Tudloi ang Inyong Anak nga Magmatinahoron

ANG usa ka panultihon sa Germany nag-ingon: “Kon ang kalo naa sa kamot, ang usa ka tawo abiabihon bisag asa siya makaabot.” Sa daghang kultura, ang pagtukas sa kalo sa dihang mosulod sa balay o sa dihang motimbaya giisip nga maayong pamatasan ug sa ingon maangkon ang pagtahod sa mga tawo. Busa, ang maong panultihon nagpasabot nga ang mga tawo mas magmaluloton niadtong may maayong pamatasan.

Pagkamakapahimuot kon ang mga batan-on may maayong pamatasan! Usa ka magtatan-aw sa sirkito sa Honduras nga nakig-uban sa mga magmamantala nga lainlaig edad diha sa pagsangyaw nag-ingon, “Sagad ang bata nga matinahoron ug nabansay pag-ayo mas tagdon sa tagbalay kay sa akong gipanulti.”

Niining panahon nga nagkakaylap ang pagkadili-matinahoron, maayong mahibalo kita kon unsaon pagtratar ang uban. Labaw pa niana, ang Kasulatan nagtambag nga “magagawi kamo sa paaging takos sa maayong balita labot kang Kristo.” (Filip. 1:27; 2 Tim. 3:1-5) Importante nga tudloan nato ang atong mga anak sa pagtahod sa uban. Sa unsang paagi sila matudloan nga mahimong tinuod nga matinahoron, dili lamang sa panggawas nga pagkamatinahoron? *

Mahimong Panig-ingnan sa Maayong Pamatasan

Ang mga bata mosundog kon unsay ilang makita. Busa ang pangunang paagi aron masilsil sa mga ginikanan ang maayong pamatasan sa ilang mga anak mao ang pagpakitag panig-ingnan niana. (Deut. 6:6, 7) Ang pagtudlo sa imong anak bahin sa pagpakitag pagtahod hinungdanon, apan kana dili igo. Ang mga pahinumdom kinahanglang ubanan sa maayong panig-ingnan.

Tagda ang kahimtang ni Paula, * nga gimatuto sa nag-inusara nga Kristohanong ginikanan. Nabatasan na niya ang pagpakitag pagtahod. Ngano? Siya mitubag, “Si Mama nagpakitag maayong panig-ingnan, busa kaming mga anak nakakat-on sab nga magmatinahoron.” Ang Kristohanong si Walter nagtudlo sa iyang mga anak lalaki sa pagtahod sa ilang dili-magtutuong inahan. “Akong gitudloan ang akong mga anak nga tahoron ang ilang inahan pinaagi sa akong panig-ingnan, nga dili gyod ko manaway sa akong  asawa.” Si Walter padayong nagtudlo sa iyang mga anak sa Pulong sa Diyos, ug nag-ampo kang Jehova alang sa tabang. Usa kanila nag-alagad karon sa usa ka sangang buhatan sa mga Saksi ni Jehova, ug ang usa nagpayunir. Ilang gihigugma ug gitahod ang ilang mga ginikanan.

Ang Bibliya nag-ingon: “Ang Diyos usa ka Diyos, dili sa kasamok, kondili sa kalinaw.” (1 Cor. 14:33) Hapsay ang tanang ginabuhat ni Jehova. Ang mga Kristohanon angayng maningkamot sa pagsundog niining hiyasa ug huptang hapsay ang balay. Gibansay sa pipila ka ginikanan ang ilang mga anak sa paghipos sa ilang higdaanan sa dili pa moeskuyla, pagbutang sa ilang besti sa hustong dapit, ug sa pagtabang sa buluhaton sa balay. Kon makita sa mga bata nga hapsay ug hinlo ang ilang balay, lagmit sundogon sab nila kana diha sa ilang kuwarto ug mga butang.

Unsay pag-isip sa inyong mga anak sa ilang nakat-onan sa eskuylahan? Nagpahayag ba silag apresasyon sa ilang mga magtutudlo? Ingong ginikanan, nagpakita ka ba usab ug apresasyon? Lagmit sundogon sa imong mga anak ang tinamdan nga imong gipakita ngadto sa mga magtutudlo ug sa mga buluhaton sa eskuylahan. Busa dasiga sila nga batasanon ang pagpasalamat sa mga magtutudlo. Ang pagpasalamat sa mga serbisyo maoy ekselenteng paagi sa pagpakitag pagtahod sa magtutudlo, doktor, tindero, o kang bisan kinsa. (Luc. 17:15, 16) Ang batan-ong mga Kristohanon nga nalahi sa ilang mga eskolmet tungod sa ilang pagkamatinahoron ug maayong panggawi angayng dayegon.

Ang mga membro sa Kristohanong kongregasyon angayng magpakitag maayong ehemplo sa pamatasan. Pagkamakapalipay nga makita ang mga batan-on sa kongregasyon nga matinahorong moingon nga “palihog” ug “salamat”! Sa dihang ang mga hingkod magpakitag pagtahod kang Jehova pinaagi sa pagpamati panahon sa mga tigom, ang mga batan-on madasig sa pagsundog kanila. Ang mga bata makakat-on sa pagtahod sa ilang mga silingan pinaagi sa pagpaniid sa maayong pamatasan nga ilang makita diha sa Kingdom Hall. Pananglitan, ang kuwatro-anyos nga si Andrew nakakat-on na sa pagsultig, “Excuse me,” sa dihang moagi taliwala sa mga hingkod.

Unsay laing mahimo sa mga ginikanan aron ang ilang mga anak makakat-on sa tukmang panggawi? Angay silang mogahin ug panahon sa pag-asoy sa ilang mga anak sa daghang panig-ingnan diha sa Pulong sa Diyos.—Roma 15:4.

Itudlo ang mga Panig-ingnan sa Bibliya

Ang inahan ni Samuel lagmit nagtudlo sa iyang anak nga moyukbo sa Hataas nga Saserdoteng si Eli. Sa dihang gidala niya si Samuel sa tabernakulo, siya lagmit tres o kuwatro anyos pa niadto. (1 Sam. 1:28) Makabansay ka ba sa imong anak sa pagsultig “maayong buntag,” “maayong hapon,” “maayong gabii,” o kon unsay komon sa inyong lugar? Sama sa batang si Samuel, ang inyong mga anak usab mahimong “gikahimut-an sa panglantaw ni Jehova ug sa mga tawo.”—1 Sam. 2:26.

Nganong dili nimo gamiton ang mga asoy sa Bibliya aron ipasiugda ang kalainan sa pagtahod  ug kawalay-pagtahod? Pananglitan, sa dihang ang dili-matinumanong Hari sa Israel nga si Ahazias buot makigkita kang propeta Elias, siya nagpadalag ‘pangulo sa kalim-an uban sa iyang kalim-an’ sa pagpatawag kaniya. Ang pangulo nagmando sa propeta sa pagkuyog kaniya. Dili kadto haom nga paagi sa pagpakigsulti sa usa ka hawas sa Diyos. Unsay tubag ni Elias? “Buweno, kon ako usa ka tawo sa Diyos, pakanaogon unta ang kalayo gikan sa mga langit ug magaut-ot kanimo ug sa imong kalim-an.” Ug kana gayod ang nahitabo. “Ang kalayo nanaog gikan sa mga langit ug nag-ut-ot kaniya ug sa iyang kalim-an.”—2 Hari 1:9, 10.

Ang ikaduhang pangulo sa 50 gipadala sa pagkuha kang Elias. Siya usab nagmando kang Elias sa pagkuyog kaniya. Gilamoy gihapon sila sa kalayo gikan sa langit. Dayon, ang ikatulong pangulo sa 50 miadto kang Elias. Siya nagpakitag pagtahod. Imbes mandoan si Elias, siya miluhod ug nangaliyupo: “Tawo sa matuod nga Diyos, itugot palihog nga ang akong kalag ug ang kalag niining kalim-an nimo ka alagad mahimong bililhon sa imong mga mata. Ania, ang kalayo nanaog gikan sa mga langit ug nag-ut-ot sa duha ka naunang mga pangulo sa kalim-an ug sa ilang tinagkalim-an, apan karon itugot nga mahimong bililhon ang akong kalag sa imong mga mata.” Mohangyo ba ang propeta sa Diyos nga magpakanaog ug kalayo aron maglamoy sa usa nga bisag may kahadlok, misulti nga matinahoron? Imposible kana! Hinuon, ang manulonda ni Jehova nagsulti kang Elias nga mokuyog sa maong pangulo. (2 Hari 1:11-15) Dili ba kana nagpasiugda nga hinungdanon kaayo ang pagpakitag pagtahod?

Sa dihang si apostol Pablo gidakop sa Romanong mga sundalo didto sa templo, wala niya isipang may katungod siya sa pagsulti. Siya matinahorong nangutana sa tagdumala: “Makahimo ba ako sa pagsulti kanimo?” Ingong resulta, si Pablo gitugotan sa pagdepensa sa iyang kaugalingon.—Buh. 21:37-40.

Si Jesus gisagpa samtang siya gihusay. Apan, nahibalo siya sa hustong paagi sa pagreklamo: “Kon sayop ang akong gisulti, pamatud-i ang sayop; apan kon husto, nganong imo akong gisagpa?” Walay makaingon nga sayop ang paagi sa pagtubag ni Jesus.—Juan 18:22, 23.

Ang Pulong sa Diyos naghatag sab ug mga pananglitan bahin sa hustong pagsanong sa dihang kita badlongon ug sa matinahorong pagdawat sa nahimong sayop o pagpasagad. (Gen. 41:9-13; Buh. 8:20-24) Pananglitan, si Abigail nangayog pasaylo sa sinalbahis nga pagtratar sa iyang banang si Nabal kang David. Gawas sa pagpangayog pasaylo, siya mihatag ug daghang pagkaon. Si David nakadayeg kaayo sa gibuhat ni Abigail nga sa pagkamatay ni Nabal iya siyang gipangasawa.—1 Sam. 25:23-41.

Tudloi ang inyong mga anak nga magmatinahoron, kini man sa pagpakitag pagtahod ubos sa lisod nga kahimtang o yanong pagpakitag maayong pamatasan. ‘Ang pagpalamdag sa atong kahayag atubangan sa mga tawo’ niining paagiha ‘maghimaya sa atong Amahan, nga anaa sa mga langit.’—Mat. 5:16.

[Mga footnote]