaen sun go daon. Why nao olsem? Bikos hem nao taem wea Jesus celebratem datwan witim olketa faithful aposol. (1 Corinthians 11:25) Evening long Sunday April 17, 2011, hem sem date wea Jesus startim datwan long 1,978 year go finis. Jesus dae tu long datfala sem day, Nisan 14. Hem important day for rememberim dae bilong hem!

Hao for Redi

Wanem nao iu savve duim for redi for disfala hipap wea kamap wanfala taem evri year? Wanfala samting, hem for ting raonem wanem Jesus duim for iumi. Datfala buk Wanem Nao Really Samting wea Bible Teachim? * helpem staka million pipol for tinghae long dae bilong Jesus.—Matthew 20:28.

Nara samting wea iumi savve duim for redi, hem for read abaotem olketa samting wea happen long last week wea Jesus stap long earth. Long next tufala page, hem wanfala chart. Long raet saed, hem olketa scripture wea storyim wanem hem happen bifor Jesus dae. Long datfala list hem garem tu olketa chapter from buk Nambawan Man Wea Winim Evri Otherfela Man * wea storyim olketa samting wea happen.

Long left saed long chart hem olketa date long kalenda bilong iumi wea semsem witim kalenda wea olketa Jew bifor iusim. Hem gud for readim samfala scripture hia long each day wea olketa markem long chart bifor iumi hipap for rememberim dae bilong Jesus! Datwan bae helpem iu for redi for datfala barava important day long year.

[Olketa Footnote]

[Blurb long page 16]

Rememberim dae bilong Jesus Sunday, April 17, 2011

 [Chart/Piksa long page 17, 18]

(Lukim pablikeson)

LASTFALA WEEK BILONG JESUS LONG EARTH

2011 Tuesday April 12

▪ Sabbath

□ John 11:55–12:1

□ gt 101, pars. 2-4 *

NISAN 9 (start taem sun go daon)

Long taem bilong Jesus, day hem start taem sun go daon and end long evening long next day

▪ Kaikai witim Simon wea garem leprosy

▪ Mary kapsaetem oil long hed bilong Jesus

▪ Olketa Jew visitim Jesus and Lazarus

□ Matthew 26:6-13

□ Mark 14:3-9

□ John 12:2-11

□ gt 101, pars. 5-9

2011 Wednesday April 13

▪ Jesus go long Jerusalem

▪ Hem teach long temple

□ Matthew 21:1-11, 14-17

□ Mark 11:1-11

□ Luke 19:29-44

□ John 12:12-19

□ gt 102

NISAN 10 (start taem sun go daon)

▪ Sleep long Bethany

2011 Thursday April 14

▪ Early morning hem long Jerusalem

▪ Raosem pipol wea duim bisnis long temple

▪ Jehovah tok kam from skae

□ Matthew 21:12, 13,18, 19

□ Mark 11:12-19

□ Luke 19:45-48

□ John 12:20-50

□ gt 103, 104

NISAN 11 (start taem sun go daon)

2011 Friday April 15

▪ Hem teach long temple and iusim olketa tokpiksa

▪ Tok strong long olketa Pharisee

▪ Lukim widow womangivim selen

▪ Jesus sei Jerusalem bae finis

▪ Storyim saen wea showimaot hem bae stap

□ Matthew 21:19–25:46

□ Mark 11:20–13:37

□ Luke 20:1–21:38

□gt 105 to 112, par. 1

NISAN 12 (start taem sun go daon)

2011 Saturday April 16

▪ Stap witim olketa disaepol long Bethany

▪ Judas mekem plan for killim dae Jesus

□ Matthew 26:1-5, 14-16

□ Mark 14:1, 2, 10, 11

□ Luke 22:1-6

□ gt 112, pars. 2-4

 NISAN 13 (start taem sun go daon)

2011 Sunday April 17

▪ Peter and John redyim kaikai bilong Pasova

▪ Jesus and tenfala aposol kam bihaen long aftanun

□ Matthew 26:17-19

□ Mark 14:12-16

□ Luke 22:7-13

□ gt 112, par. 5 to 113, par. 1

NISAN 14 (start taem sun go daon)

▪ Celebratem Pasova

▪ Jesus wasim leg bilong olketa aposol

▪ Jesus talem Judas for go

▪ Jesus startim Memorial for dae bilong hem

□ Matthew 26:20-35

□ Mark 14:17-31

□ Luke 22:14-38

□ John 13:1–17:26

□ gt 113, par. 2 go kasem end long 116

midolnaet

2011 Monday April 18

▪ Judas givim go Jesus long enemy long Gethsemane

▪ Olketa aposol ranawe

▪ Hae Kot bilong olketa Jew kotem hem

▪ Peter denyim Jesus

□ Matthew 26:36-75

□ Mark 14:32-72

□ Luke 22:39-62

□ John 18:1-27

□ gt 117 go kasem end long 120

▪ Olketa tekem Jesus long Hae Kot moa

▪ Olketa tekem Jesus long Pilate, then long Herod, then long Pilate moa

▪ Pilate givim komand for nilam Jesus long post

▪ Jesus dae samting olsem thri klok long aftanun

▪ Aotem body from post and putim long grev

□ Matthew 27:1-61

□ Mark 15:1-47

□ Luke 22:63–23:56

□ John 18:28-40

□ gt 121 go kasem 127, par. 7

NISAN 15 (start taem sun go daon)

▪ Sabbath

2011 Tuesday April 19

▪ Pilate letem security for gaedem grev bilong Jesus

□ Matthew 27:62-66

□ gt 127, pars. 8-9

NISAN 16 (start taem sun go daon)

□ Mark 16:1

2011 Wednesday April 20

▪ Jesus laef bak

▪ Olketa disaepol lukim Jesus bihaen hem laef bak

□ Matthew 28:1-15

□Mark 16:2-8

□ Luke 24:1-49

□ John 20:1-25

□ gt 127, par. 10 to 129, par. 10

[Footnote]