Katakin Ajiri ro Nejõm bwe Ren Jelã Kautiej

J UÕN jabõnkennan in Majõl ej ba: “Joij eo mour eo.” Elañe jej kwalok joij ñan ro jet, renaj bareinwõt kwalok joij ñan kij. Einwõt an jabõnkennan in kwaloke, armij ro rej kwalok joij im kautiej ñan ro im rejelã manit.

Jej mõnõnõ elañe jodrikdrik ro rejelã manit! Juõn brother eo ej lolok congregation ko ilo Honduras im ekkã an jerbal in kwalok nan jen em ñan em ibben aolep dri kwalok ro, ej ba, “Emwij aõ kile bwe juõn ajiri eo ejelã kautiej im ejelã manit elaplok an jelet armij ro jen ennan ko ij kwaloki.”

Elap an aurõk ñan jelã kwalok kautiej, kinke ejjab aolep armij ilo ran kein rej kõmmane men in. Baibel eo ej rejañ kij bwe jen ‘etetal ekkar ñan gospel an Kraist.’ (Pil. 1:27; 2 Tim. 3:1-5) Elukkun aurõk bwe jen katakin ro nejid bwe ren jelã kautieje ro jet. Ewi wãwen jemaroñ katakin ir bwe ren kwalok kautiej ilo mol im jab ilo kelmarok? *

Kwalok Juõn Joñok Emmõn

Ajiri ro rej rittolok kin ta ko rej loi. Eñin unin eaurõk bwe ro jemen im jinen ren likit juõn joñok emmõn ilo air kwalok kautiej. (Dut. 6:6, 7) Eaurõk ñan kemeleleik ajiri eo nejõm bwe ej aikwij kwalok joij, bõtab ejabwe ñan kennan wõt. Ilo am kennan ñan e kwoj aikwij bareinwõt kwaloke ilo kõmman ko am.

Jen lale men eo ear walok ñan Paula, * juõn eo im ear drik im rittolok ibben jinen. Aolep ien ej kwalok kautiej ñan ro jet. Etke? Ej ba, “Mama ear likit juõn joñok emmõn ñan kim ro nejin, eñin unin ear bidrodro am kwalok kautiej ñan ro jet.” Juõn Kristian etan Walter ear katakin ladrik ro nejin ñan kautiej jineir, eo ear jab bed ilo mol eo. Ej ba, “Iar likit juõn joñok ñan ladrik ro nejũ bwe ren kwalok kautiej ñan jineir ilo aõ konono wõt ilo joij im jab kwalok nan ko reddo ñan e.” Walter ear wõnmanlok wõt im katakin ladrik rein nejin jen Baibel eo, im ear kajitõk bwe Jeova en jibañ e. Juõn ian ladrik rein ej kiõ jerbal ilo juõn ian ra ko an Dri Kennan ro an Jeova, im eo  juõn ej kiõ pioneer. Ladrik rein nejin rej yokwe im kautiej jineiro im jemeiro jimor.

Baibel eo ej ba: “Komin kõmmõn men otemjej ilo kon im ilo jimwe.” (1 Kor. 14:40, UBS) Aolep men ko Jeova ej kõmmani rekwon. Dri Kristian ro rej aikwij kate ir ñan kõmmane men in bareinwõt ilo air kakwonkwone iloan moko imweir. Jet ro jemen im jinen rar katakin ro nejier bwe ren limi men ko kineir, rarõ, ak kõmmane jerbal ko jet mokta jen air ilok im jikuul. Elañe ajiri ro rej loe bwe erreo iloan im inabijin mweo, men in enaj kõmman bwe ren mõnõnõ in jibañ im karreo.

Ewi wãwen an ajiri ro nejõm watõki men ko rej katak ilo jikuul? Rej ke kwalok air kamolol kin men ko dri kaki ro air rej katakin ir kaki? Einwõt juõn jemen ak jinen, kwoj ke kwalok am kamolol dri kaki rein? Elañe kwoj kaurõk katak ko air im kwalok am kamolol ñan dri kaki ro, ajiri ro nejõm renaj kõnan kõmmane men in bareinwõt. Etke kwojjab rejañ ajiri ro nejõm bwe ren kamolole dri kaki ro air? Ad kwalok kamolol ñan dri kaki ro, taktõ ro, ro ewor air mõn wia ak ñan jabrewõt armij, ej juõn wãwen jej kwalok ad kautiej kin jerbal ko rej kõmmani ñan jibañ kij. (Luk 17:15, 16) Elap ad nebar aolep dri Kristian jodrikdrik ro im rej oktak jen dri jikuul ro jet kin air jelã kwalok kautiej im jelã manit.

Ro uan congregation eo rej aikwij bareinwõt likit juõn joñok ilo air jelã manit. Elap an emmõn ñe jej lo an jodrikdrik ro ilo congregation ko kwalok joij ñan ro jet ilo air kajerbale nan kein “joij” im “kommol.” Elañe ro reritto rej kwalok air kautiej Jeova ilo air roñjake im kajerbal nan in kakabilek ko rej bõki ilo ien kwelok ko, men in enaj rejañ jodrikdrik ro ñan lor joñok kein air. Ajiri ro remaroñ bareinwõt katak ñan kwalok kautiej ñan ro dri turier ilo air lale an armij kwalok kautiej ñan dron ilo ien kwelok ko. Ñan wanjoñok, Andrew eo emen an yiõ, emwij an katak ñan jelã ba “jolok bwid” aolep ien ej etetal ijoko ritto ro rej bed ak jijõt ie.

Bar ta ko ro jemen im jinen rej aikwij kõmmani ñan jibañ ajiri ro nejier bwe ren jelã kwalok kautiej? Remaroñ im rej aikwij bõk ien ñan bwebwenato ibben ro nejier kin men ko remaroñ katak jen wanjoñok ko rej walok ilo Baibel eo.—Rom 15:4.

Kajerbal Wanjoñok ko jen Baibel Eo

Ejelok berre bwe jinen Samuel ear katakin ladrik eo nejin bwe en barikrik iman Eli, Pris eo Elap. Ilo tõrein, ear jilu ak emen wõt an Samuel yiõ ke jinen ear bõklok e ñan imõn kabbed eo an Jeova. (1 Sam. 1:28) Kwomaroñ ke kamelmel ibben ajiri ro nejõm bwe ren kajerbal nan in yokyokwe ko ak jabrewõt nan ko rekkar ñe rej iion armij ro? Ilo wãwen in, ajiri ro redrik nejõm remaroñ einwõt kar Samuel ilo an kar “jitenburu iben Jeova, im bareinwõt iben armij ro.”—1 Sam. 2:26.

 Etke kwojjab kajerbal bwebwenato ko ilo Baibel ñan kwalok oktak eo ikõtan kwalok kautiej im jab kwalok kautiej? Ñan wanjoñok, ke kiñ in Israel eo enana etan Ahaziah ear kõnan lo dri kanan Ilaija, ear jilkinlok juõn kapen in tõrinae im limñoul dri tõrinae ro. Kapen eo ear kajju ba ñan Ilaija bwe en wõnlaltak ñan ibben. Ear jab kwalok an kautieje dri kanan in an Anij. Ewi wãwen an kar Ilaija uak? Ear ba: ‘Elañe ña juõn armij õn Anij, kijeek en wõnlaltak jen lõñ im tile yuk im lõmaro limñoul drom.’ Im eñin men eo ear walok. ‘Kijeek e ar wõnlaltak jen lõñ im tile leo im limñoul ro dron.’—2 Kiñ 1:9, 10.

Elikin men in, kar bar jilkinlok juõn kapen im bar 50 dri tõrinae ro ibben. Ilo an jab kwalok kautiej, ear bar kajeoñ kõmman bwe Ilaija en ilok ibbenlok. Kijeek ar bar wõnlaltak jen lañ im kokkure ir. Tokelik, kar bar jilkinlok juõn kapen in tõrinae im 50 dri tõrinae ro. Eman in ear kwalok kautiej ilo an kar bukwelõlõ im ba: “O armij õn Anij, ij akwelap bwe aõ mour, im mour an rein limñoul ro dri kõrijerõm, ren aurõk iman mejõm. Lo, kijeek e ar wõnlõltok jen lõñ, im tile kapen ro ruo mokta, kapen in limñoul kab limñoul ro droir; a kiõ aõ mour en aurõk iman mejõm.” Dri kanan in an Anij enaj kar ke kajitõk bwe kijeek en wõnlaltak jen lañ im tile eman in me ear lelñoñ bõtab ear kwalok kautiej? Eban kar! Ijellokin men in, enjel eo an Jeova ear jiroñ Ilaija bwe en ilok ibben eman in. (2 Kiñ 1:11-15) Bwebwenato in ejjab ke kwalok kin aurõkin ad aikwij kwalok kautiej?

Ke dri tõrinae in Rom ro rar bõke dri jilik Paul jen tempel eo im kalbuji, ear jab mõkaj in lemnak bwe ewor an maroñ ñan konono. Ilo kautiej, ear kajitõk ibben kapen eo elap: “Imaroñ ke konono ñõn yuk?” Tokjen men in, kar kõtlok an Paul konono im jojomar e make.—Jerb. 21:37-40, UBS.

Ke rar jeptake Jisõs ilo ien eo rar ekajete, ear jelã kilen uake ir ilo ekkar. Ear ba: “Elañe ebwid aõ konono, kwon kwalok bwid eo ñõn armij rein. Ak elañe ejimwe men eo iar ba, etke kwoj ubrare iõ?” Ejelok rar maroñ uake Jisõs kinke ear jimwe wãwen an konono.—Jon 18:22, 23, UBS.

Baibel eo ej kwalok kin jet joñok ko jemaroñ lori kin wãwen jemaroñ emakõt elañe rej kajimwe kij, im bareinwõt wãwen jemaroñ kwalok bwid ko jaar kõmmani mokta. (Jen. 41:9-13; Jerb. 8:20-24) Ñan wanjoñok, Abigeil ear kajitõk ibben Devid bwe en jolok an leo belen bwid kin men eo enana ear kõmmane. Bõtab, ear jab baj kajitõk wõt bwe en jeorlok an bwid ak ear bar bõklok elõñ ekkan ko ñan Devid. Joñan an kar Devid mõnõnõ kin men eo Abigeil ear kõmmane, ear bõke bwe en belen elikin an kar Nebal mij.—1 Sam. 25:23-41.

Kwon katakin ajiri ro nejõm bwe ren kwalok kautiej aolep ien meñe ilo ien ko rebin ak jab. Ilo wãwen in ‘jenaj maram iman mejen armij im bõktok nebar ñan Jemer ilõñ.’—Matu 5:16.

[Footnotes]