Vivẹnudido Ehe Ma Yin Ovọ́!

SINSẸ̀N-BIBASI WHẸNDO TỌN po Biblu pinplọn po yin dandan eyin ovi lẹ na yin pinplọn whẹ́n “to mẹplọnlọ po anademẹ Jehovah tọn po mẹ.” (Efe. 6:4) Ṣigba, mì mẹjitọ lẹ yọnẹn dọ onú nọ yawu ṣikọna ovi lẹ. Nawẹ mì sọgan dọ̀n ayidonugo yetọn gbọn? Mì gbọ mí ni pọ́n nuhe mẹjitọ delẹ ko wà.

George he nọ nọ̀ Californie, États-Unis, dọmọ: “To whenue ovi mítọn lẹ gbẹ́ pò to ovu, yẹn po asi ṣie po nọ tẹnpọn na oplọn whẹndo tọn mítọn ni yin awuvivinu. To whedelẹnu, mímẹpo nọ doaṣọ́ di mẹhe yin nùdego to Biblu mẹ lẹ bo nọ basi wadohia nuhe mí hia to Owe Ṣie heyin Otan Biblu Tọn mẹ de tọn. Mí tlẹ nọ basi nuyizan lẹ taidi—ohí, agbogọdọẹ, ohà, po mọmọ po. Mí sọ nọ daihun Biblu tọn he nọ yin, ‘dọ mẹhe n’yin’ podọ mí sọ wleawuna aihun Biblu tọn de he nọ bẹ kanbiọ voovo he delẹ bọawu bọ devo lẹ sinyẹn lẹ hẹn. Humọ, mí nọ ze yanwle pọmẹ tọn lẹ dai, taidi aki Noa tọn gbigbá kavi awuwiwlena todohukanji nujijọ he to Biblu mẹ lẹ tọn. To whedelẹnu, mí nọ yí ojlẹ lọ zan nado de yẹdide mẹhe yin nùdego to Biblu mẹ kavi otàn Biblu tọn lẹ tọn. To agọe, mí wazọ́n dopọ nado de yẹdide gbaja gbigbọ tọn he yin zẹẹmẹ basina to Efesunu lẹ 6:11-17 mẹ tọn, bọ mẹdopodopo nọ dọ nuhe adà etọn lẹ nọtena. Aliho nupinplọn tọn ehelẹ gọalọna mí nado nọ mọ awuvivi to oplọn whẹndo tọn mítọn mẹ.”

Debi, onọ̀ de he nọ nọ̀ Michigan, États-Unis, dọmọ: “E vẹawuna yẹn po asu ṣie po nado dọ̀n ayidonugo viyọnnu mítọn tọn to whenue e tindo nudi owhe atọ̀n. Ṣigba, gbèdopo he n’to otàn Isaki po Lebeka po tọn hia na ẹn sọn Owe Ṣie heyin Otan Biblu Tọn mẹ, n’yí bèbi awe zan nado basi wadohia otàn lọ tọn bo nọ dọ nuhe dopodopo yetọn sọgan ko dọ. E dotoai po sọwhiwhe po! To osun he bọdego lẹ mẹ, n’yí bèbi awe lọ lẹ zan nado basi wadohia otàn Biblu tọn voovo lẹ tọn. Eyin mí hia kandai de, viyọnnu mítọn nọ yì dín aihundanu kavi nudevo he sọgan yin yiyizan nado basi wadohia otàn lọ tọn. E nọ taidi mẹhe to adọkunnu de dín pé! Mí yí apotin afọpa tọn de po okàn vẹẹ de po do basi owhé Lahabi tọn po sekan vẹẹ ṣẹ́ṣẹ́ lọ po. Mí lilẹ́ odàn aihundida tọn de he dite sọ mẹtlu 1,5 do akiza de go nado basi odàn gànvẹẹ tọn he yin nùdego to Osọha lẹ 21:4-9 mẹ lọ. Mí bẹ aihundanu lọ lẹ do saki daho de mẹ. Homẹhunnu wẹ e nọ yin nado mọ viyọnnu mítọn sinai to abò mẹ bo to nulẹ dín to ‘saki otàn Biblu tọn’ etọn mẹ. Ayajẹnu wẹ e nọ yin nado mọ ẹn dile e to wadohia otàn lẹ tọn basi sọgbe hẹ nuyọnẹn etọn!”

E ma nọ bọawu nado plọn ovi lẹ whẹ́n, podọ e nọ biọ nususu hugan nupinplọn sẹmẹsẹmẹ tọn nado sọgan do ojlo Jehovah sinsẹ̀n tọn do ahun yetọn mẹ. Ṣigba, sinsẹ̀n-bibasi whẹndo tọn po Biblu pinplọn po sọgan gọalọ nado na yé anademẹ gbigbọmẹ tọn devo lẹ. Matin ayihaawe, vivẹnudido ehe ma yin ovọ́!