Tese Ônov Ou u Nan Mbagenev Icivir

INJAKWAGH igen ken zwa Jamani kaa ér: “Ka wea kôr idyer sha uwe u za u nyôr hanma ijiir cii.” Sha ajiir agen yô, yange or a bugh idyer sha ityou shighe u nan ze hen ya u orgen shin nan lu sughun ior yô, nan zua a icivir sha ieren i nan i eren kwagh a mbagenev sha icivir la. Sha nahan yô, kwagh u injakwagh i i ter sha heen ne i lu ôron yô ér, mba ve eren kwagh sha icivir yô, ior mba hembe soon u eren kwagh a ve kundu kundu shi mba hembe lumun ve kpaa.

Nenge er agumaior ka a naan ior icivir ve i doo sha wono! Ortamen u sôron atôônanongo ugen ken tar u Honduras, u a duen kwaghpasen u sha uya uya vea mbapasenkwagh mba kaven ishigh man mbayev yô kaa ér, “Ashighe kpishi wanye u i tese nan tsembelee shi nan ne ior icivir ka nana lam a orya yô, kwaghôron u nan la hemba kôron orya ken ishima a kwaghôron wam.”

Sha ayange a ior kpishi ve ne mbagenev icivir ga ne, aluer se fa er se eren kwagh a mbagenev yô, a wase se kpishi shi se zua a mtsera kpaa. Heela tseegh ga, Ruamabera wa se kwagh ér “mlu wase a̱ kuma sha Loho u Dedoo u Kristu” la. (Fil. 1:27; 2 Tim. 3:1-5) Gba hange hange u se tese ônov asev u nan mbagenev icivir. Se er nan ve se tese ve u nan ior icivir sha iyol tseegh ga, kpa vea naan ior icivir sha mimi?

Mbayev Ka Ve Hen u Nan Or Icivir Zum u Ve Nenge Ikyav ken Mbagenev Yô

Mbayev ka ve hen kwagh sha u dondon kwagh u ve nengen i eren la. Nahan, gba hange hange u mbamaren ayol a ve vea hii lun mba nan ior icivir ve mbayev vev vea lu a ieren i nan or icivir ye. (Dut. 6:6, 7) Ka hange hange u ú lamen a wan wou sha kwagh u ieren i civirigh, kpa u lamen a nan sha kwagh ne tseegh la kuma ga. Gba keng u ú wa nan kwagh shi u tese nan ikyav kpaa!

Nenge ase kwagh u Paula, * u yange vese hen ya u Orkristu sha ikyev i ormaren môm la. Ieren i nan or icivir la yange i hingir ikye na. Sha ci u nyi? A kaa ér, “Ka kwagh u mama a eren yô, nahan se ônov nav cii hingir ikye yase u nan ior icivir.” Orkristu ugen u i yer un ér Walter yô tese ônov nav mba nomso u nan ngô ve u a ne jighjigh ga la icivir. A kaa ér: “Yange m nôngo mer me tese ônov av u nan ngô ve icivir sha ieren yam, yange m ôron kwagh u dang sha kwase wam ga.” Walter za hemen  u wan mbayev nav kwagh ken Mkaanem ma Aôndo, shi sônon Yehova iwasen ken msen. Wan na u môm ngu eren tom shin afishi a branci a Mbashiada mba Yehova, ugen di ngu pania. Ônov nav soo un kua kwase na shi mba ne ve uhar cii icivir.

Bibilo kaa ér: “Aôndo ka u nzughul nzughul ga, kpa ka u bem.” (1 Kor. 14:33) Yehova eren akaa a na cii sha inja vough vough. Gba u Mbakristu vea nôngo kpoghuloo vea dondo ieren i Aôndo i dedoo ne, nahan vea sôr akaa a ve lu a mi hen ya cii vea ver a sha inja vough vough. Mbamaren mbagenev tese ônov vev u sôron ugambe vev hanma sev cii yemen makeranta ye, shi ve tese ve u veren akondo a ve sha inja man u wasen ityom i eren hen ya. Aluer mbayev nenge i ver akaa hen ya sha injaa vough vough shi ya cii ngu wang yô, alaghga a hemba lun ve ican ga u sôron ayou a ve tse ker la shi veren akaa a ve tsembelee.

Mbayev ou mba nengen kwagh u ve henen ken makeranta ve la nena? Mba wuese kwagh u atica a ve a eren sha ci ve la kpa? Er u lu ormaren yô, u wuese kwagh u atica a eren sha ci u mbayev ou la kpa? Mbayev ou vea lu a mnenge wou sha makeranta u ve henen la shi ieren ve ia tese mnenge la hen atica a ve kpaa. Nahan yô, er nan u taver ve ishima wer ve sughun atica a ve hanma shighe ga? U̱ wuese or sha akaa a nan eren sha ci wou la ka gbenda u doon tsung u nan nan icivir, a lu ma tica shin ortwer shin orkasua shin antior kpaa. (Luka 17:15, 16) Agumaior a a lu Mbakristu, a a dugh kposo a mbayev mba ken imakeranta ve sha ci u icivir i ve ne ior la ve kuma u se wuese ve.

Gba u mba ve lu ken tiônnongo u Kristu cii vea ver ikyav i dedoo sha ieren ve. Nenge er agumaior a ken tiônnongo aa tesen icivir sha u kaan a or ér, “wea lumun yô” shin “m sugh u” ve a doo sha wono! Mbaganden ka vea na Yehova icivir sha u keghen ato ungwan kwaghwan ken mbamkombo yô, ishima i mgbegha mbayev u dondon ieren ve la. Mbayev vea hen u nan mbawanndor a ve icivir sha u nengen ikyav ken mbagenev, er ve ne mbagenev icivir hen Iyou i Tartor la. U tesen ikyav yô, wanye ugen u lun anyom 4, mba yer un ér Andrew, a fa er una kar ikyua a organden ve a lu sha icivir yô.

Kanyi igen kpa mbamaren vea er ve vea wase mbayev, vea hen u eren kwagh sha inja er i gbe u vea eren laa? Mbamaren vea fatyô u tôôn shighe tesen mbayev vev akaa a ve hen hen ior kpishi mba i er kwagh ve ken Mkaanem ma Aôndo la, shi ka kwagh u i gbe u mbamaren vea er je ne.—Rom. 15:4.

Tese Mbayev Ou Ikyav sha Ior mba i Er Kwagh Ve ken Bibilo La

A shi nan kpa ngô u Samuel yange vande tesen wan na u ngurum sha ishigh ki Pristi u Tamen, Eli. Shighe u ngô u Samuel yem a na ken tabernakel la, a shi nan kpa Samuel lu anyom atar tseegh. (1 Sam. 1:28) U fatyô u karen iyol vea wan wou u kiriki sha u a fa ma ishughun, er “u nder vee?” shin “u pande vee?” nahan, shin nyityô ishughun i í sughun ior hen ijiir i i lu her la kpa? Mbayev ou kpa, ‘Yehova kua ior kpaa vea lumun ve’ vough er yange i lumun Samuel shighe u lu wanye la nahan.—1 Sam. 2:26.

Er nan u pase aeren a ior mba i er kwagh ve ken Bibilo la sha u tesen mkposo u u eren  kwagh a or sha icivir man kwagh u a tese ilyahan ga? U tesen ikyav yô, zum u Tor Ahashia, u lu tor u eren kwagh sha mimi la soo u nengen a profeti Eliya yô, a tindi “orhementyav u a lu a ior akunduahargber sha ikyev yô, a ior nav mba akunduahargber mbara cii” ér ve za va a na. Orhementyav la za kaa a profeti ér a kaa vea yem hen tor. Lu gbenda u shami yange lam a or u Aôndo la ga. Eliya gema kaa a na ér nyi? A kaa ér: “Aluer mea lu or u Aôndo mimi yô, usu u̱ sen Sha u̱ va hia u kua ior ou mba akunduahargber mban cii.” Shi kwagh la er nahan vough. “Usu sen Sha hia un kua ior nav mba akunduahargber mbara” cii.—2 Utor 1:9, 10.

Shi tor tindi orhementyav ugen u lun a ior 50 sha ikyev, a ior nav cii ér a za va a Eliya. Un kpa nôngo ér una na Eliya wada a kaa vea yem hen tor. Ngun kpa usu sen sha hia un a ior nav cii. Tsô orhementyav ugen u lun a ior 50 sha ikyev, u sha utar za va hen Eliya a ior nav. Ngun gema er kwagh sha icivir. Yange na Eliya wada ga, kpa a gema a gure sha ishigh ki Eliya, a zamber a na ér: “Or u Aôndo, uma wam kua uma u mbayev ou akunduahargber mban, a̱ shi lu kwagh u injaa sha ashe ou. Nenge, usu sen Sha va hia mbahementyav mba uhar mba lun a ior akunduahargber akunduahargber sha ikyev, mba tsuaa la, a ior vev mba akunduahargber mbara; yô, uma wam a̱ shi lu kwagh u injaa sha ishigh yough.” Profeti u Aôndo una kaa ér usu u sen sha u hia or u alaghga lu a mciem iyol, kpa de lam sha icivir laa? Mayange ga cii! Ortyom u Yehova gema kaa a Eliya ér a za vea orhementyav la imôngo hen tor. (2 Utor 1:11-15) Kwagh la tese wanger wanger er i lu a inja u eren kwagh a or sha icivir ga he?

Zum u mbautyaav mba Mbaroma za kôr apostoli Paulu hen Tempel yem a na sha baaki ve yô, a gba fan tsô ér un ngu a ian i ôron kwagh ga. A kende a pine torutya u tamen u za a mbautyaav la ér: “U shi lumun mo, m̱ ôr kwagh a we kpa?” Kwagh la na yô, i na Paulu ian a lam, a pase ishô na.—Aer. 21:37-40.

Shighe u i lu ôron Yesu ijir la, i cir un sambe ken ishi. Nahan kpa, yange fa gbenda u una gba ijir sha kwagh shon ve a lu sha mi yô. A gema a kaa ér: “Aluer Mea ôr kwagh dang yô, ma u pase kwagh shon la; kpa a lu sha mi yô, ka nyi u tem samba?” Ma or fatyô u zuan Yesu a ibo i môm sha gbenda u yange lam la ga.—Yoh. 18:22, 23.

Mkaanem ma Aôndo ma a akav a tesen se er se er kwagh shighe u i kôôm se sha gbenda u taver tsung man er se lumun ibo sha icivir sha ma kwagh u se er shami ga shin se we ikyo sha mi ga yô. (Gen. 41:9-13; Aer. 8:20-24) Ikyav i tesen yô, Abigail yange zamber kpishi sha ci u ilyahan i nom na, Nabal laha Davidi la. Yange zamber a Davidi shi er un iyua sha kwaghyan kpishi kighir sha mi. Yange doo Davidi kpishi sha kwagh u Abigail er la, nahan Nabal kpen kera yô, a za kua a na va lu kwase na.—1 Sam. 25:23-41.

Aluer ka u nan or icivir shighe u i lu ican u eren nahan shin ka di u eren kwagh sha inja tsô kpa, tese ônov ou u nan ior icivir. U den ‘iwanger yase wanger sha ishigh ki iorough’ sha imba gbenda ne la ‘ve Ter wase u A lu Sha la a icivir.’—Mat. 5:16.

[Ngeren u shin kpe]