Leri den pikin fu yu fu sori lespeki gi trawan

WAN odo e taki: „Wan bun taki e feni wan bun presi.” Na odo disi e wani taki dati te wan sma abi bun maniri, dan trawan o de klariklari fu sori switifasi gi en.

A e gi prisiri trutru te yonguwan abi bun maniri! Wan kring-opziener na ini Honduras di e wroko oso fu oso makandra nanga difrenti preikiman, e taki: „Nofo tron mi si taki te wan pikin kisi bun kweki èn te a abi bun maniri, dan dati abi moro krakti na tapu den ososma, leki den sani di mi e taki.”

Na ini a ten disi pe moro nanga moro sma no e sori lespeki, a bun fu sabi fa fu handri nanga trawan fu di dati e tyari wini kon gi wi. San moro prenspari, na taki Bijbel e gi wi a rai fu ’tyari wisrefi na wan fasi di fiti a bun nyunsu fu Krestes’ (Fil. 1:27; 2 Tim. 3:1-5). A de tumusi prenspari taki wi e leri den pikin fu wi fu sori lespeki gi trawan. Fa wi kan leri den pikin fu wi fu no du nomo leki den abi bun maniri, ma fu lespeki trawan trutru? *

Leri den bun maniri fu di yu e gi den wan bun eksempre

Pikin e teki leri fu na eksempre di trawan e gi. Sobun, wan prenspari fasi fa papa nanga mama kan leri den pikin fu den bun maniri, na taki densrefi musu de wan bun eksempre gi den pikin (Deut. 6:6, 7). A de prenspari fu fruteri den pikin fu yu fu sori lespeki gi trawan, ma dati wawan no sari. A de fanowdu tu, taki yu e gi den wan bun eksempre.

Luku na eksempre fu Paula, * di kweki na ini wan Kresten osofamiri pe en mama wawan ben e sorgu gi den pikin. Paula kon abi a gwenti fu sori lespeki gi ala sma. Fa dati du kon? A e piki: „Mi mama gi wi wan bun eksempre. Na so wi leki den pikin fu en, kon kisi a gwenti fu sori lespeki gi trawan.” Wan Kresten di nen Walter leri den manpikin fu en fu abi lespeki gi a mama fu den di no de na bribi. Walter e taki: „Fu di mi ben wani leri den boi fu mi fu sori lespeki gi a mama fu den, meki misrefi pruberi fu gi den wan bun eksempre. Noiti mi ben e taki takru fu mi wefi.” Walter tan gi den manpikin fu en leri komoto fu Gado Wortu, èn a ben begi Yehovah fu yepi en. Now, wan fu den manpikin fu en e dini na wan fu den bijkantoro fu Yehovah Kotoigi, èn  a trawan na wan pionier. Den manpikin fu en e sori lobi nanga lespeki gi a papa nanga a mama fu den.

Bijbel e taki: „Gado a no wan Gado fu bruya, ma fu vrede” (1 Kor. 14:33). Ala ten Yehovah e du sani na wan orga fasi. Kresten musu pruberi fu sori a srefi fasi disi fu Gado, èn dati meki den musu hori den oso krin. Son papa nanga mama leri den pikin fu den fu meki den bedi ibri dei bifo den e go na skoro. Boiti dati, den leri den pikin fu den fu poti den krosi na a yoisti presi, èn fu yepi nanga a wroko di de fu du na oso. Te pikin e si taki tra presi fu na oso krin èn seti bun, dan dati kan yepi den fu hori den eigi kamra krin, èn sosrefi den tra sani di den abi.

Fa den pikin fu yu e denki fu den sani di den e leri na skoro? Den e sori warderi gi den sani di den skoromisi nanga skoromeester e du gi den? Leki papa noso mama, yu e sori warderi gi den sani dati? Te yu e du dati, dan nofo tron den pikin fu yu o kon abi warderi tu gi a skorowroko fu den èn gi den sma di e gi den leri na skoro. Fu san ede yu no e leri den pikin fu yu fu kon abi a gwenti fu taki den skoromeester nanga den skoromisi tangi? Wan heri moi fasi fa wi kan sori lespeki gi wan sma, na fu sori warderi gi a sani di a sma dati du gi wi, awinsi a sma dati e gi wi leri na skoro, awinsi a de wan datra, wan wenkriman, noso iniwan tra sma (Luk. 17:15, 16). Yongu Kresten di e sori lespeki gi trawan èn di abi bun maniri, de heri tra fasi leki den tra yonguwan na skoro. Fu dati ede den yongu Kresten disi de fu prèise trutru.

Memre fu a Kresten gemeente musu de wan bun eksempre te a abi fu du nanga bun maniri. Fu tru, a de wan prisiri sani fu si fa yonguwan na ini a gemeente e sori lespeki gi trawan te den e taki „grantangi” te dati de fanowdu. Te bigisma e sori lespeki gi Yehovah fu di den e poti ala den prakseri na den rai di den e kisi na den konmakandra, dan yonguwan o wani teki na eksempre fu den. Te pikin e si taki trawan na ini a Kownukondre zaal abi bun maniri, dan dati kan leri den fu sori lespeki gi tra sma. Fu eksempre, Andrew di abi fo yari, leri kaba fa fu sori lespeki te a musu waka pasa na mindri bigisma.

Sortu tra sani papa nanga mama kan du fu leri den pikin fu den bun maniri? Papa nanga mama kan teki ten fu sori den pikin san den kan leri fu den someni sma di kari na ini Gado Wortu èn di de wan bun eksempre. Fu taki en leti, papa nanga mama musu du dati.​—Rom. 15:4.

Gi den leri nanga yepi fu Bijbel eksempre

A no de fu taki dati Samuel en mama leri a boi fu en fu boigi gi Granpriester Eli. Di a tyari Samuel go na a tabernakel, dan a kan taki a boi ben abi sowan dri noso fo yari nomo (1 Sam. 1:28). Kande yu kan oefen nanga a yongu pikin fu yu fu taki sani soleki „kumorgu”, nanga „kuneti”, noso kande yu kan leri en iniwan tra bun gwenti di fiti na ini a kontren pe yu e tan. Neleki fa a ben de nanga yongu Samuel, na so ’Yehovah nanga tra sma sa kon lobi den pikin fu yu moro nanga moro’.​—1 Sam. 2:26.

 Fu san ede yu no e gebroiki tori na ini Bijbel fu yepi yu pikin fu si san a wani taki te wan sma no e sori lespeki, èn san a wani taki fu sori lespeki? Fu eksempre, di a trangayesi Kownu Ahasia fu Israel ben wani si a profeiti Elia, dan a seni ’wan legre-edeman fu feifitenti srudati makandra nanga den feifitenti srudati fu en’ go na a profeiti. A legre-edeman komanderi a profeiti fu kon nanga en. Dati no ben de wan yoisti fasi fu taki nanga wan man di ben e teki presi gi Gado. San Elia piki en? A taki: „Efu mi na wan man fu Gado, dan faya musu komoto fu hemel, èn bron yu nanga den feifitenti srudati fu yu.” Èn na dati pasa trutru. „Faya komoto fu hemel èn a bron a legre-edeman nanga den feifitenti srudati fu en.”​—2 Kow. 1:9, 10.

A kownu seni ete wan legre-edeman fu 50 srudati, go na Elia. A legre-edeman disi ben wani komanderi Elia tu fu kon nanga en. Agen, faya komoto fu hemel, èn a bron den. Ma baka dati, a di fu dri legre-edeman fu 50 srudati kon na Elia. A man disi sori lespeki gi en. A no komanderi Elia fu kon nanga en, ma na presi fu dati, a saka kindi boigi gi Elia, èn a begi en: „Man fu a tru Gado, mi e begi yu, no kiri mi nanga den feifitenti man di de nanga mi, bika den na futuboi fu yu. Faya ben komoto fu hemel èn a bron den tra legre-edeman nanga den feifitenti srudati fu den. Ma mi e begi yu fu no kiri mi.” A profeiti fu Gado ben o meki faya bron wan sma di ben e taki na wan lespeki fasi, aladi a ben e frede? A profeiti noiti ben o du dati! Na presi fu dati, na engel fu Yehovah taigi Elia taki a ben musu go nanga a legre-edeman (2 Kow. 1:11-15). A tori disi e sori o prenspari a de fu sori lespeki, a no so?

Di den srudati fu Rome ben grabu na apostel Paulus hori na ini a tempel, dan a no ben e du neleki a ben abi a reti fu taki wan sani. Na wan lespeki fasi Paulus aksi a komandanti di ben e teki fesi: „Mi kan taigi yu wan sani?” Fu di Paulus ben sori lespeki, meki a kisi na okasi fu opo taki gi ensrefi.​—Tori. 21:37-40.

Di sma ben tyari Yesus go na krutu, dan den naki en na ini en fesi. Ma Yesus ben sabi san ben de a yoisti fasi fu taki gi ensrefi. A aksi den: „Efu mi no taki bun, dan sori mi sortu ogri mi du, ma efu mi taki bun, dan fu san ede yu e naki mi?” Nowan sma ben kan feni wan fowtu na ini a fasi fa Yesus ben e taki.—Yoh. 18:22, 23.

Na ini Gado Wortu wi kan leisi fu eksempre di e sori wi fa wi kan handri te wi e kisi piri-ai, fa wi kan taki krin èn na wan lespeki fasi taki wi du wan sondu trutru, noso taki wi no du wan sani di wi ben musu du (Gen. 41:9-13; Tori. 8:20-24). Fu eksempre, Abigail ben aksi pardon fu a takru fasi fa en masra Nabal ben e handri nanga David. Boiti taki a aksi pardon, a gi David bun furu nyanyan sani. A sani di Abigail du ben naki David ati so te, taki baka di Nabal dede, a teki en leki en wefi.​—1 Sam. 25:23-41.

Leri den pikin fu yu fu sori lespeki gi trawan, awinsi den de na ini muilek situwâsi, noso awinsi na fu di a fiti taki den e sori bun maniri. Te wi e ’meki sma si a leti fu wi’ na a fasi disi, dan ’den kan gi glori na wi Tata di de na hemel’.​—Mat. 5:16.

[Futuwortu]