Yu de srekasreka gi a moro prenspari dei fu a yari?

WAN tu yuru bifo Yesus dede, a poti wan spesrutu seti fu memre a dede fu en. Sma kon sabi a seti disi leki „a neti-nyanyan fu Masra”, noso na Avondmaal fu Masra (1 Korentesma 11:20). Fu di Yesus ben wani sori o prenspari na okasi disi de, meki a gi a komando disi: „Un mus tan du disi fu memre Mi” (Lukas 22:19; Nyun Testamenti). Yu wani gi yesi na Yesus? Efu yu wani du dati, dan yu o si a dei te wi musu memre a dede fu Yesus, leki a moro prenspari dei na ini a yari.

Ma o ten yu musu memre na okasi disi? Fa yu kan sorgu taki yu e frustan krin o prenspari na okasi disi de? A ben o bun efu ibri Kresten poti seryusu prakseri na den aksi disi.

Omeni leisi wi musu hori en?

Nofo tron wi e memre wan prenspari dei, wán leisi wan yari. Fu eksempre, sma e tan memre den lobiwan di lasi libi na ini a rampu di ben pasa tapu 11 september 2001, di opolani naki go panya na World Trade Center na ini New York City. Ibri yari te a dei dati e doro, den e si en leki wan spesrutu dei.

Na so a de tu taki na ini Bijbel ten, sma ben memre spesrutu okasi wán leisi wan yari (Ester 9:21, 27). Yehovah ben gi den Israelsma a komando fu memre a dei di a puru den na wan wondru fasi na ini katibo na Egepte. Den ben musu hori wan fesa fu memre a dei dati ibri yari. Bijbel e kari a fesa dati a Paskafesa, èn den Israelsma ben hori en wán leisi wan yari, soifri tapu a dei di den ben kisi frulusu.​—Exodus 12:24-27; 13:10.

Baka di Yesus hori a Paskafesa nanga den apostel fu en, a seti wan spesrutu nyanyan fu sori fa sma musu memre a dede fu en (Lukas 22:7-20). Sma ben hori a Paskafesa ibri yari. Fu dati ede, wi kan frustan taki a nyun seti disi di ben kon na ini a presi fu a Paskafesa, musu hori wán leisi wan yari tu. Ma tapu sortu dei a musu hori?

O ten a musu hori?

Fu man gi piki tapu na aksi dati, wi musu frustan tu sani fosi. A fosi sani na taki na ini Bijbel ten, wan nyun dei ben bigin na mofoneti te sondongo, èn a ben kaba a tra dei te sondongo. Fu dati ede, wan dei ben de fu mofoneti te go miti a tra mofoneti.​—Lefitikus 23:32.

A di fu tu sani, na taki Bijbel no e gebroiki a kalender di wi gwenti gebroiki na ini a ten disi.  Fu eksempre, na presi fu taki fu a mun maart nanga april, Bijbel e taki fu a mun Adar nanga Nisan (Ester 3:7). Te den Dyu ben teri wan mun fu a yari, dan den ben luku a munkenki. Sobun, den ben teri fu a wán nyun mun te go miti a tra nyun mun. Den ben hori a Paskafesa tapu a di fu 14 dei fu a fosi mun fu a kalender fu den, èn dati ben de a mun Nisan (Lefitikus 23:5; Numeri 28:16). Tinafo Nisan, ben de a srefi dei di den Romesma ben spikri wi Masra Yesus Krestes na wan postu. A ben dede 1545 yari baka di sma ben hori a fosi Paskafesa. Tinafo Nisan na trutru wan spesrutu dei!

Ma tapu sortu dei 14 Nisan e fadon na ini a ten disi? A no muilek fu kon sabi sortu dei dati de. Den Dyu ben e wakti a spesrutu dei na ini a lente, te a son e skèin sowan 12 yuru langa èn te a dungru sowan 12 yuru langa. A fosi nyun mun di de fu si na ini Yerusalem baka te son dongo, leti bifo noso leti baka a dei dati, ben de a fosi dei fu a mun Nisan. Te wi e teri 14 dei moro fara, dan wi e doro na 14 Nisan. Nofo tron a furu mun de fu si tapu a dei disi. Te wi e teri na a fasi disi fa Bijbel e sori, dan a yari disi 14 Nisan e bigin tapu sonde 17 april 2011, baka te son dongo. *

Fu dati ede a de so taki a yari disi, Yehovah Kotoigi e sreka sani fu kon makandra nanga ala den sma di wani memre a dede fu Yesus. Den e gi yu wan switi kari fu kon makandra nanga den. Grantangi, aksi Yehovah Kotoigi na ini a kontren drape o lati èn pe a konmakandra disi o hori. Den no o hori na okasi disi mamanten, noso bakadina, ma den o hori en na mofoneti baka te son dongo. Fu san ede? Fu di Bijbel e sori taki na okasi disi na wan „neti-nyanyan” (1 Korentesma 11:25). A mofoneti fu sonde 17 april 2011, na a dei te wi o memre a spesrutu okasi di Yesus ben seti 1978 yari pasa. Disi na a bigin fu a srefi dei di Yesus dede, èn dati na 14 Nisan. Dati na a moro bun dei fu memre a dede fu en, a no so?

Fa fu sreka gi a dei disi

San yu kan du now fu sreka gi na okasi disi di e hori wán leisi wan yari? Wan sani di yu kan du, na fu denki dipi fu san Yesus du gi wi. A dede fu Yesus wani taki furu gi wi. A buku San Bijbel e leri wi trutru? * yepi milyunmilyun sma fu kisi moro warderi gi dati.​—Mateyus 20:28.

Wan tra sani di wi kan du fu sreka wi ati gi a spesrutu okasi disi, na fu leisi den sani di ben pasa fosi a lasti dei fu Yesus en libi dyaso na grontapu. Wan schema de na tapu den bladzijde di e kon. Na a reti-anusei fu a bladzijde yu o si den Bijbeltekst di e taki fu den sani di pasa fosi Yesus dede. Boiti dati, yu o si na ini sortu kapitel fu a buku A moro bigi man di oiti ben libi * yu kan leisi moro fu den tori.

Na a kruktu-anusei fu a bladzijde, yu o si tapu sortu dei den sani dati pasa, èn tapu sortu dei den sani dati e fadon na ini a yari disi. Fu san ede yu no e teki ten fu leisi wan tu fu den Bijbeltekst di e taki fu den sani di ben pasa tapu den dei dati te go miti a Neti-nyanyan fu Masra? Disi o yepi yu fu sreka yusrefi gi a moro prenspari dei fu a yari.

[Futuwortu]

[Prenspari pisi na tapu bladzijde 22]

Wi o memre a dede fu Yesus tapu sonde 17 april 2011

 [Karta/​Prenki na tapu bladzijde 23, 24]

(Efu yu wani si pe den sani disi skrifi, luku a tijdschrift)

A LASTI WIKI

Tudewroko 12 april 2011

▪ Sabat

□ Yohanes 11:55–12:1

□ gt 101, par. 2-4 *

9 NISAN (e bigin baka sondongo)

Na ini Bijbel ten, wan nyun dei ben bigin na mofoneti, baka te son dongo, èn a ben kaba a tra dei te son dongo

▪ Fesa nanga Simon, a gwasiman

▪ Maria e kanti nardus-oli na tapu Yesus en ede

▪ Den Dyu e kon luku Yesus nanga Lasarus

□ Mateyus 26:6-13

□ Markus 14:3-9

□ Yohanes 12:2-11

□ gt 101, par. 5-9

Dridewroko 13 april

▪ Yesus e kon na ini Yerusalem leki wan kownu

▪ Yesus e gi leri na ini a tempel

□ Mateyus 21:1-11, 14-17

□ Markus 11:1-11

□ Lukas 19:29-44

□ Yohanes 12:12-19

□ gt 102

10 NISAN (e bigin te son dongo)

▪ Yesus e tan a neti na ini Betania

Fodewroko 14 april 2011

▪ Yesus e go frukufruku na Yerusalem

▪ Yesus e krin a tempel

▪ Yehovah e taki komoto fu hemel

□ Mateyus 21:12, 13, 18, 19

□ Markus 11:12-19

□ Lukas 19:45-48

□ Yohanes 12:20-50

□ gt 103, 104

11 NISAN (e bigin te son dongo)

Freida 15 april 2011

▪ Yesus e gi leri na a tempel èn a e gebroiki agersitori

▪ Yesus e krutu den Fariseiman

▪ Yesus e poti prakseri na wan uma di gi bijdrage

▪ Yesus e taki na fesi dati Yerusalem o kisi pori

▪ Yesus e taki fu a marki di e sori a denoya fu en

□ Mateyus 21:19–25:46

□ Markus 11:20–13:37

□ Lukas 20:1–21:38

□ gt 105 te go miti 112, par. 1

12 NISAN (e bigin te son dongo)

Satra 16 april 2011

▪ Yesus de en wawan nanga den disipel fu en na ini Betania

▪ Yudas e seti sani fu tori Yesus

□ Mateyus 26:1-5, 14-16

□ Markus 14:1, 2, 10, 11

□ Lukas 22:1-6

□ gt 112, par. 2-4

 13 NISAN (e bigin te son dongo)

Sonde 17 april 2011

▪ Petrus nanga Yohanes e sreka sani gi a Paskafesa

▪ Moro lati a bakadina dati, Yesus nanga den tra tin apostel e doro

□ Mateyus 26:17-19

□ Markus 14:12-16

□ Lukas 22:7-13

□ gt 112, par. 5 te go miti 113, par. 1

14 NISAN (e bigin te son dongo)

▪ Den e hori a Paskafesa

▪ Yesus e wasi den futu fu den apostel

▪ Yesus e seni Yudas gowe

▪ Yesus e seti a Memrefesa fu a dede fu en

□ Mateyus 26:20-35

□ Lukas 22:14-38

□ Yohanes 13:1–17:26

□ gt 113, par. 2 te na a kaba fu 116

mindrineti

Munde 18 april 2011

▪ Yudas tori Yesus; den grabu en ini a dyari fu Getseimanei

▪ Den apostel e lon gowe

▪ A Sanhedrin e krutu Yesus

▪ Petrus e taki dati a no sabi Yesus

□ Mateyus 26:36-75

□ Markus 14:32-72

□ Lukas 22:39-62

□ Yohanes 18:1-27

□ gt 117 te go miti a kaba fu 120

▪ Yesus e kon baka na fesi a Sanhedrin

▪ Den tyari en na Pilatus, Herodes, èn baka na Pilatus

▪ Yesus kisi dedestrafu èn den spikri en na wan postu

▪ Yesus e dede na wan ten fu dri yuru bakadina

▪ Den e puru a dedeskin fu Yesus èn den e beri en

□ Mateyus 27:1-61

□ Markus 15:1-47

□ Lukas 22:63–23:56

□ Yohanes 18:28–19:42

□ gt 121 te na 127, par. 7

15 NISAN (e bigin te son dongo)

▪ Sabat

Tudewroko 19 april 2011

▪ Pilatus e gi primisi taki waktiman hori wakti na a grebi fu Yesus

□ Mateyus 27:62-66

□ gt 127, par. 8-9

16 NISAN (e bigin te son dongo)

□ Markus 16:1

Dridewroko 20 april 2011

▪ Yesus opo baka

▪ Yesus e sori ensrefi na den disipel

□ Mateyus 28:1-15

□ Markus 16:2-8

□ Lukas 24:1-49

□ Yohanes 20:1-25

□ gt 127, par. 10 te na 129, par. 10

Futuwortu