Dizishenu Anyanenu Kulonda Ekali Nakalemesha

A LUNDA ahoshaña nawu: “Kusubula itepa kumutu hakwimusha, kwamwekeshaña kalemesha.” Muyisemwa yayivulu, neyi iyala yasubula itepa kumutu hakwiñila mwitala damuntu hela hakwimusha mukwawu amumonaña nawu wudi nakalemesha. Dichi, mazu itunashimuni hewulu atalisha mukwila nawu antu amwekeshaña luwi nikwikala chachiwahi kudi antu akweti yililu yayiwahi.

Atwansi neyi amwekeshaña yililu yayiwahi chatuzañaleshaña chikupu. Nkoñi wañinza mwituña daHondura wazatilaña hamu nawakwakushimwina atwansi niakulumpi mumudimu wakushimwina kwiitala nikwitala wahosheli nindi: “Enimatala atiyililaña nankashi kudi anyana akalemesha kubadika munahoshaña ami.”

Muyinu mpinji, yinasweji antu kasawuntu, kulemesha antu hinjila yayiwahi nawa mwafumaña yuma yayiwahi. Sweje-e dinu, Nsona jatukonkomwenaña nawu ‘tushakami mwatelela nsañu yaKristu yayiwahi.’ (Fwi. 1:27; 2 Tim. 3:1-5) Dichi twatela kudizisha anyanetu kulonda alemesheña antu amakwawu. Tunateli kuyidizisha ñahi kulonda ekaleña nakalemesha kakeni bayi kahamesu hohuku? *

Anyana Adizilaña Maana Amawahi Kudi Akwawu

Anyana adizilaña kuyuma yamonañawu kudi akwawu. Dichi njila yayiwahi yadizishilañamu anvwali anyanawu kwikala nayililu yayiwahi yidi yakuyimikila chakutalilahu chachiwahi. (Kuhit. 6:6, 7) Kuhanjeka nawanyanenu hayililu yayiwahi kwalema, ilaña bayi mukumina hohenahaku. Kubombela hakuyanukishaña, kuyimikila chakutalilahu chachiwahi kwalema nankashi.

Talenu chakutalilahu chaPaula, * wakulishililuwu muchisaka chawakwaKristu kudi nvwali mujiki. Wakulili nayililu yakulemesha antu ejima. Muloñadi? Wakwili nindi, “Amama atwimikilili chakutalilahu chachiwahi, dichi etu anyana chadiña nakutupelela kulemesha antu.” MukwaKristu wejina daWalter wadizishili anyanindi awamayala kulemesha mama yawu wabula kwitiya. Walter wahosheli nindi, “Nafwilileña kudizisha anyanami amulemesheña mama yawu kuhitila mukuyimikila chakutalilahu, iñodami hinamuhosheleña mazu akasawuntuku.” Walter watwalekeluhu kudizisha anyanindi Izu daNzambi, nawa walombeleña nindi Yehova yamukwashi. Mwanindi wumu wazatilaña hakasanji kamutayi kawaYinsahu  jaYehova, mukwawu niyena hipayiniya. Anyanindi awamayala akeña anvwali jawu nawa ayilemeshaña.

Bayibolu yahosha nawu: “Nzambi hiNzambi wakuluwañeshaku, hiNzambi wakuwunda.” (1 Kor. 14:33) Yuma yejima yakoñañayi Yehova yaloña. AkwaKristu atela embujoleña iyi yililu yaNzambi nikwikala awunyonji mumatalawu. Anvwali amakwawu adizisha anyanawu kwala tudidi twawu ifuku niifuku henohu kanda ayi kushikola, kutula yakuvwala yawu chachiwahi, nikuzata nyidimu yahetala. Neyi anyana amonaña nawu yuma mwitala ayitulaña chachiwahi nawa mwitala mwejima mwawunyoji, niwena anateli kuwahishaña mutupeka twawu nikuhemba yuma yawu chachiwahi.

Anyanenu amonaña ñahi yuma yadizañawu kushikola? Komana ahamekaña yuma yayidizishañawu kudi antañishi jawu? Anvwali, komana ninenu mwahamekaña? Anyanenu akumwekeshaña yililu yoyimu neyi yimwamwekeshaña enu anvwali hanyidimu yakushikola nikuhameka antañishi jawu. Komana kwila muyikolesha ekaleña nachaaku chakuhameka antañishi jawu nehi? Kuhameka hanyidimu yazatañawu hinjila yayiwahi yakumwekeshelamu kalemesha, kudi ntañishi, ndotolu, mukwakulandisha musitolu, hela kudi antu amakwawu. (Luka 17:15, 16) Tunakuhameka akwaKristu atwansi amwekeshaña yililu yayiwahi kubadika akwawu akashikola hamuloña wakalemesha niyililu yayiwahi.

Antu amuchipompelu chawakwaKristu atela kwimika chakutalilahu chakumwekesha yililu yayiwahi. Chatuzañaleshaña neyi tumona atwansi amuchipompelu anakumwekesha yililu yayiwahi nakuhoshaña mazu amawahi adi neyi “mwani” hela “kusakililaku mwani”! Neyi akulumpi akumwekeshaña kalemesha kudi Yehova kuhitila mukutiyilila nshimbi yatulejañawu hakupompa, atwansi niwena akufwilaña kuyimbujola. Anyana anateli kulemesha antuñinawu neyi amonaña yililu yayiwahi yamwekeshañawu amana kwetu Hetala daWanta. Chakutalilahu, Andrew wudi nayaaka yiwaana weluka dehi kuhosha nindi, “Sesa mwani,” neyi nakuhita hadi akulumpi.

Yumanyi yikwawu yatela kwilawu anvwali hakukwasha anyanawu adizi chakwikala nayililu yayiwahi? Anvwali atela kuwana mpinji yakudizisha anyanawu yuma yadizilañawu kuyakutalilahu yasonekawu Mwizu daNzambi.—Rom. 15:4.

Zatishenu Yakutalilahu yamuBayibolu Hakuyidizisha

Mama yaSamweli wamudizishili mwanindi kumufukamina Kapristu Muneni Eli. Hampinji yamutwaliliyi Samweli kutabanaka, hadaha wadiña nayaaka yisatu hela yiwaana. (1 Sam. 1:28) Komana kwila mudizisha anyanenu anyanya mazu imwazatishaña hakwimusha adi neyi “munahinduki ñahi mwani,” “mudi ñahi mwani namwanowu,” “melela mwani,” hela mazu amakwawu imwazatishaña hakwimusha nehi? Anyanenu anateli ‘kuyitiya kuwaha nikudi Yehova nikudi antu,’ neyi chamukeñeluwu Samweli hadiñayi kansi.—1 Sam. 2:26.

Komana kwila muzatisha nsañu yamuBayibolu hakuyilumbulwila chaambu chekala hakwikala nakalemesha nikubula kalemesha  nehi? Chakutalilahu, hampinji yakeñeleñayi Mwanta Ahaziya wabulili kashinshi wamuIsarela kudimona nakaprofwetu Elija, watemesheli “mukulumpi wawantu makumi atanu, hamu nawantu indi makumi atanu,” kulonda amutambiki. Mukulumpi wawu wamulejeli kaprofwetu nindi yamulondeli. Iyi hiyadiña njila yayiwahi yakuhoshelamu nantemesha yaNzambuku. Indi Elija wakwili nindidi? Wahosheli nindi, “Neyi nimuntu waNzambi, kesi kaholoki mwiwulu, kakunoñeshi nineyi niantu eyi makumi atanu.” Nawa mwalala chamwekeni. “Kesi hikakuholoka mwiwulu, hikakumunoñesha niyena niantu indi makumi atanu.”—2 Anya. 1:9, 10.

Kuhiñahu mukulumpi wawantu makumi atanu amulejeli nawu yayi nakumusenda Elija. Niyena wesekeli kumukanjikija Elija nindi ayi hamu. Cheñi nawa, kesi kaholokeli mwiwulu. Nkumininaku, mukulumpi wamuchisatu wawantu makumi atanu wayili kudi Elija. Iwu mukulumpi wamulemesheli. Chatela yamuleji Elija nindi tuyi, wafukamini hamaseki nakumulembelela nindi: “Eyi muntu waNzambi, mwani wumi wami niwumi wawambuñeyi, awa makumi atanu, wulemi kumesu eyi. Kesi kaholoka mwiwulu kanoñesha akulumpi akusambila ayedi awantu makumi atanu, nawantu awu makumi atanu; ichi dinu wumi wami wulemi kumesu eyi.” Komana kaprofwetu waNzambi wateleleli kulomba nindi kesi kaholokeli hadi muntu wamutiyili woma nawa wahosheli nakalemesha? Chumichi hichadi kuwahaku! Ilaña, kañelu kaYehova wamulejeli Elija kuya naniwu mukulumpi. (2 Anya. 1:11-15) Komana chumichi hichinakumwekesha nawu twatela kwikala nakalemeshaku?

Chamukasiliwu kapostolu Pawulu mukaleya hatembeli kudi amashidika awaRoma, hatoñojokeli nindi wadiña nawuswa wakuhoshaku. Wamwihwili mukulumpi wawamashidika nakalemesha nindi: “Wukuñiteja nikuleji chuma chimu?” Eñañi, Pawulu amwinkeli ñovu yakuhosha kulonda yadamwini yomweni.—Yil. 21:37-40.

Hampinji yamusompesheleñawu, Yesu amweteli mbañala hamesu. Hela chochu, welukili njila yayiwahi yakudamwina wahosheli nindi: “Neyi nahoshi chatama, shimunaku chinatamishi, ilaña neyi chachiwahi wunañetelidi?” Kwosi wamweni hakumwinkela Yesu muloña nachahosheliyuku.—Yow. 18:22, 23.

Izu daNzambi datulejaña cheñi chitwatela kwakula neyi anakutufumba nichakwiteja nakalemesha yiluwa yitwakoñeli kunyima hela yitwakoñeli hamuloña wakubula kashinshi. (Kutach. 41:9-13; Yil. 8:20-24) Chakutalilahu, Abigayili walombeli kwanakena hamuloña wawinyi wamwekesheliyi nfumwindi Nabali kudi Davidi. Kubombela hakudanakena, wamwinkeli cheñi Davidi yakudya yayivulu. Davidi wazañaleli nankashi hayuma yeliliyi Abigayili nawa chafwiliyi Nabali, wamusumbwili.—1 Sam. 25:23-41.

Dizishenu anyanenu kulonda ekali nakalemesha mpinji yejima hela neyi adi mukukala hela nehi. Neyi ‘chejeji chetu chikutoñekaña kumesu awantu,’ muniyi njila antu ‘akulemesha Tata yetu wamwiwulu.’—Mat. 5:16.

[Tumazu twaheshina]