Wawanakasarux respetasirïñ yatichañäni

MAYNINAKAR respetompi uñjir jaqixa, respetatarakiwa. Yaqhip markanakanxa, mä utar mantañatakisa jan ukax aruntʼasiñatakisa, chachanakax sombrer asaqtʼasipxirïna; ukhamatwa mayninakar jupax respetatap uñachtʼayäna ukat mayninakax respetapxarakïnwa. Ukhamax khititï respetomp uñjasirïki ukarux ukhamarakiw mayninakax respetompi uñjapxi.

Kunapachatï mä waynax yaqhanakar suma chuymamp uñjki ukhaxa, ¿kusiskañaxaya? Honduras markan tamanak tumptʼir mä jilataxa, kunayman marani jilat kullakanakampi Diosan arunakap yatiyasax akham siwa: “Mä wawar respetomp kuns lurir uñjasaxa, walja kutiw jaqinakax nayan arunakajat sipans wal muspharapxi” sasa.

Chiqas taqinir suma chuymamp uñjañax janiw nayrjamäxiti, ukampis ukhamäsax askinak jikxatsna ukat wakiskirirakiwa. Biblia pachpaw “Jesucriston arunakaparjam sarnaqapxam” sasin iwxtʼistu (Fili. 1:27; 2 Tim. 3:1-5). Ukatpï wawanakasarux mayninakar respetañ yatichañax wakiskirixa. Ukampisa, ¿kunjamatsa respetasirïñ yatichsna? ukat ¿kunjamatsa taqi chuyma respetasirïpxaspa? *

Sum sarnaqatasampiw yatichsna

Mayninakar uñjasaw wawanakax yatiqapxi. Ukhamax luratanakasampiw wawanakar respetasirïñsa, suma chuymanïñsa yatichsna (Deu. 6:6, 7). Chiqas mayninakar suma chuymamp uñjañatakix sapa kutiw wawanakasar arxayañasa, ukampis jiwasaw mayninakar respetatas uñachtʼayañasa.

Ukatakix Paula kullakat parltʼañäni, * mamapax sapäkchinsa, Jehová Diosan Qhanañchiripjamwa uywatayna. Ukat mayninakar respetomp uñjañax wali wakiskirïtapxa wawatpachwa Paulax yatiqäna, ukatwa akham saraki: “Mamajaw mayninakar suma chuymamp uñjañ uñachtʼayapxitu, ukatwa nanakatakix ukhamäñax jan chʼamäkänti” sasa. Mä tuqitxa, Walter sat jilatan esposapax janiw cristianükänti ukampis wawanakaparux jiskʼatpach mamapar respetañ yatichatayna, ukatwa akham saraki: “Esposajarux respetompipuniw uñjirïta, janiw jupat jan walinak parlirïkti ukhamatwa wawanakajax  mamapar respetapxarakïna” sasa. Aka jilatax chiqa yupaychäwin wawanakapar sum uywañatakixa, Jehová Diosarupuniw yanaptʼa mayisirïna. ¿Kunsa ukampix jikxatawayi? Maynix Jehová Diosan qhanañchirinakan mä sucursalapanwa yanaptʼaski ukat maynix precursorarakiwa. Ukat mamaparus tataparus munasiñampi ukat respetompiw uñjapxi.

Jehová Diosax taqi kuns yäpar apnaqiriwa ukat sumankayir Diosarakiwa sasaw Bibliax qhanañchi (1 Cor. 14:33, NM). Chiqas Jupax taqi kuns yäparupuniw apnaqi. Cristianonakax familian ukhamäñatakiw chʼamachasiñasa. Yaqhip awk taykanakax wawanakar utan lurañanakap phuqhañwa yatichapxi, escuelar janïr sarkasinwa ikiñap janxatayapxi ukat isipsa apthapiyapxi. Ukampis taqpach utatix qʼuma ukat suma apthapitänixa, wawanakax ukhamarakiw ikiñ utapsa, yaqhanaksa apthapipxani ukat qʼumachapxarakini.

¿Escuelan yatiqapxatanakapat kamsapxis wawanakaxa? ¿Yatichirinakarux yuspärasipkiti? Ukat ¿jiwasax yuspärasktanti? Kunjamxay awk taykax escuelat amuychi jan ukax parlchi, ukanak wawanakax sum amuyapxi. Ukhamax yatiqapxañapatak yanaptʼa katuqapxatap laykux yatichirinakar yuspärañwa yatichañasa, ukhamatwa respetatas uñachtʼayarakiñäni. Chiqas doctorarusa aljirirusa, mä arunx taqiniruw yanaptʼatapat yuspärañasa (Luc. 17:15, 16). Taqi wayn tawaquruw cristianükasin escuelapan taqinitakis suma chuymani ukat suma sarnaqiri, ukham uñtʼatïpan walik ukham lurtax sasin taqi chuyma sañasa.

Chiqasa, taqi cristianow yatiqaskay sarnaqañapa. ¡Tantachasiñ Utan kunja kusiskañasa wawanakaru suma arumpi kuns maytʼasiri jan ukax yuspärasiri uñjañaxa! Ukat tantachasiñ horasasti, jilïrinakax taqi chuyma istʼasaw Jehová Diosar respetapxatap uñachtʼayapxañapa. Ukhamatwa wawanakax yatiqasipxarakini. Ukat tantachasiñ utan jilat kullakanakar purapat respetasir uñjasaxa, ukhamarakiw vecinonakapar respetomp uñjani. Ukatpï pusi maran jiskʼa Andresux jilïrinak taypnam pasañatakix permiso maytʼasiñ yatiqatayna.

Wawanakax respetasiñsa ukat mayninakar suma chuymamp uñjañ yatichañatakix, ¿kunanakampsa lursna? Biblian utjki uka suma sarnaqäwinak yatichañataki tiempo apstʼasiñaw wakisi (Rom. 15:4).

Biblian utjki uka sarnaqäwinakamp yatichañäni

Kunapachatï Jacob chachax familiapampi Canaán markaru kutʼkäna ukhaxa, Esaú sat jilapan nayräxapan altʼasipxañapatakiw wawanakapar yatichpachäna (Gén. 33:3, 6, 7). ¿Jiwasax wawanakasar ukhamrak yatichsnati? Kawkhans aruntasirïñ yatichañasawa, ukax wali askirakiwa. Ukhamatwa Samuel wawjamäpxani, jupan “sarnaqatapasti [Jehová] Tatitutakisa, jaqinakatakisa askirakïnwa” (1 Sam. 2:26). Respetasir wawanakax Jehová Diosaruw jachʼañchi ukat awk taykarus kusisiyarakiwa.

Mayninakar respetompi uñjañaxa, janiw suma chuymampi uñjañampix kikpäkiti,  Bibliampiw ukxa qhanañtʼaraksna. Uk amuytʼañatakixa, Israel markankir Ocozías sat jan wali reyit parltʼañäni, jupax Elías profetaruw jawsayäna. Ukat nayraqat “mä capitanampi phisqa tunka soldadompi” khitäna. Ukat purkäna ukhasti, Eliasarux mäpit sarañapatakiw parlxayäna, ukampis Diosan ajllit chacharux janiw ukham parlañapakänti. ¿Kunjamsa profetax jaysäna? Akham sänwa: “Nayatix profetästa ukaxa, alaxpachat ninax saraqanpan, ukatsti nakhantpan jumarusa, ukhamarak juman phisqa tunka soldadonakamarusa” sasa. Chiqas ukhamänwa, “ukspachawa ninax alaxpachata saraqanisina jupanakaru nakhantäna” (2 Rey. 1:9, 10).

Ukat Ocozías reyix yaqha capitanaruw khitäna, ukampis nayrïr capitanjamarakiw Eliasar parlxayäna. Ukatwa wasitampix ninax alaxpachat saraqanisin juparusa ukat 50 soldadonakaparus tukjäna. Ukampis yaqha capitanaw purinïna, ukat aknïrix suma arunakampiw jikxatäna. Mä pit jariyañat sipansa, qunqurtʼasisaw akham säna: “Rogtʼasmawa profeta, nayan jakañaxarux khuyaptʼayitaya, ukhamarak aka phisqa tunka servirinakan jakañanakapsa. Alaxpachata ninax saraqanisinxa nakhantänwa pä capitanaru ukhamarak soldadonakapamppacharu. Nayasti rogtʼassmawa nayat khuyaptʼayasiñamataki” sasa (2 Rey. 1:11-15) Uka capitanar ukhan arxayir istʼasax, ¿Eliasax kamachpachänisa? Ukham wali respetompi parlxayataxa, ¿wasitampit ninamp nakhantayañatak Jehová Diosar mayïna? ¡Janiwa! Antisaw mä angelan iwxtʼatax jupamp chikax saräna. Ukhamax aka sarnaqäwirjamax ¿respetasirïñax wali wakiskirixaya?

Ukhamarakiw apóstol Pablot yatiqassna. Romankir soldadonakax templon katuntapkäna ukhaxa, jupax janiw siskänti nayax derechonïtwa parlañatakixa sasa. Ukatwa uñjiri comandanterux respetompi akham sasin jisktʼäna: “¿Mä jukʼa arunak arstʼasiristti?” sasa. Ukatwa arstʼaskakim sapxäna (Hech. 21:37-40).

Jesucristot parltʼarakiñäni, kunapachatï ajanut chʼakhuntapkäna ukhaxa, arsusïnwa ukampis yatïnwa kunjam arsusiñsa, ukatwa akham säna: “¿Kuns jan wal arstxa? Arsutaxatix walikïskchi ukaxa, ¿kunats nuwista?” sasa. Ukat ukham arsutapatx janirakiw khitis kamskänti (Juan 18:22, 23).

Juchar putʼasitasat qhan iwxtʼapxistani ukhax kunjamsa respetompi qatuqassna ukwa Bibliat apstʼat mayni sarnaqäwinakax yatichistu, ukat juchas uñtʼasiñasatakisa, akatjamat panjasitas yatiñasatakisa (Gén. 41:9-13; Hech. 8:20-24). Amuytʼaskakiñäni, Abigailax Nabal chachapan juchapatwa, David reyir perdón mayisïna. Ukat walja manqʼañanakwa churarakïna. Davitasti, ukham luratapatx wali sum uñjänxa, ukatwa Nabalan jiwatapatx Abigailamp casarasxäna (1 Sam. 25:23-41).

Wawanakasan mayninakar respetompi ukat suma chuymamp uñjapxañapatak yatichañasawa, ukhamatwa sapür jakäwinsa ukat jan waltʼäwinakansa wali respetomp sarnaqapxani. Ukat jaqinakatakiw “qhana[sax] qhantʼani” ukhamat Jehová “Dios Awki[sa]ru yupaychapxañapataki” (Mat. 5:16).

[Qhanañchäwinaka]