Longesha bana bebe bua bikale ne kanemu

LUSUMUINU lukuabu lua mu Allemagne ludi luamba ne: “Padi muntu ukuata tshifulu ku tshianza, udi wendakana buloba bujima.” Mu miaba ya bungi padi muntu ukopola kafulu kumpala kua kubuela mu nzubu wa muntu anyi kumpala kua kuela bantu muoyo bidi bileja ne: udi ne bukalanga. Lusumuinu elu ludi lumvuija ne: bantu batu basue kunemeka bantu badi ne bukalanga ne kubenzela malu mimpe.

Bidi bienza disanka dia bungi padi baledi balongesha bana babu bukalanga. Mutangidi wa tshijengu mukuabu wa mu ditunga dia Honduras utu ne tshibidilu tshia kuyisha ku nzubu ne ku nzubu ne bantu ba bidimu bishilashilangane udi wamba ne: “Misangu ya bungi mvua mmona ne: muana yeye mukolesha bimpe ne muikale ne kanemu, bavua bamuteleja bimpe mu buambi kupita muvuabu banteleja meme.”

Kumanya mua kusomba ne bakuabu kudi ne mushinga wa bungi mu tshikondo etshi tshidi bantu benda anu bapanga kanemu. Mukanda wa Nzambi udi kabidi utubela bua kuikala ne ‘bikadilu biakanangane ne lumu luimpe lua Kristo.’ (Filip. 1:27; 2 Tim. 3:1-5) Ke bualu kayi mbimpe bua baledi kulongesha bana babu bua bikale banemeka bantu bakuabu. Kadi mmunyi mudibu mua kubalongesha bukalanga ne bua kunemeka bantu bakuabu ne muoyo mujima? *

Bana batu balongela bukalanga kudi baledi babu

Bana batu bidikija malu adibu bamona bakuabu benza. Ke bualu kayi, mushindu muimpe udi baledi mua kulongesha bana babu bukalanga mpadibu bobu bine ne bukalanga. (Dut. 6:6, 7) Kadi kubela bana bua bikale ne bukalanga ki nkudi ne mushinga nkayaku to. Baledi badi ne bua kuikala kabidi babavuluija ne babaleja tshilejilu tshimpe.

Tuangate tshilejilu tshia Paula, * udibu bakoleshe kudi muledi umuepele mu bulelela. Uvua ne tshibidilu tshia kunemeka bantu bonso. Bua tshinyi? Udi wamba ne: “Mamu uvua ufila tshilejilu tshimpe, ke bualu kayi tuakalua ne tshibidilu tshia kunemeka bakuabu.” Muanetu muakuabu diende Walter uvua mulongeshe bana bende bua kunemeka mamuabu uvua kayi Ntemu. Udi wamba ne: “Ngakalongesha bana banyi bua kunemeka mamuabu pamvua meme muine mmunemeka, tshiyi mmupuekesha milongo to.” Walter wakatungunuka ne kulongesha bana bende ba balume Dîyi dia Nzambi ne  uvua ulomba Yehowa diambuluisha. Umue wa kudibu udi mpindieu wenza mudimu ku Betele wa Bantemu ba Yehowa ne mukuabu udi mpanda-njila. Bana bende aba badi bamunemeka yeye ne mamuabu ne mbabanange.

Mukanda wa Nzambi udi wamba ne: “Nzambi kena Nzambi wa malu mabuelakane, kadi udi Nzambi wa ditalala.” (1 Kol. 14:33) Malu onso atu Yehowa wenza atu anu malondangane. Bena Kristo badi ne bua kuidikija ngikadilu wa Nzambi eu ne kulongolola bintu mu nzubu yabu bimpe. Baledi bakuabu mbalongeshe bana babu bua kulongolola miaba idibu balala dituku dionso kumpala kua kuyabu mu kalasa, kuteka bilamba biabu pa muaba wabi ne kuenza midimu mikuabu ya ku mbelu. Bana bobu bamona bintu bilongolola bimpe ne mankenda mu nzubu, nebikale pabu balongolola bintu biabu ne miaba idibu balala.

Bana bebe batu bamona malu atubu balonga mu kalasa bishi? Batuku baleja dianyisha bua malu atu balongeshi babu babenzela anyi? Wewe muledi, utuku pebe uleja balongeshi aba dianyisha anyi? Bana bebe nebanyishe midimu idi balongeshi babu babapesha mu kalasa ne malu adibu babenzela pikalabu bakumona wewe uleja dianyisha edi. Kuenaku mua kubambila bua kuikalabu ne tshibidilu tshia kuela balongeshi babu tuasakidila anyi? Mushindu muimpe utudi mua kunemeka mulongeshi, munganga, muntu utudi tusumba bintu anyi muntu mukuabu yonso, nkumuleja dianyisha bua malu adiye mutuenzele. (Luka 17:15, 16) Bansonga bena Kristo batu bashilangane ne balongi nabu bua bukalanga ne ngikadilu wabu wa tshitembu, mbakanyine kalumbandi.

Bena mu tshisumbu badi pabu ne bua kufila tshilejilu tshimpe pa bidi bitangila bukalanga. Bidi bienza disanka patudi tumona bansonga mu tshisumbu banemeka bakuabu padibu babambila mêyi mimpe bu mudi: “bu wewe mua kusua” anyi “tuasakidila.” Bantu bakulumpe bobu banemeka Yehowa padibu bateleja ne ntema yonso malu adibu balongesha mu bisangilu, bidi bisaka bana bua kubidikija. Padi bana bamona mudi bantu banemekangana ku Nzubu wa Bukalenge, badi mua kulonga pabu bua kunemeka bantu bakuabu. Tshilejilu, Andrew udi ne bidimu binayi ukadi mulonge mua kuamba ne: “mfuileku luse” padiye ulomba muntu mukulumpe bua amushile njila.

Baledi badi mua kuenza kabidi tshinyi bua kulongesha bana babu bikadilu bimpe? Badi ne bua kudisumbila tshikondo tshia kuyukila ne bana babu malu adibu bapete mu bilejilu bia bungi bia mu Bible.​—Lomo 15:4.

Longesha bana ne bilejilu bia mu Bible

Mamuende wa Samuele uvua mua kuikala mumulongeshe bua kuinama kumpala kua muakuidi munene Eli. Pavuaye muye nende ku ntenta wa kusambakena, Samuele uvua mua kuikala ne bidimu bisatu anyi binayi. (1 Sam. 1:28) Kuenaku mua kulongesha muanebe mutekete bua kuikalaye welangana muoyo ne kanemu bilondeshile mutubu bawelangana muaba unudi anyi? Anu bu Samuele, bana bebe badi pabu mua kuikala ne ‘diakalengele kudi Yehowa ne kudi bantu kabidi.’​—1 Sam. 2:26.

 Udi mua kubumvuija miyuki ya mu Bible bua kubaleja dishilangana didi pankatshi pa kuikala ne kanemu ne kupangila kanemu. Tshilejilu, pavua Ahazaya mukalenge wa Isalele uvua kayi ne lulamatu musue kumonangana ne muprofete Eliya, wakatuma ‘kapitene ka masalayi ne bantu bende makumi atanu’ bua kumubikila. Kapitene wakaya kuambila muprofete bua amulonde. Kadi au kauvua mushindu muimpe wa kuambila muena mudimu wa Nzambi bualu to. Eliya wakamuandamuna bishi? Wakamba ne: ‘Bingikala muntu wa Nzambi, kapia kafume mu diulu, kakuoshe ne bantu makumi atanu badi nebe. Kapia kakafuma mu diulu kakamuosha ne bantu bende makumi atanu.’​—2 Bak. 1:9, 10.

Bakatuma kapitene muibidi wa masalayi 50 kudi Eliya. Yeye pende wakatumina Eliya dîyi bua baye nende. Kapia kakafuma kabidi mu diulu kakamuosha ne bantu bende. Kapitene muisatu wa masalayi 50 wakalua pende kudi Eliya. Kadi yeye wakanemeka muprofete. Pamutu pa kutumina Eliya dîyi, wakatua binu ku makasa ende ne kumusengelela wamba ne: ‘Wewe, muntu wa Nzambi, ndi nkusengelela ne: Witabuje bua muoyo wanyi ne mioyo ya bantu aba, bena mudimu bebe, makumi atanu ikale ya mushinga mukole ku mêsu kuebe. Mona, kapia kakafuma mu diulu diambedi kakosha tupitene tubidi ne bantu batu makumi atanu makumi atanu; kadi witabuje bua muoyo wanyi wikale wa mushinga mukole ku mêsu kuebe.’ Muprofete wa Nzambi uvuaku mua kulomba bua kapia kuosha muntu eu uvua muakule ne kanemu ne buôwa anyi? Tòo. Kadi, muanjelu wa Yehowa wakambila Eliya bua kuya ne kapitene eu. (2 Bak. 1:11-15) Tshilejilu etshi katshienaku tshileja mudi kunemeka bakuabu ne mushinga anyi?

Pavuabu baye ne mupostolo Paulo mu buloko ku ntempelo kudi basalayi ba bena Lomo, kavua mumone ne: uvua ne bukenji bua kuakula to. Wakalomba mulami wa buloko ne bukalanga buonso wamba ne: “Ndiku mua kukuambila bualu anyi?” Bakamuanyishila bua kudibingisha.​—Bien. 21:37-40, MMM.

Pavuabu balumbuluisha Yezu, bantu bakamutapa mapi kuisu. Kadi wakabandamuna ne bukalanga wamba ne: “Bingikala muambe bualu bubi, ubuambe; bingikala muambe bimpe, udi unkumina tshinyi?” Muntu nansha umue kavua mua kuangula kalema mu mêyi a Yezu to.​—Yone 18:22, 23.

Mukanda wa Nzambi udi pawu ufila bilejilu bia mutudi mua kuandamuna padibu batunyoka ne mutudi mua kuitaba ne kanemu bimue bilema bituvua benze. (Gen. 41:9-13; Bien. 8:20-24) Tshilejilu, Abigayila wakalomba Davidi luse bua bupote buvua bayende Nabala muenzele Davidi. Pa kumusha luse luvuaye mumulombe, wakamupesha biakudia bia bungi. Davidi wakasanka bikole bua tshivua Abigayila muenze, ne wakamusela pakafua bayende Nabala.​—1 Sam. 25:23-41.

Longesha bana bebe bua bikale ne kanemu mu nsombelu yonso anyi bua bikale ne bukalanga. Tuetu bikale ne bukalanga, ‘munya wetu neuteme ku mêsu kua bantu, ne nebatumbishe Tatu wetu udi mu diulu.’​—Mat. 5:16.

[Mêyi adi kuinshi]