Sulit an Paghihingoa!

KAIPUHAN an Pampamilyang Pagsamba asin pag-adal sa Biblia tanganing an mga aki mapadakula “sa disiplina asin pagtatanos nin isip gikan ki Jehova.” (Efe. 6:4) Pero, kun saro kang magurang, aram mong an mga aki madaling magsawa. Paano mo mapagdadanay an atension ninda? Isip-isipa an ginibo nin nagkapirang magurang.

“Kan sadit pa an mga aki,” an sabi ni George na taga California, E.U.A., “hinihingoa ming mag-agom na magin interesante pirme an pampamilyang pag-adal sa Biblia. Kun beses gabos kami nagbabado nin arog kan sa mga karakter sa Biblia asin iinaakto an sarong estorya mantang binabasa mi iyan sa My Book of Bible Stories. Naggigibo pa ngani kami nin mga gamit—mga espada, setro, basket, asin iba pa. May mga kawat man kami sa Biblia arog kan ‘tuodan mo kun siisay ako’ asin board game na may manlaenlaen na hapot, na an iba pasil asin an iba depisil. Dangan may mga proyekto kami arog kan paggibo nin sadit na representasyon kan arka ni Noe o paggibo nin time line kan mga pangyayari sa Biblia. Kun beses, ilinaladawan mi an mga karakter o estorya sa Biblia paagi sa drowing. Ngonyan, nagpaplano kaming idrowing an espirituwal na pangalasag na ilinaladawan sa Efeso 6:11-17, na an kada saro sa samo mapaliwanag kun ano an irinerepresentar nin sarong kabtang kaiyan. Nakatabang sa samo an mga paaging ini na ikaogma an samong pampamilyang pag-adal.”

Si Debi, na sarong ina na taga Michigan, E.U.A., nagsaysay: “Nasasakitan kaming mag-agom na kuanon an atension kan aki ming babae kan mga tres anyos sia. Dangan, sarong aldaw mantang binabasa ko nin makosog an estorya ni Isaac asin Rebeca sa My Book of Bible Stories, nagkua ako nin duwang munyika asin ginamit ko iyan tanganing iakto an posibleng pag-oolay kan duwa. Ngonyan, atentibo na sia sa kada sinasabi! Sa suminunod na mga bulan, an duwang munyikang idto nagin manlaenlaen na karakter sa Biblia. Pagkabasa mi nin sarong estorya, an aki mi minahanap sa harong nin mga kawatan o iba pang bagay na magagamit sa pag-akto kan estorya. Garo iyan kawat na paghanap nin kayamanan! An kahon nin sapatos asin an pulang laso nagin harong ni Rahab na may mapulahon na pisi. An 1.5 metros na stuffed toy na halas na ipinurupot sa tugod nin samod garo man sana an halas na tanso sa Bilang 21:4-9. Ilinaag mi an mga ini sa dakulang bag na tela. Ogmahon kami na an aki mi parateng minatukaw sa sala asin hinahalungkat an saiyang ‘bag nin mga estorya sa Biblia.’ Nakakagayagaya nanggad na maheling sia na iinaakto an mga estorya sa sadiri niang pamamaagi!”

An pagpadakula nin mga aki bakong madali, asin bako sanang serosemanang pag-adal an kaipuhan tanganing ikatadom sa sainda an pagmawot na maglingkod ki Jehova. Alagad an pampamilyang pagsamba asin pag-adal sa Biblia puedeng magin paagi para sa iba pang espirituwal na pagtotokdo. Daing duda, sulit an paghihingoa!