Gudisani Vhana Vhaṋu Uri Vha Vhe Na Ṱhonifho

MUṄWE murero wa Ludzheremani u amba uri musi muthu a tshi bvula muṅadzi u vha a tshi khou sumbedza ṱhonifho. Kha mvelele nnzhi, munna ane a bvula muṅadzi musi a tshi dzhena muḓini kana musi a tshi lumelisa, zwi dzhiiwa sa nyito yavhuḓi ine ya ita uri a ṱhonifhiwe. Nga zwenezwo, murero wa Ludzheremani we ha ambiwa ngawo afho nṱha u sumbedza uri vhathu vha takalela vhathu vha re na mikhwa yavhuḓi.

Zwi takadza lungafhani u vhona vhaswa vha tshi sumbedza u vha na mikhwa yavhuḓi! Muṅwe mulavhelesi wa ḽiisela we a tshimbila na vhahuweleli vha miṅwaha yo fhamba-fhambanaho mushumoni wa u huwelela nnḓu nga nnḓu ngei Honduras o ri: “Ndo ṱhogomela uri kanzhi ṅwana o gudiswaho zwavhuḓi na a ṱhonifhaho u kwama muṋe wa muḓi u fhira zwine nda zwi amba.”

Musalauno, samusi u ṱhonifha zwi songo tsha ḓowelea, u ḓivha nḓila ine ra fanela u fara ngayo vhaṅwe zwi nga shuma nahone zwi nga vhuyedza. Zwa ndeme u fhira zwenezwo ndi uri Maṅwalo a ri ṱuṱuwedza uri ri ‘dzudzane lwo fanelaho vha mafhungo-maḓifha a Kristo.’ (Vha-Fil. 1:27; 2 Tim. 3:1-5) Ndi zwa ndeme uri ri gudise vhana vhashu u ṱhonifha vhaṅwe. Vha nga gudiswa hani u vha na mikhwa na u ṱhonifha zwi tshi bva mbiluni. *

Vhetshelani Vhana Tsumbo Dzavhuḓi Dza Mikhwa.

Vhana vha nga guda nga u edzisa tsumbo dzine vha dzi vhona. Nga zwenezwo, nḓila ya ndeme ine vhabebi vha nga gudisa ngayo vhana mikhwa yavhuḓi ndi nga u vha na mikhwa yavhuḓi vhone vhaṋe. (Doit. 6:6, 7) U vhudza vhana vhaṋu uri vha fanela u vha na mikhwa ndi zwa ndeme, fhedzi u sokou amba nga hazwo a zwo ngo eḓana. Ndi zwa ndeme u vha vhudza na u vha vhetshela tsumbo yavhuḓi.

Ṱhogomelani tsumbo ya Paula, * we a aluswa muṱani wa mubebi a re eṱhe wa Mukriste. O vha a tshi ṱhonifha vhathu vhoṱhe. Ndi ngani? O ri: “Mme anga vho ri vhetshela tsumbo, nga zwenezwo, u ṱhonifha zwo vha zwi tshi tou vha nzulele kha riṋe vhana.” Muṅwe Mukriste ane a pfi Walter o gudisa vharwa vhawe u ṱhonifha mme avho ane a si vhe Ṱhanzi. O ri: “Ndo vhona uri u itela u funza vharwa vhanga uri vha ṱhonifhe mme avho nga u vha vhetshela tsumbo, a tho ngo fanela u sasaladza mufumakadzi wanga.” Walter u bvela phanḓa a tshi livhisa vharwa vhawe nga  Ipfi ḽa Mudzimu, nahone o vha a tshi rabela Yehova u itela u wana thuso. Muṅwe wa vharwa vhawe u shuma ofisini ya davhi ya Ṱhanzi dza Yehova, nahone muṅwe ndi muvulanḓila. Vharwa vhawe vha a funa na u ṱhonifha vhabebi vhavho.

Bivhili yo amba uri: “Mudzimu a si Mudzimu wa phusuphusu, tshawe ndi mulalo.” (1 Vha-Kor. 14:33) Zwithu zwoṱhe zwe Yehova a zwi ita zwo dzudzanyea. Vhakriste vha fanela u lwela u edzisa pfaneleo dza Mudzimu na u ita uri zwithu zwi dzule zwo dzudzanyea mahayani avho. Vhaṅwe vhabebi vho gudisa vhana vhavho uri vha adzulule mmbete vha sa athu ya tshikoloni, u vhea zwiambaro zwavho fhethu ho teaho, na uri vha thuse nga mishumo ya hayani. Arali vhana vha vhona uri fhethu hoṱhe hayani ho dzudzanyea nahone ho kuna, zwi nga ita uri na vhone vha dzudzanye kamara dzavho na u vhea zwithu fhethu ho teaho.

Vhana vhaṋu vha dzhia hani zwine vha zwi guda tshikoloni? Naa vha sumbedza u livhuha zwine vhadededzi vha vha itela zwone? Sa mubebi, naa ni a sumbedza uri ni a dzhiela nṱha vhadededzi? Vhana vhaṋu vha ḓo vha na mavhonele ane inwi na vha nao nga ha mushumo wa tshikolo na vhadededzi. Ndi ngani ni sa vha ṱuṱuwedzi uri vha zwi ite mukhuvha u livhuha vhadededzi vhavho? U livhuha zwithu zwine ra itelwa zwone ndi nḓila yavhuḓi vhukuma ya u sumbedza ṱhonifho hu sa londwi uri ndi kha vhadededzi, madokotela, vhoramavhengele kana muthu naho e ufhio. (Luka 17:15, 16) Vhaswa vha Vhakriste vhane vha vha tsumbo kha vhane vha dzhena navho tshikolo nga ṅwambo wa u vha na ṱhonifho na vhuḓifari havhuḓi, vha a khoḓiwa vhukuma.

Miraḓo ya tshivhidzo tsha Vhukriste i fanela u vhea tsumbo musi zwi tshi ḓa kha u vha na mikhwa. Ndi zwavhuḓi lungafhani u vhona vhaswa tshivhidzoni vha tshi sumbedza u vha na mafunda nga u amba maipfi ane ari “ndi khou humbela” na uri “ndi a livhuha”! Musi vhathu vhahulwane vha tshi sumbedza uri vha ṱhonifha Yehova nga u dzhiela nṱha vhulivhisi vhune ha ṋekedzwa miṱanganoni, vhaswa vha a ṱuṱuwedzea u vha edzisa. Vhana vha nga guda u ṱhonifha vhahura vhavho nga u vhona tsumbo dza mikhwa yavhuḓi Holoni ya Muvhuso. Sa tsumbo, Andrew a re na miṅwaha miṋa o no ḓi guda uri musi hu na vhathu vhahulwane vho imaho nahone ene a tshi khou ṱoḓa u fhira a thome a humbele uri vha mu sendelele uri a kone u fhira.

Ndi mini zwiṅwe zwine vhabebi vha nga zwi ita u itela u thusa vhana vhavho uri vha gude u ḓifara nga nḓila yo teaho ine vha lavhelelwa uri vha ḓifare ngayo? Vhabebi vha nga kona u fhedza tshifhinga na vhana vhavho vha tshi khou vha gudisa mafhungo manzhi ane a bva kha tsumbo dzi re Ipfini ḽa Mudzimu, nahone vha fanela u ita nga u ralo.—Vha-Roma 15:4.

Vha Funzeni Nga Tsumbo Dzi Re Bivhilini

Zwi vhonala u nga mme a Samuele vho mu gudisa uri a loshe Tshifhe Muhulu Eli musi a tshi mu vhona. Musi mme a Samuele vha tshi ṱuwa nae mbulungeloni ya mulanga, khamusi o vha e na miṅwaha miraru kana miṋa. (1 Sam. 1:28) Zwi nga vha zwavhuḓi uri na inwi ni gudise ṅwana waṋu zwithu zwi leluwaho zwi ngaho u lumelisa sa uri “ndi matsheloni,” “ndi masiari,” “ndi madekwana” kana dziṅwe nḓila dza u lumelisa dza fhethu hune na dzula hone. U fana na Samuele we a vha e muswa, vhana vhaṋu na vhone vha ḓo “funwa nga Mudzimu  na nga vhathu.”—1 Sam. 2:26.

Ndi ngani ni sa shumisi mafhungo a re Bivhilini u itela u sumbedza phambano i re hone vhukati ha u ṱhonifha na u sa ṱhonifha? Sa tsumbo, Khosi ya Isiraele Ahasia a sa fulufhedzei o vha a tshi ṱoḓa u vhona muporofita Elia, nahone a ruma “nduna na vhanna vha na mahumi maṱanu” uri vha ye u mu vhidza. Nduna yo amba nga nḓila ya lunyadzo musi i tshi vhudza muporofita uri a ṱuwe nayo. Yeneyo yo vha i si yone nḓila yo teaho ya u amba na muthu we a vha e muimeleli wa Mudzimu. Elia o fhindula a ri mini? O ri: “Arali ndi munna wa Mudzimu nangoho, hone nga hu ḓe mulilo u tshi bva ṱaḓulu, u U fhise na gomane yau.” Nahone ndi zwenezwo zwe zwa itea. “Ha mbo ḓa mulilo u bvaho ṱaḓulu, wa mu fhedza na gomane yawe.”—2 Dzikh. 1:9, 10.

Ho dovha ha rumelwa nduna na tshigwada tsha vhathu vha 50 uri vha ye u vhidza Elia. Na yone yo amba nga nḓila ya lunyadzo musi i tshi vhudza Elia uri a ṱuwe nayo. Na kha tshiitea tshenetsho, ho mbo ḓi ḓa mulilo u tshi bva ṱaḓulu. Fhedzi ho dovha ha ḓa nduna ya vhuraru na tshigwada tsha vhathu vha 50 kha Elia. Yeneyo nduna yo mbo ḓi sumbedza ṱhonifho. Nṱhani ha u sokou tou vhudza Elia uri a ṱuwe nayo, yo gwadama nga magona nahone ya humbela ya ri: “Hee iwe munna wa Mudzimu! U songo nyadza vhutshilo hanga na ha avha vhanna vha na mahumi maṱanu; ri vhalanda vhau. Dziḽa dzinduna mbili na dzigomane dzadzo dzo fhedzwa nga mulilo. Zwino U songo nyadza na hanga vhutshilo.” Naa muporofita wa Mudzimu o vha a tshi nga vhidza mulilo uri u ḓele munna onoyo we a sumbedza u vha na nyofho na we a amba nga ṱhonifho? Na khathihi! Nṱhani hazwo, muruṅwa wa Yehova o vhudza Elia uri a ṱuwe na nduna yeneyo. (2 Dzikh. 1:11-15) Mafhungo enea a sumbedza zwavhuḓi vhukuma uri u ṱhonifha ndi zwa ndeme.

Musi muapostola Paulo o valelwa ngei thembeleni nga maswole a Vharoma, ho ngo sokou humbula uri u na ndugelo ya u amba. O amba nga ṱhonifho na nduna yo mu faraho a ri: “Ndi humbela u amba na iwe.” Nga ṅwambo wa zwenezwo, Paulo o kona u ṋewa tshibuli tsha uri a ambe u itela uri a ḓiimelele.—Mish. 21:37-40.

Musi e tsengoni, Yesu o rwiwa nga mpama. Naho zwo ralo, o vha a tshi ḓivha nḓila yo teaho ye a vha a tshi fanela u ḓiambela ngayo. O ri: “Arali ndo fhindula nga fhungo ḽivhi, nthovhedze vhuvhi haḽo; arali ndo amba zwone, U nthwela’ni?” A hu na muthu we a vha a tshi nga vhona Yesu mulandu nga zwe a zwi amba.—Yoh. 18:22, 23.

Ipfi ḽa Mudzimu ḽi dovha ḽa ri ṋea tsumbo dza nḓila dzine ra nga fhindula ngadzo musi ri tshi ṋewa ndayo khulwane na nḓila ine ra nga ṱanganedza ndayo yeneyo nga ṱhonifho na u ṱhogomela vhukhakhi he ra vha ro vhu ita tshifhingani tsho fhiraho. (Gen. 41:9-13; Mish. 8:20-24) Sa tsumbo, Abigaili o humbelela Nabali munna wawe pfarelo nge a fara Davida nga nḓila ya tshiṱuhu. Nga nnḓa ha u humbela pfarelo, o dovha a ṋea Davida zwiḽiwa zwinzhi. Davida o takadzwa vhukuma nga zwe zwa itwa nga Abigaili, lwe a mu vhinga musi Nabali o no fa.—1 Sam. 25:23-41.

Gudisani vhana vhaṋu uri vha ṱhonifhe na u vha na mikhwa yavhuḓi hu sa londwi vhuimo he vha sedzana naho. ‘U ita uri tshedza tshashu tshi vhonetshele vhathu’ nga nḓila yeneyo ‘zwi rendisa khotsi-ashu wa ṱaḓulu.’—Mat. 5:16.

[Ṱhaluso dzi re magumoni a siaṱari]