Ñamboʼéke ñane famíliape irrespetuóso hag̃ua

HETA hendárupi kuimbaʼekuéra ohechauka hag̃ua orrespetaha hapichakuérape ojepokuaa jepi oipeʼa isombréro og̃uahẽvo peteĩ ógape térã oporosaluda hag̃ua. Upévare peteĩ ñeʼẽnga heʼi: “Jaipeʼárõ ñane sombréro, hetave oĩ ñanemombaʼéva”. Péicha jahecha la hénte ipyʼaporã ha horyveha ñanendive japororrespetáramo.

Ajépa javyʼaite jahecháramo umi imitãva ojeporta porã ha orrespetáramo opavavépe. Peteĩ superintendénte de sirkuíto Honduraspegua osẽ meme opredika opaichagua ermánondi, tahaʼe imitãva térã ijedávandi. Haʼe heʼi: “Japredika porãramo jepe, heta vése umi hénte ohecharamove umi mitã ojeportaporãramo”.

Koʼág̃a rupi heta hetave oĩ umi nomombaʼéiva hapichápe, upéicharamo jepe jatrata porãramo opavavépe oho porãvéta ñandéve. La Biblia heʼi voi ‘peikókena hekópe, Ñandejára marandu porã heʼiháicha’ (Fili. 1:27; 2 Tim. 3:1-5). Upévare tekotevẽterei ñahekomboʼe ñane famíliape opororrespeta hag̃ua. Mbaʼéichapa ikatu ñaipytyvõ chupekuéra? Mbaʼépa jajapovaʼerã akóinte omombaʼe hag̃ua hikuái hapichápe ipyʼaite guive? *

Ñamboʼe ñane ehémplo rupive

Umi mitã katuete ojapose pe ohecháva. Upévare ñane ehémplo rupive ikatu ñahekomboʼe chupekuéra ijedukádo hag̃ua (Deu. 6:6, 7). Tekotevẽramo jepe ñañemoñeʼẽ ñane famíliape, iñimportanteve hína ñandete voi jahechauka japororrespetaha.

Jahechamína Paula * ehémplo, haʼe ningo okakuaavaʼekue isýndi añónte. Chupe ojekuaa akóinte opororrespeta haguére. Haʼe omombeʼu mbaʼérepa: “Rohechágui mbaʼéichapa ore sy orrespeta hapichápe, ndahasyietevaʼekue oréve rojapo hag̃ua avei upéicha”. Peteĩ ermáno hérava Walter omombeʼu avei mbaʼéichapa omboʼevaʼekue itaʼyrakuérape michĩmi guive orrespeta hag̃ua isýpe, ndahaʼéiramo jepe testígo. Haʼe heʼi: “Che voi amoĩ ehémplo ha arakaʼeve ndaikoivaʼekue añeʼẽ vai che rembirekóre”. Walter oñemboʼe meme vaʼekue Jehovápe omongakuaa porã hag̃ua ifamíliape. Mbaʼéichapa osẽ itaʼyrakuéra?  Peteĩva ombaʼapo Betélpe, ambue katu prekursór. Mokõivévante omombaʼe ha ohayhueterei itúva ha isýpe.

La Biblia ohechauka porã Jehová ‘ndojapoiha mbaʼeve sarambikuépe’ (1 Cor. 14:33). Haʼe ojapo opa mbaʼe hekopete. Ñande avei ñañehaʼãvaʼerã jasegi iñehémplo, ha ani jareko sarambikuépe ñande róga. Oĩ tuvakuéra heʼíva ifamíliape omoĩ porã hag̃ua hupa oho mboyve eskuélape, tomohenda ijao ha toipytyvõ umi tembiapo ogapypeguápe. Mitãnguéra ohecháramo pe óga ipotĩ ha hendápe porã oĩha entéro mbaʼe, katuete ikyreʼỹta ojapo hag̃ua avei upéicha.

Mbaʼéichapa ohecha ñane família umi mbaʼe oaprendéva eskuélape? Omombaʼe ha oagradesépa hikuái imboʼeharakuérape? Ha ñande tuvakuéra, jajapópa avei upéva? Umi mitã ohecháramo tuvakuéra omombaʼeha umi tembiapo eskuelapegua ha oñeʼẽ porãha umi mboʼehárare, haʼekuéra ojapóta avei upéicha. Ñamboʼevaʼerã ñane famíliape oagradese ha omombaʼe hag̃ua imboʼeharakuérape. Umi mitã ojepokuaavaʼerã ijedukádo enterovéndi, tahaʼe oho jave doktórpe, térã ombaʼejogua jave (Luc. 17:15, 16). Jaguerohorýkena umi mitãrusu ha mitãkuñáme opororrespeta ha ojeporta porã haguére eskuélape.

Enterove jaservíva Jehovápe ningo jatrata porã vaʼerã ñande rapichápe. Javyʼaite jahechávo Salónpe umi mitã mimi jepe ijedukádo ha ñandetrata porãha. Rreunión aja jahechaukavaʼerã jarrespetaha Jehovápe ñañatendévo pe ojeʼévare, péicha umi mitã osegíseta ñane ehémplo. Avei ohechávo mbaʼéichapa jajotrata Salónpe oipytyvõta chupekuéra imbaʼeporã hag̃ua vesinokuérandi. Pór ehémplo, Andrés orekóva 4 áñonte, ohasátarõ hénte paʼũ rupi ojerure raẽ permíso.

Mbaʼépa ikatu jajapove ñahekomboʼe hag̃ua ñane famíliape? Ñamboykevaʼerã tiémpo ñañeʼẽ hag̃ua hendivekuéra umi ehémplo porã oĩvare Ñandejára Ñeʼẽme(Rom. 15:4).

Jaiporu umi ehémplo oĩva la Bíbliape

Ikatu ñañeʼẽ chupekuéra Samuel rembiasakuére. Haʼe orekovaʼekue 3 áño rupinte isy oguerahárõ guare chupe Jehová rógape. Upérõ oiméne isy omboʼéma chupe oñakãityvaʼerãha Elí renondépe, pe saserdóte guasu (1 Sam. 1:28). Ikatúpa ñamboʼe avei upéicha ñane famíliape? Iporãta ñahekomboʼe chupekuéra osaluda porã hag̃ua enterovépe. Péicha ojoguáta Samuélpe, ‘Jehová oguerohoryvaʼekue chupe ha avei enterove Israelgua’ (1 Sam. 2:26).

Iporãta jaiporúramo la Biblia jahechauka hag̃ua ñane famíliape oho vaitaha chupe ndopororrespetáiramo. Ikatu ñamombeʼu mbaʼépa oikovaʼekue pe rréi ñañaite Ocozías ohenoikárõ guare proféta Elíaspe.  Ñepyrũrã pe rréi omondo hendápe peteĩ mburuvicha 50 soldádo reheve. Pe mburuvicha og̃uahẽre voi heʼi Elíaspe oho hag̃ua hendive, péro haʼe ndaikatúi péicha omanda peteĩ Ñandejára rembiguáipe. Mbaʼépa ojapo Elías? Haʼe heʼi: ‘Che haʼéramo añetehápe Ñandejára rembiguái, toʼa tata yvágagui ha tanembokusugue ndéve ha nde soldadokuérape’. Ha upeichaite oiko: ‘Hoʼa tata yvágagui ha ombokusugue chupe ha umi 50 soldádope’ (2 Rey. 1:9, 10).

Rréi Ocozías omondo jey hendápe ambue mburuvicha, ha péva omandasénte avei Elíaspe. Upévare hoʼa jey tata yvágagui ha ojuka chupe ha umi 50 soldádope. Upe rire omondo Elías rendápe ambue mburuvicha, haʼe katu ndojoguaiete umi ótrope. Omanda rangue Elíaspe, oñesũ henondépe ha ojerure asy chupe: ‘Ñandejára rembiguái, emombaʼemína ore rekove. Aikuaa porã ningo hoʼa hague tata yvágagui ha ombokusugue umi mokõi mburuvicha ha 100 soldádope. Ajerure ndéve cheporiahuverekomi hag̃ua’. Mbaʼépa ojapóta pe proféta ohechávo ko kuimbaʼe oñemomirĩ ha kyhyjepópe oñeʼẽha? Ojerurétapa avei hoʼa hag̃ua tata yvágagui ko kuimbaʼe ári? Nahániri! Peteĩ ánhel rupive Ñandejára heʼi Elíaspe oho hag̃ua hendive (2 Rey. 1:11-15). Péicha jahecha iñimportanteha japororrespeta.

Apóstol Pablo peteĩ ehémplo porã avei. Umi soldádo Romaygua ojagarrárõ guare chupe pe témplope, haʼe oikuaa porã ikatuha oñeʼẽ oñedefende hag̃ua, upéicharõ jepe oporandu porãnte pe mburuvichápe: ‘Ikatúpa añeʼẽmi ndéve?’. Upéicha rupi oheja chupe oñeʼẽ (Hech. 21:37-40).

Ikatu jahecha ñane famíliandi Jesucristo ohasavaʼekue. Ojehovapetérõ guare chupe oĩ jave umi mburuvicha renondépe, Jesús ombohovái chupekuéra, péro ojapo upéva pyʼaguapýpe porãnte. Haʼe heʼi: ‘Oimérõ añeʼẽ raʼe hendapeʼỹ, ere chéve; péro oimérõ ndaʼéi mbaʼeve ivaíva, mbaʼére cherovapete?’. Upérõ avave ndaikatúi heʼi hese ndopororrespetái hague (Juan 18:22, 23).

Ñandejára Ñeʼẽme oĩ avei ambue ehémplo ohechaukáva mbaʼéichapa ikatu ñambohovái porã oĩramo ñanemongavajúva, ha mbaʼépa jaʼevaʼerã oĩramo ohechaukáva ñandéve jajavyha (Gén. 41:9-13; Hech. 8:20-24). Pór ehémplo, Abigail ojediskulpa Davídpe iména Nabal otrata vai haguére chupe. Hiʼarive omeʼẽ chupe hetaiterei hiʼupy. David omombaʼeterei upéva, ha Nabal omano rire omenda Abigail rehe (1 Sam. 25:23-41).

Iñimportanteterei ñahekomboʼe ñane famíliape akóinte imbaʼeporã ha irrespetuóso hag̃ua oĩramo jepe otrata vaíva chupe. Upéicharõ ‘jahesapéta’ opavave renondépe, ha ‘ñamombaʼeguasúta ñande Ru yvagapeguápe’ (Mat. 5:16).

[Nóta]